CRISTIANJAM JAKAÑATAKI
¿Hospitalan qollayasiñamajj wakisini ukatak wakichtʼatäjjtati?
¿Kunatsa wakichtʼatäñasa? Taqeniruw mä akatjamat mä jan waltʼäwejj pasistaspa, jan ukajj mä akatjamatwa hospitalar sarañasajj wakisispa. Hospitalan jiwasar sum uñjapjjañap munstan ukhajja, jichjatpachaw wakichtʼasiñasa, kuna yanaptʼanakas utji ukanakampis yanaptʼayasiñasarakiwa. Ukhamatwa jakañ vidasaru, Jehová Diosajj wila toqet ley churkäna ukar respetatas uñachtʼayañäni (Hch 15:28, 29).
¿Kunjamsa wakichtʼasisma?
Nayraqat amuykiptʼasa ukat orasajja, wila jan uchayasiñatak tarjetwa (DPA) phoqantañama.a Bautisat jilat kullakanakajj siervo de publicaciones jilataruw uka tarjeta mayipjjaspa. Awk taykanakasti, Tarjeta de identidad (ic) ukwa jiskʼa wawanakapatak mayipjjarakispa.
Usur warminakajja, Información para mujeres embarazadas (S-401) sat documento ancianonakar mayipjjaspa. Ukajja usurïkasina jan ukajj parto horasajj suma amtanakar puripjjañapatakiw yanaptʼani.
Qollayasiñamatak wila munasitap mayipjjätam jan ukajj hospitalan quedasiñamajj wakisini ukhajja, janiräkipanwa ancianonakar uk yatiyañama. Jehová Diosan Testigonakapan visitap munatamwa hospitalar yatiyañamaraki.
¿Kunjamsa ancianonakajj yanaptʼapjjaspa? Ancianonakajj DPA tarjeta phoqantañatakiw yanaptʼapjjeristam, ukampis janiw uk phoqantañatakejj juma lanti amtapjjañapäkiti, juma pachpaw kunjamsa qollayasïta uka toqet mä amtar puriñama (Ro 14:12; Gál 6:5). Hospitalan wila uchayasiñ mayipktam uk ancianonakar yatiyäta ukhajja, ancianonakajj jankʼakiw Comité de Enlace con los Hospitales (CEH) ukankirinakar jawstʼapjjañapa.
¿Kunjamsa CEH ukankirinakajj yanaptʼapjjeristam? Ukan yanaptʼirinakajja, wilamp qollayasiñ toqet kunjamsa Testigonakajj amuytan uk amuyapjjañapatakiw doctoranakaru, leyinak toqet encargadonakar yanaptʼapjje. Maysa toqetjja, kunjamsa wila jan uchayasis qollayasisma uka toqetwa doctoranakar yanaptʼapjjaspa. Wakisini ukhajja, jan wila uchasa qolliri mä doctor jikjjatañatakiw yanaptʼapjjeristam.
¿WILAMP QOLLAYASIÑ TOQET KUNJAMSA SUMA AMTANAKAR PURSNA? SAT VIDEO UÑTASAJJA, AKA JISKTʼARUW QHANAÑCHTʼÄTA:
Wilamp qollayasiñ toqet wakichtʼatäñamatakejj ¿kunanak lurañas yanaptʼätam?
a ¡Wiñayatakiw kusisit jakasisma! sat libron 39 yatichäwipajja, wilamp qollayasiñ toqet suma amtanakar puriñatakiw yanaptʼätam.