Bibliat yatichañatakejj tiempo apstʼasiñasawa
1. ¿Kunatsa yaqhep jilat kullakanakajj Bibliat jan yatichapki?
1 Jan tiemponïsajja, yaqhep jilat kullakanakajj Bibliat yateqañ munirinakarojj janiw yatichäma sisjjapjjeti. Mä yateqerir sum yanaptʼañatakejja, tiempow munasi, kunattejj waktʼayasiñawa, yatichañawa ukat yantʼanakar atipjañapatakis yanaptʼañarakiwa. Tesalonikankir jilat kullakanakar cheqa yatichäwinak yatichañatakejj taqe chuymaw chʼamachasiwayta sasaw apóstol Pablojj säna (1 Tes. 2:7, 8). Jaqenakar Bibliat yatichañatakejj ¿kunjams tiemp apstʼassna?
2. Jehová Diosar munasitas uñachtʼayañatakejja, ¿kunjamsa tiempos sum apnaqsna?
2 Jehová Diosar serviñatakejj tiempow munasi. Jehová Diosar yupaychäwisanjja, walja lurañanakaw utjistu. Sapa semanaw tantachäwinakar sarañatakisa, yatiyañatakisa, Biblia liyiñatakisa ukat Diosar oración mayisiñatakis tiempo apstʼastanjja. Amuytʼañataki: mä casada warmejja, jan tiemponïkchi ukasa, taqe chuymaw munat chachapatakejj tiempo apstʼasi. Ukhamajja, Jehová Diosarojj niyakejjay wal munastanjja, taqe chuymaw Jupar serviñatakejj tiemp apstʼasiñasarakïspa (Efe. 5:15-17; 1 Juan 5:3). Jesusan aruparjamajja, yupaychäwisan mä wakiskir luräwejj jaqenakar jupan arkirip tukuyañawa (Mat. 28:19, 20). Ukhamajja, Bibliat yatichañatakejj uka toqet lupʼiñaw yanaptʼistani.
3. Jan tiempon uñjasiñäni ukhasa, ¿kunjamsa Bibliat yateqerinakarojj yatichsna?
3 Inas maynejj wali usuntatäsina, irnaqasina jan ukajj taman luräwinakap phoqhasin jan tiemponi jikjjataschi, ukhamächi ukhajja, ¿kuns luraspa? Usuntatäsinjja, yaqhepanakajj yateqerinakaparojj utaparuw jawstʼapjje. Yaqhep jilat kullakanakajja, kawkïr sarapchi ukhasa, telefon toqe jan ukajj computador toqew yatichapjje. Ukat yaqhepajj tamapankir confiykay jilat kullakanakaruw yateqeripar yatichañapatakejj jan puedipki ukhajj jaytapjje.
4. Bibliat yateqañ munirinakarutï yatichañäni ukhajja, ¿kuna bendicionanaksa jikjjatañäni?
4 Apóstol Pablojj kunatï cheqäki uk mayninakar yatichañatak chʼamapsa, tiempopsa jan ina chʼusar aptʼasitapatjja, wali kusisitaw jikjjatasïna (Hech. 20:35). Tesalonikankir jilat kullakanakajja, apóstol Pablon yanaptʼapampejj nayraruw sartasipkäna, uk uñjasajja apóstol Pablojj Jehová Diosaruw wal yuspäräna (1 Tes. 1:2). Jiwasatï jan tiemponïkasas Bibliat yateqañ munirinakar yatichañatak tiempo apstʼasiñäni ukhajja, Diosan arunakap yatiyasajj wali kusisitäñäniwa.