¿Kunsa profetanakajj Diosat yatichistu?
Nayra tiemponjja, Diosajj wali wakiskir yatiyäwinakapjja profetanakap toqew jaqenakar yatiyirïna. Uka wakiskir yatiyäwinakajja ¿Diosan bendicionap katoqañatakejj kunsa lursna uk yatiyarakistuti? Jïsa. Diosat jan jitheqtiri kimsa profetanakajj kuntï arsupkäna ukat kunsa yateqsna uk yatjjatañäni.
ABRAHÁN
Diosajj janiw khitirus yaqhachkiti taqe jaqenakaruw bendisiñ munaraki.
Abrahán profetarojj Diosajj akham sänwa: “Juma toqerakiw taqe familianakas aka oraqenjja bendecitäpjjani” sasa (Génesis 12:3).
¿Kunsa yateqsna? Diosajj wal munasistu, Jupar istʼapki taqe uka familianakarus (chachäpasa, warmïpasa, wawäpasa) bendisiñwa munaraki.
MOISÉS
Diosajj khuyapayasiriwa jupar uñtʼañatak chʼamachasirinakarus bendisirakiwa.
Taqe Chʼamani Diosaw Moisés profetarojj milagronak lurañapatak chʼam churäna. Ukhamäkchïnsa, Moisesajj akham sasaw Diosar mayisïna: “[Yatichtʼitaya] amtäwinakamjja ukhamata nayan confiansa utjañapataki, ukat juman khuyapayasiñamajj nayatak utjaskatapa yatiñajjataki” sasa (Éxodo 33:13). Moisesan ukham mayisitapajj Diosar wal gustäna, ukatwa jukʼamp yatiña Moisesar churäna, kunjam Diosasa uksa yatiyarakïnwa. Amuytʼañataki, Moisesajj taqe kun Luririn ‘khuyapayasirïtapwa’ yateqäna (Éxodo 34:6, 7).
¿Kunsa yateqsna? Jiwasatï Diosar uñtʼañatak chʼamachasiñäni ukhajja, taqeniruw (chachäpasa, warmïpasa, wawäpasa) Jupajj bendisistani. Diosarojj kunjamsa adorañasa, qhawqsa bendisiñ munistu ukajj Arupan qellqatawa.
JESÚS
Jesusajj khuyaptʼayasirïnwa kunayman usutanakaruw qollarakïna.
Jesusajj kuntï lurkäna kuntï yatichkäna uk yateqañäni ukhajja Diosajj wiñayatakiw bendisistani.
Jesusan jakäwipasa yatichäwinakapasa Diosan Arupan qellqatawa. Diosaw Jesusarojj walja milagronak lurañapatak chʼam churäna, ukhamat juykhunakaru, oqaranakaru, cojonakar qollañapataki. Jiwapkäna uka jaqenakat yaqheparojj jaktayarakïnwa. Ukham lurasaw kuna sumanaktï Diosajj jutïrin jiwas layku lurkani uk uñachtʼayäna. Uka bendicionanak katoqañatakejj kunsa lurañasa uk akham sasaw qhanañchäna: “Khitinakatï wiñay jakañ katoqapkani ukanakajja juma sapa cheqpach Diosar uñtʼasipkakiñapawa jumajj khitankta uka Jesucristorus ukhamarakiw uñtʼasipkakiñapa” sasa (Juan 17:3).
Jesusajj khuyaptʼayasiri, sinttʼasiri, munasiri ukhamänwa. Kunayman marani chachanakasa warminakasa taqe chuymaw Jesusan invitacionaparojj istʼapjjäna, jupajj akham sänwa: “Nayat yateqasipjjarakita. Nayajj llampʼu chuymanïtwa, humilde chuymanirakïtwa, ukatsti jumanakatakejj samarañsa jikjjatapjjätawa” sasa (Mateo 11:29). Uka tiempon jakiri yaqhep chachanakajja janiw warminakarojj respetomp uñjapjjerïkänti, ukampis Jesusajja warminakat khuyaptʼayasïnwa, respetompiw uñjarakïna.
¿Kunsa yateqsna? Jesusajj jaqenakar wal munasïna, ukhamatwa kunjamsa maynit maynikamajj uñjasiñasa uk yatichawayistu.
JESUSAJJ JANIW DIOSÄKITI
Sagrado Qellqatanakajj “mä sapa Diosakiw utji”, Jesucristojj Diosan khitapawa, humilde chuymaniwa sasaw qhanañchi (1 Corintios 8:6). Jesusajja ‘nayat sipansa Diosajj jilïriwa’, ‘Jupaw aka oraqerojj khitanitu’ sasaw qhan sarakïna (Juan 11:41, 42; 14:28).a
a Jesucristot jukʼamp yatjjatañatakejja, Diosan apayanit suma yatiyäwinaka sat folleton 4 yatichäwip uñjjattʼäta. Internetansa jw.org cheqanwa utjaraki.