Aka revista liytʼirinakan jisktʼäwinakapa
¿‘Sumankañsa apankirista ukham jan amuyapjjamti’ sasin Jesusajj siskäna uka arunakajj kamsañsa muni?
Mayninakamp sumankapjjam sasaw Jesusajj yatichäna. Ukampis mä kutejj akham sasaw apostolonakapar säna: “Jumanakajj sumankañsa aka oraqer apankirista ukham jan amuyapjjamti; janiw sumankañ apankti, jan ukasti espada apanta. Nayajj jaqenakpur pitthapiriw jutta. Yoqajj awkip contraw saytʼani, phuchasti taykap contraraki, yojjchʼasti suegrap contraw saytʼarakini” sasa (Mat. 10:34, 35). ¿Uka arunakajj kamsañsa muni?
Jesusajj janiw familianakar tʼaqanoqtayañ munkänti, ukampis yatichäwinakapajj familianakar tʼaqanoqtayaspänwa, uk jupajj sum yatïna. Ukhamajj Jesusan discipulopäñ munapki, bautisasiñ munapkaraki ukanakajj ak amuyapjjañapawa: Jesusan discipulopäñ amtatapajj inas familiaranakaparojj jan gustkchiniti. Awisajj inas esposopasa, jan ukajj esposapasa, jan ukajj mä familiarapas Criston kayup arkañ amtki uka contra saytʼchispa, ukaw maynir jan waltʼayaspa.
Bibliajj cristianonakar akham siwa: “Taqe jaqenakampi sumankapjjam” sasa (Rom. 12:18). Ukampis yaqhep familianakatakejja, Jesusan yatichäwinakapajj mä ‘espadampi’ sasispawa. Cheqas maynejj Jesusan yatichäwinakap katoqaski ukhajj ukaw pasi. Ukampis yaqhepajj Jesusan yatichäwinakap rechazapjjewa, yamas uka contraw saytʼapjje. Familiaranakapa, mä arunjja ‘pachpa utapankirinakaw’ Biblian yatichäwinakap yateqaskatap laykojj enemigonakapar tukupjje (Mat. 10:36).
Yaqhep jilat kullakanakajja, yaqha religionankir familiaranakapampiw jakasipjje, jupanakasti awisajj Jehová Diosampiru Jesusampirut kusisiyapjjani, jan ukajj familiaranakaparuch kusisiyapjjani ukwa ajllipjjañapa. Inas familiaranakapajj yaqhep fiestanak amtañatak obligapjjchispa. Ukhaman uñjasisajj khitirus kusisiyapjjani ukwa amtapjjañapa. Jesusajj akham sänwa: “Khititejj tataparu jan ukajj mamaparu nayat sipansa jukʼamp munaski ukajja, janiw nayatakjamäkiti” sasa (Mat. 10:37). Ukampejja, discipulonakapajj awk taykanakaparojj janis sint munasjjapjjañapäkaspa ukham janiw sañ munkänti. Jan ukasti jakäwisan kunas jukʼamp importantëñapa uk amuyapjjañapatakiw ukham yatichaskäna. Jan Testigöki uka familiarasatï Diosar jan adorañas munkchi ukhajja, juparojj munasiskakiñäniwa, ukampis Diosar munasitasaw jakäwisan nayrankani.
Familiasajj jiwas conträki ukhajj wal llakistanjja. Ukampis “khititejj tʼaqesiñ lawap jan apañ munki, nayarojj arkarakitu ukajja, janiw nayatakjamäkiti” sasin Jesusajj siskäna uka arunakatwa cristianonakajj amtastanjja (Mat. 10:38). Ukhamasti Jesusar arkañ munstan ukhajj tʼaqesiñatakejj dispuestokïñasawa, mä arunjja familiasajj jiwas contra saytʼapkani uk aguantañatakejj dispuestokïñasawa, uk cristianonakajj sum yattanjja. Ukañkamasti sarnaqatas uñjasin familiaranakasajj cambiapjjaspa, Biblian yatichäwinakap yateqañ munjjapjjaspa uk suytʼaskakiñäni (1 Ped. 3:1, 2).