¿Kunjamsa mayninakar sum ewjjtʼsna?

1. ¿Khitinakas mayninakar ewjjtʼapjjañapa, ukat kunatsa?

YAQHEPATAKEJJ ewjjtʼañajj facilakiwa, yaqhepatakisti chʼamakirakiwa. Ukampis taqeniruw may kutis maynir ewjjtʼañajj waktʼistani. ¿Kunatsa jilat kullakanakar ewjjtʼañasa? Kuna laykutejj ukhamatwa jupanakar munasitas uñachtʼaytanjja, Jesusan arunakaparjamajja cheqpach arkirinakapajj munasirïpjjañapawa (Juan 13:35). Uka toqet parlkasajja, maynir ewjjtʼasajj jupampejj jukʼamp suma amigötanwa sasaw Bibliajj qhanañcharaki (Prov. 27:9).

2. ¿Ancianonakajj kuna luräwimpis phoqapjjañapa, ukat kunatsa? (“Semanan apaski uka tantachäwin ¿kunjamsa maynejj ewjjtʼañapa?” sat recuadro liytʼarakïta).

² Jukʼampis ancianonakaw suma ewjjtʼirïpjjañapa, kuna laykutejj Jehová Diosampi Jesusampiw jupanakarojj congregacionar uñjapjjañapatak uttʼayapjje (1 Ped. 5:2, 3). ¿Kunjamsa ancianonakajj uka luräwimp phoqapjje? Mä toqetjja, discursonak arstʼkasajj Bibliarjamapuniw ewjjtʼapjje. Maysa toqetjja, congregacionankir sapa mayni jilat kullakanakaruw ewjjtʼapjjaraki, khitinakatï Jehová Diosan markapat jitheqtatäpki jupanakats janiw armasipkiti. ¿Kunjamsa ancianonakasa taqe jiwasanakas suma ewjjtʼirïsna?

3. 1) ¿Khitinakatsa suma ewjjtʼirïñ yateqassna? (Isaías 9:6; “Ewjjtʼkasajj Jesusat yateqasipjjañäni” sat recuadro liytʼarakïta). 2) ¿Kunanakatsa aka yatichäwin yatjjataskañäni?

³ Mayninakar sum ewjjtʼañatakejja, Diosan nayra servirinakapatwa yateqassna. Jupanakat maynïrejj Jesusawa, Bibliajja jupat ‘Yatiñani Ewjjtʼiriwa’ sasaw qhanañchi (Isaías 9:6 liytʼäta). Ewjjtʼa mayipkistu ukhajj kunsa lursna, jan ewjjtʼa mayipkistani ukhajj kunsa luraraksna ukwa aka yatichäwin yatjjataskañäni. Kuna horasasa ukat kunjamsa ewjjtʼañasa uka toqets yatjjataskarakiñäniwa.

EWJJTʼA MAYIPKISTANI UKHAJJ ¿KUNSA LURSNA?

4, 5. ¿Maynin ewjjtʼa mayitajj kamsasas jisktʼasiñasa? Uk mä ejemplomp qhanañchtʼam.

⁴ Maynejj ewjjtʼa maykistani ukhajj ¿kunsa nayraqat lurañasa? Jiwasar ukham jisktʼasitapat kusissnawa, jankʼakiw ewjjtʼañ munaraksna. Ukampis janïr uk lurkasajj akhamwa jisktʼasiñasa: “¿Sum ewjjtʼañatakejj jisktʼaskitu uka toqet sumti yattjja?” sasa. Awisajja, khititï uka toqet sum yatki ukar jisktʼasiñapatak yanaptʼañaw walïspa.

⁵ Wali munat mä amigosajj mä jan wali usunïkaspas ukham amuytʼañäni. Jupajj usupat qollasiñatakejj walja qollanak utjatapwa yatjjati, ukat “¿kawkïris jukʼamp walïspa?” sasaw jisktʼasistu. Inas jiwasajj kawkïris walïspa uk sum yatjjstan, ukampis janitï doctoräkstan, janirak uka usut yatjjattʼatäkstan ukhajja, khititï uka toqet sum yatki ukar jisktʼasiñapatakiw yanaptʼsna.

6. ¿Ewjjtʼa mayitajj kunatsa jan jankʼak ewjjtʼañasäki?

⁶ Maynin ewjjtʼa mayitajja, ewjjtʼañatakejj wakichtʼatäksnas ukhamwa awisajj amuyassna. Ukhamächi ukhajja, janïr jayskasajj suytʼañaw walïspa. Proverbios 15:28 textojj akham siwa: “Cheqap sarnaqer jaqen chuymapajja janïr jayskasajj lupʼiwa” sasa. Ukatwa ewjjtʼañatak wakichtʼatjam amuyasstan ukhas uka toqet yatjjatañataki, orasiñataki ukat lupʼiñatak tiempo apstʼasiñasa. Ukham lurasaw kunjamtï Jehová Diosajj amuyki ukarjam ewjjtʼañäni. Jichhajj Natán profetat amuytʼañäni.

7. ¿Kunsa Natán profetat yateqassna?

⁷ David reyejja, Jehová Diosatakejj mä templo lurañ munäna, ukwa Natán profetarojj yatiyäna. ‘Ukham amtatamajj walikïskiwa’ sasaw profetajj Davidar säna, ukampis Jehová Diosajj janiw Davidan templo lurañap munkänti. Ukhamajj Natán profetajj janïr Davidar kun siskasajja, Jehová Diosar jisktʼasiñapaw walïspäna (1 Crón. 17:1-4). ¿Kunsa uka sarnaqäwit yateqsna? Maynin ewjjtʼa mayitajja, ‘janiw jan amuytʼasisajj jankʼak parlañasäkiti’ (Sant. 1:19).

8. ¿Kunatsa janïr ewjjtʼkasajj wal amuytʼasiñasaraki?

⁸ ¿Kunatsa janïr ewjjtʼkasajj wal amuytʼasiñasaraki? Ewjjtʼasar istʼasatï maynejj jan walir purtʼasispa ukhajja, jiwasajj juchanirakïsnawa. Ukhamajj janïr ewjjtʼkasajj sum amuytʼasiñasawa.

EWJJTʼA JAN MAYIPKISTANI UKHAJJ ¿KUNSA LURSNA?

9. Maynir janïr ewjjtʼkasajj ¿kunsa ancianonakajj nayraqat amuytʼapjjañapa? (Gálatas 6:1).

⁹ Maynejj ‘jan wali thakir saranukchi’ ukhajja, kunjamtï Gálatas 6:1 (liytʼäta) texton siskejja ancianonakaw yanaptʼañatak ewjjtʼapjjañapa. Inas maynejj jan amuytʼasis suma amtanakar jan purkchiti, qhepat ukajj jachʼa jucharuw purtʼasiyaspa. Ukatwa ancianonakajj wiñay jakañar apki uka thaknam saraskakiñapatak jupar ewjjtʼapjjañapa (Sant. 5:19, 20). Janïr uk lurkasajja, cheqapunit jan wali thakir saranukuski janicha ukwa ancianonakajj nayraqat amuytʼapjjañapa, kuna laykutejj sapa maynin concienciapajj mayj mayjawa, ukatwa maynejj mä kun lurañs amtaspa (Rom. 14:1-4). Ukampis ancianonakajj maynin cheqpachapun jan wali thakir saranukuskatap amuyapjjani ukhajja, ¿kunjamsa jupar ewjjtʼapjjaspa?

10-12. Maynejj ewjjtʼa jan maykani ukhajj ¿kunjamsa ancianonakajj jupar ewjjtʼapjjaspa? Uk mä ejemplomp qhanañchtʼam (fotonak uñjjattʼarakïta).

¹⁰ Maynitï mä ewjjtʼa jan maykchi ukhajja, ancianonakatakejj ewjjtʼañajj chʼamakïspawa, kuna laykutejj apóstol Pablon arunakaparjamajja, maynejj jan amuyasisaw jan wali thakir saranukuskaspa, janirakiw mä ewjjtʼa necesitataps amuyaskaspati. Ukhamajj janïr ewjjtʼkasajja, ¿kunanaksa ancianonakajj maynin ewjjtʼa katoqasiñapatakejj lurapjjañapa?

¹¹ Uk amuytʼañatakejja, jathanak satantañat parltʼañäni. Yapuchirejj janïr satantkasajja, nayraqat oraqwa laqʼachtʼi, ukjjarusti jathanakwa satanti ukat umampiw warjjattʼaraki. Maynir ewjjtʼañajj niya ukar uñtasitarakiwa, maynitï mä ewjjtʼa jan maykchi ukhajja, mä ancianojj ewjjtʼañatakejj “oraq laqʼachtʼañapa”. Ukatakejj jupajj munasirit uñtʼatäñapawa, ukhamäni ukhajj mä jilatajj jankʼakiw jupat mä ewjjtʼa katoqasini. Ukat ewjjtʼañatak horasäjjani ukhajja, “wal munassma, wal jumat llakista, ukatwa may sañ munayäsma” sasaw ancianojj saspa.

¹² “Oraqe laqʼachtʼaskakiñatakejja”, ancianojj akhamwa saspa: ‘Taqeniw pantjasirïtanjja, ukatwa awisajj ewjjtʼatäñajj wakisi’ sasa (Rom. 3:23). Ukat suma arunakampi respetompiw kunansa pantjasiski uk Bibliamp sum qhanañchtʼañapa. Jilatajj kunansa pantjasiski uk amuyasjjani ukhajja, jan uk lurjjañapatakejj ancianojj qhana arunakampiw ewjjtʼañapa, ukham lurasajj “jathsa satantkaspa” ukhamäniwa. Ukjjarusti suma luratanakapatwa felicittʼañapa, ukat jupampiw orañaparaki, ukhamatwa “umampis warjjattʼkaspa” ukhamäni (Sant. 5:15).

13. Maynejj ewjjtʼa sumt entiendiwayi janicha uk sum amuyañatakejj ¿kunsa ancianonakajj lurapjjaspa?

¹³ Awisajj mä ancianojj sumsa ewjjtʼkaspa ukhamwa amuyasispa, ukampis ewjjtʼa katoqer jilatajj janiw ewjjtʼa sum entiendkaspati. Uk jan pasañapatakejj ¿kunsa ancianonakajj lurapjjaspa? Wali amuyumpiw jilatar jisktʼapjjañapa, ukhamat ewjjtʼa sumt entiendiwayi, kuns lurañapa uk sumt amuyawayi uk yatiñataki (Ecl. 12:11).

¿KUNA HORASASA UKAT KUNJAMSA EWJJTʼAÑASA?

14. ¿Kunatsa coleratäkasin maynir jan ewjjtʼañasäki?

¹⁴ Niyakejjay taqenis pantjasirïstanjja, arsutasampis luratasampis maynir chuym ustʼayañäniwa (Col. 3:13). Ukat Biblianjja, maynejj awisajj colertʼayistaspawa sasaw qhanañcharaki (Efes. 4:26). Ukampis coleratäsajj janipuniw maynir ewjjtʼañasäkiti, kuna laykutejj “colerasir jaqejja janiw kunatï Dios nayraqatan cheqapäki ukarjamajj lurkiti” (Sant. 1:20). Coleratäsin maynir ewjjtʼsna ukhajja, yanaptʼañat sipans jan walirukiw purtʼasjjsna. Ukhamajj chuyma ustʼaykistu ukampitï kunjamas jikjjatastan uka toqet parlañ munañäni ukhajja, coler pasayasiñkamaw suyañasa. Jichhajj Elihú chachat parltʼañäni, jupajj Job chacharojj sum ewjjtʼäna.

15. ¿Kunsa Elihú chachat yateqassna? (Dibujo uñjjattʼarakïta).

¹⁵ Kunjamsa jan wali amigonakapajj Job chachar kʼarintapjjäna, Job chachajj kunjamsa arjjatasirakïna uk walja urunakaw Elihú chachajj istʼaskäna. Jupajj Job chachat sinttʼaskchïnsa, Jehová Diosat kunatï jan cheqäki ukanak parlatapat colertʼasïnwa. Ukhamäkchïnsa, pacienciampiw parlañatak suytʼäna, ukat wali respetompi jan usuchjir arunakampiw ewjjtʼäna (Job 32:2; 33:1-7). Elihú chachat akwa yateqassna: mä ewjjtʼa churañajj wakisini ukhajja, kuna horasasa ukat kunjamsa ewjjtʼañäni uk sum amuytʼañasawa, mä arunjja respetompi ukat munasiñampipuniw ewjjtʼañasa (Ecl. 3:1, 7).

SUMA EWJJTʼANAK CHURASKAKIÑÄNI UKAT EWJJTʼANAK KATOQASISKAKIÑÄNI

16. ¿Kunsa Salmo 32:8 textot yateqsna?

¹⁶ Aka yatichäwitak apstʼat textorjamajja, Jehová Diosajj nayranakapamp uñchʼukisaw ewjjtʼistu (Salmo 32:8 liytʼäta). Uka textorjamajja, Jehová Diosajj janiw ewjjtʼa mayak ewjjtʼkistuti, jan ukasti ukarjam luraskakiñatakejj yanaptʼaskakistuwa. ¡Ukajj wali yateqaskañawa! Maynir ewjjtʼkañäni uka qhepatjja, uka ewjjtʼarjam lurañapatak yanaptʼaskakiñasawa.

17. ¿Isaías 32:1, 2 textojj Bibliarjam ewjjtʼir ancianonakat kamsisa?

¹⁷ Qhepa urunakankatasatjja, mayninakar ewjjtʼañsa ewjjtʼatäñsa taqeniw necesittanjja (2 Tim. 3:1). Bibliarjam qhana arunakamp ewjjtʼir ancianonakajja, ‘waña oraqen jalir umanakar uñtasitäpjjewa’ (Isaías 32:1, 2 liytʼäta). Necesitktan uka ewjjtʼanak churir ukham amigonakanïñajja, wali kusiskañawa. Arunakapajj wali valoraniwa, “kunjamtï qori manzananakajj mä qollqe bandejar uchatajj wali sum uñtaskejja” ukhamawa (Prov. 25:11). Ukhamajj suma ewjjtʼanak churañatakisa katoqañatakisa, yatiñanïñatak chʼamachasisipkakiñäni.