Lurañanakam taqe chuymaw phoqañama

MÄ SUMA amigojj wali munasiñampi chʼamañchtʼkir arunakampi carta qellqanirïtam ukhajja, ¿kunjamakis jikjjatasirïta? Ukham cartwa Timoteojj apóstol Pablot katoqäna. Uka cartajja, jichhajj Bibliankiwa, 2 Timoteo sasin uñtʼatawa. Timoteojj uka carta liytʼañ wal munpachäna, kunsa amigopajj qellqanïna uk yatiñsa wal munarakpachäna. Inas akham jisktʼaschïna: “¿Pablojj kunjamäskpachasa? ¿Kunjamsa lurañanak sum phoqerista uka toqet ewjjtʼanpachïtuti? ¿Aka cartajj mayninakar yanaptʼañatakisa jaqenakar Bibliat sum yatichañatakis yanaptʼitaniti?” sasa. Uka wakiskir cartaw uka jisktʼanakaru ukat yaqha jisktʼanakar qhanañchi. Jichhajj kuna wakiskir ewjjtʼanakas uka cartan utji ukanakat mä qhawqha uñjañäni.

‘TAQE KUNWA AGUANTASKAKTA’

Timoteojj carta liyiñ qalltäna ukhajja, Pablotakejj jupajj kunja wakiskirïnsa ukwa jankʼak amuyasïna. Pablojj munasiñatjja, Timoteorojj ‘munat wawaja’ sasaw säna (2 Tim. 1:2). Timoteojj 65 mara jakʼanakanwa uka carta katoqpachäna, inas ukapachajj 30 jila maranëjjchïna, ukampis jilïr irpirjamajja wali experiencianëjjänwa. Pablompejj tunka maranakats jilaw trabajïna, waljanakwa jupat yateqpachäna.

Yantʼanakan uñjaskasas kunjamsa Pablojj Diosat jan jitheqtas aguantaskakïna uk yatisajja, Timoteojj wali chʼamañchtʼatäpachänwa. Pablojja Roma markanwa carcelankaskäna, niyaw jiwayata uñjasiñaparakïna (2 Tim. 1:15, 16; 4:6-8). Kunjamsa Pablojj ukanakar jan ajjsarkäna uk Timoteojj amuyänwa, Pablojj ‘taqe kunsa aguantaskaktwa’ sasaw cartapan qellqäna (2 Tim. 2:8-13). Timoteorojj Pablon ukham aguantatapajj wal chʼamañchtʼäna, jiwasarus ukhamarakiw wal chʼamañchtʼistaspa.

“KUNTÏ DIOSAT KATOQKTA UKJJA NINÄKASPAS UKHAM JUKʼAMP” AQTAYAM

Pablojja, Diosar serviñ wali valoranit uñjañapatakiw Timoteor chʼamañchtʼäna. ‘Kuntï Diosat katoqkta uk ninäkaspas ukham jukʼamp aqtayañapwa’ munäna (2 Tim. 1:6). Pablojj “kuntï Diosat katoqkta” siski ukatakejja, griego arun khárisma siski uka arwa apnaqäna. Uka arojja, kuntï gratisak katoqktan, ina chʼusatak jan chʼamachasis mä kun katoqktan ukwa sañ muni. Timoteojj congregacionan mä wakiskir luräwi katoqkäna ukhaw uka regalo katoqäna (1 Tim. 4:14).

¿Timoteojj kunsa uk katoqasajj lurañapäna? ‘Ninäkaspas ukham jukʼamp aqtayam’ siski uka arunak liytʼasajja, Timoteojj inas utanakan qherinakajj utjkäna ukan ninajj jukʼat jukʼat jiwtʼjjerïna, awisajj nina sankʼaruk tukjjerïna ukanakat amtchïna. Ninajj jukʼamp aqtañapatakisa juntʼuptañapatakisa jukʼamp phichkatañaw wakisi. Mä diccionariorjamajja, Pablojj griego arut mä aru (anazōpyréō) apnaqkäna ukajja, “wasitat naktayaña, nina naktañapatak phuskataña” sañwa muni. Mä arunjja, Timoteorojj ganasampi, kusisit chuymampi trabajim sasaw Pablojj saskäna. “Lurañanakam taqe chuyma phoqam” siskaspas ukhamänwa. Jiwasanakajj ukhamarakiw Diosarojj taqe chuyma serviñatak chʼamachasiñasa.

‘JUMAR KATUYATÄKI UKJJA SUM CUIDAM’

Timoteojj munat amigopan cartap liytʼaskakïna ukhajja, wali chʼamañchtʼkir arunakwa jikjjatarakïna, ukaw Diosar sum serviñatak yanaptʼäna. Pablojj akham sasaw jupar qellqäna: “Kunatï jumar katuyatäki ukjja, espíritu santon yanaptʼapampi sum cuidam, uka espíritu santojj taqe jiwasampïskiwa” sasa (2 Tim. 1:14). ¿Kunas jupar katuyatäna? Uka versículo nayrajja, Pablojj ‘cheqa yatichäwinakatwa’ parläna, mä arunjja Qellqatanakan jikjjataski uka cheqa yatichäwinakänwa (2 Tim. 1:13). Timoteojj cristianjamajja, kunatï cheqäki ukwa jilat kullakanakarusa, yaqha jaqenakarus yatichañapäna (2 Tim. 4:1-5). Jupajj Diosan ovejanakapar awatiñatak jilïr irpirit uttʼayatarakïnwa (1 Ped. 5:2). ¿Kunjamsa Timoteojj kunatï jupar katuyatäkäna, mä arunjja kunatï cheqäki uk cuidaspäna? Jehová Diosan espíritu santopan yanaptʼapampi Diosan Arupan yanaptʼapampiw cuidaspäna (2 Tim. 3:14-17).

Jichha tiemponjja, jiwasarojj ukhamarakiw kunatï cheqäki uk jaqenakaru yatiyañasatak confiyistu (Mat. 28:19, 20). Jaqenakar yatichktan uka cheqa yatichäwinakajj wali valoraniwa, uk janipuniw armañasäkiti. Ukatakejja, sapüruw Diosar mayisiñasa, Diosan Arupatsa yatjjatañasaraki (Rom. 12:11, 12; 1 Tim. 4:13, 15, 16). Inas jumajj congregacionan jilïr irpirïsta, jan ukajj precursorästa. Ukham suma luräwi katoqasajj humilde chuymanïñasawa, Diosar confiyañasarakiwa. Ukhamajja, kuntï katoqktan uktï wali valoranit uñjstan Jehová Diosarus confiyarakstan ukhajja, cuidañäniwa.

“SUMA PHOQERI CHACHANAKAR YATICHAM”

Kuna luräwinaktï Timoteojj katoqkäna ukanakat mayajj yaqhanakar yatichañänwa. Ukatwa Pablojj jupar akham säna: “Kunanaktï nayar parlir istʼkista [...] ukanakjja, suma phoqeri chachanakar yaticham, ukhamatwa jupanakajj yaqhanakar yatichañatakejj suma wakichtʼatäpjjani” sasa (2 Tim. 2:2). Timoteojj kunanaktï yateqkäna taqe ukanak mayninakar yatichañapatakiw Pablojj jupar amtayaskäna. Jilïr irpirinakajj congregacionan ukham yatichañatakiw chʼamachasipjjañaparaki. Mä jilïr irpirejja, kunjamsa luräwinak sum phoqaña uk yatisajj janiw jupa sapatakik imaskiti. Jan ukasti mayninakarojj yatichiwa, ukhamat mayninakajj uk sum lurapjjañapataki. Mayninakajj nayat sipan jukʼamp sum lurañ yatisajj jiskʼachapjjetaspawa, sasajj janiw ajjsarayaskiti. Jan ukasti mayniru yatichkasajj kunjamsa lurañapa ukjja taqpachwa yatichi. Jupanakan suma amuytʼasir cristianöpjjañapa, Diosar serviñan nayrar sartapjjañapwa munaraki. Ukhamatwa uka ‘suma phoqeri chachanakajj’ congregacionan jukʼamp sum yanaptʼapjjani.

Timoteojj Pablot katoqkäna uka cartjja, wali valoranitwa uñjäna. Jupajj kutin kutinwa Pablon ewjjtʼanakap liypachäna, kunjamsa ukarjam luraspa uksa lupʼirakpachänwa.

Jiwasajj uka ewjjtʼanakarjamaw lurañ munaraktanjja. ¿Kunjamsa uk lursna? ‘Kuntï Diosat katoqktan uk ninäkaspas ukham jukʼamp aqtayañatakiw’ chʼamachasiñasa. Kunatï cheqäki uk sumwa cuidañasa, yatktan uksa mayninakar taqpach yatichañatakiw chʼamachasiñasaraki. Ukhamatwa kuntï Pablojj Timoteor ewjjtʼkäna ukarjam kunatï lurañasäki uk phoqañäni, Diosarus sum servirakiñäni (2 Tim. 4:5).