-
¿Kunjam jakasiñassa Diosajj muni?¡Wiñayatakiw kusisit jakasisma! Bibliat yateqañataki
-
-
25 YATICHÄWI
¿Kunjam jakasiñassa Diosajj muni?
Jaqenakajja ‘jukʼa tiempokiw jakapjje, vidapajj jan waltʼäwinakamp phoqantatarakiwa’ sasaw Bibliajj qhanañchi (Job 14:1). Ukampis Diosajj ¿ukham jakasiñasti munpachäna? ¿Kuna amtampis Diosajj lurawayistu? ¿Uka amtapajj phoqaspachäniti? Uka toqenakat Bibliajj kuna suma yatiyäwinakanisa uk yatjjatañäni.
1. ¿Diosajj kunjam jakasiñassa muni?
Jehová Diosajj wali sum jakasiñaswa muni. Jupajj Adanampir Evampir lurkäna ukhajja, Edén jardinaruw jupanakar uchäna, ukajj wali suma paraisopunïnwa. Ukanjja “Diosajj akham sasaw jupanakar bendisïna: ‘Walja wawanakanïpjjam, waljaptapjjam, oraqpach phoqantapjjam, apnaqapjjarakim’” sasa (Génesis 1:28). Jehová Diosajj wawanïpjjañapa, aka oraq mä paraisor tukuyapjjañapa, animalanakar sum cuidapjjañapwa munäna. Jaqenakajj wiñayatak jan usuntas jakasipjjaspa ukwa Diosajj qalltatpach amtarakïna.
Kuntï Diosajj amtkäna ukajj janis phoqaskchïnjja,a Jehová Diosan amtapajj pachpakïskiwa (Isaías 46:10, 11). Diosajj jupar istʼir jaqenakajj wiñayatak wali sum jakasipjjaspa uk munaskakiwa (Apocalipsis 21:3, 4 liytʼäta).
2. ¿Kunjamsa jichhjatpach kusisit jakassna?
Jehová Diosajja ‘jupat yatjjatañajj kunja wakiskirisa’ uk amuyiri, mä arunjja jupar uñtʼaña jupar adorañ munirwa lurawayistu (Mateo 5:3-6 liytʼäta). Diosajj jupampejj suma amigösna, ‘taqpach thakinakaparjam sarnaqsna, jupar munassna, taqe chuym jupar serviraksna’ ukwa muni (Deuteronomio 10:12; Salmo 25:14). Jiwasatï taqe ukanak lurañänejja, jan waltʼäwinakan uñjaskasas kusisitakïskañäniwa. Jehová Diosar adorañajj walpun kusisiyistu, mä suma amtampiw jakasiraktanjja.
JUKʼAMP YATJJATAÑÄNI
Jehová Diosajj aka oraq jiwasatak lurasajj kunjamsa wali munasirïtap uñachtʼayistu, kuna amtamp luratätansa uka toqet kunsa Diosan Arupajj yatichi ukanakatwa jichhajj yatjjatañäni.
3. Jehová Diosajj wali sum jakasiñaswa muni
VIDEO uñtasajja aka toqetwa parltʼapjjäta:
¿Kunatsa Diosajj aka oraq wali musparkañ luri?
Eclesiastés 3:11 liytʼasajja aka toqetwa parltʼapjjäta:
¿Kunsa uka textojj Jehová Diosat yatichistu?
4. Jehová Diosan amtapajj pachpakïskiwa
Salmo 37:11, 29; Isaías 55:11 liytʼasajja aka toqetwa parltʼapjjäta:
Jehová Diosajj kuna amtampis lurawayistu ukajj pachpakïskiwa, ¿kunjamatsa uk yattanjja?
Qʼala tukjat mä utajja askichasispawa, ukhamarakiw aka oraqejj askichasispa. Jaqenakajj qʼalsa aka oraq tukjapkchejja, Jehová Diosajj jupar munasiri jaqenakatakiw askichani.
5. Jehová Diosar adorañaw kusisit jakasiñatakejj yanaptʼistu
Jehová Diosajj kuna amtampis lurawayistu uk yatiñajj kusisit jakasiñatakiw yanaptʼistu. VIDEO uñtasajja aka toqetwa parltʼapjjäta:
Kuna amtamp luratätansa uk yatiñajja, ¿kunjamsa Tirumi warmirojj yanaptʼäna?
Eclesiastés 12:13 liytʼasajja aka toqetwa parltʼapjjäta:
Kunanaktï Jehová Diosajj jiwas layku lurawayki ukanakat yuspäratas uñachtʼayañatakejja, ¿kunanaksa lurañasa?
YAQHEPANAKAJJ AKHAM SAPJJEWA: “¿Kunsa maynejj kusisit jakasiñatak luraspa?” sasa.
¿Jumajj uka toqet kamsasmasa?
¿KUNSA YATEQAWAYTAN?
Jehová Diosajja wiñayatak aka oraqen sum jakasiñaswa muni. Jehová Diosar taqe chuyma adorasajja, jichha tiempons kusisitaw jakassna.
Amtañataki
¿Kuna amtampis Jehová Diosajj Adanarusa Evarusa luräna?
¿Jehová Diosajj kuna amtampis jaqenakar lurawayi ukajj pachpakïskatap kunjamatsa yatsna?
¿Kunas sum jakasiñatakejj yanaptʼiristam?
JUKʼAMP YATJJATAÑAMATAKI
Edén jardinajj cheqapuniw utjaskäna sasajj kunatsa sissna uk yatjjatam.
“Edén jardinax ¿chiqapunit utjäna?” (Yatiyañataki abril-junio 2011)
Aka oraqejj janipuniw tʼunjatäkaniti sasajj kunatsa sistan uk yatjjatam.
Kuna amtamp luratätansa uka toqet Bibliajj kamsisa uk yatjjatam.
Mä chachajj taqe kunanïkaspas ukhamwa amuyasïna, ukampis kunas vidapan faltäna uk videon uñtam.
a Jutïr yatichäwinwa kunatsa Diosan amtapajj jan phoqaskäna uk yatjjataskañäni.
-
-
¿Kunas Diosan Reinopajja?¡Wiñayatakiw kusisit jakasisma! Bibliat yateqañataki
-
-
2. ¿Khitinakas Jesusamp chikajj apnaqapjje?
Jesusajj janiw sapak apnaqkiti. Jupamp chikajja ‘taqe tribunkir jaqenakampi, kunayman aru parlirinakampi, kunayman markanakata taqe kasta jaqenakampiw reyinakjam apnaqanipjjani’ (Apocalipsis 5:9, 10). ¿Qhawqhanis Cristomp chikajj apnaqanipjjani? Jesusajj aka oraqenkkäna ukhat jichhakamajja, walja waranqa jaqenakaw Criston arkirinakapar tukuwayapjje. Ukampis 144.000 jaqenakakiw alajjpacharojj Jesusamp apnaqañatakejj sarapjjani (Apocalipsis 14:1-4 liytʼäta). Mayni cristianonakajja aka oraqenwa jakapjjani, Diosan Reinopampi apnaqatäpjjarakiniwa (Salmo 37:29).
-
-
¿Kunanaksa Diosan Reinopajj lurani?¡Wiñayatakiw kusisit jakasisma! Bibliat yateqañataki
-
-
¿Kunanaksa Diosan Reinopajj lurani?
Diosan Reinopajj apnaqjjewa, niyaw aka oraqen kunayman cambionak utjayarakini. Diosan Reinopajj kunanaksa lurani ukanakat mä qhawqhanak yatjjatañäni, ukanakajj jutir urunak kusisit suytʼañatakiw yanaptʼistani.
1. Sumankañ utjañapatakisa taqenir cheqapar uñjasiñapatakisa, ¿kunsa Diosan Reinopajj lurani?
Armagedón guerranjja, Diosan Reinopan Reyipjamajj Jesusaw jan wali jaqenakampiru gobiernonakampir chhaqtayani (Apocalipsis 16:14, 16). Uka tiempotakejja Biblian aka promesapaw phoqasini: “Mä jukʼa tiempotjja jan wali jaqenakajj janiw utj-jjaniti” (Salmo 37:10). Jesusajj Diosan Reinop toqew aka oraqen sumankañ utjañapatakisa, taqenir cheqapar uñjasiñapatakis yanaptʼani (Isaías 11:4 liytʼäta).
2. Diosan amtapajj phoqasjjani ukhajja, ¿kunjamsa aka oraqen jakasjjañäni?
Diosan Reinopajj apnaqjjani ukhajja, ‘cheqap sarnaqer jaqenakajj oraq katoqapjjani, wiñayatakiw ukan jakapjjarakini’ (Salmo 37:29). Ukatjja taqeniw suma jaqenakäjjapjjani, Jehová Diosarus wal munasipjjani, maynit maynikamas munasiñampiw uñjasipjjarakini. ¡Ukhaman jakasiñajj wali sumapunïniwa! Janiw khitis usuntjjaniti, taqenirakiw wiñayatak jakasjjapjjani.
3. Jan wali jaqenakar chhaqtayasajja, ¿kunsa Diosan Reinopajj lurani?
Jan wali jaqenakar tukjasajja, Jesusajj 1.000 maranakaw Reyit apnaqani. Uka tiemponjja, Jesusampi 144.000 ajllitanakampejj juchan esclavopäñatwa jaqenakarojj salvapjjani, perfectöpjjañapatakis jaqenakar yanaptʼapjjarakiniwa. 1.000 maranakajj tukusjjani ukhajja, aka oraqejj mä suma paraisöjjaniwa, Jehová Diosan leyinakaparjam sarnaqeri, kusisit jakasiri jaqenakamp phoqantatarakïniwa. Ukatjja Jesusajj Jehová Dios Awkiparuw gobiernop kuttʼayjjani, Diosan sutipajj jukʼamp jachʼañchatarakïniwa (Mateo 6:9, 10). Uka tiempotakejja Jehová Diosan wali suma apnaqerïtapasa, markapar sum cuidatapas qhanaw amuyasjjarakini. Uka qhepatjja Jehová Diosajj Supayampiru, demonionakampiru ukhamarak khitinakatï Supay toqet saytʼasipki ukanakampiruw tukjani (Apocalipsis 20:7-10). Diosan Reinopajj kunanaktï lurkani ukanakajj wiñayatakïniwa.
JUKʼAMP YATJJATAÑÄNI
Biblian qellqatäki uka promesanakapjja, Diosajj Reinop toqew phoqani sasajj kunatsa confiysna ukwa jichhajj yatjjatañäni.
4. Diosan Reinopaw gobiernonak tukjani
“Jaqejja pachpa jan waltʼäwipatakiw jaqerojj apnaqe” (Eclesiastés 8:9). Jehová Diosajja, Reinop toqew kuna jan walinakatï utjki ukanak askichani.
Daniel 2:44; 2 Tesalonicenses 1:6-8 liytʼasajja aka toqetwa parltʼapjjäta:
Gobiernonakarusa uka gobiernonakar apoyiri jaqenakarusa, ¿kunsa Jehová Diosampi Jesús Yoqapampejj lurapjjani?
Jehová Diosasa Jesusasa cheqaparjama, jan khitirus yaqhachasaw jutïrin taqe kuns lurapjjani, ¿kunatsa ukham sistanjja?
5. Jesusajj wali suma Reyiwa
Diosan Reinopan Reyipjamajja, Jesusajj kunaymaninakatwa aka oraqen jakirinakarojj yanaptʼani. Jesusajj jaqenakar yanaptʼañ munatapsa, jupanakar yanaptʼañapatak Diosajj chʼam churatapsa kunjamanakatsa uñachtʼayäna uk yatiñatakejja VIDEO uñtapjjäta.
Jesusajj aka oraqenkkasajj kunanaktï lurkäna ukanakajja, Diosan Reinopajj kunanaktï lurkani ukwa uñachtʼayi. Aka aynachan uñstki uka promesanakatjja, ¿kawkïrinaksa jumajj phoqasir wal uñjañ munta? Uka promesanakajj kawkïr textonakankisa taqe ukanakwa liytʼapjjäta.
JESUSAJJ ORAQENKKASAJJA...
JESUSAJJ ALAJJPACHATJJA...
... mä jachʼa thaywa tʼakurayäna (Marcos 4:36-41).
... aka oraqen contaminatätapat kuna jan walinakatï utjawayki ukanakwa askichani (Isaías 35:1, 2).
... walja waranqa waranq jaqenakaruw mä milagro toqe manqʼayäna (Mateo 14:17-21).
... aka oraqen utjki uka manqʼat pistʼañanakwa chhaqtayani (Salmo 72:16).
... walja jaqenakaruw qolläna (Lucas 18:35-43).
... jan usuntas jakasipjjañapatakiw taqe jaqenakar yanaptʼani (Isaías 33:24).
... mä qhawqha jaqenakaruw jaktayäna (Lucas 8:49-55).
... jiwañ utjatapat kuna jan walinakatï utjki ukanakwa chhaqtayani (Apocalipsis 21:3, 4).
6. Diosan Reinopajj jutïrin sum jakasiñatakiw yanaptʼistani
Jehová Diosajj jaqenakan kunjam jakasipjjañaptï qalltatpach munkäna ukham jakasipjjañapatakejja, Reinopaw yanaptʼani. Jupanakajj paraisoptayat oraqenwa wiñayatak jakasipjjani. Diosajj kunjamsa Jesús yoqap toqejj amtap phoqaski uk yatiñatakejja VIDEO uñtapjjäta.
Salmo 145:16 liytʼasajja aka toqetwa parltʼapjjäta:
‘Kunanaktï taqe jakirinakajj munapkani’ ukanakwa Jehová Diosajj jupanakar churani, ¿uk yatiñajj jumatak kunjamakisa?
YAQHEPANAKAJJ AKHAM SAPJJEWA: “Taqenitï mayachtʼassna ukhajja, kuna jan walinakatï aka oraqen utjki ukanak chhaqtaysnawa” sasa.
Jaqenakan gobiernonakapajj kuna jan walinaktï chhaqtayañ jan puedepki ukanakatjja, ¿Diosan Reinopajj kawkïrinaksa chhaqtayani?
¿KUNSA YATEQAWAYTAN?
Diosajj amtanakap Reinop toqew phoqani. Uka Reinojja mä suma paraisoruw oraqpach tukuyani, ukanjja Jehová Diosar adoriri jaqenakaw wiñayatak jakapjjani.
Amtañataki
Diosan Jehová sutip jachʼañchañatakejja, ¿kunsa Diosan Reinopajj lurani?
¿Diosan Reinopaw Biblian qellqatäki uka promesanak phoqani sasajj kunatsa sissna?
Diosan Reinopajj kunanaktï lurkani ukanakatjja, ¿kawkïrsa jumajj uñjañ wal munta?
JUKʼAMP YATJJATAÑAMATAKI
Armagedonajj kunasa uk yatjjatam.
“Jachʼa tʼaqesiñ tiempow jutani” sasaw Jesusajj arsüna, uka urun kunanakas paspachäni uk yatjjatam (Mateo 24:21).
Paraison kunjamsa jakasipjjani uka toqet kunanaksa mä familiajj amuytʼasipki uk videon uñtam.
Chʼajjwañ muniri mä chachajj kunjamsa kuntï thaqkäna uk jikjjatäna uk yatiñatakejja, “Me inquietaban muchas preguntas” siski uka cheqanwa liytʼäta.
“La Biblia les cambió la vida” (La Atalaya, 1 de enero de 2012)
-