¿Kunjamsa jan walinak lurañ munañar atipjsna?

1. ¿Kunatakis chʼamachasiñasa?

¿KUNTÏ Jehová Diosajj uñiski uk lurañ munirïtati? Ukhamächi ukhajja, inas jumaruk uk pasatap amuyasajj desanimassta. Ukampis Bibliajj akham siwa: “Kuna yantʼanakantï taqe jaqenakajj uñjasipki uka pachpa yantʼanakanwa jumanakajj uñjasipjjtajja” sasa (1 Cor. 10:13). Uka textorjamajj walja jilat kullakanakaw jan walinak jan lurañatak chʼamachasisipki, janiw sapäktati. Jehová Diosaw yanaptʼätam, ukhamat jan walinak lurañamp jan apayasiñamataki.

2. Yaqhep jilat kullakanakasa Bibliat yateqerinakas ¿kuna yantʼanakarus saykatasipki? (Fotonak uñjjattʼarakïta).

² Bibliajj akham sarakiwa: “Sapa mayniw munañapampi apayasisa munañapampi katuntayasisajj yantʼat uñjasi” sasa (Sant. 1:14). Ukhamajj janiw taqe jaqenakajj mä pachpa yantʼan uñjasipkiti. Sañäni, yaqhep jilat kullakanakasa Bibliat yateqerinakasa, qʼañu juchwa chuymapan lurañ munapjjaspa, warmipura jan ukajj chachapurwa ikthapiñ munapjjarakispa. Inas yaqhepajj pornografía uñchʼukiñ jaytawayapjjchi, ukampis jichhajj wasitatwa uñchʼukiñ munapjjaspa. Ukat yaqhepajj drogasiñsa, alcoholani umañanak jiljas umañsa wasitatwa munapjjarakispa. Inas jiwasajj ukhaman uñjasstan, ukhamächi ukhajja, Pabljamarakiw jikjjatassna, jupajj akhamwa qellqäna: “Kunatï walïki uk lurañ nayajj munkta ukhajja, kunatï jan walïki ukaw nayamp chikäski” sasa (Rom. 7:21).

3. Maynitï mä jan wal jan lurañatak kutin kutin chʼamachasiskchi ukhajj ¿kunsa amuyaspa?

³ Jumatï mä jan wal jan lurañatak kutin kutin chʼamachasisksta ukhajja, ukar atipjañatakejj jan chʼamanjamaw amuyasjjasma, ukat ukhamätapat janis Jehová Diosamp sumat uñjatäjjasma ukhamwa amuyasisma. ¡Ukampis janiw ukhamäkiti! Kunatsa ukham sistan uk amuyañatakejja, aka pä jisktʼanakaruw aka yatichäwin qhanañchaskañäni: 1) ¿kunatsa aynachtʼayir amuyunakanïtanjja?, 2) ¿kunjamsa jan walinak lurañ munañar atipjsna?

¿KUNJAM AMUYASIÑASSA SUPAYAJJ MUNI?

4. 1) ¿Kun amuyañassa Supayajj muni? 2) Jan walinak lurañ munañanakar atipjañatakejj chʼamanïtanwa sasajj ¿kunatsa jan payachasktanjja?

⁴ Yantʼat uñjasktan ukhajja, ukar atipjañatakejj jan chʼamanjam amuyassna ukwa Supayajj muni. Ukatwa Jesusajj akham Jehová Diosar mayiñas yatichistäna: “Janirak yantʼarus puriyapjjestati, jan ukasti Supayat salvapjjeta” sasa (Mat. 6:13). Mä jan wal lurañatak yantʼat uñjasisajja, jaqenakajj Jehová Diosar jan istʼañwa ajllipjjani sasaw Supayajj arsuwayi (Job 2:4, 5). Ukhamsa Supayajj jiwasat amuykchejja, jupapachpaw ukhamar purtʼasiwayi, Jehová Diosar istʼañat sipansa jan wal lurañ munañapampiw apayasïna, jiwasajj jupjamäksnas ukham amuyaraki. Janiw ukakïkiti, Diosan perfecto Yoqapatsa, yantʼat uñjasisajj jan wal lurani sasaw amuyarakïna (Mat. 4:8, 9). Ukampis ¿jan walinak lurañ munañanakasar atipjañatakejj chʼamanïtanti? Jïsa, chʼamanïtanwa, apóstol Pablojj akham sänwa: “Khititejj nayar chʼam churkitu ukan chʼamapampejja taqe kunatakiw nayajj chʼamanïta” sasa (Filip. 4:13).

5. ¿Jan walinak lurañ munañanakar atipjañatak chʼamanïtas Jehová Diosajj yatiwa sasajj kunatsa sistanjja?

⁵ Jehová Diosajj janiw Supayjamajj amuykiti, jupajj jan walinak lurañ munañanakar atipjañatak chʼamanïtasat janiw payachaskiti, ¿kunjamatsa uk yattanjja? Kuna laykutejj Jehová Diosajja, jachʼa tʼaqesiñ tiempon nayat jan jitheqtir walja jaqenakaw salvasipjjani sasaw arsuwayäna. Uka arunakajj ¿kamsañsa muni uk amuytanti? “Kayukam purir janqʼo isinakampi” isthapit walja jaqenakaw paraisor mantapjjani sasaw Jehová Diosajj säna (Apoc. 7:9, 13, 14). Ukajj jupa nayraqatan qʼomat uñjatäpjjatapwa uñachtʼayi, ukhamajj Jehová Diosajj jan walinak lurañ munañanakar atipjañatak chʼamanïtas sum yati.

6, 7. ¿Kun amuyañassa Supayajj munaraki?

⁶ Supayajja, jan walinak lurañ munatasatakwa janis Jehová Diosamp sumat uñjatäksna, janis paraíso katoqañajj waktʼkistaspa ukham amuyañas muni. ¿Kunatsa Supayajj ukham amuyañas muni uk amuytati? Kuna laykutejj jupaw Jehová Diosampejj jan sumat uñjatäkiti, janirakiw wiñay jakañatak mä suytʼäwinïkiti, ukatwa janis suytʼäwinïksna ukham jupjam amuyañas munaraki (Gén. 3:15; Apoc. 20:10). Niyakejjay jiwasajj wiñay jakañatak suytʼäwinïstänjja, Supayajj jiwasatak wali coleratawa. Ukatwa janis jupjam suytʼäwinïksna ukham amuyañasatak wal chʼamachasi. Ukampis Bibliarjamajja, Jehová Diosajj jupa nayraqatan sumat uñjatäñasatakisa, wiñay jakañ katoqañasatakis yanaptʼañ munistu, “janiw khitin jiwañapsa jupajj munkiti, jan ukasti taqenin arrepentisipjjañapwa muni” (2 Ped. 3:9). Ukhamajj ¡jiwasajj janiw Supayjamajj jan suytʼäwinïktanti!

⁷ Jan walinak lurañ munañanakanïtasat Jehová Dios nayraqatan janis sumat uñjatäjjsna, uka munañanakar atipjañatakejj janis chʼamanëjjsna ukham amuyañaswa Supayajj muni. Uk amtapuniñäni ukhajja, aynachtʼayir amuyunakar atipjañäniwa. ¡Janipun Supayan amuyunakapamp atipjayasipjjañäniti! (1 Ped. 5:8, 9).

JUCHARARÄTAS LAYKOJJ ¿KUNJAMAS JIKJJATASSNA?

8. Diosajj janis sum uñjkistaspa jan ukajj jan walinak lurañ munañanakar janis atipjañ puedksna ukhamjja, ¿kunas amuyayarakistaspa? (Salmo 51:5; “Amtañataki” siski uk liytʼarakïta).

⁸ Jan wali lurañ munañanakar atipjañatakejj janis chʼamanïksna, janis Diosajj sum uñjkistaspa ukham janiw Supayakejj amuyañas munkiti. Jan ukasti Adanampit Evampit juch katoqawayktan ukaw jan wal jikjjatasiyarakistaspa. Uka jucha katoqatasatjja, janis jan wali lurañ munañanakar saykatañ puedksna, jan ukajj janis Jehová Diosajj sum uñjkistaspa ukhamwa amuysna (Job 14:4; Salmo 51:5 liytʼäta).a

9, 10. 1) Juchachasipkäna uka qhepatjja, ¿kunjamas Adanampi Evampejj jikjjatasipjjäna? (Dibujo uñjjattʼarakïta). 2) ¿Kunjamas jiwasajj juchararätas laykojj jikjjatastanjja?

⁹ Adanampi Evampejj juchachasipkäna ukhajj kunjamas jikjjatasipjjäna uk amuytʼañäni. Jehová Diosar jan istʼasipkäna uka qhepatjja, jupanakajj imantasipjjänwa, jan qʼalaläñatakis mä kunamp imtʼasiñwa munapjjarakïna. ¿Kunatsa ukanak lurapjjpachäna? Perspicacia para comprender las Escrituras librorjamajja, juchachasipjjatap laykojj wal phenqʼasipjjäna, llakiw jupanakar apjjattarakïna, janiw kamachtʼirjamäpkänsa. Janipuniw mayampis Jehová Diosamp sum apasjjapjjaspänti. Kunsay lurapkchïnjja, phenqʼasisipkakïnwa, wali llakitäsipkakïnwa, kuna laykutejj juchararäjjapjjänwa.

¹⁰ Adanampi Evampejj janiw juchampit jiwañampit kutsuyatäpkaspänti, ukampis jiwasarojj Jesusaw juchampit jiwañampit kutsuyawayistu. Ukhamatwa juchanakasajj perdonatäspa, qʼoma conciencianirakïsna (1 Cor. 6:11). Ukhamäkchisa, juch katoqatas laykojj Adanjama Eva warmjamarakiw wali llakita, phenqʼasita ukham jikjjatassna. Bibliarjamajja juchajj taqe jaqenakaruw aynachtʼayaski, khitinakatï ‘Adanjam jan juchachasipki ukanakarus’ ukhamaraki (Rom. 5:14). Ukhamsa jikjjataskstanjja, kunatï walïki uk lurañatakejj janis chʼamanïksna, janis Jehová Diosampejj sumat uñjatäksna ukham janiw amuyasiñasäkiti. ¿Kunas uka aynachtʼayir amuyunakar atipjañatakejj yanaptʼistaspa?

11. Jan walinak lurañ munañar atipjañatakejj janis chʼamanïksna ukham amuyasstan ukhajja, ¿kunsa Romanos 6:12 textojj amtayistu?

¹¹ Awisajj juchararätas laykojj inas akham sasin amuysna: “Janiw jan wali lurañ munañarojj atipjañ puedkäti, uka jan walir atipjañatakejj janiw chʼamanïkti” sasa. ¡Janipun uka amuyump apayasipjjañäniti! Bibliajj akham sasaw yatichistu: “Jan juchajj jiwir cuerponakamar mä reyir uñtatajj jukʼampi apnaqpanti” sasa (Romanos 6:12 liytʼäta). Jan wali lurañ munañajj chuymasankchisa, juch jan lurañwa jiwasajj amtsna, ukwa uka arunakajj sañ muni (Gál. 5:16). Jan walinak lurañatak yantʼat uñjasiñäni ukhajja, ukanakar atipjsnawa, uk Jehová Diosajj sum yati. Janitï ukhamäkaspajja, janiw jan walinakar atipjañ maykistaspati (Deut. 30:11-14; Rom. 6:6; 1 Tes. 4:3). Ukhamajj jan wali lurañ munañarojj atipjsnawa.

12. Jehová Dios nayraqatan janiw sumat uñjatäjjäti sasin amuystan ukhajja, ¿kunsa lurañasa, ukat kunatsa?

¹² Juchararätas laykojj akhamwa amuyaraksna: “Niyakejjay chuymajan mä jan wal lurañ munañajj utjchejja, Jehová Dios nayraqatan janiw sumat uñjatäjjäti” sasa. ¡Janiw uka amuyump apayasiñasäkiti! Nasktan ukhatpach juchararätas Jehová Diosajj sum yati sasaw Bibliajj yatichi (Sal. 103:13, 14). Diosajj jiwasat ‘taqe kunwa yati’, jucha katoqatas laykojj jan walinak lurañ munañajj chuymasan utjataps jupajj yatirakiwa (1 Juan 3:19, 20). Ukhamajj jiwasatï ukanakamp jan apayasiñatak chʼamachasiskakiñäni, janirak ukanak lurkañäni ukhajja, Jehová Dios nayraqatan qʼomat uñjatañäniwa. ¿Kunatsa ukajj ukhamapunïskiwa sasin sissna?

13, 14. ¿Mä jan wali lurañ munatas laykojj janit Jehová Diosajj sumat uñj-jjestu?

¹³ Mä jan wali lurañ munañampi uk lurjjañampejj janiw pachpakiti sasaw Bibliajj yatichi. Mä jan wali lurañ munañajja chuymasan utjakipunispawa, ukampis uka jan wal lurañäniti janicha uk sapa mayniw amtsna. Corinto congregacionankir cristianonakat amuytʼañäni. Janïr cristianökasajja, jupanakat yaqhepajj chachapura jan ukajj warmipuraw ikintasipjjerïna. Ukatwa apóstol Pablojj akham säna: “Jumanakat yaqhepajj ukhamäpjjayätawa” sasa. Ukampis cristianöjjapjjäna uka qhepat ¿janit uka munañanakajj chuymanakapan utj-jjpachäna? Utjaskakpachänwa, kuna laykutejj uka munañanakajj chuymanakapan saphintatäkaspas ukhamänwa. Ukampis uka jan wali lurañ munañamp jan apayasipkäna, janirak lurapkäna uka cristianonakajja, ‘qʼomachatäjjapjjänwa’, Jehová Dios nayraqatans sumat uñjatäpjjarakïnwa (1 Cor. 6:9-11). Jiwasatï jan wal lurañ munañanakamp jan apayaskañäni ukhajja, Jehová Diosajj ukhamarakiw uñjistani.

¹⁴ Inas mä jan wali jan lurañatak chʼamachasiskstan, ukhamächi ukhajj atipjsnawa. Uka jucha lurañ munañajj chuymasan utjaskakchinisa, “jañchin munañapa, amuyunakasan munañap” jan lurañwa amtsna (Efes. 2:3). Ukhamajj ¿kunas jan walinak lurañ munañar atipjañatakejj yanaptʼistaspa?

¿KUNJAMSA JAN WALINAK LURAÑ MUNAÑAR ATIPJSNA?

15. Jan walinak lurañ munañanakar atipjañatakejja, ¿kunsa jan lurañasäki?

¹⁵ Jan walinak lurañ munañar atipjañ munstan ukhajja, kunanakas juchar purtʼasiyistaspa ukanak sum amuytʼasiñasawa. Janiw ‘kʼari amuyunakampejj jiwas pachpajj engañjasiñasäkiti’ (Sant. 1:22). Inas jiwasajj machjayir umañanakat akham amuysna: “Nayat sipans mayninakaw jukʼamp umapjjejja” sasa. Inas yaqhanakar akham sasin juchañcharaksna: “Esposajatï wali munasiñamp uñjitaspajja, janiw pornografía uñchʼukkiristti” sasa. Khititï ukham pienski ukajja, mä jan wali lurañajj janis sinti jan walïkaspa ukhamwa amuyaski, mä jachʼa jucharus facilakirakiw purtʼasispa. Ukhamajj mä jan wali lurañajj walikïkaspasa ukham amuyasajj jan jiwas pachp engañjasipjjañäniti. Sapa mayniw kuntï lurkañäni ukarjamajj walinsa jan walinsa uñjasiñäni (Gál. 6:7).

16. Kunatï walïki uk lurañatakejj ¿kunas yanaptʼistani?

¹⁶ Ukatjja jucha lurañ munañamp jan apayasiñatakiw amtañasa (1 Cor. 9:26, 27; 1 Tes. 4:4; 1 Ped. 1:15, 16). Kunanakas facilak mä jucha lurañar purtʼasiyistaspa uk sum amuytʼasiñasawa. Sañäni, inas arum toqeru jan ukajj wali qaritäkasajj mä juchar facilak purtʼassna. Mä jan wali lurañamp jan apayasiñatakejja, kunsa lurañäni uk janïräkipanwa amtjjañasa. Ukhamajj jan walinak lurañ munañanakar atipjañatakejja, janïräkipanwa wakichtʼasiñasa (Prov. 22:3).

17. ¿Kunsa Joseat yateqsna? (Génesis 39:7-9; dibujompi fotompi uñjjattʼarakïta).

¹⁷ Joseat parltʼañäni. Mä kutejja, Potifaran esposapaw Josearojj ikintasiñatak arjjayäna. Ukampis Joseajj jankʼakiw jan payachasisajj “janiwa” sasin säna (Génesis 39:7-9 liytʼäta). ¿Kunsa ukajj uñachtʼayistu? Yaqha chachan warmipamp jan ikintasiñwa janïräkipan amtjjäna. ¿Kunsa Joseat yateqsna? Mä jan walir jan purtʼasiñatakejja, janïräkipanwa kunatï walïki uk lurañ amtjjañasa. Ukhamatwa jan wal lurañatak yantʼat uñjasisajj jankʼak rechazañäni, kuna laykutejj janïräkipanwa kunsa lurañäni uk amtawayjjtanjja.

“AMUYKIPTʼASISIPKAKIM”

18. Jan wali lurañ munañanakar atipjañatakejj ¿kunampsa lursna? (2 Corintios 13:5).

¹⁸ Jan walinak lurañ munañar atipjañatakejja, sapa mayniw kunjamäsktansa uk amuykiptʼasiñasa (2 Corintios 13:5 liytʼäta). Ukaw kuna cambionaksa lurañasa uk amuykiptʼasiñatakisa, lurañatakis yanaptʼistani. Mä jan wal lurañatak yantʼat uñjasisajja, inas akham sasin jisktʼassna: “¿Jankʼakit rechazawaytjja?” sasa. Janitï jankʼak rechazawaykstanjja, janiw desanimasiñasäkiti, ukampis “janiwa” sasin jankʼak mayan sañatakejja, kunsa lurañäni ukwa amuytʼasiñasa. Akham sasaw jisktʼasiraksna: “¿Jan wali amuyunak jankʼakit apanuktjja? ¿Kuntï liytʼkta, istʼkta, uñjkarakta ukajj juchar jan purtʼasiñatak yanaptʼituti? ¿Qʼañu juchanak jan uñjañatakejj jankʼakit maysar uñttjja? Mä jan wal jan lurañatak wal chʼamachasiñajächi ukhajja, ¿kuntï Diosajj maykitu ukajj nayan askijatakiwa sasinti amuytjja?” sasa (Sal. 101:3).

19. Walikjamäkaspas ukham amuyasin mä jan wali amtar puriñajja, ¿kunatsa jan walïki?

¹⁹ Amtapjjapuniñäni, ‘chuymajj taqe kunat sipans jukʼamp engañjasiriwa, ratukiw kuns munaraki’ (Jer. 17:9). “Chuymatjja jan wali amuyunakaw juti” sasaw Jesusajj sarakïna (Mat. 15:19). Ukhamajj chuymasajj mä jan wali lurañajj walikïkaspas ukhamwa engañjistaspa. Sañäni, inas maynejj pornografía uñchʼukiñ jaytjjchi, ukampis mä qhawqha tiempotjja, akham sasaw amuyjjaspa: “Jan isini jaqenakar qʼañunak luraskir uñjañakiw jan walejja, jukʼa isini jaqenakar uñjañajj walikïskiwa” sasa. Jan ukajj inas akham sasin amuyarakchispa: “Qʼañu juchanakat piensañajj walikïskiwa, uk lurjjañaw jan walejja” sasa. Uka amuyunakajj akwa uñachtʼayi: chuymapaw jan walinak lurañatakejj ‘janïräkipan amtaski’ (Rom. 13:14). Uka trampar jan jaltʼañatakejj ¿kunsa jiwasajj lursna? Inas qalltan janis importantëkaspa ukham amuyasin jan wali amtanakar pursna, ukampis ukham lurañajja, juchar puriyir jan wali amtanakaruw purtʼasiyistaspa.b Ukhamajj chuymat jutki uka ‘jan wali amuyunakamp’ jan engañjayasipjjañäniti, ukanakajj jan walinak lurañ munañanakajj walikïkaspas ukhamwa amuyayistaspa.

20. ¿Jan walinak lurañ munañanakajj jutïrin utjaskakiniti, ukat khitis jichha tiempon yanaptʼistu?

²⁰ Kunjamtï yatjjataniwayktanjja, Jehová Diosaw jan walinak lurañ munañanakar atipjañatakejj chʼam churistu. Ukhamarus juchampit jiwañampit jiwasar kutsuyañatakejja, Jesusaw aka oraqer jutawayi, ukhamatwa paraison wiñay jakasiñatak suytʼäwinïtanjja. ¡Ukan Jehová Diosar serviñajj wali kusiskañäniwa, kuna laykutejj janiw jan walinak lurañ munañajj chuymasan utj-jjaniti! Uka uru puriniñapkamajj jan walinak lurañ munañanakar atipjasipkakiñäni, ukhamtï lurañänejja Jehová Diosajj bendisistaniwa, jan walinak lurañ munañarus atipjarakiñäniwa.