¿Kunjamsa Biblia liyisa chʼamañchtʼassna?

1. ¿Jehová Diosan servirinakapajj kuna jan walinakansa uñjastanjja?

¿JAN walinti uñjastan? Inas congregacionankir mä jilatasa jan ukajj kullakas chuym ustʼaychistu (Sant. 3:2). Jan ukajj trabajonkiri, escuelankir compañerosaw Jehová Diosar servitasat burlasistaspa (1 Ped. 4:3, 4). Jan ukajj familiasaw tantachäwinakar sarañata, predikir sarañat jarkʼistaspa (Mat. 10:35, 36). Mä jan waltʼäwitï wal tʼaqesiyaskchistu ukhajja, Diosar serviñajajj janiw wakisjjaspati sasin amuyañjamäspawa. Ukampis akwa amtañasa: kuna jan waltʼäwinsay uñjaskchiñänejja, Jehová Diosaw aguantañatakejj yatiñsa, chʼamsa churistani.

2. Romanos 15:4 textorjamajja, ¿Biblia liyiñajj kunjamsa yanaptʼistaspa?

² Jehová Diosajja, kunjamsa jiwasjam pantjasir jaqenakajj jan walinak aguantapjjäna ukanakwa Bibliar qellqayäna. Ukjja, jupanakat yateqasiñasatakiw qellqayäna. Ukwa apóstol Pablojj Romanos 15:4 (liytʼañataki) texton Diosan amuytʼayatajj qellqäna. Ukhamajja, uka sarnaqäwinak liytʼañajj chuymachtʼistaspawa, jutïr uru suytʼañatakis yanaptʼarakistaspawa. Ukampis askinak apsuñatakejj janiw Biblia aleqak liytʼañasäkiti. Kuntï liyktan ukajj amuyus cambiañapataki, chuymasar purtʼañapatakiw chʼamachasiñasa. Sañäni, kunjamsa mä jan waltʼäwir atipjsna uk yatiñ munstan ukhajja, akanakwa lurañasa: 1) orasiñasawa, 2) niyas uñjksna ukhamwa amuytʼañasa, 3) lupʼiñasawa, 4) kuntï yateqktan ukarjamaw lurañasaraki. Kunjamsa uk lursna ukanakwa jichhajj mayat may yatjjataskañäni.b Ukatsti, ukarjamaw David reyitsa, apóstol Pablotsa yatjjatarakiñäni.

3. Biblia janïr liytʼkasajja, ¿kunsa lurañasa, ukat kunatsa?

³ 1) Orasiñasawa. Biblia janïr liytʼkasajja, sum amuytʼañatakejj Jehová Diosaruw yanaptʼa mayisiñasa. Sañäni, mä problema askichañatak ewjjtʼanak thaqaskstan ukhajja, Diosaruw uka ewjjtʼanak Biblian jikjjatañatakejj yanaptʼa mayisiñasa, ukhamat suma amtanakar puriñataki (Filip. 4:6, 7; Sant. 1:5).

4. ¿Biblian mä sarnaqäwip liykasajj kunsa lurañasa?

⁴ 2) Niyas uñjksna ukhamwa amuytʼañasa. Niyas uñjksna ukham amuytʼañajja, Diosan mä suma regalopawa. Ukhamajj Biblian mä sarnaqäwi liykasajja, niyas ukanak uñjksna, jiwasas jupäksna ukhamwa amuytʼañasa. Kunanaktï jupajj uñjkäna uk uñjañataki, kunjamas jikjjatasïna uk amuyañatakiw chʼamachasiñasa. Ukham lurañäni ukhajja, wali askinakwa yateqañäni.

5. ¿Lupʼiñajj kunasa, ukat kunas lupʼiñatakejj yanaptʼistaspa?

⁵ 3) Lupʼiñasawa. Lupʼiñajja, kuntï liyktan ukanakat sum amuykiptʼañawa, kunsa ukampejj yatichañ munistu ukanak amuykiptʼañarakiwa. Ukatjja, amuyunakas mayachthapiñatakiw lupʼiñajj yanaptʼarakistu. Ukhamatwa kuna toqetsa mä yatichäwejj parlaski uk sum amuytanjja. Biblia liyisin jan lupʼiñajja, mesa patjjan jaratatat mä rompecabeza aleqak uñchʼukiñampi sasiwa. Ukampis lupʼiñajja, uka rompecabeza sum armthapiñampi sasiwa, ukhamat kunas utji uk sum uñjañataki. Lupʼiñatakejja, akham jisktʼanakar qhanañchañaw yanaptʼistaspa: “¿Problemap askichañatakejj kunsa uka jaqejj luräna? ¿Kunjamsa Jehová Diosajj jupar yanaptʼäna? Biblian qellqat sarnaqäwinakat yateqawaykta ukajj ¿kunjamsa jan walinakan uñjaskä ukhajj aguantañatak yanaptʼitaspa?” sasa.

6. ¿Kunatsa kuntï Bibliat yatjjatktan ukarjam lurañasa?

⁶ 4) Kuntï yateqktan ukarjamaw lurañasaraki. Maynejj kuntï Bibliat yateqki ukampis jan ukarjam lurki ukhajja, chʼalla patjjar utachasiri jaqempi sasiwa. Jupajj inamayakiw wal trabaji sasaw Jesusajj säna. ¿Kunatsa? Umajj wal sartanini thayas wali chʼamamp thaytʼanirakini ukhajja, utajj allthaptjjaniwa (Mat. 7:24-27). Jiwasatï orasiñäni, niyas uñjksna ukham amuytʼañäni, lupʼirakiñäni, ukampis ukarjam jan lurkañäni ukhajja, ukhamarakiw chʼamachasitasajj inamayakïni. Problemanakan uñjaskañäni, arknaqata uñjaskañäni ukhajja, Diosarojj jukʼakwa confiyjjañäni. Ukampis, jiwasatï Bibliat yatjjatasin ukarjam lurañäni ukhajja, suma amtanakaruw puriñäni, sumakiw jikjjatasiñäni, Jehová Diosarus jukʼampiw confiyarakiñäni (Is. 48:17, 18). Jichhajja, David reyin sarnaqäwipat kunsa yateqassna, ukwa uka pusi yanaptʼanakarjam yateqaskañäni.

¿KUNSA DAVID REYIT YATEQSNA?

7. ¿Khititsa yatjjataskañäni?

⁷ ¿Mä amigosasa jan ukajj familiasas jan wal lurirïstuti? Ukhamächi ukhajja, David reyin Absalón yoqapat yatjjatañaw yanaptʼistaspa, jupajj awkip contraw saytʼäna, reinop apaqañwa munarakïna (2 Sam. 15:5-14, 31; 18:6-14).

8. ¿Kunsa Jehová Diosamp yanaptʼatäñatakejj lurañasa?

⁸ 1) Orasiñasawa. Janïr uka sarnaqäwit Biblian liytʼkasajja, kunjamas jan wal luratajj jikjjatastan ukwa Jehová Diosar qhan yatiyañasa (Sal. 6:6-9). Ukatjja, suma amtar puriñatakejj Biblian wiñay yatichäwinakap jikjjatañatakiw Diosar yanaptʼa mayisiñasa.

9. ¿Kunas Davidampir Absalonampir pasäna?

⁹ 2) Niyas uñjksna ukhamwa amuytʼañasa. Absalón chachajj kunsa luräna uk amuytʼañäni, kunjamsa ukajj David reyir jan waltʼayäna uk uñjksnas ukham amuytʼarakiñäni. Absalonajj jaqenakamp sumat uñjatäñatakejj walja maranakaw chʼamachasïna (2 Sam. 15:7). Horasätap amuyasajja, uñaqerinakwa Israel markpachar khitäna, ukhamat jaqenakajj reyirjam jupar katoqañapataki. Ahitofel chacharus David contra saytʼañapatak iyawsayarakïnwa, jupajj Davidan mä suma amigopänwa, ewjjtʼiriparakïnwa. Ukatjja, Absalonajj jupa pachpaw reyit uttʼayasïna, David awkipar katuntaña, jiwayañwa munarakïna, inas uka pachajj Davidajj wali usuntatäskchïna (Sal. 41:1-9). Davidasti ukanak yatisajj Jerusalén markaruw escapjjäna. Uka qhepatjja, Absalonan ejercitopampi Davidat jan jitheqtiri ejercitopampiw nuwasipjjäna. David contra saytʼiri Absalonan ejercitopajj atipjataw uñjasïna, juparojj jiwayapjjarakïnwa.

10. ¿Jan walin uñjasisajj kunsa David reyejj luraspäna?

¹⁰ Jichhajja, kunjamas Davidajj jikjjataspachäna uk niyas uñjksna ukham amuytʼañäni. Jupajj Absalonar wal munasïna, Ahitofel chacharus confiyarakïnwa. Ukhamäkchïnsa, panpachaniw jupa contra saytʼapjjäna, chuymap wal ustʼayapjjäna, jiwayañ kunwa munapjjarakïna. Davidajja, mayni amigonakajajj Absalonampiw mayachasjjarakpacha sasaw jupanakar jan confiyjjaspänti. Jupa pachpatak llakisisajj sapakiw yaqha markar escapañ munjjaspäna. Jan ukajja, llakitäsajj qʼal aynachtʼaspäna. Ukampis janiw ukanak lurkänti. Antisas uka jan waltʼäwir atipjänwa. ¿Kunjamsa uk luräna?

11. ¿Kunsa David reyejj jan walin uñjasisajj luräna?

¹¹ 3) Lupʼiñasawa. ¿Kunsa Davidat yateqsna? Ukatakejj akhamwa jisktʼassna: “¿Kunsa Davidajj jupa pachpar yanaptʼasiñatak luräna?” sasa. Davidajj ajjsaraspänwa, jan sum amuytʼasisajj jankʼakirakiw jan wali amtanakar purispäna, ukampis janiw uk lurkänti. Antisas Jehová Diosaruw oracionan yanaptʼa mayisïna, amigonakaparus yanaptʼa mayirakïnwa. Mä amtar purisajja, ratukiw ukarjam luräna. Wali llakitäkchïnsa, mayninakar confiyaskakïnwa, janirakiw uñisiñamp apayaskänti. Jehová Diosarusa, amigonakaparus confiyaskakïnwa.

12. ¿Kunjamsa Diosajj Davidar yanaptʼäna?

¹² ¿Kunjamsa Jehová Diosajj Davidar yanaptʼäna? Jiwasatï Davidat yatjjatañäni ukhajja, kunjamsa Jehová Diosajj uka jan waltʼäwi aguantañapatak chʼam churäna ukwa yateqañäni (Sal. 3:1-8; pʼeqeñchäwipa). Kuna amtanakarutï Davidajj purkäna ukanak Diosajj bendisïnwa, jan jitheqtir amigonakapajj jupar jarkʼaqañatak nuwaskäna ukanakarus Diosajj yanaptʼänwa.

13. Maynitï jan wal luristani ukhajja, ¿kunjamsa Davidat yateqassna? (Mateo 18:15-17).

¹³ 4) Kuntï yateqktan ukarjamaw lurañasaraki. Akham jisktʼasiñäni: “¿Kunjamsa Davidat yateqasirista?” sasa. Mä problema askichañatakejj jankʼakiw kuns lurañasa. Wakisini ukhajja, kuntï Jesusajj Mateo capítulo 18 ukan ewjjtʼkäna ukarjamaw askichsna, jan ukajj uka ewjjtʼan yatichäwiparjamaw luraraksna (Mateo 18:15-17 liytʼañataki). Ukampis coleratäktan ukhajj janiw jankʼak mä amtar puriñasäkiti. Jehová Diosar paciencia, yatiña mayisiñasawa, ukhamat uka problem askichañataki. Amigonakasarus confiyaskakiñasawa, yanaptʼapsa katoqasiñasawa (Prov. 17:17). Jukʼampisa, Jehová Diosajj Arupan ewjjtʼanak churkistu ukarjamaw lurañasa (Prov. 3:5, 6, TNM).

¿KUNSA APÓSTOL PABLOT YATEQSNA?

14. ¿Kunapachas 2 Timoteo 1:12-16 ukat 4:6-11, 17-22 textonak liytʼañajj chʼamañchtʼistaspa?

¹⁴ ¿Jehová Diosar serviñti familiasajj jarkʼistu? Jan ukajj ¿kawkjantï jakasktan ukan predicañajj mä jukʼa jan ukajj qʼala jarkʼatati? Ukhamächi ukhajja, 2 Timoteo 1:12-16 ukat 4:6-11, 17-22 textonak liyiñaw chʼamañchtʼistaspa.c Pablojj carcelankkasaw uka textonak qellqäna.

15. ¿Kunsa Jehová Diosar mayissna?

¹⁵ 1) Orasiñasawa. Janïr uka textonak liytʼkasajja, kunanakas llakisiyistu, kunjamas jikjjatastan ukanak Jehová Diosar qhan yatiyañäni. Ukatjja, kunanakas jiwasar yanaptʼistaspa uka ewjjtʼanak Pablon sarnaqäwipan jikjjatañatakejj Jehová Diosar yanaptʼa mayisiñäni.

16. ¿Kunjamansa Pablojj uñjasïna?

¹⁶ 2) Niyas uñjksna ukhamwa amuytʼañasa. Jiwasas Pablöksna ukham amuytʼañäni. Roma markan carcelan llawintatäsktanwa. Nayrajj carcelankchiyätansa, jichha kutin jiwayapjjestaniwa. Yaqhep compañeronakasajj jaytanukuwayjjestuwa, wali qaritarakïtanwa (2 Tim. 1:15).

17. ¿Kunanaksa Pablojj luraspäna?

¹⁷ Pablojja, kunanaksa nayrajj luräna ukat lupʼisajj akhamwa amuyaspäna: ‘Janitï Diosar taqe chuyma servkiriskäyätjja, inas carcelan jistʼantat jan uñjaskiriskchiyätti’ sasa. Asia provinciankirinakan jupar jaytanukutapatjja, jupanakatak wal coleraspäna, mayni amigonakaparus janiw confiyjjaspänti. Ukampis janiw ukanak lurkänti. ¿Kunatsa amigonakaparusa Jehová Diosarus confiyaskakïna?

18. ¿Kunsa Pablojj jan walin uñjasisajj luräna?

¹⁸ 3) Lupʼiñasawa. Akham jisktʼasiñäni: “¿Kunsa Pablojj jupapachpar yanaptʼasiñatakejj luräna?” sasa. Jiwañap jakʼankjjatap yatkasasa, jakäwipan Jehová Diosar jachʼañchañaw nayrankäna. Mayninakar kunjamat chʼamañchtʼañatakis chʼamachasiskakïnwa, Jehová Diosarus taqe chuyma confiyasaw orasiskakïna (2 Tim. 1:3). Yaqhepajj jupar jaytanukupkäna ukjjat janiw sint lupʼkänti, antisas jan jitheqtir amigonakapajj kunjamsa munasiñampi yanaptʼapjjäna ukat wal yuspäräna. Diosan Arupatsa yatjjataskakïnwa (2 Tim. 3:16, 17; 4:13). Jukʼampisa, ‘Jehová Diosasa, Jesusas nayar munasipjjetuwa, janiw jaytanukupkituti’ sasaw confiyäna, ‘jan jitheqtas servitajats premio churapjjetani’ sasaw confiyarakïna.

19. ¿Kunjamsa Jehová Diosajj Pablor yanaptʼäna?

¹⁹ Pablojj cristianötapat arknaqataw uñjasiñapäna, Diosajj uk yatiyjjänwa (Hech. 21:11-13). ¿Kunjamsa Diosajj Pablor yanaptʼäna? Mayisitanakapar contestänwa. chʼamañchtʼarakïnwa (2 Tim. 4:17). Jehová Diosajja, ‘premio katoqañatak wal chʼamachasitamat katoqätawa’ sasaw Pablor yatiyäna, jupat jan jitheqtir amigonakapampiw Pablor yanaptʼayarakïna.

20. 1) Romanos 8:38, 39 textorjamajja, ¿kunatsa Pablojj problemanakan uñjaskasas Diosar jan jitheqtas serviskakïna? 2) ¿Kunjamsa Pablot yateqassna?

²⁰ 4) Kuntï yateqktan ukarjamaw lurañasaraki. Akham jisktʼasiñäni: “¿Kunjamsa Pablot yateqasirista?” sasa. Apóstol Pablorjamarakiw Diosar confiyatasat jan waltʼayañatak arknaqapjjestani, uk yattanwa (Mar. 10:29, 30). Jan waltʼäwinakan uñjasisajj jan jitheqtas serviskakiñatakejja, Jehová Diosaruw oracionan yanaptʼa mayisiñasa, Arupatsa jan jaytasaw yatjjatañasa. Jehová Diosar jachʼañchañaw jukʼamp importantejja, janiw ukat armasiñasäkiti. Jupajj janipuniw jaytanukkistaniti, janirakiw ni kunas jiwasar munasiñapatak jarkʼkaniti, ukanakat jan pächasiñäniti (Romanos 8:38, 39 liytʼañataki; Heb. 13:5, 6).

BIBLIAN PARLKI UKA YAQHA CHACHANAKAMPIT WARMINAKAMPIT YATEQASIÑÄNI

21. ¿Kunas Aya ukat Hector jilat kullakarojj problemanakar saykatañatak yanaptʼäna?

²¹ Kunjamansay uñjaskchiñänejja, Biblian parlki uka sarnaqäwinakajj chʼamañchtʼistaspawa. Sañäni, Japón markankir Aya sat precursorarojja, Jonás profetat yatjjatañaw carritomp jan ajjsaras predicañatak yanaptʼäna. Indonesia markankiri, Hector sat waynan awk taykapajj janiw Testigöpkiti, ukhampachas Jehová Diosar serviskakiwa. Juparojj Rut warmin sarnaqäwipaw Jehová Diosat jukʼamp yatjjatañataki, Jupar serviskakiñatak yanaptʼarakïna.

22. Videonak uñtkasa, Bibliat liytʼat dramanak istʼkasa jan ukajj Jupanakjam iyawsäwinïpjjañäni sat libro liytʼkasajj ¿kunanakas uk sum amuytʼañatak yanaptʼistani?

²² ¿Biblian parlki uka chʼamañchtʼkir sarnaqäwinak kawkinsa jikjjataraksna? Videonakampi, Bibliat liytʼat dramanakampi Jupanakjam iyawsäwinïpjjañäni siski uka librompiw Biblian qellqatäki uka sarnaqäwinak jukʼamp sum amuytʼañatak yanaptʼistu.d Ukanak janïr uñtkasa, janïr istʼkasa, jan ukajj janïr liytʼkasajja, Jehová Diosaruw kuna yatichäwinakas yanaptʼistaspa uk jikjjatañatak oracionan mayisiñasa. Ukatjja, Diosan uka serviripäksnas ukhamwa amuytʼañasa. Kunsa luräna, kunjamsa Diosajj problemanakapar saykatañatak yanaptʼäna ukwa lupʼiñasaraki. Ukjjarojja, kuntï yateqtan ukarjamaw lurarakiñasa. Jiwasar yanaptʼatapat Jehová Diosaruw yuspärañasaraki. Mayninakar chʼamañchtʼasa yanaptʼasaw Jupar yuspäratas uñachtʼaysna.

23. Isaías 41:10, 13 textorjamajja, ¿kun lurañsa Jehová Diosajj arsuwayi?

²³ Supayan apnaqat aka pachan jakañajj chʼamakiwa, ukatwa awisajj jan kuns lurañ puedjjsnati (2 Tim. 3:1). Ukampis janiw llakisiñasäkiti ni ajjsarañasäkisa. Kuna jan walinakansa uñjastan uk Jehová Diosajj sum yatiski. Yanaptʼa munkañäni ukhajja, Jupaw atipjiri kupi amparapamp katjjäsistani, ukwa Jupajj arsuwayi (Isaías 41:10, 13 liytʼañataki). Jehová Diosajj yanaptʼapunistaniwa, Bibliajj kunayman problemanakar saykatañatakiw chʼam churarakistani.