1925: ¿Kunas patak maranak nayrajj pasäna?

KUNTÏ SUYAPKÄNA UKAJJ JANIW PHOQASKÄNTI

Jilat kullakanakajj 1925 maran aka oraqejj mä paraisöjjaniwa sasaw suyapjjäna. ¿Kunatsa uk suyapjjäna? Albert Schroeder (jupajj qhepat Cuerpo Gobernante taypinkjjänwa) jilatajj akham sänwa: “Ajllitanakajj Jesusamp chik apnaqaniñatakiw alajjpachar taqpachan sarjjapjjani, ukat Diosan nayra servirinakapajja, mä arun Abrahán, David ukat yaqhanakasa principëñatakiw jaktanipjjani, ukat aka oraqenkir Diosan servirinakaparuw pʼeqtʼapjjani sasaw amuyapjjayäta” sasa. Uk jan phoqasitapat yaqhep jilat kullakanakajj chuyma pʼakintataw jikjjatasipjjäna (Prov. 13:12).

Ukhampachas walja jilat kullakanakaw taqe chuym predicasipkakïna, jukʼat jukʼatwa Jehová Diosat parlañajj wali importantëtap amuyjjapjjäna. Ukatwa jupanakajj radio toqe kunatï cheqäki uk jaya lugaranakar puriyapjjäna, uk jichhajj uñjapjjañäni.

RADIONAK TOQEW PREDICASÏNA

1924 maran WBBR sat radio walja jaqenak istʼapjjatapatjja, jilat kullakanakajj Chicago (Illinois) marka jakʼan WORD sat yaqha radio lurapjjäna, jaya cheqanakanwa uka radiojj istʼasïna. Ukan yanapir Ralph Leffler sat mä ingenierojj akham sänwa: “Wali chʼuchʼu arumanakajj jaya lugaranakatpachaw walja jaqenakajj uka radio istʼapjjäna” sasa. Mä familiajj Pilot Station (Alaska) markatpachwa uka radio istʼapjjäna, jupanakajj radiot 5.000 jila kilometronak jayankapjjänwa. Uka radio istʼasajja, ukan trabajirinakaruw uka familiajj mä carta qellqapjjäna, ukhamat wali chʼamañchtʼkir arunak istʼapjjatapat yuspärañataki.

1 de diciembre de 1925 inglés arut Yatiyañataki sat revistanjja, WORD sat radiojj kunjamsa walja cheqanakan istʼasïna uka toqetwa parläna, uka revistan akham sänwa: “Aka radiojja, Estados Unidos markan utjki uka jachʼa radionakat maynïriwa, jaya lugaranakanwa istʼasiraki. Estados Unidos markan mä thiyat mä thiyakamaw istʼasi, alay toqenkir Alaska markat aynach toqenkir Cuba markakamaw istʼasiraki. Biblian cheqa yatichäwinakap janipun istʼapkäna uka jaqenakajja, jichhajj Bibliat jukʼampiw yatiñ munjjapjje” sasa.

Uka tiemponjja, jilat kullakanakajj radio toqew Canadá markan predicañ munapjjarakïna. 1924 maranjja, Saskatoon (Saskatchewan) markan CHUC sat mä radiow lurasïna, uka radiojj mä religionan radiopänwa. Mä mara qhepatjja, jukʼamp jachʼa lugararuw uka radio apañ munapjjäna. Ukatwa Jehová Diosan markapajj uka radio aläna, Saskatoon markankir Regent Building sat mä teatroruw apasjjarakïna. Radior tukuyañ amtampipuniw uka teatrojj alasïna.

Uka radio utjatapatjja, Saskatchewan marka jakʼankir jiskʼa markanakansa walja jaqenakaw suma yatiyäwinak nayrïr kut istʼapjjäna. Jupanakat maynejj Graham sat mä warmïnwa, jupajj uka radio istʼasajj qellqatanakas mayiñatakiw mä carta qellqäna. Uka cartat George Naish jilatajj akham sänwa: “Arunakap liytʼasajja, qellqatanak wal munatapwa amuyapjjayäta, ukatwa Estudios de las Escrituras sat qellqatanakat taqpach apayapjjayäta” sasa. Mä jukʼa tiempotjja, Graham warmejj Reinon suma yatiyäwinakap wali jaya markanakanwa predikjjäna.

BIBLIAN MÄ CHEQA YATICHÄWIPA

1 de marzo de 1925 inglés arut Yatiyañataki revistanjja, “Markan nasïwipa” sat pʼeqeñchäwini mä yatichäwiw mistüna. ¿Kunatsa uka yatichäwejj wali importantëna? Jilat kullakanakajj Supayajj mä organizacionanïtap nayra tiempotpachaw yatipjjäna. Kutkatasir jan wali angelanakasa, falso religionanakasa, walja qollqenïñ amtampi negocionak luririnakasa, politiconakas uka organización taypinkapjjewa. Ukampis uka pachpa yatichäwinjja, ‘suma phoqeri amuyasir esclavojj’ Jehová Diosajj mä organizacionanïtap amuyapjjañapatakiw jilat kullakanakar yanaptʼarakïna, uka organizacionajj mayjawa, Supayan organizacionap contraw saytʼaraki (Mat. 24:45). 1914 maran Diosan Reinopajj alajjpachan uttʼayasitapa, uka maran alajjpachan mä guerra utjatapa, ukat Supayampi demonionakapampejj aka oraqer jaqoqanitäpjjatapwa esclavojj qhanañcharakïna (Apoc. 12:7-9).

Yaqhep jilat kullakanakatakejja, uka machaq yatichäwi katoqasiñajj chʼamakïnwa. Ukatwa uka pachpa yatichäwejj akham sasin ewjjtʼäna: “Aka revista liytʼasatï yaqhepajj jan acuerdöpkätajja, paciencianïpjjañamataki ukat Jehová Diosar suytʼapjjañamatakiw chʼamañchtʼapjjsma. Ukampis taqe ukanak suma chuymampipun phoqapjjam” sasa.

Gran Bretaña markankir Tom Eyre sat mä colportor (jichhajj precursor sutimpiw uñtʼasjje) jilatajja, uka yatichäwi liytʼasajj jilaparte jilat kullakanakajj kunjamsa uka yatichäwi katoqasipjjäna uka toqet akham siwa: “Kunjamsa Apocalipsis 12 capitulojj qhanañchasïna uk liytʼasajja, jilat kullakanakajj wal kusisipjjäna. Diosan Reinopajj alajjpachan uttʼayasitap amuyasajja, taqe chuymapuniw uka suma yatiyäwi jaqenakar yatiyapjjayäta. Jukʼampiw predicapjjayäta, kunjamsa Jehová Diosajj markapar irpaski ukwa uñjapjjarakiyäta” sasa.

PREDICAÑAJJ WALI WAKISKIRÏTAPWA AMUYAPJJÄNA

Jichha tiemponjja, Isaías 43:10 texto sum uñtʼtanjja, ukan akham sasaw qallti: “Jumanakaw nayan testigonakajäpjjtajja, jïsa, nayan ajllita servirinakajäpjjtawa” sasa. 1925 mara nayrajja, uka textot janiw qellqatanakasan añch yatjjatasirïkänti. Ukampis janiw ukhamäjjänti. Uka pachpa maranjja, inglés arut Yatiyañataki 11 revistanakanwa Isaías 43:10, 12 textot qhanañchasïna.

1925 maran agosto phajjsi tukuyarojja, mä asambleanwa jilat kullakanakajj Indianápolis (Indiana) markan tantachasipjjäna. Joseph Rutherford jilatajj yaqha cheqanakat jutapkäna ukanakar katoqtʼañatakejja, mä qhawqha arunakwa qellqäna. Uka arunakapajj asambleatak wakichaskäna uka programanwa uñstäna. Ukan akham sänwa: “Jehová Diosan chʼamap katoqañatakiw aka asamblear jutawaytanjja, [...] ukhamat jupan testigonakapjam taqe chuym yatiyañasataki” sasa. Uka asambleajj kimsaqallqo urunakaw apasïna, ukanjja taqe cheqan Jehová Diosat yatiyasiñapatakiw chʼamañchasïna.

Sábado 29 de agosto urunjja, Rutherford jilatajj “Wakiskir luräwimp phoqapjjam” sat pʼeqeñchäwin mä discurso arstʼäna, ukanjja predicañajj wali wakiskirïtapwa qhanañchasïna. Jilatajj akham sänwa: “‘Jehová Diosajj akham siwa: Ukhamajj jumanakaw nayan testigonakajäpjjtajja, nayaw Diosätjja’ sasa. Ukatjja aka mandato Jehová Diosajj churarakistu: ‘Markanakatakejj mä señal saytʼayapjjam’ sasa” (Is. 43:12; 62:10). Ukjjarojj akham sasaw qhanañcharakïna: “Markanakan uñjapjjañapatakejja, janiw khitis aka oraqen mä señal saytʼaykaspati. Jan ukasti, Jehová Diosan espiritupamp yanaptʼatäpki uka servirinakapakiw uk lurapjjaspa. Ukham lurapjjatapatjja, Diosan Testigopjamaw saytʼapjje” sasa.

Rutherford jilatajj arstʼäwip tukuyäna ukhajja, jilat kullakanakatakejj “Phoqasiñap suytʼasktan uka arunaka” sat mä documento liytʼäna. Ukanjja akham sänwa: “Sumankañsa, sum jakasiñsa, kʼumar jakasiñsa, vidsa, libre jakasiñsa ukat wiñayatak kusisitäñsa, Jehová Diosan Reinopakiw churistaspa” sasa. Uka asambleankapkäna ukanakat taqeniw uka documentomp acuerdöpjjäna. Uka qhepatjja walja arunakaruw uka documentojj jaqokipasïna ukat imprimisirakïna, ukhamat ukamp predicasiñapataki. Uka documentojj mä 40 millones ukhaw lakirasïna.

Estudiantes de la Biblia sasin uñtʼat jilat kullakanakajj mä qhawqha maranak qhepatsa Jehová Diosan Testigonakapjam uñtʼatäsipkchïnjja, predicañajj qhawqha wakiskirisa uk amuyjjapjjänwa.

REVISITANAK LURAPJJAÑAPATAKIW CHʼAMAÑCHASÏNA

Niyakejjay jilat kullakanakajj oraqpachan jiljjattasipkchïnjja, jupanakarojj suma yatiyäwinakat jukʼamp yatiñ munirinakar revisita lurapjjañapatakiw chʼamañchasïna. “Phoqasiñap suytʼasktan uka arunaka” sat documentojj lakiraskäna uka qhepatjja, Bulletina sat qellqatajj akham sänwa: “Inas yaqhep utanakan jan ni mä qellqats katoqasipkchïnti, ukampis “Phoqasiñap suytʼasktan uka arunaka” sat documento katoqasipjjchi ukhajja, jupanakan utapar kuttʼapjjam” sasa.

1925 maran enero phajjsitak mistkäna uka Bulletin sat qellqatanjja, Plano (Texas) markankir mä jilatan arunakapaw qellqasïna, jilatajj akham sänwa: “Nayrïr kut predicapkta uka lugaranakat sipansa walja kut kuttʼapkta uka lugarankir jaqenakajj jukʼampiw istʼapjjetu. Congregacionajajj mä jiskʼa markar predicañatak asignatawa, aka tunka maranakanjja phesqa kutiw ukar kuttʼawayapjjta. […] Jichhanakakiw Hendrix kullakampi mamitajampejj wasitat uka markar kuttʼawayapjje, nayrat sipansa walja libronak jaytaniwayapjjatayna” sasa.

Panamá markankir mä colportor jilatajj akham sarakïnwa: “Nayrïr kutejj punkumpis jistʼkatapjjerïchitojja, uka utanakar wasitat kuttʼirïkta ukhajj wali sum katoqtʼjjapjjerïtu. Aka marajj jukʼamp revisitanak lurañatakiw tiempo apstʼasta, ukham lurasajj awisajj wali suma experiencianakanïtwa” sasa.

JUKʼAMP LURAÑAW UTJASKAKÏNA

Sapa mara colportoranakar apayirïkäna uka cartanjja, Rutherford jilatajj kunjamsa 1925 marajj predicasïna ukat jutir maranakan kuna lurañanakas utjaskakini uka toqet akham sasaw qellqäna: “Aka marajja, llakitäpki uka jaqenakaruw jumanakajj chuymachtʼawayapjjta. Ukham lurasajj chuymanakaman wali kusisitäpjjtawa. […] Jutir marajj Diosana ukat Reinopan testigopäsasa khitinakas Diosan cheqpach servirinakapäpjje uk uñachtʼayasas wali kusisitäpjjätawa. […] Jaqenakar parlasa Diosasampiru Reyisampiru jachʼañchapjjañäni” sasa.

1925 mara tukuyarojja, Brooklyn (Nueva York) markankir Betel ut jukʼamp jachʼaptayañatakiw amtasipkäna. 1926 maranwa uka construccionajj qalltäna, janipuniw nayrajj ukham jachʼa construccionajj lurasirïkänti.