Jaqenakar yatichañjja jan ajjsarapjjañäniti
1. ¿Kunatsa Bibliat yatichañ yaqhepanakajj ajjsarayasipjje?
1 ¿Bibliat janjakiw sum yatichkiristi sasint ajjsarayasta? Diosan nayra yupaychirinakapatjja, yaqhepanakajj ajjsarayasipjjarakïnwa, amtañäni: Moisesampi, Jeremiasampejj kuna luräwinaktï katoqapkäna ukatakejj janis wakichtʼatäpkaspa ukham amuyasipjjäna (Éxo. 3:10, 11; 4:10; Jer. 1:4-6). Cheqas awisajj ukham jikjjatasiraksnawa. Ukhamäni ukhajj ¿kuns lursna?
2. Nayajj utat utatakwa yatiyä ukat mayninakaw Bibliat yatichasipkani sasajj ¿kunatsa jan sañasäki?
2 Jehová Diosajj kuntï jan lurirjamäktan ukjja janiw maykistuti (Sal. 103:14). Ukhamajj “yatiyir sarapjjam” siskistu uka ewjjtʼarojja phoqsnawa (Mat. 28:19, 20). Jehová Diosajj uka luräwjja, janiw kawkïrinakatï wali yatjjattʼatäpki ukanakaruk confiykiti (1 Cor. 1:26, 27). Ukhamajj yaqha jilat kullakanakaw jaqenakar Bibliat yatichasipkani nayajj utat utatakwa yatiyä sasajj janiw amuyañasäkiti.
3. ¿Kunjamsa Jehová Diosajj jaqenakar Bibliat yatichañatakejj yanaptʼistu?
3 Jehová Diosaw yatichistu. Jehová Dios pachpaw jaqenakar yatichañatakejj yanaptʼistu (2 Cor. 3:5). Cheqansa akapachankir wali yatiñan jaqenakajj kuntï jan yatipki ukwa Jehová Diosajj markap toqejj yatiyistu (1 Cor. 2:7, 8). Ukat Jesusajj aka oraqenkkäna ukhajja, kunjamanakatsa jaqenakar yatichirïna ukwa Bibliajj qhanañcharaki. Ukat tantachäwinakansa ukhamarakiw suma ewjjtʼanak sapa kuti katoqaraktanjja. Ukampirusa, Bibliat apstʼat qellqatanakas utjarakistuwa, maynïrejj Kunsa yatichi sat librowa, ukanwa Biblian cheqa yatichäwinakapjja suma amuytʼkaya qhana arunakampi yatichistu. Ukhamajj Bibliat maynir yatichañajja janiw chʼamäkiti.
4. Jehová Diosaw yanaptʼitani sasajj ¿kunatsa sissna?
4 Jehová Diosan yanaptʼapampejja, Moisesampi Jeremiasampejj kuna luräwtï katoqapkäna ukjja phoqhapjjänwa (Éxo. 4:11, 12; Jer. 1:7, 8). Ukhamajj Jehová Diosar yanapapjja mayipuniñäni. Cheqansa Jupajj yanaptʼistaniwa, kunattejj cheqa yatichäwinakap jaqenakar yatichañasjja wal muni (1 Juan 3:22). Ukhamajj maynirukis Bibliat yatichañ qalltañatak chʼamachasipjjañäni. Uk lurasajj wal kusisiñäni ukat walja bendicionanakwa katoqarakiñäni.