¿Kunjamsa congregacionat apsutäpki ukanakar yanaptʼasispa?

1, 2. 1) ¿Kunjamsa Jehová Diosajj juchachasipki janirak arrepentisipki ukanakar uñji? 2) Jehová Diosajj juchachasirinakan ¿kun lurapjjañapsa muni?

JEHOVÁ DIOSAJJ jan walinak lurañarojj janiw ukhamak uñjkiti, jucha lurañarojj uñisiwa (Sal. 5:4-6). Jupajj cheqap mandatonakap Biblian churkistu ukanakar respetañaswa muni. Ukhamäkchisa jupajj pantjasirïtas yatiwa, janiw taqe kuns jan pantjasis lurañas maykistuti (Sal. 130:3, 4). ‘Jan phenqʼani jucha lurañ layku Diosasan wali khuyapayasiñap mayjtʼayapki’ uka jan wali jaqenakarojj janirakiw katoqkiti (Jud. 4). Bibliarjamajj Armagedón guerranwa jupajj ‘jan wali jaqenakar tʼunjani’ (2 Ped. 3:7; Apoc. 16:16).

² Ukampis Jehová Diosajj janiw khitin tukjatäñaps munkiti. Kunjamtï pasïr yatichäwinakan yatjjataniwayktanjja, jupajj “taqenin arrepentisipjjañapwa muni” sasaw Bibliajj qhanañchi (2 Ped. 3:9). Ancianonakajj Jehová Diosjamarakiw jachʼa jucha luririnakan arrepentisipjjañapatakisa, wasitat Diosan amigopäjjapjjañapatakis pacienciamp yanaptʼañatak chʼamachasipjje. Ukampis janiw taqenejj uka yanaptʼa katoqasipkiti (Is. 6:9). Ancianonakajj kutin kutinis jupanakan arrepentisipjjañapatak yanaptʼapkchejja, yaqhepajj janiw cambiañ munapkiti. Ukhamächi ukhajj ¿kunas lurasispa?

‘JAN WALI JAQEROJJ APSUPJJAM’

3. 1) Maynitï jachʼa jucha luratapat jan arrepentisiñ munkchi ukhajj ¿kunas Bibliarjamajj lurasiñapa? 2) Juchachasiritï jan arrepentisiñ munkchi ukhajj ¿kunatsa jupa pachpas congregacionat apsutäñ ajllkaspa ukhamaw sissna?

³ Maynitï jachʼa juchar purtʼaschi, janirak arrepentiskchi ukhajja, ancianonakajj kuntï 1 Corintios 5:13 texton siski ukarjamaw lurapjjañapa. Ukan akham siwa: “Jan wali jaqerojj jumanak taypit apsupjjam” sasa. Ukhamajj juchachasir pachpas congregacionat apsutäñ amtkaspa ukhamawa, kuntï phawki ukwa apthapiskaraki (Gál. 6:7). ¿Kunatsa ukham sistanjja? Kuna laykutejj walja kutis ancianonakajj jupar yanaptʼañ munapkchejja, janiw jupajj yanaptʼayaskiti (2 Rey. 17:12-15). Luratanakapajj Jehová Diosan mandatonakapar jan istʼañ munatapwa uñachtʼayi (Deut. 30:19, 20).

4. Maynir congregacionat apsuski ukhajj ¿kunatsa ukajj congregacionar yatiyasiñapa?

⁴ Maynitï mä jachʼa jucha lurchi, jan arrepentisitapat congregacionat apsutäjjarakchi ukhajja, jupajj janiw Jehová Diosan Testigopäjjeti sasaw congregacionar yatiyasjje.a Ukham yatiyasitapajj janiw juchachasirir phenqʼachañatakïkiti, jan ukasti Bibliarjamajj “jan jukʼampi uka jaqempejj chikachasipjjamti janirak manqʼapjjamsa” siski uka mandator jilat kullakanakan phoqapjjañapatakiwa (1 Cor. 5:9-11). Jehová Diosajj mä wakiskir razonatwa uka instrucción churäna. Apóstol Pablojj akham sasaw qellqäna: “Mä jukʼa levadurajj taqpach masa[ruw] poqtayi” sasa (1 Cor. 5:6). Juchapat jan arrepentisiñ munki ukarutï congregacionat jan apsuskaspa ukhajja, mayninakajj janis Jehová Diosan cheqap mandatonakap phoqañatak chʼamachasiñajj wakiskaspa ukhamwa amuyjjapjjaspa (Prov. 13:20; 1 Cor. 15:33).

5. Jan Testigöjje ukarojj ¿kunjamsa uñjañasa, ukat kunatsa ukham sistanjja?

⁵ Maynitï jan Testigöjjchi ukhajja, janiw jupamp chikachasjjañasäkiti. Ukampis chhaqer ovejarjamakiw uñjañasa, janiw wiñayatakis chhaqkaspa ukham uñjañasäkiti. Mä ovejatï tamat saranukchi ukhajj kuttʼanjjaspawa. Amtañäni, juchachasirejj Jehová Diosaruw jakäwip katuyasïna, ukampis jichhajj janiw uka arsutaparjam sarnaqjjeti, ukhamïpan jan walinwa uñjasirakispa (Ezeq. 18:31). Ukampis tiempo utjkipansa Jehová Diosan khuyapayasirïtapatsa, jupajj kuttʼanjjaspawa sasaw suytanjja. Ukhamajj ¿kunjamsa ancianonakajj congregacionat apsutäpki ukanakar yanaptʼapjjaspa?

CONGREGACIONAT APSUTÄPKI UKANAKAROJJ ¿KUNJAMSA ANCIANONAKAJJ YANAPTʼAPJJE?

6. ¿Kunanaksa ancianonakajj congregacionat apsutäki ukar yanaptʼañatakejj lurapjjañapa?

⁶ Maynejj congregacionat apsutäjje ukhajj ¿kunsa ancianonakajj lurapjje? ¿Juchachasirirojj ukhamakti jaytjjapjje, janit Jehová Diosan ukar kuttʼañapatakis yanaptʼjjapjje? ¡Janiw ukhamäkiti! Comité taypinkir ancianonakajj congregacionat apsutäjjätawa sasin jucha luririr yatiyjjapjje ukhajja, kunanaksa congregacionar kuttʼaniñatakejj lurañapa uk sumwa jupar qhanañchapjjañapa. Janiw ukakïkiti. Jilapartejj ancianonakajj mä qhawqha phajjsinakat wasitat tantachtʼasiñatakiw jucha luririr mayipjjañapa, ukhamat amuyup cambyjjeti janicha uk yatiñataki. Jucha luriritï jupanakamp wasitat tantachtʼasiñatak dispuestokïchi ukhajja, uka tantachäwin ancianonakajj wali munasiñampiw juchachasirir arrepentisiñapatakisa kuttʼaniñapatakis chʼamañchtʼapjjañapa. Janitï ukapachkamajj amuyup cambiatap uñachtʼaykani ukhajja, ancianonakajj jutïrin jupamp wasitat tantachasiñatakejj chʼamachasisipkakiñapawa.

7. Jehová Diosat yateqasisajj ¿kunjamsa ancianonakajj congregacionat apsutäjje ukar sinttʼasiñamp uñjapjje? (Jeremías 3:12).

⁷ Ancianonakajj congregacionat apsutäpki ukanakar Jehová Diosjam khuyapayasiñamp uñjañatakiw chʼamachasipjjañapa. Ak amuytʼañäni: nayra tiempon israelitanakajj jan istʼasirïpkäna ukhajja, janiw Jehová Diosajj jupan ukar kuttʼanipjjañapatakejj aleq ukhamak suykänti. Jan ukasti jupanakajj janïras arrepentisipjjatap mä jukʼas uñachtʼayapkchïnjja, jupaw israelitanakar yanaptʼañatakejj nayraqat jakʼachasïna. Kunjamtï aka revistan payïr yatichäwipan yatjjataniwayktanjja, Jehová Diosajj Oseas profetap taypiw kunja sinttʼasirisa uk uñachtʼayäna. Oseas profetarojj jachʼa jucha luraskäna uka esposapar perdonañapataki, wasitat katoqañapatakiw mayïna (Os. 3:1; Mal. 3:7). Ancianonakajj Jehová Diosjamarakiw juchachasirin arrepentisiñapsa Diosan markapar kuttʼaniñaps taqe chuym munapjje, janirakiw kuttʼaniñapatak chʼam tukuyapkiti (Jeremías 3:12 liytʼäta).

8. Herenciap tukuntir waynat parlir uñachtʼäwejj ¿kunjamsa Jehová Diosan sinttʼasirïtap jukʼamp qhanstayi? (Lucas 15:7).

⁸ Aka revistan payïr yatichäwipanjja, Jesusajj herenciap tukuntir waynat parlkäna uka uñachtʼäwit yatjjataniwaytanjja. Yoqapar jayankkipan uñjasajja, tatapajj jankʼakiw “jupan ukarojj tʼijüna. Wali munasiñampiw qhomantäna, jampʼattʼarakïna” (Luc. 15:20). Tatapajj janiw wawapan jupat perdón mayisiñap suykänti. Antisas jupaw wawapar munasitap laykojj jupan ukar nayraqat tʼijüna. Ancianonakajj ukhamarakiw chhaqanukut ovejanakar uñjapjje, kuttʼanipjjañapatak yanaptʼañatakis chʼamachasipjjarakiwa (Luc. 15:22-24, 32). Mä juchachasirejj kuttʼanjje ukhajja, ¡alajjpachan wali kusisiñaw utji, aka oraqens ukhamaraki! (Lucas 15:7 liytʼäta).

9. ¿Jehová Diosajj jachʼa jucha luririnakan kun lurapjjañapsa muni?

⁹ Kunjamtï yatjjataniwayktanjja, Jehová Diosajj janiw jachʼa jucha lurapki, janirak arrepentisipki ukanakan markapankaskakiñap munkiti, ukampis juchachasirinakarojj yanaptʼañwa muni, kuttʼanipjjañapwa munaraki. Juchapat arrepentisirinakarojj kunjamsa uñji uk Oseas 14:4 textonwa qhanañchi, ukan akham siwa: “Nayasti jupanakar qolläwa, jupanakajj janiw jaytjasirëjjapjjaniti. Voluntadajat jupanakar munasëjja, wal colerasiñajajj janiw jupanakjjankjjeti” sasa. Uk yatisajja, jucha luriritï mä jukʼa arrepentisiskatap uñachtʼaychi ukhajj jankʼakiw ancianonakajj uk amuyapjjañapa. Jehová Diosar jaytapki ukanakajja, kunanaktï jupan ukar kuttʼañatak lurapjjañapäki ukanak jankʼakiw lurapjjañaparaki.

10, 11. ¿Kunjamsa ancianonakajj nayra maranakan congregacionat apsutäpkäna ukanakar yanaptʼapjjañapa?

¹⁰ Maynejj congregacionat apsutäkäna ukhat jichhakamajj inas walja tiempo pasjjchi jan ukajj walja maranak pasjjarakchi. Inas kuna jucha luratapattï jupar congregacionat apsuskäna uka juch jan lurjjchiti, jan ukajj walja tiempo pasjjepan kunatsa jupar congregacionat apsusïna uk janirak amtasjjchiti. Qhawqha tiempoy pasjjchi, ancianonakajj taqe jupanakar jikjjatañataki, jupanakar visittʼañatakiw chʼamachasipjjañapa. Visitasajj jupanakampiw orapjjaspa, congregacionar kuttʼanipjjañapatakejj wali munasiñampiw chʼamañchtʼapjjañapa. Janiw ukakïkiti, maynitï congregacionat walja maranak jitheqtatäjjchi ukhajja, Jehová Diosarojj wasitatwa uñtʼañapa, Biblian cheqa yatichäwinakaps wasitat yateqañapawa. Ukhamajj jupatï kuttʼaniñ munchi ukhajja, janïras Diosan markapar kuttʼankchi ukhas ancianonakajj mä jilatampi jan ukajj mä kullakamp Bibliat yatjjatañapatakiw yanaptʼapjjani. Khitis jupar Bibliat yatichani ukjja, ancianonakapuniw amtapjjañapa.

¹¹ Ancianonakajj Jehová Diosjam sinttʼasirïñwa munapjje. Ukatwa khitinakatï Jehová Diosat jitheqtawayapki taqe jupanakar thaqanipjjañapa, kuttʼanipjjañapatakiw chʼamañchtʼapjjañaparaki. Maynitï arrepentisjjatapsa jucha lurañ apanukjjataps uñachtʼaychi ukhajja, jankʼakiw Diosan markapan wasitat katoqatäjjañapa (2 Cor. 2:6-8).

12. 1) ¿Kunapachanakas ancianonakajj wal amuytʼasipjjañapa? 2) ¿Kunatsa yaqhep juchachasirinakajj janipuniw Diosan khuyapayasiñap katoqapkaniti sasajj jan amuyañasäki? (Nota liytʼarakïta).

¹² Awisanakajja, maynejj Diosan markapar kuttʼanjjaspati janicha uk janïr amtkasajj ancianonakajj wal amuytʼasipjjañapawa. Maynitï mä wawar abusatap layku, apostasía jucha luratap layku, jan ukajj mä kun luras matrimonio tukjatap layku juchanïchïna ukhajja, jupajj cheqpachapunit arrepentisjje janicha uk ancianonakajj sum segurtʼasipjjañapawa (Mal. 2:14; 2 Tim. 3:6). Jupanakaw congregacionankirinakar jarkʼaqapjjañapa. Ukampis ak amtañasawa: jucha luriritï taqe chuym arrepentisitap uñachtʼaychi, janirak jachʼa juchanak lurjjchi ukhajja, Jehová Diosajj wasitatwa markapar katoqjjani. Ukhamajj mayninak contra sinti jan walinak lurapkäna ukanakarojj wali amuyumpis ancianonakajj uñjapkchinejja, ukham jan walinak luririnakajj janipuniw Jehová Diosan khuyapayasiñap katoqapkaniti sasajj janiw amuyapjjañapäkiti (1 Ped. 2:10).b

¿KUNSA CONGREGACIONANKIRINAKAJJ LURAPJJAÑAPA?

13. ¿Kunjamsa censuratäki ukar uñjañasa, ukat kunjamsa congregacionat apsutäki ukarojj uñjañasaraki?

¹³ Kunjamtï pasïr yatichäwin yatjjataniwayktanjja, awisajj maynin censuratätapaw congregacionar yatiyasi. Ukhamächi ukhajja, jupampejj chikachasiskaksnawa, kuna laykutejj jupajj arrepentisjjewa, jucha lurañs apanukjjarakiwa (1 Tim. 5:20). Niyakejjay jupajj congregación taypinkaskakchejja, kunatï walïki uk luraskakiñatakejj jilat kullakanakamp chʼamañchtʼatäñapaw wakisiraki (Heb. 10:24, 25). Ukampis congregacionat apsutäki ukampejj janiw uka pachpajj luraskiti. Congregacionat apsutäki ukampejj ‘janiw chikachasjjtanti ni manqʼkaraktansa’ (1 Cor. 5:11).

14. Congregacionat apsutäki ukarojj kunjamsa uñjani uka toqet ¿kunsa sapa mayni cristianojj Biblian yatichat concienciaparjamajj amtjjañapa? (Fotonak uñjjattʼarakïta).

¹⁴ Maynitï congregacionat apsutäjjchi ukhajj ¿janit mä jukʼas jupar yäqañasäjjaspa? Janiw ukhamäkapuniti. Cheqas janiw jupampejj chikachasiñasäkiti. Ukampis jupatï mä familiarasächi, jan ukajj wali munat amigosächïna ukhajja, tantachäwinakarojj invitañänit janicha uk sapa mayni cristianow Biblian yatichat concienciasarjam amtjjañasa. Tantachäwinakar jutani ukhajj ¿kunjamsa jupar uñjañasa? Nayra tiempon janiw aruntkayätanti. Ukampis jichhajj sapa mayni cristianow Biblian yatichat concienciaparjamajj kunsa lurani uk amtjjañapa. Inas yaqhepatakejj aruntañasa jan ukajj “walik tantachäwir juttajja” sañas walikïchini. Ukampis janiw jupanakamp wali jay parlañasäkaspati ni chikachasiñasäkaspasa.

15. ¿Khitinakatsa 2 Juan 9-11 textojj parlaski? (“¿Apóstol Juanasa apóstol Pablos mä kasta juchatakti parlasipkäna?” sat recuadro liytʼarakïta).

¹⁵ Inas akham sasin jisktʼassna: “¿Janit Biblian khititï jucha luririnakar aruntki ukajj ‘jan wali luratanakaparuw apoyaski’ sasin siski?” sasa (2 Juan 9-11 liytʼäta). Uka versiculonakarjamajja, apostatanakampita jan walinak lurañanakar chʼamañchapki ukanakampit parlaskatapwa amuytanjja (Apoc. 2:20). Ukhamajj maynitï apostatanakan yatichäwinakap chʼamañchaskchi jan ukajj yaqha juchanak lurañar chʼamañchaskchi ukhajja, ancianonakajj janiw jupar visitañ amtapjjañapäkiti. Ukampis jupajj cambiaspawa. Janitï cambykchejja, janiw jupar aruntañasäkiti ni tantachäwinakarus invitañasäkiti.

JEHOVÁ DIOSJAM SINTTʼASIRÏPJJAÑÄNI KHUYAPTʼAYASIRÏPJJAÑÄNI

16, 17. 1) Jehová Diosajj juchachasirinakan ¿kun lurapjjañapsa muni? (Ezequiel 18:32). 2) ¿Ancianonakajj kun lurasas Jehová Diosar yanaptʼapjjaraki?

¹⁶ Aka revistan yatjjataniwayktan uka phesqa yatichäwinakanjja, Jehová Diosajj jan khitins jiwañap munatapwa yateqawaytanjja (Ezequiel 18:32 liytʼäta). Diosajj taqe juchararanakan jupamp sumankthapipjjañapwa muni (2 Cor. 5:20). Ukatwa nayratpachas Jehová Diosajj khitinakatï jupar apanukupkäna ukanakarojj arrepentisipjjañapataki, jupan ukar kuttʼapjjañapatak kutin kutin chʼamañchawayi. Khitinakatï jachʼa jucha lurapki ukanakar arrepentisipjjañapatak yanaptʼasajja, ancianonakajj Jehová Diosaruw yanaptʼasipki, ukajj jupanakatak mä jachʼa privilegiowa (Rom. 2:4; 1 Cor. 3:9).

¹⁷ Kunapachatï juchachasirinakajj arrepentisipki ukhajja, ¡alajjpachan wali kusisiñaw utji! Chhaqat ovejanakapat maynejj kuttʼanjje ukhajja, alajjpachankir Jehová Dios Awkisajj walpun kusisi. Ukhamajj jupan sinttʼasirïtapatsa, munasirïtapatsa, wali khuyapayasirïtapats amuykiptʼasipkakiñäni, ukhamatwa juparojj urut urutjam jukʼamp munasiñäni (Luc. 1:78).