Jehová Dios Awkisar walpun munastanjja

1, 2. ¿Kunatsa Jehová Diosajj familiapar irpanistu, kunsa ukatakejj lurawayi?

JEHOVÁ DIOSAW familiap taypinkañasatak invittʼistu, ukajj wali kusiskañawa. Uka familia taypinkirinakajj Diosaruw jakäwinakas katuyastanjja, Diosan Yoqapan jaqenak layku jiwataparus creyiraktanwa. Diosan kusisit familiap taypinkañajj wali kusiskañawa. Jichhajj sumaw jakasjjtanjja, jutïrinsti wiñayaw aka oraqen jakasirakiñäni, yaqhepasti alajjpachanwa jakasipjjarakini.

² Jehová Diosajj wal munasistu, ukatwa familiap taypinkañasatakejj mä jachʼa sacrificio lurawayi (Juan 3:16). Biblianjja, “Diosaw [...] alasipjjtamjja” sasaw qhanañchistu (1 Cor. 6:20). Diosaw Yoqaparojj jiwas layku jiwañapatak khitanïna, ukatwa Diosar jakʼachassna. Cheqas Taqe Kunjjaru Munañani Diosarojj “Awkija” sasaw sissna. Kunjamatï pasïr yatichäwin yatjjataniwayktanjja, Jupjam suma awkejj janiw utjkiti.

3. ¿Kamsasas awisajj jisktʼassna? (“¿Jehová Diosajj nayat llakispachati?” sat recuadro uñjjattʼäta).

³ Awisajja, Biblia qellqer mä chachjamaw akham jisktʼassna: “¿Kunampirak Tatitur phoqherista, nayatak askinak luratapatsti?” sasa (Sal. 116:12). Cheqas alajjpachankir Awkisarojj janiw kunampis phoqksnati. Ukampis Diosajj wal munasistu, ukatwa jiwasajj Jupar wal munasiraktanjja. Apóstol Juanajj akham sänwa: “Diosaw nayraqat munasistu, ukatwa jiwasajj munasiñ yatiraktanjja” sasa (1 Juan 4:19). Ukhamajj ¿kunjamanakatsa alajjpachankir Awkisar munasitas uñachtʼaysna?

JEHOVÁ DIOSAN JAKʼAPANKAPUNIÑÄNI

4. Santiago 4:8 textorjamajja, ¿kunatsa Jehová Diosar jakʼachasiñatak chʼamachasiñasa?

⁴ Jupar jakʼachassna, Jupamp sapa kut parltʼassna ukwa Jehová Diosajj muni (Santiago 4:8 liytʼañataki). Akham sistuwa: “Oración lurapjjapunim” sasa. Diosajja, mayisitanakas istʼañatakejj jankʼakiwa (Rom. 12:12). Jupajj janipuniw oracionanakas istʼañatakejj qaritäkaniti ni jan tiemponïkanisa. Ukampis ¿kunjamsa jiwasajj Diosar istʼaraksna? Mä toqetjja, Biblia liyisa ukhamarak Bibliat apstʼat qellqatanak liyisaw istʼtanjja. Ukatjja, tantachäwinakan sum istʼasaw Diosar istʼaraktanjja. Wawanakajj awk taykapampi sapa kuti parltʼasipjje ukhajj wal munasipjje, jiwasarojj ukhamarakiw Jehová Diosamp sapa kuti parltʼasiñajj Jupan jakʼapankañatak yanaptʼistu.

5. ¿Oracionanakasajj Diosatak jukʼamp sumäñapatakejj kunas yanaptʼistaspa?

⁵ ¿Jehová Diosampejj parltʼasisktanti? Chuymanakas Jupar jistʼarsna ukwa Diosajj muni (Sal. 62:8). Ukatwa taqenis akham sasin jisktʼasiñasa: “¿Diosar mayista ukhajj jan amuytʼasisat pachpa arunak sapa kuti sistjja, jan ukajj taqe chuymach mayistjja?” sasa. Jehová Diosar wal munastanjja, janipuniw kunäkipansa Jupat jitheqtañ munktanti. Ukatakejj sapa kutiw Diosampejj parlasiñasa. Kunas llakisiyistu kunas kusisiyarakistu ukanaksa Juparuw awistʼasiñasa, yanaptʼsa jan ajjsarasaw mayiñasa.

6. ¿Kunsa Jehová Diosan jakʼapankaskakiñatakejj lurañasa?

⁶ ¿Kunsa Jehová Diosan jakʼapankañatakejj luraraksna? Yuspärasirïñasawa. Salmo qellqerjamaw akham saraktanjja: “Dios Tatay, muspharkañ luratanakamajj waljawa, nanakat khuyapayasitamas waljarakiwa: janiw khitis jumjamajj utjkiti. Ukanakjjat yatiyañ yantʼta, arsuñ yantʼarakta, nayatakisti janiw jaktʼañjamäkiti” sasa (Sal. 40:5). Diosarojj janiw chuyma manqhanak yuspärañasäkiti, jan ukasti arunakasampi luratanakasampiw yuspärañasa. Ukanwa jichha tiempon jakir jaqenakat mayjätanjja. Akapachanjja, jaqenakajj janiw kuntï Diosajj jupanak layku lurki ukat yuspärapkiti. Jaqenakan ukham jan yuspärasirïpjjatapajj ‘qhepa urunakan’ jakataswa uñachtʼayi (2 Tim. 3:1, 2). Janipun uka jaqenakjamañäniti.

7. ¿Kunjam jakasiñassa Jehová Diosajj muni, ukat kunatsa?

⁷ Awk taykanakajja wawanakapajj jan nuwasipjjaspati, sumak jakasipjjaspa ukwa munapjje. Jehová Diosajj ukhamarakiw wawanakapan sum jakasipjjañap muni. Cheqansa, maynit maynikam munastan ukhajja, cheqpach cristianötaswa uñachtʼaytanjja (Juan 13:35). Diosan mä serviripajj akham sasaw qellqäna: “Uñjapjjam: ¡kunj munkayasa jilanak pur mä wawak suman jakasiñajja!” sasa (Sal. 133:1). Jiwasajj Salmo qellqeri chachjamarakiw amuytanjja. Cheqas jilat kullakanakasar munastan ukhajja, Jehová Diosar munasitaswa uñachtʼaytanjja (1 Juan 4:20). ‘Maynit maynikam suma chuymamp uñjasiri, maynit maynikam sinttʼasiri’ jilat kullakanak taypinkañajj wali kusiskañawa (Efes. 4:32).

ISTʼASIRÏSAW MUNASIRÏTAS UÑACHTʼAYSNA

8. Kuntï 1 Juan 5:3 texton siski ukarjamajja, ¿kunatsa Diosarojj taqe kunat sipans istʼtanjja?

⁸ Jehová Diosajja, wawanakajj awk taykanakapar istʼapjjaspa, jiwasas Jupar istʼsna ukwa muni (Efes. 6:1). Diosaw lurawayistu, Jupaw jakayarakistu, Jupjam wali yatiñan Awkejj janiw utjkiti, ukatwa Diosar istʼtanjja. Taqe ukanakat sipansa Jupar wal munasitasatwa istʼtanjja (1 Juan 5:3 liytʼañataki). Diosar istʼañasatakejj walja razonanakas utjkchejja, Diosajj janiw Jupar istʼañasatak obligkistuti. Jan ukasti, kunsa lurañäni uk sapa mayni ajllirwa lurawayistu, ukatwa munasiñat Jupar istʼañ ajlltan ukhajj wal kusisi.

9, 10. Alajjpachankir Awkisajj kunjam sarnaqañassa muni uk yatiñasa ukarjam sarnaqañasa, ¿kunatsa wali wakiskiri?

⁹ Awk taykanakajja, wawanakapajj sum jakasipjjaspa ukwa munapjje. Ukatwa kun lurapjjañapas walïspa jan walïkarakispa uk sapjje. Wawanakajj istʼasirïpjje ukhajja, awk taykapar confiyapjjatapa jupanakar respetapjjatapwa uñachtʼayapjje. Alajjpachankir Awkisajj kunjam sarnaqañassa muni uk yatiñasa, ukarjam sarnaqañas jukʼamp wakiskiriwa. Ukhamatwa Jupar munasitassa respetatassa uñachtʼaytanjja. Ukham lurtan ukhajja kusisitaw jakastanjja (Is. 48:17, 18). Ukampis Diosarusa leyinakaparusa jan istʼapki ukanakajja, jupanak pachpaw jan walin uñjasipjje (Gál. 6:7, 8).

¹⁰ Kunjamtï Jehová Diosajj munki ukarjam jakañajja, jan usuntañataki, jan sinti llakisiñataki, Diosat jan jitheqtañatakiw yanaptʼistu. Kunas sum jakasiñatak yanaptʼistaspa ukjja Diosakiw yati. Estados Unidos markan jakasir Aurora sat mä kullakajj akham siwa: “Jehová Diosar istʼas sarnaqañäni ukhajja, kusisitapuniw jakasiñäni” sasa. Ukajj cheqäskapuniwa. ¿Kunjamsa Jehová Diosar istʼas sarnaqañajj jumar yanaptʼawaytam?

11. ¿Kunjamsa oracionajj yanaptʼistu?

¹¹ Chʼamäki ukhasa oracionaw Diosar istʼañatakejj yanaptʼistu. Niyakejjay taqenis pantjasirïstanjja, awisajj Jehová Diosar istʼañajj chʼamakïspawa, ukatwa istʼasirïñatak chʼamachasiskakiñasa. Salmonak qellqer mä chachajj akham sasaw Diosar ruwtʼasïna: “Munañam phoqhañay yatichita, taqpach chuymampiw arunakam imä” sasa (Sal. 119:34). Denise sat mä precursora kullakajj akham siwa: “Jehová Diosan mä mandamientoparjam sarnaqañajj nayatak chʼamäki ukhajja, ‘kunatï walïki uk lurañatak chʼam churita’ sasaw orasta” sasa. Jan pächasiñäniti, Diosajj ukham mayisitanakas istʼapuniniwa (Luc. 11:9-13).

YAQHANAKAROJJ ALAJJPACHANKIR AWKISAR MUNASIPJJAÑAPATAK YANAPTʼAÑÄNI

12. ¿Kun lurañatakis Efesios 5:1 textojj chʼamañchistu?

¹² (Efesios 5:1 liytʼañataki). Jehová Diosan “munat wawanakapjamajj” Jupat yateqasiñatakiw chʼamachastanjja. ¿Kunanak lurasas Diosat yateqasitas uñachtʼaytanjja? Yaqhanakar suma chuymamp uñjasa, munasisa, ukhamarak perdonasaw Diosat yateqasitas uñachtʼaytanjja. Jehová Diosar jan uñtʼirinakajja, sum sarnaqatas uñjasajj Diosat jukʼamp yatjjatañwa munapjjaspa (1 Ped. 2:12). Kunjamtï Jehová Dios Awkisajj uñjkistojja, ukham wawanakapar uñjañatakiw cristiano awk taykanakajj chʼamachasipjjañapa. Ukham lurapjjani ukhajja, wawanakajj wali munasiri Awkisan amigopäñwa munapjjaspa.

13. ¿Kunas Diosat jan ajjsaras parlañatakejj yanaptʼistaspa?

¹³ Niya taqe jiskʼa wawanakaw tatapat wal kusisipjje, yaqhanakarus tatapat sum parlapjjaraki. Niya ukhamarakiw jiwasajj alajjpachankir Awkisat wal kusistanjja, yaqhanakan Jupar uñtʼapjjañapwa munaraktanjja. David reyjamarakiw sistanjja, jupajj akham sasaw qellqäna: ‘Nayajj sumanakwa Jehová Diosat parlä’ sasa (Sal. 34:2, TNM). Ukampis inas ajjsarirïstan, ukhamächi ukhajja, ¿kunas Diosat jan ajjsaras parlañatakejj yanaptʼistaspa? Aka toqenakatwa amuytʼañasa: predicasajj Diosaruw kusisiysna, Diosar uñtʼapjjañapatakiw jaqenakar yanaptʼaraksna, ukhamatwa sum jakasipjjaspa. Cheqas Diosaw jan ajjsarirïñatak yanaptʼistaspa. Kunjamtï nayrïr patak maranakan jakir cristianonakar yanaptʼkänjja, ukhamarakiw yanaptʼistani (1 Tes. 2:2).

14. ¿Kunatsa predicañajj wali wakiskirejja?

¹⁴ Jaqenakajj kawki markatäsipkpansa, Jehová Diosajj janiw khitirus yaqhachkiti. Jiwasajj ukhamarakiw jaqenakar uñjañasa, ukham luratasajj Jehová Diosar wal kusisiyi (Hech. 10:34, 35). ¿Kunjamanakatsa jaqe masisar munasitas uñachtʼaysna? Taqe kunat sipansa, suma yatiyäwinak predicasaw jaqenakar munasitas uñachtʼaysna (Mat. 28:19, 20). ¿Kunjamsa predicatasajj jaqenakar yanaptʼaspa? Diosan arunakap istʼapki ukanakajj sumaw jichhürunakan jakasipjjaspa, jutïrinsa wiñayaw jakasipjjarakispa (1 Tim. 4:16).

JEHOVÁ DIOS AWKISAR MUNASISAKIW KUSISIT JAKASSNA

15, 16. ¿Kunanakatsa kusisitäñasa?

¹⁵ Jehová Diosajj wali munasir Awkiwa, familiapankirinakajj kusisit jakasipjjaspa ukwa muni (Is. 65:14). Jan walinakansa uñjaskchiñänejja, walja razonanakaw kusisitäñatakejj utjistu. Sañäni, alajjpachankir Awkisajj wal munasistu, janiw ukat pächasktanti. Kuntï Bibliajj yatichki uksa sum uñtʼtanjja (Jer. 15:16). Mä suma familia taypinkaraktanwa, jupanakajj Jehová Diosarusa, leyinakaparusa, jilat kullakanakarus wal munasipjje (Sal. 106:4, 5).

¹⁶ Ukatsti jutïrin wali sumaw jakasjjañäni sasaw taqe chuyma suytanjja, ukatwa kusisitarakïtanjja. Kunjamtï yatktanjja, niyaw Jehová Diosajj taqe jan walinak chhaqtayjjani, Reinopasti mä paraisoruw aka oraq tukuyjjarakini. Jiwatäpki uka familiaranakasas jaktanjjapjjaniwa, wasitampiw jupanakampejj jakasjjañäni (Juan 5:28, 29). Taqe ukanak uñjañajj wali kusiskañäniwa. Niyaw Jehová Dios Awkisarojj alajjpachansa aka oraqensa taqeni jachʼañchapjjani adorapjjarakini, ukaw taqe kunat sipansa jukʼamp wakiskirejja.