“Cheqpach yatiñajj callenakanwa jachʼat arnaqasi”

1. ¿Kunjamsa walja jaqenakajj yatiñajj artʼaski ukar jichhürunakan uñjapjje? (Proverbios 1:20, 21).

WALJA lugaranakanjja, Diosan Reinopat kusisita yatiyirinakaruw callenakan uñjasi. Jupanakajj jaqenakaruw Bibliat apstʼat qellqatanak churapjje. ¿Jumajj mä kutis ukham yatiyirïtati? Ukhamtï lurstajja, Proverbios libron parlki uka uñachtʼäwitwa amuytʼpachätajja. Ukanjja walja jaqenakajj utjki uka cheqanwa yatiñajj arnaqasiski, ukhamat jaqenakajj ewjjanak istʼapjjañapataki sasaw qhanañchi (Proverbios 1:20, 21 liytʼäta). Bibliansa Bibliat apstʼat qellqatanakasansa, Jehová Diosat jutki uka ‘cheqpach yatiñaw’ utji. Wiñay jakañar apki uka thaknam sarañatakejja, jaqenakajj uka cheqpach yatiñatwa nayraqat yatjjatapjjañapa. Jaqenakajj Bibliat apstʼat qellqatanakasat mayaksa katoqtʼasipjje ukhajja, wal kusistanjja. Ukampis janiw taqpach jaqenakajj uk lurapkiti, yaqhepajj janiw kunsa Bibliat yatiñ munapkiti, yaqhepajj jiwasat larusipjjewa, Bibliajj nayra librökaspas ukhamwa jupanakajj amuyapjje. Yaqhepanakajja, Biblian juchat jitheqtañat parlki uka leyinakarojj jan walitwa uñjapjje. Uka leyinakar respetapki ukanakarojja, jan munasiñanïpjjewa, mayninakar juzguirïpjjewa sasaw sapjje. Ukhamäkchisa, Jehová Diosajj munasiñampiw taqe jaqenakarojj cheqpach yatiña churaski. ¿Kunjamsa uk luri?

2. ¿Kunjamsa jichhürunakan cheqpach yatiña jikjjatsna, ukampis jilaparte jaqenakajj kunsa lurapjje?

² Jehová Diosajja, Biblia toqew jaqenakarojj cheqpach yatiña churaski. Bibliajj niya taqeninwa utj-jje. ¿Bibliat apstʼat qellqatanakasat kamsaraksnasa? Jehová Diosan bendicionapampejja, 1.000 jila arunakanwa utj-jje. Khitinakatï istʼapki, mä arunjja khitinakatï Bibliatsa Bibliat apstʼat qellqatanakatsa liyipki yateqatarjam lurapkaraki ukanakarojja, wal yanaptʼi. Ukampis jilaparte jaqenakajja, cheqpach yatiñan arnaqasitaparojj janiw istʼañ munapkiti. Mä amtar puripjjañapäki ukhajja, jupanak pachparukiw confiyasipjje, jan ukajj yaqhanakarukiw istʼapjje. Kuntï Bibliajj siski ukar istʼatasat inas jiskʼachapjjchistu. Aka yatichäwinjja, kunatsa jaqenakajj ukhamäpjje ukwa yatjjataskañäni. Ukampis nayraqatjja, kunjamsa Jehová Diosat jutki uka yatiñ katoqsna ukwa uñjañäni.

YATIÑANÏÑATAKEJJ JEHOVÁ DIOSAR UÑTʼAÑASAWA

3. ¿Kunsa cheqpach yatiñanïñatakejj lurañasa?

³ Yatiñajja kuntï yatktan ukarjam suma amtanakar puriña sañ muni. Ukampis cheqpach yatiñajja, janiw ukakïkiti. Bibliajj akham siwa: “Jehová Diosar ajjsarañajj yatiñan qalltapawa, Wali Santo Diosar uñtʼañajja amuytʼasirïñwa churi” sasa (Prov. 9:10). Wali wakiskir amtanakar puriñatakejja, ‘wali Santo Diosar uñtʼktan’ ukarjamaw amtañasa, mä arunjja Jehová Diosan amuyuparjamaw amtañasa. Ukatakejj Bibliata ukat Bibliat apstʼat qellqatanakatwa yatjjatañasa. Ukhamtï lurañänejja, cheqpach yatiñanïtaswa uñachtʼayañäni (Prov. 2:5-7).

4. ¿Kunatsa Jehová Diosakejj yatiñ churirejja?

⁴ Jehová Diosakiw yatiñ churirejja (Rom. 16:27). ¿Kunatsa ukham sistanjja? Maya, jupaw jiwasan Luririsajja, kunanaktï jupajj lurki ukanakats sumwa yatiraki (Sal. 104:24). Paya, taqe kunanaktï lurki ukajj yatiñanïtapwa uñachtʼayi (Rom. 11:33). Kimsa, yatiñani ewjjtʼanakaparjam sarnaqerinakarojja, ewjjtʼanakapajj yanaptʼapuniwa (Prov. 2:10-12). Jiwasatï cheqpach yatiñanïñ munstan ukhajja, uka kimsa ewjjtʼanak katoqtʼasiñasawa, ukarjamarakiw kunsa amtañasa, lurañasaraki.

5. ¿Jehová Diosar cheqpach yatiña chuririparjam jan uñjañ munirinakajj kunjamansa uñjasipjje?

⁵ Prediktan uka jaqenakat jilapartejja, taqe kunanakatï aka oraqen utjki ukanakajj wali suma lurtʼatawa sasaw sapjje, ukampis mä Luririn utjatapar creyiñat sipansa, evolucionaruw creyipjje. Yaqhepajj Diosar creytwa sapjjewa, ukampis Biblian yatichäwinakapajj pasatäjjewa, jiwasaw kunjamsa jakañäni uk amtjjañasa sasaw sapjje. ¿Ukham amtapjjatapat kunas utjawayi? Diosan yatiñapar confiyañat sipans pachpa yatiñapar confiyapjjatapatjja, ¿aka mundojj jukʼamp sumäjjeti? ¿Cheqpach kusisiñanïpjjeti, jutïritak mä suytʼäwinïpjjeti? Janiwa. Kunanaktï uñjktan ukanakajj aka arunakan cheqätapwa uñachtʼayistu: “Jehová Dios contra saytʼañanjja janiw yatiñasa, amuytʼañasa, ewjjtʼasa utjkiti” (Prov. 21:30). Uka arunakajja, Jehová Diosar cheqpach yatiña mayiskakiñatakiw yanaptʼistu. Ukampis jilaparte jaqenakajja, janiw uk lurapkiti. ¿Kunatsa?

¿KUNATSA JAQENAKAJJ CHEQPACH YATIÑAR JAN ISTʼAÑ MUNAPKI?

6. Proverbios 1:22-25 textorjamajja, ¿khitinakas cheqpach yatiñan arnaqasitapar jan istʼir tukupjje?

⁶ Kunapachatï cheqpach yatiñajj ‘callenakan jachʼat arnaqasi’ ukhajja, waljanejj jan istʼasiriw tukupjje. Biblianjja cheqpach yatiñar jan istʼañ munirinakat kimsa kasta jaqenakatwa parli, jupanakajj akanakawa: “jan experiencian jaqenaka”, “burlasir jaqenaka”, “jan amuytʼasir jaqenaka” (Proverbios 1:22-25 liytʼäta). Uka jaqenakajj kunatsa Jehová Diosan yatiñapar jan istʼañ munapki, jan jupanakjamäñatakejj kunsa lurañasa ukanakatwa mayat maya yatjjataskañäni.

7. ¿Kunatsa yaqhepanakajj ‘jan experiencianïskakiñ’ amtapjje?

⁷ ‘Jan experiencian jaqenakajj’ taqe kun creyirinakawa, jupanakajj facilakwa kunarus iyaw sapjje jan ukajj engañjayasipjje (Prov. 14:15). Prediktan ukhajja, walja ukham jaqenakampiw jikistanjja. Cheqas millón millón jaqenakaw religión pʼeqtʼirinakana, politiconakan engañjatajj uñjasipjje. Ukham engañjat amuyasisajja, yaqhepanakajj chuyma pʼakintataw uñjasipjje. Ukampis Proverbios 1:22 texton parlki uka jan experiencian jaqenakajja, jupanak pachpaw ukham jan experiencianïskakiñ amtapjje (Jer. 5:31). Kuntï munapki uk lurañwa amtapjje, janiw kuntï Bibliajj siski uk yateqañ munapkiti, ni Biblian leyinakaparus istʼañ munapkiti. Waljaniw Quebec (Canadá) markankir wali religiosa mä warmjamajj amuyapjje, mä Testigojj visitkäna ukhajja, jupajj akham sänwa: “Nanakan sacerdotejatï engañapjjchitojja, janiw nanakan juchajäkiti, jupan juchapäskiwa” sasa. Jiwasajj janiw uka jan amuytʼasir jaqenakat yateqasiñ munktanti (Prov. 1:32; 27:12).

8. ¿Kunas yatiñanïñatakejj yanaptʼistani?

⁸ Janipun jan experienciani jaqenakjamäpjjamti antisas “jilïr jaqenakjam amuytʼasirïpjjam” sasaw Bibliajj chʼamañchtʼistu (1 Cor. 14:20). Biblian wiñay yatichäwinakaparjam sarnaqasaw yatiñanïña jikjjattanjja. Jiwasatï uka wiñay yatichäwinakarjam lurañäni ukhajja, kunjamsa suma amtanakar puriñatak yanaptʼistu, kunjamsa jan walinakat jitheqtañatak yanaptʼistu ukwa uñjañäni. Kuna amtanakarus puriwaytan ukanakat amuykiptʼañajj wali wakiskiriwa. Jumatï walja tiempo Bibliat yatjjatasksta, tantachäwinakarus saraskaraksta, ukampis janïr Jehová Diosar jakäwim katuyasksta ni bautisaskaraksta ukhajja, kunatsa uk jan lurkta uk jisktʼasiñamawa. Jumatï bautisatäjjsta ukhajja, akham jisktʼasiñamawa: “¿Qhawqsa jukʼamp sum predicañatakisa suma yatiyäwinak yatichañatakis chʼamachasisktjja? ¿Kun amtañatakis Biblian yatichäwinakapampit yanaptʼasisktjja? ¿Kunjamtï Jesusajj lurkaspäna ukhamti mayninakarojj uñjasktjja?” sasa. Jiwasatï kunans chʼamachasiñasa uk amuyasstan ukhajja, kunanaktï Jehová Diosajj amtaykistu ukanakar istʼañasawa, ukaw ‘jan experiencianïki ukarojj yatiñanïñar tukuyi’ (Sal. 19:7).

9. ¿Kunjamsa ‘burlasir jaqenakajj’ Diosan yatiñap jan istʼañ munapjjatap uñachtʼayapjje?

⁹ Diosan yatiñapar jan istʼañ munir payïr grupojja, ‘burlasir jaqenakawa’. Awisajj ukham jaqenakampiw predicacionan jikistanjja, mayninakat burlasiñajj wal jupanakar gusti (Sal. 123:4). Qhepa urunakanjja, walja burlasir jaqenakaw utjani sasaw Bibliajj qhanañchjjäna (2 Ped. 3:3, 4). Jichha tiempon jakir yaqhep jaqenakajja, kunjamtï cheqapar sarnaqeri Lot chachan tollqanakapajj Diosan ewjjanakapar jan istʼapkänjja, ukhamarakiw jan istʼapkiti (Gén. 19:14). Biblian wiñay yatichäwinakaparjam sarnaqapki ukanakatjja, waljaniw larusipjje. Uka burlasir jaqenakajja, “jan wali munañanakapan qhepapwa” sarapjje (Jud. 7, 17, 18). Kunanaktï Bibliajj burlasir jaqenakat siskejja, apostatanakasa Jehová Diosat jan yatiñ munir jaqenakas ukham chuymanïpjjatapwa uñachtʼayapjje.

10. Salmo 1:1 qellqatarjamajja, ¿kunsa jan uka burlasir jaqenakjamäñatakejj lursna?

¹⁰ ¿Jan uka burlasir jaqenakjamäñatakejj kunsa lursna? Taqe kunat quejasipki ukanakampejj janiw chikachasiñasäkiti (Salmo 1:1 liytʼäta). Ukatakejj janiw kunanaktï apostatanakajj sapki qellqapkaraki ukanakar istʼañasäkisa ni liyipjjañasäkisa. Jiwasatï jan amuyasksnajja, facilakiw taqe kunat quejasjjsna, Jehová Diosatsa markap toqe instruccionanak churkistu ukanakats payachasiñ qalltjjsna. Ukhamar jan purtʼasiñatakejja, akham sasaw jisktʼasiñasa: “¿Machaq qhanañchäwinaka jan ukajj instruccionanak katoqasajj ukanak contra mä kuns parlapuntti? ¿Irpapkistu uka jilatanakan pantjasitanakap thaqapuntti?” sasa. Jiwasatï uka jan walinak jankʼak askichañäni ukhajja, Jehová Diosajj jiwasat wal kusisini (Prov. 3:34, 35).

11. ¿Kunjamsa ‘jan amuytʼasir jaqenakajj’ Jehová Diosan leyinakapar uñjapjje?

¹¹ Diosan yatiñap jan istʼañ muniri kimsïr grupojja, ‘jan amuytʼasir jaqenakawa’. Jupanakajja Diosajj sum sarnaqañ toqet leyinak churkistu ukarjamajj janiw sarnaqañ munapkiti, ukatwa jan amuytʼasir jaqenaka satäpjje. Kunatï jupanakatakejj walïki ukarjamakiw kuns lurapjje (Prov. 12:15). Yatiñanïñ churki uka Jehová Diosarus janiw istʼañ munapkiti (Sal. 53:1). Predicacionan jupanakamp jikisktan ukhasa, Biblian leyinakapar respetatas laykojj jan sinttʼasisaw jiskʼachapjjestu, ukampis jupanakajj janiw jukʼamp suma jakasiñ churkistaspati. Bibliajj akham siwa: “Cheqpach yatiñajja jan amuytʼasir jaqetakejj janiw jikjjatañjamäkiti, marka punkunsa janiw kunsa parlirjamäkiti” sasa (Prov. 24:7). Jan amuytʼasir jaqenakajja, janiw kunsa yatiñampejj parlapkaspati. Ukatwa Jehová Diosajj akham sasin ewjjtʼistu: “Jan amuytʼasir jaqerojj jan jakʼachasimti” sasa (Prov. 14:7).

12. ¿Kunas jan amuytʼasir jaqenakjam jan lurañatakejj yanaptʼistani?

¹² Diosan ewjjtʼanakapar uñisipki uka jaqenakat sipansa, jiwasajj kuntï Jehová Diosajj amuyki ukarusa taqpach leyinakaparus munasiñwa yateqtanjja. Istʼasirinakajj kuna askinaksa jikjjatapjje, jan istʼasirinakajj kuna jan walinakansa uñjasipjje uk igualtʼayañäni ukhajja, Diosan leyinakapar jukʼamp munasiñatakiw yanaptʼistani. Mä toqetjja, Jehová Diosan yatiñani ewjjtʼanakapar jan istʼirinakajj kuna jan walinakansa uñjasipjje ukwa amuytʼañasa. Maysa toqetjja, Jehová Diosar istʼirinakajj kunjamsa sum jakasipjje ukwa amuytʼañasaraki (Sal. 32:8, 10).

13. ¿Yatiñani ewjjanakapar istʼañasatakejj Jehová Diosajj obliguistuti?

¹³ Jehová Diosajj taqenirus yatiña churañ munkchejja, janiw khitirus uka yatiña katoqasiñapatak obligkiti. Ukampis yatiñapar jan istʼañ munirinakarojj kunas pasani uk qhanañcharakistuwa (Prov. 1:29-32). Khitinakatï Jehová Diosar jan istʼañ munapki ukanakajja, ‘luratanakaparjamaw jan walinakan uñjasipjjani’. Tiempompejja ukham jakañ amtapjjatapatjja, llakinakana, problemanakan uñjasipjje, qheparojj tukjataw uñjasipjjani. Maysa toqetjja, Jehová Diosan yatiñani ewjjanakapar istʼirinakasa ukarjam sarnaqerinakasa, aka promesa phoqasirwa uñjapjjani: “Khititï nayar istʼkitani ukajj jan ajjsarasaw jakasini, janirakiw kuna jan waltʼäwirus ajjsarkaniti” (Prov. 1:33).

CHEQPACH YATIÑAJJ YANAPTʼISTUWA

14, 15. ¿Kunsa Proverbios 4:23 textot yateqtanjja?

¹⁴ Diosan yatiñaparjam sarnaqañajja, yanaptʼapunistuwa. Kunjamtï uñjaniwayktanjja, Jehová Diosajj yatiñani ewjjanakapwa churistu. Proverbios libronjja, kunayman tiempon jakasir jaqenakatakiw suma ewjjtʼanakajj utji, ukarjam sarnaqasajj sumwa jakasiraktanjja. Uka yatiñani ewjjanakat pusi jichhajj yatjjatañäni.

¹⁵ Chuymas jarkʼaqapjjañäni. Bibliajj akham siwa: “Taqe kunat sipansa chuymam jarkʼaqam, kuna laykutejj chuymamatwa jakañajj juti” sasa (Prov. 4:23). Lloqos cuidasiñasatakejj kunanakas wakisi uk amuytʼañäni. Ukatakejj suma alimentonakwa manqtʼasiñasa, ejercicionakwa lurañasa, kunanakatï cuerposar jan waltʼaykaspa ukanak janirakiw lurañasäkiti. Chuymas jarkʼaqasiñatakejja, niya uka pachparakwa lurañasa. Sapüruw Diosan Arupampi chʼamañchtʼasiñasa. Tantachäwinakatak wakichtʼasiñasawa, tantachäwinakarojj sarañasapuniwa, ukankasajj comentarionak arstʼañasarakiwa. Predicacionarus jan faltasisaw sarañasa. Kunanakatï amuyus qʼañuchkaspa ukanakat jitheqtañasawa, qʼañu juchanakajj utjki uka kusistʼañanakatsa jan wali amigonakats jitheqtañasawa.

16. ¿Kunatsa Proverbios 23:4, 5 textonkir ewjjtʼajj jichhürun wali yanaptʼkirejja?

¹⁶ Kunanakatï utjkistu ukampejj kusisitakïpjjañäni. Bibliajj akham sasaw ewjjtʼistu: “Yänak jikjjatañ laykojj jan inamay chʼam tukumti […]. Kunapachatï uka yänakar nayranakamamp uñchʼukta ukhajja, uka yänakajj chhaqtjjakiwa, kunjamtï pakarojj chheqanakajj jilarkejja, ukhamarakiw uka yänakarojj chheqanakajj jilarani, ukatsti jaltawayasaw alajjpachar sarjjapjjani” sasa (Prov. 23:4, 5). Kunanakatï utjkistu ukanakajj facilakiw tukusjjaspa. Ukhampachasa, wali utjirininakas pobrenakas qollq ganañatakiw wal chʼamachasipjje. Qollqet sinti llakisipjjatapatjja, jupanak pachpaw jan walit uñjayasipjje, yaqhanakampis jan waltʼayasipjjewa, usuntjjapjjarakiwa (Prov. 28:20; 1 Tim. 6:9, 10). Maysa toqetjja, yatiñanïñajj qollqer wali amuyumpi uñjañasatakiw yanaptʼistu. Ukaw jiwasatakik taqe kun jan munañasatak yanaptʼistu, kunanakatï utjkistu ukanakamp contentokïñataki ukhamarak kusisitäñatakiw yanaptʼistu (Ecl. 7:12).

17. Proverbios 12:18 textorjamajj ¿kunjamatsa “amuytʼasir jaqen arunakapajj” jiwasan utjaspa?

¹⁷ Janïr parlkasajj amuytʼasipjjañäni. Janitï amuytʼasksna ukhajja, arunakasampejj mayninakar jan waltʼaysnawa. Bibliajj akham siwa: “Jan amuytʼasis arsut arunakajja espadampi usuchjañamp sasiwa, ukampis amuytʼasir jaqen arunakapajj heridanak qolltʼiriwa” sasa (Prov. 12:18). Jiwasatï mayninakan pantjasitanakapjjat jan parlkañäni ukhajja, mayninakampejj wali sumwa apasiñäni (Prov. 20:19). Arunakasajj usuchjañat sipans qolltʼañapatakejja, Diosan Arupat liytʼañasapuniwa, amuytʼañasarakiwa (Luc. 6:45). Jiwasatï Biblian ewjjtʼanakapat lupʼiñäni ukhajja, arunakasajj mayninakatak chʼamañchtʼkirïspawa, yatiñasajj “jawir umar uñtasitaw” jalarakispa (Prov. 18:4).

18. ¿Kunjamsa Proverbios 24:6 textojj sum predicañatak yanaptʼistu?

¹⁸ Diosan markapajj churkistu uka instruccionanakarjam lurapjjañäni. Bibliajj akham sasaw ewjjtʼistu: “Guerrar sarañatakejja suma yatjjattʼat jaqen ewjjtʼapaw wakisi, walja jaqenakan ewjjtʼapampiw atipjasi” sasa (Prov. 24:6). Kunjamsa Biblian uka wiñay yatichäwipajj sum predicañatakisa cheqa yatichäwinakat sum yatichañatakis yanaptʼistu uk amuytʼañasawa. Munañasar predicañat sipansa, churapkistu uka ewjjtʼanakarjam lurañatak chʼamachasipjjañäni. Tantachäwinakasanjja, yatiñani ewjjtʼanakwa katoqtanjja, Bibliarjam wakichtʼat discursonakatsa demostracionanakats waljanakwa yateqtanjja. Jaqenakar Bibliat amuytʼapjjañapatak yanaptʼañatakejja, Jehová Diosan markapajj Bibliat apstʼat qellqatanaka videonakwa churistu. ¿Jumajj uka herramientanak sum apnaqañ yateqasktati?

19. ¿Kunsa Jehová Diosajj churki uka yatiñat amuyta? (Proverbios 3:13-18).

¹⁹ (Proverbios 3:13-18 liytʼäta). ¡Diosan Arupan utjki uka ewjjtʼanakat walpun yuspärtanjja! Janitï uka ewjjtʼanakäkaspajja, janiw kusisit jakasiñ puedksnati. Aka yatichäwinjja, Proverbios libron utjki uka suma ewjjtʼanakatwa yatjjatawaytanjja. Cheqas taqpach Biblianwa Jehová Diosan yatiñani ewjjtʼanakapajj utji. Jiwasajj Diosan yatiñani ewjjtʼanakaparjamapuniw sarnaqañ muntanjja. Kuntï akapachankirinakajj Diosan yatiñapat amuyapki ukat janiw llakisktanti. Ukhamajj janiw aka toqet payachasktanti: “Khitinakatï yatiñat wal katuntasisipkaki ukanakajj kusisitäpjjaniwa”.