1921 Patak Maranak Nayrajj Kunas Pasäna

“INGLÉS arut mistkäna uka Yatiyañataki 1 de enero, 1921 revistanjja, Bibliat Yatjjatirinaka sasin uñtʼatäpkäna ukanakarojj akham sasaw jisktʼasïna: ‘¿Aka marajj kuna trabajo lurañsa suysna?’” sasa. Uka jisktʼar jaysañatakejj Isaías 61:1, 2 textwa aytäna, ukanjja “Jehová Diosaw llampʼu chuymaninakar suma yatiyäwinak yatiyañatakejj nayar ajllisitu. [...] Jehová Diosamp katoqatäñ marat yatiyañataki, Diosasan vengasiñ urupat yatiyañataki” sasaw qhanañchi, ukaw jupanakarojj predicañatak khitatäpjjatap amtayäna.

JAN AJJSARTʼAS PREDIKIRINAKA

Uka mandato phoqañatakejja, Bibliat Yatjjatirinakajj jan ajjsartʼirïpjjañapänwa. Jupanakajj ‘llampʼu chuymaninakaruw suma yatiyäwinak’ yatiyapjjañapäna, jan wali jaqenakarusti ‘Diosan vengasiñ urupatwa’ yatiyapjjañaparakïna.

Canadá markan jakkäna uka John Hoskin sat jilatajja, jan ajjsartʼasaw jarkʼata uñjaskasas predicäna. 1921 mara qalltanjja, mä metodista jaqempiw parläna, akham sasaw parlañ qalltäna: “Jumampejj Bibliat wali sumwa parltʼassna. Janis yaqhepanak mä pachpa amuykchiñänejja, sumakiw parltʼasiñ tukuyjjsna, ukatjja sumwa apasiskaksna” sasa. Ukampis janiw ukhamäkänti. Jilatajj akham siwa: “Mä qhawqha minutonakakiw jupamp parltʼasipkayäta, jupajj mayakwa punkup wali chʼamampi jaqkatanïna, punkun vidriopajj jaqstaniniwa sasaw amuyayäta” sasa.

Uka metodista chachajj “Diosar jan uñtʼapki ukanakar parlanim” sasaw toqjäna. Jilatajj amukiw aguanttʼasïna, ukampis sarjjasajja jupa pachpajj akham sasïnwa: “¡Ukhamaraks lurasktjjä!” sasa.

Qhepürojj uka chachajj iglesiapan yatichkasajja, jilatat jan walinak parlaskakïnwa. Hoskin sat jilatajj uka toqet akham siwa: “Iglesiapankirinakarojj nayat akham sänwa: ‘Jupjam kʼarinak parlir jaqejj janipuniw aka markarojj khitis jutkiti, juparojj jiwayasiñapawa’” sasa. Ukampis uka arunakajj janiw jilatarojj akchʼas ajjsaraykänti. Jilatajj uka markan predicaskakïnwa, walja jaqenakampiw parläna. Jupajj akham saskakiwa: “Janipuniw utat uta yatiyasajj ukham kusisita yatiyirïkti. Yamas yaqhepanakajj ‘Diosatak trabajiskatam yatipjjtwa’ sapjjetänwa. Kunatï jakañatak munaski uk churañsa munapjjetänwa” sasa.

BIBLIAT SAPAK YATJJATAÑA, FAMILJAM BIBLIAT YATJJATAÑA

Jaqenakaru Bibliat sum amuyañ yanaptʼañatakejja, Bibliat Yatjjatirinakajj jisktʼanakampi qhanañchäwinakampwa ¡Sartapjjañäni! sasin jichhajj uñtʼatäjje uka revistan apsupjjerïna. “Estudio bíblico para los jóvenes” (Juvenile Bible Study) sasin uñtʼatäkäna uka programanjja, wayn tawaqonakatakejj jisktʼanakaw utjäna, uka jisktʼanakampiw awk taykanakajj jupanakampi parltʼapjjaspäna. Awk taykanakajja, “uka jisktʼanakwa wawanakapar jisktʼapjjañapäna, ukatsti uka jisktʼanakan qhanañchäwip Biblian jikjjatapjjañapatakiw yanaptʼapjjañaparakïna”. Uka jisktʼanakat mayajja, “¿Bibliajj qhawqha libronakanisa?” sänwa, faciläkis ukanakakwa yatichäna. Ukanakat yaqhasti akham sarakïnwa: “¿Cheqpach cristianonakajj taqenit arknaqatäñ suyapjje?” sasa, ukajja wayn tawaqonakarojj jan ajjsaras predicapjjañapatakiw wakichtʼäna.

“Estudios avanzados sobre el Plan Divino de las Edades” (Advanced Studies in the Divine Plan of the Ages) sat programanjja, Bibliat jukʼamppach yatjjapjjäna ukanakatakejj jisktʼanakampi Bibliarjam apstʼat qhanañchäwinakampiw utjarakïna. Uka jisktʼanakan qhanañchäwipjja, Estudios de las Escrituras sat libron nayrïr tomopanwa jikjjatapjjaspäna. Liyipkäna ukanakat waljaniruw ukajj yanaptʼawayäna. Ukampis The Golden Age 21 de diciembre, 1921 (jichhajj uka revistajj ¡Sartapjjañäni! sasin uñtʼatäjjewa) revistanjja, uka paypach programanakajj janiw jukʼamp utj-jjaniti sasaw yatiyasïna. ¿Kunatsa mä akatjamat cambiäna?

MÄ MACHAQ LIBRO

*El Arpa de Dios* sat libro, inglés aruta.

Paginanak chimptʼañataki, ukanjja libron kawkïrinaksa liyiñapa ukaw qellqtʼatäski.

Jisktʼanakan tarjetanaka.

Diosan markap pʼeqtʼasipkäna uka jilatanakajja, machaqanakan Bibliat jukʼamp sum yatjjatapjjañapatakejja, temat temwa Bibliat yatjjatapjjañapa sasaw amuytʼapjjäna. Ukatsti noviembre, 1921 maranwa The Harp of God (español arutjja, El Arpa de Dios sat sutimpi uñtʼatawa, ukajj 1925 maranwa apsusïna) sat libro apsupjjäna. Uka libro katoqasirinakajja, Bibliat yatichayasiñatakiw qellqayasipjjerïna, ukajj The Harp Bible Study Course sasin uñtʼatänwa, mayni pachpaw uka librompejj Bibliat yatjjataspäna. Bibliat ukham yatjjatasajja, “Diosajj jaqenakar wiñay jakaña churañ amtatapwa yateqapjjäna”. ¿Kunjamas ukajj lurasïna?

Uka libro katoqasirinakarojja, mä jiskʼa tarjetampwa churapjjerïna, ukanwa kawkïr paginanaksa libron liyiñapa ukajj qhanañchasïna. Maya semanasti, kuntï liykäna ukarjam apstʼat walja jisktʼanakani yaqha tarjetwa churapjjarakirïna, tarjeta tukuyarojja maya semanatakejj kawkïrinaksa liyiñaparaki ukaw qhanañchasirakïna.

12 semananakaw Bibliat yateqerejj mä tarjeta sapa semana uka jakʼankir congregacionat mä correo toqe katoqerïna. Uka tarjetanakjja, edadani jilat kullakanaka, jan ukajj utat uta jan sarañ puedipki ukanakaw apayapjjerïna. Sañäni, Millvale (Pensilvania, Estados Unidos) sat jiskʼa markankiri, Anna Gardner sat kullakajj akham siwa: “Uka libron mistsutapajja, Thayle sat usuta kullakajarojj jukʼamp predicañatakiw yanaptʼawayi, walja jisktʼanakani tarjetanak sapa semanaw apayäna” sasa. Yateqerejj uka librot yatjjatañ tukuyjjerïna ukhajja, jilat kullakanakaw Bibliat jukʼamp yatjjatañ yanaptʼañatakejj visitir sarapjjerïna.

Thayle Gardner kullakaw silla de ruedapankaski.

WALJA TRABAJOW UTJASKÄNA

Uka mara tukuyarojja, Joseph Rutherford jilatajj taqe congregacionanakaruw mä carta apayäna. Ukan akham sänwa: “Aka marajja, nayra maranakat sipansa jukʼamp jaqenakaruw Diosan Reinopat predicasiwayi, yanaptʼasiwayaraki” sasa. Jutïrit amuytʼasajja akham sarakïnwa: “Waljaw lurañajj utjaski. Ukhamajj predicapjjañapatak mayninakar chʼamañchtʼapjjam” sasa. Bibliat Yatjjatirinakajja ukar istʼapjjänwa. Ukatwa nayra maranakat sipansa, 1922 maran jan ajjsartʼasa Diosan Reinopat yatiyapjjäna.

Jan ajjsartʼir amigonaka

Bibliat Yatjjatirinakajja, maynit maynikam yanaptʼasisaw munasiñ uñachtʼayasipjjäna. Jupanakajj ‘jan walinakan’ uñjaskasas jan ajjsartʼir amigösipkakïnwa, ukwa jichhajj uñjaskañäni (Prov. 17:17).

Martes 31 de mayo, 1921 maranjja, Tulsa (Oklahoma, Estados Unidos) markankir chʼiyar jañchin mä chacharojj ‘janqʼo jañchini mä warmir jan wal lurtajja’ sasin juchañchasaw carcelar jistʼantapjjäna. Uka pasatatjja, 1.000 jila janqʼo jañchini chachanakaw chʼiyar jañchin mä jiskʼa grupo jaqenakamp nuwasipjjäna. Uka qhepatsti, Greenwood sat cheqan jilapartejj chʼiyar jañchininakajj jakapkäna ukakamaw nuwasiñajj ratuk purïna. Ukanjja 1.400 jila utanaka, negocionakwa saqueyjapjjäna, ninampi phichantapjjäna. 36 jaqenakaw jiwapjje sasaw yatiyäwinakan yatiyasïna, ukampis janiw ukhanik jiwapkpachänti, inas mä 300 jaqenak jiwapjjchïna. Uka jan waltʼäwirojj Masacre Racial de Tulsa sasaw uñtʼasïna.

Greenwood cheqan jakaskäna uka Richard Hill (Bibliat Yatjjatiri) sat jilatajj chʼiyar jañchiniwa, kunas ukan pasäna uka toqet akham siwa: “Jan waltʼäwi utjkäna uka arumajja, Bibliat yatjjatañatakejj kunjamtï tantachasipjjerïkta ukham tantachasisipkakiyätwa. Tantachäw tukuyatarojja, uka marka taypin armanak disparir istʼapjjta, disparapjjatapajj ikintawayjjapjjta ukhakamas istʼasiskakïnwa” sasa. Qhepüru alwasti, mä arunjja 1 de junio phajjsejj jukʼamp jan waltʼäwiw utj-jjäna: “Yaqhepanakajj utaruw jutapjjäna, ‘jumanakatï jarkʼaqasiñ munapjjsta ukhajja, Centro de Convenciones sat cheqaruw añchhitpach sarjjapjjañama’ sasaw yatiyapjjetäna” sasa. Richard jilatampi esposapampi phesqa wawanakapampejj jankʼakiw Centro de Convenciones de Tulsa ukar escapapjjäna. Ukanjja jan nuwasiñ utjañapatakejj ejercitow gobiernon khitanitajj niya 3.000 chʼiyar jañchini chachanakaru, warminakaru jarkʼaqapjjäna.

Niya ukharakiw Arthur Claus janqʼo jañchini jilatajj Richard jilatar yanaptʼañatak jan ajjsartʼasa utapar saräna. Jupajj akham siwa: “Greenwood cheqan utanak saqueyjasipki, ninampiw phichantasipki sasin istʼasajja, Richard munat amigojajj kunjamäskpachasa sasin jankʼakiw uñjir sarta” sasa.

Arthur Claus sat jilatajj 14 wayn tawaqetanakaruw El Arpa de Dios sat librompejj Bibliat yatichawayi.

Richard jilatan utapar purisajja, jilatan janqʼo jañchini vecinopampiw jikisïna, jupajj rifle aptʼatänwa. Richard jilatan amigoparakïnwa, ukatwa saqueyjirïpachaw sasin amuyasajj Arthur jilatarojj “¡¿kunsa uka jaqen jardinapan lurta?!” sasin arnaqäna.

Arthur jilatajj akham siwa: “Kuntï siskayäta ukatï jan gustkaspänjja, disparitaspänwa. ‘Richard vecinoman amigopätwa, walja kutiw visitirejj jutirïta’ sasaw sista” sasa. Arthur jilatampi uka vecinompiw jilatan utap jan saqueyjapjjañapatakejj jarkʼaqapjjäna.

Arthur jilatajja, Richard jilatampi familiapampejj Centro de Convenciones ukankaskatap yatjjänwa. Chʼiyar jañchini jaqenakajj janiw uka utat Barret sat generalan jan permisopampejj mistupkaspati sasaw maynejj jupar yatiyäna. Arthur jilatajj akham siwa: “Uka generalar jikjjatañajj janiw faciläkänti. Kunsa lurañ munayäta uk jupar sista ukhajja, akham sasaw jisktʼitu: ‘¿Jumat uka familiar cuidäta, kunatï jakañatak munaski uksa churäta?’ sasa. Jïsa, nayaw jupanakar cuidäjja sasaw taqe chuyma sayäta” sasa.

Centro de Convenciones ukat mistsupjjañapatak orden papelanëjjasajja, jankʼakiw Arthur jilatajj uka utar saräna. Purisajj mä oficialaruw churäna, jupasti wali musparataw akham säna: “¡Akajj Barret generalan firmapanirakisä! ¿Jichhürojj jumakipuniw aka lugarat maynirojj apsütajja uk yatiyätati?” sasa. Arthur jilatampi oficialampejj jankʼakiw Richard jilatampiru familiapampirojj jikjjatapjjäna. Ukatsti utapar kuttʼjjañatakejj Arthur jilatan autopar makatasaw sarjjapjjäna.

Arthur jilatajja, Richard jilatarusa familiaparusa jan kunas pasañapatakiw asegurtʼasïna. Ukham jan ajjsartʼirïtapa, munasirïtap uñjasajja, jaqenakajj wal musparapjjäna. Arthur jilatajj akham siwa: “Richard jilatan utap jarkʼaqañ yanaptʼkäna uka vecinojja, jichhajj nayrat sipansa Diosan markaparojj jukʼamp respetompiw uñj-jje. Diosan markapanjja, janiw yaqha kasta jañchinïpjjatajat uñisisipkayätti, taqenis mä igualakwa uñjasipjjayäta, ukatwa walja jaqenakajj Diosan Reinopat yatiñ munapjjäna” sasa.