Jehová Diosan jiwasar perdonatapat janiw payachasiñasäkiti

1, 2. ¿Kunsa Jehová Diosajj arrepentistan ukhajj luri, ukat ukajj kunjamakis jikjjatasiyistu? (Dibujo uñjjattʼarakïta).

DAVID reyejja, nayra juchanakapat amtasisajj wal juchañchasïna (Sal. 40:12; 51:3; pʼeqeñchäwi). Ukampis taqe chuym arrepentisitapatjja, Jehová Diosajj perdonänwa (2 Sam. 12:13). Uk amuyäna ukhajja, Davidajj wal kusisïna (Sal. 32:1).

² Jiwasajj Davidjamarakiw kusisitäsna. Jachʼa juchanakarus purtʼasiwaykstanjja, taqe chuym arrepentisis juchanakas arsustan, ukanak jan lurjjañatak chʼamachasiraktan ukhajja, Jehová Diosajj perdonistuwa (Prov. 28:13; Hech. 26:20; 1 Juan 1:9). Juchanakas perdonistu ukhajja, jupajj janiw mayampis uk amtjjeti, janis kunapachas juch lurawayksnäna ukhamwa uñjaraki, ukajj wal chuymachtʼistu (Ezeq. 33:16).

3, 4. ¿Kunjamsa Jennifer kullakajj jikjjatasïna? ¿Kunsa aka yatichäwin yatjjataskañäni?

³ Awisajja, Jehová Diosajj janis perdonkistaspa ukhamwa amuysna. Ukaw Jennifer kullakar pasäna. Awk taykapajj Bibliat yatichapkchïnsa, tawaqetäjjäna ukhajj jan walinakwa lurjjäna, uk awk taykapar imtʼarakïnwa. Ukampis mä qhawqha maranak qhepatjja, Jehová Diosaruw kuttʼjjäna, tiempompejj bautisasjjarakïnwa. Jupajj akham siwa: “Nayrajj qʼañu juchanakanwa sarnaqayäta, walpun alcohol umayäta, wali colerasirirakiyätwa, qollqe chuymarakiyätwa. Uka jan walinak luratajat perdón mayisisajj arrepentisiyätwa, Jesucriston sacrificiot loqtasitapjjar Diosan nayar perdonjjataps yatirakiyätwa. Ukampis janis perdonkitaspa ukhamwa amuyaskakiyäta” sasa.

⁴ Uka kullakjamajja, inas awisajj janis juchanakasat Jehová Diosajj perdonkistaspa ukham amuyasirakstan. Ukhamächi ukhajja, Davidjamarakiw Jehová Diosan khuyaptʼayasirïtapat amtasiñasa, jupajj kunjamsa Jehová Diosajj wali khuyaptʼayasirïtapat juchanakap perdonäna ukwa amuyäna. Jiwasajj ukhamarak amuysna ukwa Jehová Diosajj munaraki. Aka yatichäwinjja, Jehová Diosan jiwasar perdonatapat kunatsa jan payachasiñasäki, ukat kunas ukatak yanaptʼistaspa ukwa yatjjataskañäni.

JEHOVÁ DIOSAN JIWASAR PERDONATAPAT ¿KUNATSA JAN PAYACHASIÑASÄKI?

5. ¿Supayajj kun amuyañassa muni? Uk mä ejemplomp qhanañchtʼam.

⁵ “Jehová Diosajj perdonituwa” sasin jan payachaskañäni ukhajja, janiw Supayan mä trampapar jaltʼkañäniti. Jehová Diosar jan sirvjjañasatakejja, Supayajj kunaymaninakwa lurani. Mä trampapajja, mä jachʼa juchar purtʼastan ukhajj “Jehová Diosajj janipuniw perdonkitaniti” sasin amuyañawa. Corinto markankir mä chachat parltʼañäni, jupajj qʼañu juch luratapat congregacionat apsutaw uñjasïna (1 Cor. 5:1, 5, 13). Qhepatjja, jupajj uka jucha luratapat arrepentisïnwa. Ukampis Supayajja, janiw jilat kullakanakan jupar perdonapjjañap munkänti, janirakiw congregacionan sum katoqtʼapjjañaps munkänti. Jilat kullakanakatï uk lurapjjaspänjja, jucha luratapajj janis perdonkañäkaspa ukhamwa uka chachajj amuyjjaspäna. “Wal llakisitap laykojj” janirakiw Jehová Diosar sirvjjaspänti, cheqas Supayajj ukham pasañapwa munäna. Jichhürunakanjja, Supayajj ukhamarakiw Diosajj juchanakas janipunis perdonkistaspa ukham amuyayañ munistu, ukhamatwa Jehová Diosat jitheqtayañ munistu. Ukampis “jan wali amtanakap jiwasajj sum yattanjja” (2 Cor. 2:5-11).

6. ¿Kunas mayamp kusisitäñatakejj yanaptʼistaspa?

⁶ “Jehová Diosajj perdonituwa” sasin jan payachaskañäni ukhajja, mayampiw kusisitäjjañäni. Juchar purtʼastan ukhajja, wal llakistanjja (Sal. 51:17). Ukham jikjjatasiñajj walikïskiwa, ukhamatwa concienciasarjamajj cambiañatak chʼamachasiñäni, kunatï walïki uk lurarakiñäni (2 Cor. 7:10, 11). Ukampis Jehová Diosajj janis perdonkistaspa ukham amuyasiskaksna ukhajja, jukʼat jukʼatwa jupat jitheqtawayjjsna. Maysa toqetjja, jiwasatï “Jehová Diosajj perdonituwa” sasin jan payachaskañäni ukhajja, janiw jukʼamp juchañchasjjañäniti. Ukhamatwa qʼoma concienciampejj wali kusisit Jehová Diosar serviñäni, cheqas ukham serviñaswa jupajj muni (Col. 1:10, 11; 2 Tim. 1:3). “Jehová Diosajj perdonituwa” sasin jan payachasiñatakejj kunanakas yanaptʼistaspa ukwa jichhajj yatjjatañäni.

JEHOVÁ DIOSAJJ PERDONJJETUWA SASIN JAN PAYACHASIÑATAKEJJ ¿KUNAS YANAPTʼISTASPA?

7, 8. Éxodo 34:6, 7 texton ¿Jehová Diosajj jupa pachpat kamsänsa, ukat ukajj kunatakis yanaptʼistu?

⁷ Jehová Diosajj jupa pachpat kamsänsa uka toqetwa lupʼiñasa. Sinaí qollun Diosajj Moisesar kamsänsa uka toqet amuytʼañäni (Éxodo 34:6, 7 liytʼäta).a Jupajj kunjam Diosasa uka toqet waljanakwa saspäna, ukampis “khuyaptʼayasiri, sinttʼasiri” Diosätwa sasaw Moisesar säna. Ukhamajj Jehová Diosajja, khititï taqe chuym arrepentiski, jupar munaskaraki ukarojj perdoniwa. Jupatï jan perdonkaspajja, jan sinttʼasir Diosäspawa. Ukampis Jehová Diosajj janipuniw ukham Diosäkaspati.

⁸ Jehová Diosajj khuyaptʼayasirïtwa siski ukajj cheqäskapuniwa, jupajj janipuniw kʼariskaspati (Sal. 31:5). Ukampis Diosajj perdonpachïtuti janicha sasin payachasiskakstan ukhajja, akham amuytʼañaw jan payachasiñatak yanaptʼistaspa: “Jehová Diosajj khuyaptʼayasiri sinttʼasiri Diosawa, arrepentisipki ukanakarojj perdoniwa, ukhamajj nayarojj perdonarakituwa” sasa.

9. Kunjamsa Jehová Diosajj perdoni uka toqetjja, ¿kunsa Salmo 32:5 textojj yatichistu?

⁹ Kunjamsa Jehová Diosajj perdonistu uka toqet Bibliajj kamsisa ukwa lupʼiñasa. Davidajj akham sasaw Jehová Diosar säna: “Jumasti pantjasitajsa juchanakajsa perdonistawa” sasa (Salmo 32:5 liytʼäta). Uka versiculon hebreo arut traducitäki uka “perdonaña” arojja, “aptaña” jan ukajj “apaña” sañwa muni. Ukhamajj kunapachatï Jehová Diosajj Davidar perdonkäna ukhajja, mä jathi qʼepsa kallachipat aptasajj apaskaspa ukhamänwa. Uka jathi qʼepi apaqatäsajj Davidajj wali kusisitäjjänwa (Sal. 32:2-4). Cheqpachapun arrepentisiñäni ukhajja, Davidjamarakiw wali kusisitäñäni. Jucha luratasat juchañchasiskakiñajj janiw walïkaspati, kuna laykutejj jathi qʼepir uñtasitäki uka juchanakas Jehová Diosajj apaskaspasa ukhamawa.

10, 11. ¿Kunsa Salmo 86:5 textojj Jehová Diosat yatichistu?

¹⁰ (Salmo 86:5 liytʼäta). Davidajja, Jehová Diosajj ‘perdonañatakejj jankʼakiwa’ sasaw säna. Ukhamajja, pantjasktan ukhajj Jehová Diosajj janiw jankʼak coleraskiti, jan ukasti arrepentisipki ukanakar perdonañ wal muni. ¿Kunatsa juchanakapat arrepentisipki ukanakarojj ukham uñjpacha? Salmo 86:5 textorjamajja, ‘taqe khitinakatï jupar artʼasipki ukanakarojj wali munasiñampiw uñji, janirakiw jaytjkiti’. Kunjamtï pasïr yatichäwin yatjjataniwayktanjja, ‘Jehová Diosajj jupar munasipki ukanakarojj munasiñat janipuniw jaytjkaniti’. Ukham munasirïtapatwa jupar munasipki ukanakarojj taqe chuym perdoni (Is. 55:7). “¿Jehová Diosajj perdonpachïtuti?” sasin payachasiskakstan ukhajja, inas akham sasin amuytʼañasächispa: “Jehová Diosajj taqe khitinakatï arrepentisipki, khuyaptʼayatäñ munapkaraki ukanakar perdonañatakejj jankʼakiwa, uk nayajj sum yatta. Ukhamajj nayarojja perdonarakituwa” sasa.

¹¹ Maysa toqetjja, Jehová Diosajj kunjam lurtʼatätansa uk sum yati, pantjasirïtassa yatirakiwa sasaw Bibliajj qhanañchi, ukajj wal chuymachtʼistu (Sal. 139:1, 2). Uka toqet jukʼamp yatiñatakejj Davidan qellqat yaqha salmot yatjjatañäni, ukaw Jehová Diosan jiwasar perdonatapat jan payachasiñatak yanaptʼistani.

¿KUNSA JEHOVÁ DIOSAJJ JIWASAT YATI?

12, 13. Salmo 103:14 textorjamajja, ¿kunsa Jehová Diosajj yati, ukat kunsa ukarjamajj luraraki?

¹² (Salmo 103:14 liytʼäta). Jehová Diosajj “laqʼat luratätassa amtasirakiwa” sasaw Davidajj säna. Ukhamajj pantjasirïtas jupajj sum yati, ukatwa taqe chuym arrepentistan ukhajj jupajj jankʼak perdonistu. Jichhajj Salmo 103:14 textot jukʼamp yatjjataskakiñäni.

¹³ Davidajja, ‘jiwasajj kunjam luratätansa uk Jehová Diosajj sum yati’ sasaw qellqäna. Diosajj Adanarojj “laqʼat” luräna, ukhamajj jaqenakajj kunjam luratäpjjesa, kunanaksa necesitapjje uk jupajj sum yati. Sañäni, jaqenakajj manqtʼasiña, samsuña, iktʼasiñwa jakañatakejj necesitapjje. Mä perfecto jaqes ukanak necesitarakispawa (Gén. 2:7). Ukampis Adanamp Evamp juchachasipkäna ukat aksarojja, janiw perfectöjjtanti, jan walinak lurañ munañaw chuymasan utjaraki. Ukhamajj niyakejjay jan perfectökstanjja, awisajj pantjasikipuniñäniwa, uk Jehová Diosajj sum yati, ukampis jiwasatï pantjasitasat arrepentisiñäni ukhajja, khuyaptʼayasirïtapat Diosajj perdonistaniwa (Sal. 78:38, 39).

14. 1) Jehová Diosajj kunjamsa perdonistu uka toqetjja, ¿kunsa Salmo 103:12 textojj yatichistu? 2) Jehová Diosan Davidar perdonatapat ¿kunsa yateqsna? (“Jehová Diosajj perdoniwa ukat juchanakasat janiw mayampis amtasjjeti” sat recuadro liytʼäta).

¹⁴ Salmo 103:12 textojja, ¿kunjamsa Jehová Diosajj perdonistu uka toqet kunampsa yatichistu? (Salmo 103:12 liytʼäta). Jehová Diosajj juchanakas perdoni ukhajja, “kunjamtï inti jalsojj inti jalantat wali jayankkejja”, ukhamwa juchanakas uchi sasaw Davidajj säna. Cheqansa inti jalsojj inti jalantat wali jayankiwa. ¿Kunsa ukat yateqsna? Jehová Diosajj juchanakas perdonistu ukhajja, jiwasat wali jayaruw apasjje, janiw kunas juparojj juchanakasat wasitat amtasiykaspati, janirakiw kuna juchanaktï lurktan uk jiwasarojj amtasiykistaniti ni juchañchkistanisa, janirakiw castigkistanisa (Ezeq. 18:21, 22; Hech. 3:19).

15. Nayra juchanakasat juchañchasiskakstan ukhajj ¿kunsa lursna?

¹⁵ Nayra juchanakasat juchañchasiskakstan ukhajja, Salmo 103 textot lupʼiñaw Diosan jiwasar perdonatapat jan payachasiñatak yanaptʼistani. Akhamwa jisktʼassna: “Jehová Diosatï pantjasirïtaj amtchejja, arrepentisirinakar perdonañatak jankʼakirakïchejja, ¿janit nayajj jupjam amuyañatak chʼamachaskarakiristjja? Jehová Diosatï juchanakas armasjjchejja, janirak uka juchanakasat juchañchkchistojja, ¿janit ukanak armañajajj wakiskarakispa?” sasa. Niyakejjay Jehová Diosajj perdonkistu uka juchanakasat jan amtaskchejja, jiwasajj janirakiw ukanak amtañasäjjeti (Sal. 130:3). Jehová Diosan jiwasar perdonatapat jan payachasjjañäni ukhajja, jiwaspachpajj perdonasirakiñäniwa, Jehová Diosarus kusisitaw serviskakiñäni.

16. Nayra pantjasitanakasatak lupʼiskañajj ¿kunatsa jan walïki? (Dibujo uñjjattʼarakïta).

¹⁶ Nayra juchanakasatak piensaskañajja, auto apnaqkasin retrovisor espejo uñchʼukiskakiñampi sasiwa. Awisajj uka espejo uñchʼukiñajj walikïskiwa, ukhamat kunas utji uk uñjasin mä jan walir jan purtʼasiñataki. Ukampis auto apnaqkasin jan kuna jan walir purtʼasiñ munkstan ukhajja, nayrarupuniw uñtañasa. Jiwasampejj ukhamarakiwa, nayra pantjasitanakasat amtañajj walikiwa, ukhamat jan uka pachpa juchanakar purtʼasiñataki. Ukampis nayra pantjasitanakasatak lupʼisksna ukhajja, janiw Jehová Diosarojj taqe chuym serviñ puedjjsnati. Ukat sipansa, Jehová Diosar serviñatakiw chʼamachasiñasa, jutïrin kunjamsa jakasjjañäni uka toqetwa lupʼiñasaraki, ukanjja kuna jan walinakatï utjki ukanakajj “janiw amtatäjjaniti” (Is. 65:17; Prov. 4:25).

JANIPUN PAYACHASIPJJAÑÄNITI

17. “Jehová Diosajj munasistuwa, perdonarakistuwa” sasin chuymasar convensiñatakejj ¿kunatsa chʼamachasiskakiñasa?

¹⁷ Jehová Diosan jiwasar munasitapatsa jiwasar perdonañatak jankʼakïtapatsa, chuymasar convensiñasawa (1 Juan 3:19, nota). Kuna laykutejj Diosajj janis munaskistaspa, janis perdonkistaspa ukham amuyañasatakiw Supayajj kunaymaninak luraskakini, jupajj janiw Jehová Diosar serviñas munkiti. Jukʼa tiemponikïtap yatisajja, jukʼampiw Jehová Diosat jitheqtayañ munistu (Apoc. 12:12). ¡Ukampis jiwasajj Supay contra saytʼasajj Jehová Diosar servisipkakiñäni!

18. Jehová Diosan jiwasar munasitapata ukat perdonatapat jan payachasiñatakejj ¿kunanaksa lursna?

¹⁸ Pasïr yatichäwinjja, Jehová Diosajj munasistuwa sasin kunatsa jan payachasiñasäki uka toqetwa yatjjatawaytanjja. Aka yatichäwinsti “Jehová Diosajj perdonistuwa” sasin kunatsa jan payachasiñasäki uka toqetwa yatjjatawayaraktanjja. Jehová Diosajj jupapachpat kamsisa, kunjamsa perdonistu uka toqet Bibliajj kamsarakisa uka toqenakatwa lupʼiñasa. Jupajja pantjasirïtas yatiwa, khuyapayasiñampiw uñjarakistu, uk janipun armapjjañäniti. Taqe chuymaw perdonarakistu, uks janirak armapjjañäniti. Ukhamtï lurañänejja, Davidjamarakiw akham sañäni: “¡Jehová, ‘pantjasitanakajsa juchanakajsa perdonistawa’, walpun ukat yuspärsma!” sasa (Sal. 32:5).