Jisktʼäwinaka

◼ ¿Yaqha markankir jan uñtʼat jaqenakar Internet toqe Bibliat yatichañajj walïspati?

Yaqhep jilat kullakanakajja, kawkïr markanakantï Bibliat yatiyañajj jarkʼatäki, jan ukajj kawkhantï yatiyirinakajj jukʼak utjki, uka markankirinakaruw Internet toqe Bibliat yatichañatak chʼamachasiwayapjje. Ukham lurasajja, awisajj askinakaw jikjjatasiwayi. Ukampis jan uñtʼatanakampi, Internet toqe parlasajj jan walinwa uñjasipjjaspa (ukatakejj Diosan Apnaqäwipat Yatiyañataki julio 2007, 3 jana uñjjattʼäta). Diosan Reinopat suma yatiyäwinakampejj taqeniruw purtʼañ muntanjja. Ukampis awisanakajja, inas kullakasa, jan ukajj jilatasa, Internet toqe yatiyasajj jan wali jaqenakaru, jan ukajj Diosan markaparu uñisir jaqenakar uñtʼchispa (1 Cor. 1:19-25: Col. 2:8). Janiw ukakïkiti, kawkïr markanakantï, Diosan Reinopat yatiyañajj jarkʼatäki ukanakanjja, kuna toqetsa Internetan parlasktan ukajj autoridadanakampi uñjatäspawa. Ukham parlañajj uka markan jakasir jilat kullakanakaruw jan waltʼayaspa. Ukhamasti, yaqha markankir jaqenakarojj janiw Internet toqejj suma yatiyäwinak yatichañasäkiti.

Yaqha markat jutir jaqetï markasar visittʼaskchi ukhajja, jupar Bibliat yatichañat sipansa, kunjamsa Internetan jw.org sat cheqar mantaspa uk yatichtʼañasa. Jan ukajj markapar kutʼjjasajj kunjamsa markapankir sucursalar qellqaspa uk yaticharaksna. Jakaski uka cheqantï Tantachasiñ Utajj utjchi ukhajj ukar sarañapatakiw chʼamañchtʼsna. Jupatï Bibliat jukʼamp yatjjatañ munani ukhajja, Persona que mostró interés (S-43) sat formularior phoqantasaw tamasankir secretario jilatar churañasa. Uka jilataw sucursalar Internet toqe jw.org cheqar qellqtʼjjani. Kunatejj markapankir sucursalaw kunjamsa sum yanaptʼaspa uk yati (ukatakejj Diosan Apnaqäwipat Yatiyañataki junio 2014, 7 jana ukat Diosan Apnaqäwipat Yatiyañataki noviembre 2011, 2 jana uñjjattʼäta).

Bibliat yatjjatirisatï yaqha markar sarjjchi, jan ukajj Internet toqe maynir Bibliat yatichaskstan ukhajja, aka yatichäwin yatjjataniwayktan ukarjamaw lurañasaraki. Ukampis maynin visittʼañapkamajj Bibliat yatjjatañ jan jaytañapatakejja, jupamp parltʼaskaksnawa. Ukampirus kawkhantï Diosan Reinopat yatiyañajj jarkʼatäki uka cheqanakanjja, wali amuyumpiw carta toqesa, telefon toqesa Internet toqes yatiyañasa (Mat. 10:16).