Jilatanakat yateqasiñaw wal yanaptʼawayitu

Canadá markankiri Quebec markan nasta, ukanjja jaqenakajj francés arwa parlapjje. Louis tatajampi Zélia mamajampejj walpun munasipjjetäna. Tatajajj janiw añcha parlirïkänti, ukampis liyiñaw wal gustäna. Nayarojj qellqañaw wal gustarakitäna, ukatwa periodistäñ munayäta.

12 maranïskayäta ukhajja, tatajamp chika trabajiri Rodolphe Soucy jilatampi amigopampiw utar visittʼapjjetäna. Jupanakajj Jehová Diosan Testigopäpjjänwa. Nayajj janiw Testigonakar sum uñtʼkayätti, janirakiw jupanakat sint yatiñsa munkayätti. Ukampis jisktʼapkayäta ukarojja munasiñampiw Bibliat amuykay qhanañchapjjetäna. Uk istʼasajj awk taykajasa nayasa musparapjjayätwa, ukatwa Bibliat yatjjatañ iyawsapjjayäta.

Uka tiemponjja, catoliconakan colegiopankayätwa. Awisajja Bibliat yateqkayäta ukanakatwa compañeronakajampi parlirïta. Niyakejjay profesoranakajj sacerdotenakäpjjchïnjja, Bibliat parlataj yatipjjäna ukhajja, Bibliampi qhanañchañat sipansa ‘rebeldëtaw’ sasaw jupanakat maynejj compañeronakaj nayraqatan juchañchitäna. Profesorajj toqkchitänsa, kunatï ukan paskäna ukajj wal yanaptʼitäna, ukhamatwa ukan yatichaskäna ukajj jan Bibliarjamätap amuyjjayäta. Ukankañajajj janiw wakisjjänti. Awk taykajamp parltʼasajj yaqha colegioruw sarjjayäta.

PREDICAÑAJJ GUSTJJETÄNWA

Bibliat yatjjataskakiyätwa, ukampis utat uta predikir sarañ ajjsarataj laykojj janiw nayrar sartkayätti. Católica religionajj waljaniruw apnaqäna, ukatwa jaqenakajj predicación contrajj saytʼapjjäna. Quebec markan primer ministropajj Maurice Duplessis satänwa, jupajj católica religionar wal yanaptʼäna. Jupan yanaptʼatajj waljaniw Testigonak contra saytʼapjjäna, yamas awisajj Testigonakar nuwjapjjänwa. Ukapachanjja, yatiyir sarañatakejj jan ajjsarirïñaw wakisïna.

Jan ajjsarirïñatakejj Escuela de Galaad clase 9 ukat misturi John Rae jilataw yanaptʼitäna. Jupajj wali experiencianïkchïnsa, janiw jachʼa jachʼa tukurïkänti, jupamp parltʼañas facilakïnwa. Mä qhawqha kutikiw qhan cheqañchitäna, ukampis luratanakapampiw yatichitäna. Francés arjja janiw sumpach parlañ yatkänti, ukatwa jupamp predikir sarirïta, ukhamatwa francés arut predicañ yanaptʼirïta. John jilatan jakʼapankañajj Testigöñatakiw wal yanaptʼawayitu. Testigonakampi qalltan parlkayäta ukhatjja, tunka mara pasataruw 1951 maran 26 de mayo urun bautisasta.

Quebec markankir jiskʼa congregacionajanjja jilapartejj precursoräpjjänwa. Jupanakaw precursoräñatak wal chʼamañchapjjetäna. Uka tiemponjja, utat uta predicasajj Bibliampikiw yatichapjjerïta, janiw yaqha qellqatanakajj utjkänti, ukhamajj Biblia sum uñtʼañaw wakisïna. Ukatwa kunatï cheqäki uk sum qhanañchañatakejja textonak yateqañatak chʼamachasiyäta. Ukampis walja jaqenakajja, Bibliajj católica religionan jan permisopanïkäna ukhajj janiw liytʼañ munapjjerïkiti, uka permisojj imprimátur satänwa.

Simone Patry kullakampiw 1952 maran casarasipjjta. Jupajj congregacionajanwa Diosar taqe chuyma servïna. Ukatjja Montreal sat markaruw sarjjapjjta, casarasipkta ukhat janïraw maras paskänti ukhaw Lise sat imill wawajajj nasjjäna. Casaraskta uka nayras precursoräñ jaytkchiyätjja, esposajampejj kunatï wakiski ukampik jakañatakiw chʼamachasipjjayäta, ukhamatwa kuna lurañanakatï congregacionan utjkäna ukanakarojj familpach yanaptʼapjjerïta.

Tunka maraw pasjjäna, janïraw precursoräñ pienskayätti. 1962 maranwa Escuela del Ministerio del Reino sat cursor sarañajatakejj Canadá markankiri Betelar invittʼapjjetäna, ukajj mä phajjsiw apasïna. Ukanjja Camille Ouellette sat jilatampiw mä cuarton alojatäpjjayäta. Jupajj esposani wawanakani ukhamäkchïnsa, wal predicañ munatapajj musparayitänwa. Uka tiemponjja, wawaninakat jukʼanikiw Quebec markan precursoräpjjäna. Ukampis Camille jilatajj precursoräñ wal munäna. Jupamp jakapkayäta ukhajj precursorat serviñajatakiw wal chʼamañchitäna. Mä qhawqha phajjsitjja, wasitampi precursoräñwa amtta. Yaqhepajj janis walïkaspa ukhamwa amuyapjjäna, ukampis Jehová Diosaw jukʼamp predicañataki chʼamachasitajarojj bendisiskitani sasaw precursoräñatak qellqayasiyäta.

PRECURSOR ESPECIALATWA QUEBEC MARKAN SERVIPJJTA

1964 maranjja, nasipkta uka Quebec markan precursor especialat serviñatakiw uttʼayapjjetu. Ukanwa walja maranak serviwayapjjta. Uka tiemponjja, predicañajj janiw sinti jarkʼatäjjänti, ukampis Testigonak contra saytʼirinakajj utjaskakïnwa.

Mä kutejja sábado jaypʼuw Sainte-Marie markan katuntapjjetu, uka jiskʼa markajj Quebec markat janiw sinti jayankkänti. Mä policiaw comisariar apitu, ukanjja jan permisoni utat uta predicataj laykuw carcelar llawintapjjetäna. Uka qhepatjja, juez Baillargeon sat jachʼa jaqe nayraqataruw apapjjetäna. Jupasti khitis juicion arjjatätam sasaw jisktʼitäna. Glen Howa abogadow arjjatitani sayäta ukhajja, akham sasaw ajjsartʼasisjam jachʼat säna: “¡Janiya! ¡Janiy jupampejja!” sasa. Glen How jilatajj wali uñtʼat abogadönwa, walja jilat kullakanakaruw juicionakan atipjañ yanaptʼäna. Mä jukʼa tiempotjja, akham sasaw tribunalan yatiyjjapjjetäna: ‘Janiw jumar kunat juchañchañas utj-jjeti’ sasa.

Congregacionajan jukʼanikïpjjayätwa. Niyakejjay jaqenakajj Testigonak conträpjjchïnjja, tantachasiñ uta alquilañajj chʼamakïnwa, ukatwa jan calefaccionani mä thantha garajek alquilapjjayäta. Jilat kullakanakajj kerosenempi nakhiri mä estufanïpjjänwa, ukampiw wali thaya tiempon juntʼuchtʼasipjjerïta. Tantachäwinak janïr qalltkipanjja, uka estufar muyuntasinwa mä qhawqha horanakajj suma experiencianak cuenttʼasipjjerïta.

Testigonakajj kunjamsa aka qhepa maranakan jiljjattawayi uk uñjañajj wali kusiskañawa. 1960 maranakanjja, mä qhawqha jiskʼa congregacionanakakiw Quebec marka jakʼanakansa, Côte-Nord cheqansa, Gaspé sat markansa utjäna. Jichhürunakanjja, walja jilat kullakanakaw uka cheqan utj-jje, wali suma Tantachasiñ Utanakanwa tantachasjjapjjaraki.

CONGREGACIONANAK TUMPTʼIRIT SERVIÑATAKIW INVITTʼAPJJETU

1970 maranjja, congregacionanak tumptʼirit serviñatakiw invittʼapjjetäna, 1973 maransti superintendente de distritot serviñatakiw invittʼapjjarakitäna. Uka tiemponjja congregacionanak tumptʼiri, experienciani jilatanakat wal yateqawayta. Jupanakat yaqhepajj Laurier Saumur,b David Splanec jupanakäpjjänwa. Sapa jachʼa tantachäwi tukuyarojja, David jilatampejj jukʼamp suma yatichirïñatakejj kunas yanaptʼapjjetaspa uka toqetwa parltʼasipjjerïta. Mä kutejja, David jilatajj akham sitänwa: “Léonce, qhep qhepa discursjja wali sum arstʼawaytajja. Ukampis kunanaktï parlawaykta ukampejj kimsa discursonakwa nayajj arstʼiriskayäta” sasa. Discursonjja walja toqenakatwa parlirïta, ukhamajj mä qhawqha toqet parlañajakiw wakisïna.

Superintendente de distritot servirinakajja congregacionanak tumptʼirinakaruw chʼamañchtʼapjjañapäna. Quebec markanjja walja jilat kullakanakaw uñtʼapjjetäna, ukatwa congregacionanak tumptʼirinakar visitkayäta ukhajj nayamp predicañ munapjjerïna. Jupanakamp predicañajj wal gustitäna, ukampis congregacionanak tumptʼir jilatatakejj janiw tiempojj utj-jjetänti. Mä kutejja, congregacionanak tumptʼir mä jilatajj munasiñampiw akham sitäna: “Jilat kullakanakatak tiempo apstʼasitamajj walikïskiwa, ukampis aka semanajj nayar visittʼiriw juttajja, jan uk armasimti, nayajj chʼamañchtʼatäñ munaraktwa” sasa. Uka arunakapajj wal yanaptʼitäna.

1976 maranjja, mä jachʼa llakinwa uñjasta. Wali munat Simone esposajaw wal usuntasajj jiwjjäna. Jupajj Jehová Diosar wal munasïna, taqe chuymaw servirakïna, ukham chuymanïsajj walpun yanaptʼawayitu. Jiwatapat jan sint llakisiñatakejja, predicañaw yanaptʼitäna. Jehová Diosajj ukhamarakiw uka tiempon munasiñampi chʼamañchitäna, ukatwa Jupar wal yuspärta. Tiempompejja inglés aru parliri Carolyn Elliott kullakampiw casarasta, jupajj Quebec markaruw predicacionan yanaptʼañatak jutatayna, Diosar taqe chuyma servir precursoränwa. Jupampejj khitis parltʼakispawa, mayninakatjja taqe chuymaw llakisi, yamas ajjsaririnakatsa sapakjam amuyasirinakatsa jukʼampiw llakisi. Carolyn esposajajj walpun congregacionanak visittʼañan yanaptʼawayitu.

JAN ARMKAÑ MARA

1978 maranjja, Quebec markan Precursoranakatak Escuelajj nayrïr kuti apaskäna ukan yatichañajatakiw enero phajjsin uttʼayapjjetäna. Wal ajjsarayäta, kunatï ukan yatichasiñapäkäna ukajj nayatakis yateqerinakatakis machaqänwa. Ukampis walja precursoranakaw wali experiencianïpjjäna. Yatichirejj nayäkchiyätsa yateqerinakat wal yateqawayta.

Qhepat uka pachpa maranjja, “Fe victoriosa” sat Asamblea Internacionalaw Estadio Olímpico de Montreal ukan apasïna. 80.000 jilaw jaqenakajj tantachasipjjäna, Quebec markanjja janipuniw ukham jachʼa tantachäwejj apasirïkänti. Nayarojj Departamento de Servicio de Noticias ukan yanaptʼañajatakiw uttʼayapjjetäna. Walja periodistanakampiw ukan parlayäta. Kuna suma yatiyäwinaktï jupanakajj Testigonakat sapkäna uk istʼasajj wal kusisiyäta. Uka jachʼa tantachäwitjja, televisionansa radionsa 20 horanak jilaw yatiyasïna, periodiconakansa walja yatiyäwinakaw qellqasirakïna. ¡Waljaniw uka yatiyäwinak istʼapjjäna!

YAQHA CHEQAN SERVIÑATAKIW ASIGNAPJJETU

1996 maranjja, yaqha asignacionwa katoqta. Quebec markanjja, bautisaskta ukhatpachaw francés aru parlir congregacionanakar yanaptʼayäta. Ukampis uka maranjja, inglés aru parlir congregacionanakar yanaptʼañatakiw Toronto markan superintendente de distritot asignapjjetäna. Ukanjja, janis wakichtʼatäkirista ukhamaw amuyasiyäta, inglés aru parlañ janiw sum yatkayätti, ukatwa discursonak arstʼañ wal ajjsarayäta. Jehová Diosarojj jukʼampiw confiyañajäna mayisiñajarakïna.

Qalltan ajjsarayaskchiyätsa, pä maraw Toronto markan wali kusisit serviwayta. Carolyn esposajaw inglés aru jan ajjsaras parlañajatakejj pacienciampi yanaptʼitäna, jilat kullakanakajj ukhamarakiw chʼamañchapjjetäna. Ratukiw walja amigonakanëjjapjjayäta.

Viernes jaypʼunakajja, pä uru jachʼa tantachäwi nayrajja, tantachäwitak wakichañasa yaqha lurañanakasa waljaw utjäna, ukampis utat uta yatiyañaw jukʼamp gustitäna. Inas yaqhepajj akham sapjjchïna: “¿Kunatsa walja lurañanak utjkipanjja yatiyir sarpacha?” sasa. Jaqenakamp parltʼañaw nayar wal chʼamañchitäna, predicañajj jichhakamas chʼamañchaskakituwa.

1998 maranjja, Carolyn esposajampiru nayampirojj Montreal markaruw precursor especialat asignapjjetäna. Ukanjja, walja jaqenakajj utjki uka cheqan predicasiñapataki wakichtʼañajatakiw uttʼayapjjetäna, ukhamarak periodistanakamp parlañajatakiw asignapjjetäna, ukhamat jaqenakajj Testigonak contra jan wal parlapki uk qhanañchañataki. Jichhajja, esposajampejj yaqha markanakat jichhak purinir jaqenakaruw predicapjjta. Canadá markar purinir uka jaqenakat jilapartejj Bibliat wal yatjjatañ munapjje.

68 maranakaw Testigöjjta, uka maranak amtasajj wal kusista. Taqe chuym predicañ yateqasajj waljaniruw Jehová Diosar uñtʼapjjañapatak yanaptʼawayta, ukajj wal kusisiyitu. Lise sat phuchajampi esposopampejja, wawanakapar jilarayasajj precursor regularatwa servisipki. Lise phuchajajj taqe chuymaw jichhakamas Diosan arunakap yatiyaski, ukajj wal chʼamañchtʼitu. Jehová Diosar serviñan nayrar sartañajatakisa, Diosan markapan utjki uka luräwinak sum phoqañajatakisa, walja jilatanakaw sarnaqatanakapampi suma ewjjanakapampi yanaptʼawayapjjetu, walpun uka jilatanakar yuspärta. Mä asignacionan serviskakiñatakejj Jehová Diosan espíritu santoparuw confiyañasa, ukwa yateqawayta (Sal. 51:11). Jehová Diosaw sutip jachʼañchañajatakejj ajllisiwayitu, ukham luratapatjja Jupar yuspärapunïwa (Sal. 54:6, TNM).