¿Kunsa Jesusan jiwatapat yateqsna?

1. ¿Kunatsa Jesusan jiwatap sapa mara amtañasa?

JESUSAN jiwas layku jiwatapajj mä suma regalopuniwa (2 Cor. 9:15). Jesusan jiwatapatjja, Jehová Diosampejj wali sum apassna, jutïrin wiñay jakañwa suytʼaraksna. Jehová Diosajj jiwasar wal munasitap laykuw juchampit jiwañampit jiwasar kutsuyañatakejj Jesusar khitanïna, ukhamajj jupar yuspärañatakejj walja razonanakaw utjistu (Rom. 5:8). Ukatwa Jesusajj jiwatap sapa mara amtañasatak mayistu, ukhamat yuspäraskakiñasatakisa, jupan jiwatap jan aleq ukhamak uñjañasatakisa (Luc. 22:19, 20).

2. ¿Kunsa aka yatichäwin yatjjataskañäni?

² Aka marajja, Jesusan jiwatapajj sábado 12 de abril de 2025 ukhaw amtasiskani. Taqeniw ukar sarañ muntanjja. Jesusan jiwatapajj amtaskani uka semananakanjja, kunanaktï Jehová Diosasa Yoqapas jiwas layku lurawayapki ukanakat lupʼiñatakiwa tiempo apsusiñasa. Niyakejjay Jesusajj juchampit jiwañampit jiwasar kutsuyañatakejj jiwawaychejja, kunsa ukajj Jehová Diosatsa Jesusats yatichistu ukwa aka yatichäwin yatjjataskañäni. Jutïr yatichäwinjja, kunjamsa Jesusan jiwas layku jiwatapajj yanaptʼistaspa, kunjamsa ukat yuspäratas uñachtʼaysna ukanakwa yatjjataskarakiñäni.

¿KUNSA JESUSAN JIWATAPAJJ JEHOVÁ DIOSAT YATICHISTU?

3. ¿Kunjamsa mä sapa chachan jiwatapajj juchampit jiwañampit walja jaqenakar kutsuyaspa? (Dibujonak uñjjattʼarakïta).

³ Jehová Diosajj cheqapar uñjirïtapatwa jiwas layk jiwañapatak Yoqapar khitanïna (Deut. 32:4). ¿Kunatsa ukham sistanjja? Niyakejjay Adanajj Diosar jan istʼawaykchïntejja, taqe wawanakapaw juchampi jiwañampi jupat katoqawaytanjja (Rom. 5:12). Ukatwa Jehová Diosajj Jesusar khitaniwayi, ukhamat jiwasar juchampit jiwañampit kutsuyañataki. Ukampis ¿kunjamarak mä sapa perfecto chachan sacrificiot loqtasitapajj walja millón jaqenakar juchampit jiwañampit kutsuyaspasti? Apóstol Pablojj akham sasaw uk qhanañchäna: “Kunjamtï mä sapa jaqen [jan ukajj Adanan] jan istʼasirïtapat walja jaqenakajj jucharar jaqet uñjatäpkejja, ukhamarakiw mä sapa jaqen [jan ukajj Jesusan] istʼasirïtapat walja jaqenakajj cheqapar sarnaqer jaqet uñjatäpjjani” sasa (Rom. 5:19; 1 Tim. 2:6). Mä arunjja, niyakejjay mä perfecto chachan Diosar jan istʼatapat taqe jaqenakajj juchampin jiwañampin esclavopästänjja, ukanakat salvatäñatakejj Diosar istʼir mä perfecto chachakirakiw salvistaspa.

4. ¿Kunatsa Jehová Diosajj Adanan istʼasir wawanakapar wiñayatak jan jakaykaspäna?

⁴ ¿Jiwasar salvañatakejj Jesusan jiwañapajj wakisipunïnti? ¿Janit Jehová Diosajj Adanan istʼasir wawanakapar wiñayatak jakaykaspäna? Pantjasir amuyusarjamajj uk lurañajj walikïkaspänsa ukhamwa amuysna, ukampis ak amtañäni: Jehová Diosan cheqapar uñjirïtapajj perfectowa. Ukhamajj jupajj janiw Adanan jan istʼasitap aleq ukhamak jaytkaspänti, janis kunas paskaspäna ukhama.

5. Jehová Diosajj kunatï cheqapäki ukpunwa lurani sasajj ¿kunatsa jan payachasksna?

⁵ Jehová Diosatï jiwas layku jiwañapatak Jesusar jan khitankaspäna, Adanan pantjasir wawanakapar wiñayatak jakayaspäna ukhajj ¿kunas pasaspäna? Diosajj janis cheqapar uñjirïtapar yäqkaspa ukhamäspänwa, yaqha toqenakan ukhams lurkarakispa ukhamwa jaqenakajj amuyapjjaspäna. Taqpach promesap phoqpachänit janicha uka toqets payachasjjapjjarakispänwa. Ukampis uka toqet janiw llakisiñasäkiti, wali munat Yoqapar sacrificiot loqtañas wakiskchïnjja, Jehová Diosajj kunatï cheqapäki ukwa luräna. Ukhamajj kunatï cheqapäki ukpunwa lurani, janiw ukat payachasktanti.

6. ¿Kunjamsa Jesusan jiwatapajj qhawqsa Jehová Diosajj munasistu uk amuyañ yanaptʼistu? (1 Juan 4:9, 10).

⁶ Jesusan jiwas layk jiwatapajj Jehová Diosan cheqapar uñjirïtapwa uñachtʼayi, jukʼampis jiwasar wal munasitapwa uñachtʼayi (Juan 3:16; 1 Juan 4:9, 10 liytʼäta). Jehová Diosajj jiwas layk jiwañapatakiw Yoqapar khitanïna, ukhamat wiñay jakañasataki, familiap taypinkañasataki. Ak amuytʼañäni: Adanajj juchachaskäna ukhajja, janiw Diosan familiap taypinkjjänti. Ukatwa taqenis Diosan familiapat jayan nastanjja. Ukampis Jesusan jiwas layk jiwatapatjja, khitinakatï Diosar confiyapki, istʼapkaraki ukanakajj Diosan familiap taypinkapjjaniwa. Jichha tiempons Jehová Diosajj juchanakas perdonaspawa, jupampisa jilat kullakanakasampis wali sumaw apasiraksna. ¡Jehová Diosajj walpun munasistu! (Rom. 5:10, 11).

7. Jesusan tʼaqesitap amuytʼañajj ¿kunjamsa Jehová Diosan jiwasar munasitap amuyañatak yanaptʼistu?

⁷ Juchampit jiwañampit jiwasar kutsuyañatakejja, Jehová Diosajj wali jila precio pagawayi, uk sum amuyañaw qhawqsa munasistu uk amuyañatak yanaptʼistu. Chʼama yantʼanakan uñjasisajj Diosan servirinakapajj jupat jitheqtapjjakispawa sasaw Supayajj parli. Ukajj jan cheqätap uñachtʼayañatakejja, janïr jiwkasin tʼaqesiñapatakiw Jehová Diosajj Jesusar jaytäna (Job 2:1-5; 1 Ped. 2:21). Kunapachatï jaqenakajj Jesusat burlasipjjäna, soldadonakas jawqʼjapjjäna, mä tʼaqesiñ lawar warkkatapjjäna ukhajja, Jehová Diosajj taqe ukanak alajjpachat uñjasinkänwa. Munat Yoqapan wali tʼaqesis jiwataps uñjarakïnwa (Mat. 27:28-31, 39). Jehová Diosajj kunapachas ukanak jarktʼakispänwa. “Diosatï jupar munaschejja, salvpanaya” sasin jaqenakajj sapkäna ukhajja, jupajj salvaspänwa (Mat. 27:42, 43). Ukampis ukhamtï luraspänjja, janiw juchampit jiwañampit kutsuyatäksnänti, janirakiw jaqenakatak mä suytʼäwejj utjkaspänti. Uka razonatwa Jehová Diosajj Yoqapan jiwañapkam tʼaqesiñapatak jaytäna.

8. Yoqapar tʼaqesir uñjasajj qhawqsa Jehová Diosajj llakisïna uk qhanañchtʼam. (Dibujo uñjjattʼarakïta).

⁸ Jehová Diosajj wali chʼamanïkchisa, janiw Yoqaparojj tʼaqesiñat salvkänti, ukampis ukajj janiw janis sinttʼasirïkaspa ukham sañ munkiti. Jehová Diosajj sinttʼasir luristu, ukat niyakejjay jupar uñtasit lurchistojja, jupajj sinttʼasirirakiwa. Cheqas Bibliajja, yaqhep jaqenakajj Diosar ‘chuym ustʼayapjjänwa’, “llakisiyapjjänwa” sasaw qhanañchi (Sal. 78:40, 41). Abrahanampit Isaacampit parltʼañäni. Jehová Diosajj yoqapar sacrificiot loqtañapatakiw Abrahanar mayïna (Gén. 22:9-12; Heb. 11:17-19). Yoqapar jiwayañatak wakichaskasajj Abrahanajj wal llakispachäna. Ukampis Jehová Diosajj kunjamsa Yoqapar jiwayañkam wal tʼaqesiyapjjäna uk uñjasajj ¿kunjamas chuymapan jikjjataspachäna? Kunja llakitänsa uk janipuniw amuyksnati. (Jupanakjam Diosar confiyapjjañäni: Abrahán [parte 2] sat video jw.org cheqan uñtäta).

9. Romanos 8:32, 38, 39 textojj ¿kunsa Jehová Diosan munasirïtapat yatichistu?

⁹ Janiw khitis Jehová Diosjamajj munaskistaspati, janiw wali munat amigosasa ni wali jakʼa familiarasas ukham munaskistaspati, ukwa Jesusan jiwas layku jiwatapajj yatichistu (Romanos 8:32, 38, 39 liytʼäta). Jiwas pachpar munasktan ukat sipansa, Jehová Diosajj jukʼampiw munasistu. Ak amuytʼañäni: ¿Janit jumajj wiñayatak jakañ munkasma? Jehová Diosajj jumat sipans jukʼampiw wiñay jakañam muni. ¿Janit juchanakamat perdonatäñ munkasma? Jehová Diosajj jumat sipans jukʼampiw uk muni. Diosajj Jesusan jiwatap katoqasiñasatakejj jupar yuspäratas uñachtʼaysna, jupar confiysna, istʼaraksna ukakwa mayistu. Jesusajj juchampit jiwañampit kutsuykistu ukajja, Diosan jiwasar wal munasitapwa uñachtʼayi. Machaq mundon jukʼampiw Jehová Diosan munasirïtapat yateqañäni (Ecl. 3:11).

¿KUNSA JESUSAN JIWATAPAJJ JUPAT YATICHISTU?

10. 1) ¿Kuna toqets Jesusajj janïr jiwkasajj wal llakisïna? 2) ¿Kunjamatsa Jesusajj Jehová Diosan sutip qʼomachäna? (“Jesusajj Jehová Diosan sutip qʼomachäna” sat recuadro liytʼarakïta).

¹⁰ Jesusatakejj kuntï jaqenakajj Awkipat parlapki ukajj wali importantewa (Juan 14:31). Jupajj janipuniw Awkipan sutip qʼañuchañ munkänti, ukatwa Diosar jiskʼachatapata, autoridadanak contra saytʼatapat kʼarintapkäna ukhajj wal llakisïna. Ukatwa akham sasin orasirakïna: “Awkijay, wakischi ukhajj aka copa nayat apaqtʼita” sasa (Mat. 26:39). Niyakejjay Jesusajj jiwañkam Jehová Diosat jan jitheqtkchïntejja, wiñayatakiw Awkipan sutip qʼomachäna.

11. ¿Kunjamsa Jesusajj jaqenakar wal munasitap uñachtʼayäna? (Juan 13:1).

¹¹ Jesusan jiwas layk jiwatapajja, qhawqsa jupajj jaqenakat llakisi, jukʼampis discipulonakapat llakisi ukwa yatichistu (Prov. 8:31; Juan 13:1 liytʼäta). Jesusajj ak sum yatïna: aka oraqenkkasajj kunayman jan walinakanwa uñjasiñapäna, jiwañatakis wal tʼaqesiñaparakïna. Ukampis Jesusajj janiw phoqañ laykukejj asignacionap phoqkänti, jan ukasti taqe chuymaw jaqenakar predicäna, yatichäna, yanaptʼarakïna. Yamas jiwañapäkäna uka urojja, apostolonakapan kayunakap jareqtʼañatakisa, jupanakar chʼamañchtʼañatakisa, yatichañatakis tiemp apstʼasïnwa (Juan 13:12-15). Ukat tʼaqesiñ lawankaskäna ukhajja, ladopan warkkatatäkäna uka jan walinak lurir jaqeruw mä suytʼäwi churäna, María mamapar cuidañapatakiw Juan apostolor mayirakïna (Luc. 23:42, 43; Juan 19:26, 27). Jesusajj aka oraqenkkäna ukhajj munasiñampipuniw jaqenakar uñjäna, jupanak layk jiwasaw jupanakar munasitap uñachtʼayarakïna.

12. ¿Kunsa Jesusajj jiwas layk luraski?

¹² Cristojj ‘may kutikiw jiwäna, janirakiw mayampsa jiwkaniti’, ukampis jiwas laykojj kunaymaninak luraskakiwa (Rom. 6:10). Cheqas kunanaktï jiwatapampejj jikjjatawayki ukanak jiwasar churañatakejj trabajiskakiwa. Kunanaksa Jesusajj luraski uk amuytʼam, jupajj Reyisawa, Jachʼa Jilïr Sacerdotesawa, congregacionan pʼeqtʼiriparakiwa (1 Cor. 15:25; Efes. 5:23; Heb. 2:17). Jupajj ajllitanakar tantachtʼañataki, walja jaqenakar tantachtʼañatak encargatawa, uka luräwsti janïr jachʼa tʼaqesiñ tiempo tukuskipanwa phoqani (Mat. 25:32; Mar. 13:27).b Juparakiw suma phoqeri esclavor yanaptʼaski, ukhamat aka qhepa urunakan kunanaktï Diosar jan jitheqtas serviñatak necesitktan ukanak jiwasar churañapataki (Mat. 24:45). Waranqa Maranak Reyit Apnaqkani ukhajja, jiwasar yanaptʼañatakejj trabajiskakiniwa. Kunjamtï uñjaniwayktanjja, Jehová Diosajj janiw jakañ vidap loqtasiñapatakikejj Yoqapar churkänti, jan ukasti jiwas layk waljanak lurañapatakiw churäna.

YATEQASIPKAKIÑÄNI

13. ¿Kunsa Jehová Diosampin Jesucristompin munasirïpjjatapat yateqaskakiñatakejj lursna?

¹³ Lupʼiñajj Jehová Diosampi Jesucristompejj qhawqsa munasipjjestu uk yateqaskakiñatakiw yanaptʼistani. Aka marajj Jesusan jiwatapajj amtaskani uka semananakanjja, inas maya jan ukajj jukʼamp Evangelionak liytʼsna. Jan walja capitulonak apur apur liytʼañatakiw chʼamachasiñasa, jan ukasti kʼachitatwa liytʼañasa, Jehová Diosampir Jesusampir munasiñatakejj kuna yaqha razonanakampis utji ukwa thaqañasa. Janipun ak armamti: kuntï yateqaskta ukanak yaqhanakar yatiyañamarakiwa.

14. Salmo 119:97 textorjamasa notaparjamas ¿kunsa Jesusan jiwatapampit yaqha yatichäwinakampit yateqaskakiñatakejj lursna? (Foto uñjjattʼarakïta).

¹⁴ Jumatï walja maranak bautisatäjjstajja, “Diosan cheqapar uñjirïtapatsa, munasirïtapatsa, Jesusan jiwatapats ¿jukʼamp yatjjatañajj utjaspati?” sasin inas jisktʼassta. Ukampis ukanakat yatjjatañajj janiw tukuskiti. ¿Kunas jukʼamp yateqaskakiñatak yanaptʼiristam? Qellqatanakasat jukʼampinak yatjjataskañamakiwa. Mä texto jan amuykäta ukhajja, uka textot jukʼamp yatjjatam. Ukat kuntï yatjjatawaykta, kuntï Jehová Diosatsa, Yoqapatsa, ukat qhawqsa jupanakajj munasipjjestu uka toqets yateqawayta ukanakat uru jurnälaw lupʼiñama (Salmo 119:97, notapamp liytʼäta).

15. ¿Kunatsa Biblian suma yatichäwinakap thaqaskakiñasa?

¹⁵ Biblia liytʼasatï jan ukajj yatjjatasatï jan kuns jikjjatkäta ukhajja, jan desanimasimti. Bibliat yatjjatañajj qori thaqañamp sasispawa. Jilaparte jaqenakajj walja horanaka jan ukajj walja urunakaw qori thaqapjje. Paciencianïpjjewa, janiw qarjtapkiti, kuna laykutejj mä jiskʼa qoris jupanakatakejj wali valoraniwa. Biblian jikjjatktan uka suma yatichäwinakajj qorit sipans jukʼamp valoraniwa (Sal. 119:127; Prov. 8:10). Ukhamajj paciencianïñamawa, Biblia liytʼañsa yatjjatañs janiw jaytañamäkiti (Sal. 1:2).

16. ¿Kunjamsa Jehová Diosampit Jesusampit yateqassna?

¹⁶ Bibliat yatjjatkasajj kunjamsa yateqatasarjam sarnaqsna ukwa amuytʼañasa. Akanakwa lursna: Jehová Diosan cheqapar uñjirïtapat yateqasisajja, mayninakarojj jan yaqhachasaw uñjsna. Qhawqsa Jesusajj Awkiparusa jaqenakarus munasi uk yateqasisajja, Diosan sutip layku tʼaqesiñatakejj dispuestokïñäniwa. Sacrificionak lurañas wakiskchinejja, jilat kullakanakar yanaptʼañäniwa, Jesusajj jiwas layk jiwki uka regalot yaqhanakan beneficiasipjjañapatakejj predicarakiñäniwa.

17. ¿Kunsa jutïr yatichäwin yatjjataskañäni?

¹⁷ Jesusan jiwas layk jiwatapat jukʼamp yatjjatañäni ukhajja, jukʼampiw Jehová Diosarus Yoqaparus munasiñäni. Jupanakajj jukʼampiw jiwasar munasipjjarakistani (Juan 14:21; Sant. 4:8). Ukhamajj kunanaktï Jehová Diosajj Jesusan jiwas layk jiwatapat yateqaskakiñatak churkistu taqe ukanak aprovechtʼañasawa. Jutïr yatichäwinjja, kunjamsa Jesusan jiwatapajj yanaptʼistu, kunjamsa Jehová Diosarojj ukham munasirïtapat yuspäratas uñachtʼaysna ukanakatwa yatjjataskañäni.