Aka revista liytʼirinakan jisktʼäwinakapa
Levítico 19:16 texton ‘janiw jaqe masiman vidap contrajj saytʼasiñamäkiti’ siski uka mandatojj ¿kamsañsa muni, ukat kunsa yatichistu?
Jehová Diosajja, israelitanakarojj santo markäpjjañamawa sasaw säna. Kunjamatsa santöpjjaspa uk yanaptʼañatakejja, aka mandatwa jupanakar churäna: “Janiw jumajj markam taypinjja yaqhanakar kʼarintas sarnaqañamäkiti. Janirakiw jaqe masiman vidap contrajj saytʼasiñamäkiti. Nayajj Jehová Diosätwa” sasa (Lev. 19:2, 16).
“Contra saytʼasiña” siski uka arunakajja, kuntï hebreo arun sañ munkäna uk wali sumwa qhanañchi. Ukampis ¿kamsañsa muni? Judionakan mä libropajj akham sasaw Levítico librot qhanañchi: “Uka versiculon uka cheqapajj kamsañs muni ukajj janiw fácil amuyañjamäkiti. Hebreo arunjja, uka arunakajj ‘jakʼapan jan saytʼaña, jan ukajj jan ladopankaña’ sañwa muni. Ukampis uka arunakampejj kamsañs munaskäna uk qhanañchañajj janiw faciläkiti” sasa.
Yaqhep yatjjattʼatanakajja, uka arunakajj kuntï versículo 15 ukan siski ukamp mayachtʼatäkaspas ukham amuyapjjaraki. Uka versiculon akham siwa: “Juzgapkäta ukhajja cheqaparuw jumanakajj juzgapjjañama. Janiw jumajj mä pobre jaqerojj pobrëtap laykukejj jupar arjjatañamäkiti, janirakiw mä qamir jaqerojj qamirïtap laykukejj jupar arjjatañamäkiti. Jaqe masimarojj cheqaparuw juzgañama” sasa (Lev. 19:15). Ukhamäspa ukhajja, versículo 16 ukan jan mayni contra saytʼasiñat parlir mandatojj juicionakansa, negocionak lurañansa jan ukajj familia taypinsa, israelitanakajj cheqaparuw kuns lurapjjañapa sañwa munaspäna. Janirakiw jupan askipak thaqasakejj mayninakar engañapjjañapäkänti. Cheqas janiw ukanak lurañasäkiti. Ukampis versículo 16 ukan uñstki uka arunakajj kamsañs muni uk amuytʼañajj janiw chʼamäkiti.
Kamsis uka versiculon qalltapajj uk amuytʼañäni. Israelitanakarojj jan mayninakar kʼarintirïpjjañapatakiw Diosajj ewjjtʼi. Cheqas arunak apnaqañajj jan walinakwa utjayaspa, ukampis maynir kʼarintañajj jukʼamp jan walinakwa utjayaspa (Prov. 10:19; Ecl. 10:12-14; 1 Tim. 5:11-15; Sant. 3:6). Jilapartejja maynir jan wali jaqet uñjayañatakiw kʼarinak parlasi. Maynir kʼarintirejja, kʼarintasajj jiwañarus purtʼasiykchinejja, juparojj kʼarintaskakiniwa. Ukaw Nabot chacharojj pasäna, pä chachanakaw jupa contra kʼarinak parlapjjäna. Ukatwa janis juchanïkchïnjja, qalamp jaqjas jupar jiwayapjjäna (1 Rey. 21:8-13). Ukhamajj kunjamtï Levítico 19:16 uka tukuyar siskejja, kʼarintirejj jaqe masipan vidap contraw saytʼaski.
Maynejj uñisitap laykuw jaqe masiparojj kʼarintarakispa. 1 Juan 3:15 texton akham siwa: “Taqe khititejj jilapar uñiski ukajja, jaqe jiwayiriwa. Jumanakajj yatipjjtawa, janiw khiti jaqe jiwayiris wiñay jakañ katoqkaniti” sasa. Levítico 19:16 texton utjki uka mandato churasajja, Diosajj akham sarakïnwa: “Janiw jilamarojj chuymaman uñisiñamäkiti” sasa (Lev. 19:17).
Ukhamajj Levítico 19:16 texton utjki uka mandatojj janis añcha uñtʼatäkchejja, cristianonakatakejj wali wakiskiripuniwa. Jan wali amuyunak apanukuñasawa, janipuniw khitirus kʼarintañasäkiti. Jiwasatï maynit jan wal amuyasa jan ukajj envidiasis jupa contra saytʼañäni jan ukajj kʼarintañäni ukhajja, jupar uñisksnas ukhamäniwa. Ukampis cristianonakajj janipuniw khitirus uñisiñasäkiti (Mat. 12:36, 37).