¿Diosajj oracionanakam istʼpachati?
Jumajj oraskta ukhajj ¿cheqapunit Diosajj istʼpachätam?
¿BIBLIAJJ KAMSISA?
Diosajj istʼasktamwa. Bibliajj akham siwa: “Tatitojj artʼasirinakapan jakʼapankaskiwa, taqpach chuymamp jupat artʼasirinakan jakʼapankiwa [...], arnaqasitanakap [istʼarakiwa]” sasa (Salmo 145:18, 19).
Diosajj jupar orasiñamwa muni. Bibliajj akham siwa: “Taqe llakinakamjja Diosaru oracionan yatiyapjjam, taqe chuym ruwtʼasisa yuspärasisa jupar oración lurapjjam” sasa (Filipenses 4:6).
Diosajj cheqapuniw jumat llakisi. Diosajja, kuna problemanakamatï utjktam, kunanakatï llakisiytam ukanak sum yati, yanaptʼañwa munaraktamjja. Bibliajj akham siwa: ‘Taqe llakinakam jupan amparapar katuyam, jupajj jumat wal llakisi’ sasa (1 Pedro 5:7).