Suma luräwinakasajj kusisiyistuwa
1. Diosan arunakap yatiykasajj ¿kunas aynachtʼayistaspa?
1 Jaqenakajja, suma ‘luräwinak uñjasin kusistʼiri’ ukham luratätanwa (Ecl. 2:24). Ukampisa, Diosan arunakap yatiykas jan kuna askinak jikjjatasajja, awisajj aynachtʼsnawa ukat llakitarakiw jikjjatassna. Ukhamäspa ukhajj ¿kuns lursna?
2. Jaqenakajj jan istʼapkistani ukhajj ¿kunats jan mayjtʼasiñasäki?
2 Janiw taqenejj sum istʼapkistaniti. Jukʼanikis Jesusarojj istʼapkchïnjja, jupajj kuntï aka oraqen lurañapäkäna ukjja sumwa phoqhäna (Juan 17:4). Jesusajj phawirit parlkasinjja, Diosan Reinopat yatiyäwinakjja, janiw taqpach jaqenakajj sum katoqapkaniti sasaw arsuwayäna (Mat 13:3-8, 18-22). Ukampis chʼamachasiskakiñäni ukhajja, ¿kuna askinaksa jikjjatañäni?
3. Diosan arunakap yatiykasajj jan istʼapkchistu ukhasa, ¿kunjamsa walja ‘achunak’ achoqsna?
3 Kunjamats walj achoqapjjsna. Jesusan uñachtʼäwipanjja, suma yatiyäwinak katoqapki ukanakajj ‘suma achunakwa’ churani sasaw säna (Mat. 13:23). Amuyañataki: trigo alejj mistjje ukat poqorjjaraki ukhajja, janiw machaq alinak mistkiti, jan ukasti machaq jathanakaruw tukjje. Ukhamajja, kuna achtï mä cristianojj churki ukajja, janiw machaq arkirinak tukuyaña ukäkiti, jan ukasti jathanaka waljaptayañawa, mä arunjja, Diosan Reinopat kutin kutin parlañawa. Ukat jaqenakajj janis istʼapkchistu ukasa, kuna ‘askinaksa’ jikjjattan ukaw wal kusisiyistu. Jaqenakar yatiyasajja, Diosan sutip qʼomachasiñapatakiw yanaptʼtanjja (Isa. 43:10-12; Mat. 6:9). Diosan yanapiripäsajja wali kusisitätanwa (1 Cor. 3:9). Ukat ‘lakanakasampi yupaychasajja’ Jehová Diosaruw kusisiyaraktanjja (Heb. 13:15, 16).
4. ¿Kuna askinaksa Diosan arunakap yatiyasajj jikjjatasktanjja?
4 Cheqansa, janiw ukaratpachajj taqenis sum istʼapkistaniti uk janipun armapjjañäniti. Jesusar istʼapkäna ukanakatjja yaqhepanakajj janiw ukaratpach arkirinakap tukupkänti. Ukhamarakiw Reinon jathap jaqenakan chuymapar phawantktan ukajja, janiw jankʼaki chuymapar saphintasin jiltkaspati, jan ukasti qhepatwa Jehová Diosan qhanañchirip tukuskaspa uk jiwasajj janiw yatksnati. Diosan Reinop jaqenakar yatiyasajj walja askinakwa jikjjatasktanjja. Ukhamajj ‘walj achoqaskakiñäni’ mä arunjja, yatiyaskakiñäni ukat Jesusan arkiripätas uñachtʼayañäni (Juan 15:8).