“Jukʼamp munasiñanejj janiw utjkiti”

1-4. 1) Pilatojj jaqenak nayraqatar Jesusar irpskäna ukhajj ¿kunas pasäna? 2) Jiskʼachata, humillata, tʼaqesiyat uñjasisajj ¿kunsa Jesusajj luräna? 3) ¿Kuna wakiskir jisktʼanakarus qhanañchaskañäni?

“¡AKA chachar uñjapjjam!” sasaw Poncio Pilatojj jaqenak nayraqatar Jesusar irpsüna, uka jaqenakajj wali coleratapunïpjjänwa. Uka urojj 33 maran apaskäna uka Pascua fiestaw amtasïna, ukatwa walja jaqenakajj wali alwat palacio anqan suyapjjäna (Juan 19:5). Mä qhawqha urunak nayrajja, mä arun Jesusajj Jerusalenar Diosan ajllit Reyipjam mantkäna ukhajja, jaqenakajj walpun jupar jachʼañchapjjäna. Ukampis jichha kutinjja, jaqenakajj jupa contraw saytʼapjjäna.

² Jesusajj marka apnaqerinakjam morado jachʼa isimpi isintatänwa, pʼeqepanjja mä coronaw uchatarakïna. Ukampis soldadonakaw chʼapinakat mä corona lursusajj pʼeqepar uchapjjäna, jupanakaw mä morado jachʼa isimpis uchapjjarakïna, ukhamat Jesusat burlasiñataki. Jesusajj jawqʼjat uñjasisajj qʼala usuchjatapunïnwa, chʼapinakas pʼeqe jañchipar jununtasajj walpun ustʼaypachäna, pʼeqepas wila mayakïnwa. Jilïr sacerdotenakamp wiytatäsajja, jaqenakajj janiw Jesusarojj uñjañ munapkänti. Sacerdotenakajj akham sasaw jachʼat arnaqasipjjäna: “¡Lawar chʼakkatatäpan! ¡Lawar chʼakkatatäpan!” sasa. Jaqenakasti jiwayañ munasaw akham sasin sapjjarakïna: “Jupajj jiwañapawa” sasa (Juan 19:1-7).

³ Ukham jiskʼachata, humillata ukat tʼaqesiyat uñjaskasas Jesusajj janiw aynachtʼkänti, janirakiw ajjsarañampis apayaskänti, ni jan wal luratas quejaskänti.a Jupajj jiwañatakejj wakichtʼatänwa. Uka Pascua urun jukʼamp jaypʼurojja, tʼaqesiñ lawar chʼakkatataw jiwäna, jiwañkamajj walpun jupajj tʼaqesirakïna (Juan 19:17, 18, 30).

⁴ Jesusajj vidap churasajja, discipulonakaparojj cheqpach amigopätapwa uñachtʼayäna. Jupajj akham sänwa: “Khititï amigonakap laykojj vidap churki ukat sipansa jukʼamp munasiñanejj janiw utjkiti” sasa (Juan 15:13). Aka capitulonjja, aka wakiskir jisktʼanakaruw qhanañchaskañäni: “¿Jesusan ukham jiwañkam tʼaqesiñapajj wakisipunïnti? ¿Kunatsa jupajj taqe ukham tʼaqesiñanakan uñjasiñ amtpachäna? Jupan amigopäña ukat jupar arkañ munktan ukanakajja, ¿kunjamsa jupat yateqasitas uñachtʼaysna?”.

¿Kunatsa Jesusajj tʼaqesiñapäna ukat jiwañaparakïna?

5. Jesusajj kuna jan walinakansa uñjasiñapäna uk ¿kunjamatsa yatïna?

⁵ Jesusajj kunjamanakans uñjasiñapäna uk sum yatïna, kuna laykutejj Hebreo Arut Qellqatanakan utjkäna uka profecianak sum uñtʼäna. Uka profecianakarjamajja, Mesiasajj kunayman tʼaqesiñanakanwa uñjasiñapäna ukat jiwañaparakïnwa (Isaías 53:3-7, 12; Daniel 9:26). Walja kutirakiw discipulonakaparojj kunjamanakans uñjasini uk Jesusajj qhanañchäna, jan walinakar saykatapjjañapatakis wakichtʼarakïnwa (Marcos 8:31; 9:31). Qhep qhepa kutin Pascua amtañatak Jerusalenar sarkäna ukhajja, apostolonakaparojj akham sänwa: “Jaqen Yoqapajj jilïr sacerdotenakampiru escribanakampir katuyataw uñjasini. Jupanakajj jiwayañatakiw jupar juchañchapjjani, yaqha markankir jaqenakaruw katuyapjjarakini. Ukatsti uka jaqenakaw jupat sawkasipjjani, thuskatapjjani, jawqʼjapjjani, jiwayapjjarakini” sasa (Marcos 10:33, 34). Jesusajj kunatï cheqäki ukwa parlaskäna. Yatjjataniwayktan ukarjamajj jupat wal burlasipjjäna, thuskatapjjänwa, jawqʼjapjjänwa, qhepatsti jiwayapjjarakïnwa.

6. ¿Kunatsa Jesusajj tʼaqesiñapäna ukat jiwañaparakïna?

⁶ Ukampis ¿kunatsa Jesusajj tʼaqesiñapäna ukat jiwañaparakïna? Ukham pasañapatakejj wali importante razonanakaw utjäna. Nayraqatajja, Jesusajj jiwañkam aguantasajj Diosat jan jitheqtatapwa uñachtʼayäna, Awkipan sutips jachʼañcharakïnwa. Ak amtañäni, jaqenakajj mä kun katoqañ laykukis Diosar servipkaspa ukhamwa Supayajj kʼarisïna (Job 2:1-5). Ukampis ‘jiwañkam Diosar istʼasajja’, Jesusajj Supayan kʼarïtapwa qhanstayäna (Filipenses 2:8; Proverbios 27:11). Payïrirjamasti, jiwañkam tʼaqesisajj juchampit jiwañampitwa Jesusajj jaqenakar salväna (Isaías 53:5, 10; Daniel 9:24). Jupajj jakañ vidap churasaw ‘waljanir juchat kutsuyawayi’, ukhamatwa Jehová Diosamp sum apasiñasatakejj mä thaki jistʼarawayi (Mateo 20:28). Kimsirïrjamasti, Jesusajj kunayman jan walinakan tʼaqesisajj “jiwasjamarakiw taqe kunan yantʼat uñjasïna”. Ukatwa jupajj Jachʼa Jilïr Sacerdotjamajj jiwasat wal sinttʼasistu, ‘pantjasitanakasatsa khuyaptʼayasirakiwa’ (Hebreos 2:17, 18; 4:15).

¿Kunatsa Jesusajj jiwañatak dispuestokïna?

7. ¿Kunanaksa Jesusajj aka oraqer jutañatakejj jaytäna?

⁷ ¿Jesusajj kuna sacrificionak lurañatakis dispuestokïna? Uk sum amuytʼañatakejj aka toqet parltʼañäni: mä jaqejj utapa ukat familiap jaytasajj ¿facilakti yaqha jan uñtʼat markar saraspa? Jupatï uka markan jaqenakamp uñisitäñap yatisispa, kunjamsa jaqenakajj jupa contra saytʼapjjani, humillapjjani, tʼaqesiyapjjani ukat jiwayapjjani uk yatisirakispa ukhajja, ¿uka markar sarañ amtaskakispati? Jichhajj Jesusat amuytʼarakiñäni, jupajj janïr aka oraqer jutkasajj Awkip jakʼan wali importante puestonïnwa. Ukampis voluntadapatwa aka oraqer jutäna, mä jaqjamaw jakarakïna. Jesusajj aka oraqer jutasajj kuna jan walinakansa uñjasini uk sum yatïna, jupajj walja jaqenakamp uñisitaw uñjasiñapäna, jan walinak lurasaw juparojj humillapjjañapäna, ukatjja wal tʼaqesiyasaw jiwayapjjañapäna (Filipenses 2:5-7). ¿Kunatsa Jesusajj taqe uka sacrificionak lurañ amtpachäna?

8, 9. ¿Kuna razonatsa Jesusajj jiwas layku vidap loqtawayäna?

⁸ Jesusajj taqe ukanakjja, Awkipar wal munasitap laykuw luräna. Cheqas Diosar wal munasiñaw jan walinakan aguantañatakejj yanaptʼäna. Uka razonatwa Awkipan sutip wali importantet uñjäna, janipuniw Diosan sutip jan walit uñjayañ munkänti (Mateo 6:9; Juan 17:1-6, 26). Taqe kunat sipansa, jupajj Awkipan sutip qʼomachañwa wal munäna, kuna laykutejj kunayman kʼarinak parlasaw Supayajj Diosan sutip qʼañuchäna. Jesusatakejja, Diosan voluntadap lurasin tʼaqesiñajj mä suma privilegiönwa. Jupajj ak sum yatïna: Awkipan Jehová sutipjja, jupar taqe chuym servisaw jachʼañchaspäna, wali altoruw aptarakispäna (1 Crónicas 29:13).

⁹ Jesusajj jaqenakar wal munasitap laykuw vidap churarakïna. Cheqas jaqenakajj luratäpkäna ukhatpachaw jupanakar wal munasjjäna. Bibliajj jupat parlkasajj akham siwa: “Jaqenakarojj nayajj wal munasiyäta” sasa (Proverbios 8:30, 31). Aka oraqenkkäna ukhajja, jaqenakar munasitapajj qhanaw amuyasïna. Kunjamtï 14, 15 ukat 16 capitulonakan yatjjataniwayktanjja, jaqenakar munasitap kunayman toqetwa Jesusajj uñachtʼayäna, jukʼampis arkirinakaparuw wal munasïna. Ukampis 33 maran nisán phajjsin 14 urunak saraqataruw jaqenakar munasitapajj jukʼamp qhan amuyasïna, uka uruw jupajj taqe jaqenak layku vidap loqtawayäna (Juan 10:11). Cheqas kuntï lurkäna ukampejja, jiwasar cheqpachapun munasitapwa Jesusajj qhan uñachtʼayäna. Jiwasajj Jesusjam munasirïñatakiw chʼamachasiñasaraki, kuna laykutejj uk lurañasatakiw jupajj mayistu.

“Jumanakajj maynit maynikam munasipjjam”

10, 11. ¿Kuna machaq mandamientsa Jesusajj discipulonakapar churäna, ukat kunatsa uk phoqañatakejj chʼamachasiñasa?

¹⁰ Jesusajj janïr jiwayatäkäna uka arumajja, discipulonakaparojj akham sänwa: “Nayajj mä machaq mandamiento churapjjsma: jumanakajj maynit maynikam munasipjjam. Kunjamtï nayajj munasipksmajja, ukhamarak jumanakajj maynit maynikam munasipjjam. Cheqpachans jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:34, 35). Maynit maynikam munasiñ toqet parlkasajja, ¿kunatsa Jesusajj “mä machaq mandamiento churapjjsma” sasin sispachäna? Cheqas Moisesan Leyipanjja, “jaqe masimarojj juma kikparjam munasiñamawa” sasin qellqatäjjänwa (Levítico 19:18). Ukampis machaq mandamientor istʼañatakejja, cheqpach munasiñwa uñachtʼayañasa, mä arunjja mayninak layku vidas churañatakejj dispuestokïñasawa. Jesús pachpaw akham sasin qhanañchäna: “Nayan mandamientojajj akawa: jumanakajj maynit maynikam munasipjjam, kunjamtï nayajj jumanakar munasipksma ukhama. Khititï amigonakap laykojj vidap churki ukat sipansa jukʼamp munasiñanejj janiw utjkiti” sasa (Juan 15:12, 13). Machaq mandamientojja, “jaqe masisarojj jiwasat sipans jukʼamp munasiña” sañwa muni. Kunjamsa ukham munasiñ uñachtʼaysna ukjja, Jesusaw jiwañkam vidap churasajj yatichawayistu.

¹¹ ¿Kunatsa uka machaq mandamiento phoqañatak chʼamachasiñasa? Jesusajj akham sänwa: “Cheqpachans jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa. Mayninakarojj Jesusjam cheqpachapun munastan ukhajja, cheqpach cristianonakätaswa uñachtʼaytanjja. Ukham munasiñajj mä tarjetar uñtatawa, Jehová Diosan Testigonakapajj taqeniw asambleas regionales ukar sarasajj mä tarjeta de solapa uchastanjja, ukanjja sutisampi congregacionasampiw qellqtʼatajja, ukhamat mayninakajj jiwasar facilak uñtʼapjjañapataki. Cheqpach cristianonakajj Jesusjam munasirïpjjatap uñachtʼayapjje ukhajja, jaqenakajj jankʼakiw Jesusan arkirinakapäpjjatap amuyapjje. Ukhamasti, mayninakar cheqpach munasitasajj qhana amuykayäñapawa, jaqenakajj jiwasanakar uñjasajj ‘cheqpachapuniw jupanakajj Jesusan arkirinakapäpjje’ sasaw sapjjañapa. Ukatwa sapa maynejj akham sasin jisktʼasiñasa: “¿Nayajj cheqpach munasiñampit mayninakarojj uñjta? Kunjamtï jaqe masijar munaskta ukajj ¿Jesusan cheqpach arkiripätajti uñachtʼayi?” sasa.

¿Kunjamsa Jesusjam munasirïtas uñachtʼaysna?

12, 13. ¿Kunjamsa cheqpachapun munasirïtas uñachtʼaysna?

¹² Jesusan arkirinakapjamajja, kunjamtï jupajj munaskistu ukhamwa maynit maynikamajj munasiñasaraki. Mä arunjja, jilat kullakanakas layku sacrificionak lurañatakejj dispuestokïñasawa. ¿Kunjamsa ukhamätas uñachtʼaysna? Bibliajj uka toqet akham sistuwa: “Cristow jiwasanak laykojj jiwäna, ukhamatwa jiwasanakajj munasiñ uñtʼtanjja. Ukhamajj jilatanakas layku jiwañatakejj obligatätanwa” sasa (1 Juan 3:16). Ukhamajj jilat kullakanakas laykutï jiwañasajj wakischini ukhajja, Jesusat yateqasisajj jiwañatak dispuestokïñasawa. Gobiernonakamp jan waltʼayata ukat arknaqat uñjaskañäni ukhajja, jilat kullakanakas layku vidas churañatakejj dispuestokïñasawa, ukhamat jupanakarojj jan walinakat jarkʼaqañataki. Yaqhep markanakanjja, jaqenakajj yaqha kasta jañchinïpjjatap laykusa jan ukajj yaqha tributäpjjatap laykus wal chʼajjwapjje, jan ukajj jupanakkamaw wal uñisisipjje. Ukampis jiwasajj uka markankir jilat kullakanakar jarkʼaqañatakisa, jupanak layku vidas aptʼasiñatakis dispuestokïtanwa, janipuniw jupanakarojj yaqhachktanti. Ukat markasantï mä guerrajj utjaspa ukhajja, jiwasajj janipuniw jilat kullakanak contrasa jan ukajj yaqha markanak contras guerran nuwasksnati, antisas jan ukar mitisitas laykojj carcelar jistʼantata jan ukajj jiwayat uñjasiñatakejj dispuestokïtanwa (Juan 17:14, 16; 1 Juan 3:10-12).

¹³ Jilat kullakanakas layku jiwañatak dispuestokïkstansa, janiw uk lurasakejj jupanakar munasitas uñachtʼayksnati. Cheqas janiw taqenirupunejj ukham sacrificio lurañajj waktʼkistaniti. Ukampis jilat kullakanakasar wal munasitas layku vidas aptʼasiñatak dispuestokïstan ukhajja, ¿janit jichhatpachajj jupanak laykojj sacrificionak lurksna? Jesusjam mayninakar munasisajja, jiwasan askis thaqañat sipans mayninakan askip thaqañatakiw chʼamachasiñasa. Ukatwa kunanaktï mayninakajj necesitapki ukanakat nayraqat llakistanjja, ukatjja jiwasatak chʼamäkchi ukhasa kunatï mayninakatakejj sumäki ukwa thaqtanjja (1 Corintios 10:24). ¿Kunjamanakatsa cheqpach munasiñ uñachtʼaysna?

Congregacionansa familia taypinsa cheqpach munasiñwa uñachtʼayañasa

14. 1) ¿Kuna sacrificionaksa ancianonakajj lurapjje? 2) Ancianonakajj kunjamsa wal trabajipjje uk yatisajj ¿kunjamakis jikjjatasta?

¹⁴ Ancianonakajja ‘Diosan congregacionapar’ sum uñjañatakejj walja sacrificionakwa lurapjje (1 Pedro 5:2, 3). Jupanakajj familiapar yanaptʼañatakejj wal chʼamachasipjje, ukampis congregacionan kuna lurañanakatï utjki ukanak atiendiñatakiw chʼamachasipjjaraki, mä arunjja arumanakasa seman tukuyanakas lurañanakap phoqasipkakiwa. Ukhamarus tantachäwinakan asignacionanakapatakiw waktʼayasipjje, jilat kullakanakaruw pastoreo lurañatak visittʼapjje, congregacionan kuna jan walinakatï utjki ukanak atiendiñatakis wal chʼamachasipjje. Yaqhep ancianonakajj jukʼamp sacrificionakwa lurapjje. Sañäni, asambleanakan wal trabajipjje, Comités de Enlace con los Hospitales ukanwa yanaptʼapjje, Grupos de Visita a Pacientes uka taypinsa yanaptʼapjjarakiwa. Yaqhepanakasti, Departamento Local de Diseño y Construcción ukanwa trabajipjje. Munat ancianonaka, jumanakajj jilat kullakanakar taqe chuyma yanaptʼasajj Jesusjam munasirïpjjatamwa uñachtʼayasipktajja. Congregacionan lurañanakap phoqañatakejj tiempsa, chʼamsa apstʼasipkta ukat kunanakatï utjapktam ukanaks churapkta ukhajja, cheqpach munasirïpjjatamwa uñachtʼayasipktajja (2 Corintios 12:15). Taqe ukanakjja, Jehová Diosasa jilat kullakanakas sumwa uñjasipki, wali valoranitwa sacrificionak lurapjjatam uñjapjjaraki (Filipenses 2:29; Hebreos 6:10).

15. 1) Ancianonakan esposanakapajj ¿kuna sacrificionaksa lurapjje? 2) ¿Kunsa jumajj ancianonakan esposanakapat amuyta?

¹⁵ ¿Ancianonakan esposanakapat kamsaraksnasa? ¿Janit jupanakajj walja sacrificionak lurapkaraki? ¿Janit jupanakajj congregación sum uñjañatakejj esposonakapar yanaptʼapkaraki? Ancianonakan esposanakapatakejja, familiapampïñasa esposopampïñas wali wakiskiriwa, ukampis jupanakajj congregacionar sum uñjañatakejj taqe chuymaw yanaptʼapjje, janiw esposonakapan ocupatäpjjatap laykojj quejasipkiti. Jichhajj superintendente de circuito jilatanakan esposanakapat amuytʼapjjarakiñäni, jupanakajj Jesusjam cheqpach munasirïpjjatapwa uñachtʼayapjjaraki. Kuna laykutejj mä congregacionat yaqha congregacionar sarañatakisa yaqha circuitonakar sarañatakis walja sacrificionakwa lurapjje, taqe chuymaw esposonakaparojj yanaptʼapjjaraki. Jupanakajj janiw mä utanïpkiti, ukatjja sapa semanaw yaqha utanakan quedasisajj ikipjjaraki. Ukham lurapjjatapatjja, ¡walpun jupanakar yuspärtanjja! Jupanakat llakisiñat sipansa, congregacionatwa wal llakisipjje ukat cheqpach munasirïpjjatapwa uñachtʼayapjjaraki (Filipenses 2:3, 4).

16. ¿Kuna sacrificionaksa cristiano awk taykanakajj lurapjje?

¹⁶ ¿Kunjamsa familia taypin cheqpach munasirïtas uñachtʼaysna? Awk taykanaka, jumanakajj kunatï wawanakamatak munaski ukanak churañatakisa, “Jehová Diosajj munki ukarjam cheqañchasa ewjjtʼasa” sum uywañatakis kunayman sacrificionakwa lurapjjtajja (Efesios 6:4). Inas jumanakajj utaman manqʼa jan faltañapatakisa, wawanakamar isi ukat samartʼañatak mä lugar churañatakis walja horanak trabajipjjsta. Ukat inas awisajj jan manqʼata jan kun alasis sarnaqapjjsta, ukhamat wawanakamar jan kuns faltayañataki. Ukampis wawanakamar Bibliat yatichañataki, tantachäwinakar irpañataki, jupanakamp predikir sarañatakiw wal chʼamachasipjjtajja (Deuteronomio 6:6, 7). Taqe ukanak munasiñat lurapjjatam uñjasajja, familia utjayir Diosajj walpun kusisi, jupaw wawanakaman wiñay jakañ katoqapjjañapatakis yanaptʼarakini (Proverbios 22:6; Efesios 3:14, 15).

17. ¿Kunjam toqenakatsa esposonakajj Jesusjam munasirïpjjatap uñachtʼayapjjaspa?

¹⁷ Esposonaka, ¿kunjamsa jumanakajj Jesusjam munasirïpjjatam uñachtʼayapjjasma? Bibliajj uka toqet akham sasaw qhanañchi: “Casarat chachanaka, warminakamarojj munasisipkakim, kunjamtï Cristojj congregacionar munaski, congregación laykus jakäwip loqtaski ukhama” sasa (Efesios 5:25). Kunjamtï yatjjataniwayktanjja, Jesusajj arkirinakapar walpun munasïna, ukatwa vidap jupanak layku taqe chuyma loqtäna. Romanos 15:3 textojj uka toqet akham siwa: “Cristos janiw kuntï juparojj kusisiykaspa uk lurkänti” sasa. Ukhamajj mä cristiano esposojja, Jesusat yateqasisajj esposapan askipwa thaqañapa, kunanaktï esposapajj necesitki ukanaks taqe chuymaw churañaparaki. Ukatjja janiw jupan munañaparjamak taqe kuns lurañapäkiti, jan ukasti Bibliarjamatï walikïskchi ukhajj esposapan sugerencianakap istʼañapawa, kuntï esposapajj siski ukarjamas taqe chuymaw lurañaparaki. Kawkïr esposonakatï ukham lurapki ukanakajja, Jehová Diosampejj sumat uñjatäpjjewa, esposapasa wawanakapas respetompi ukat munasiñampiw jupar uñjapjjaraki.

¿Kunsa jumajj luräta?

18. ¿Kunatsa machaq mandamientor istʼañasa?

¹⁸ Machaq mandamientorjam maynit maynikam munasiñajj janiw facilapunïkiti, ukampis mä wakiskir razonaw uka mandamiento phoqañatakejj utjistu. Pablojj uka toqet akham sasaw qellqäna: “Criston munasiñapaw obligapjjetu. Nanakajj akwa amuyapjjta, mä jaqew taqe jaqenak laykojj jiwäna [...]. Jupajj taqenitakiw jiwäna, ukhamat khitinakatï jakasipki ukanakajja, jan jupanak pachpataki jakjjapjjañapataki, jan ukasti khititï jupanak layku jiwki, jaktayatäkaraki uka Cristotak jakjjapjjañapataki” sasa (2 Corintios 5:14, 15). Niyakejjay Jesusajj jiwas layku jiwawaychejja, taqeniw jupataki jakjjañatak chʼamachasiñasa. Mä arunjja, jupat yateqasisajj cheqpach munasirïtaswa uñachtʼayañasa.

19, 20. ¿Jehová Diosajj kuna suma regalsa churawayistu, ukat kunjamsa uka regalo katoqasitas uñachtʼaysna?

¹⁹ Jesusajj “khititï amigonakap laykojj vidap churki ukat sipansa jukʼamp munasiñanejj janiw utjkiti” sasaw säna, ukham sasajj kunatï cheqäki ukwa parlaskäna (Juan 15:13). Cheqas jupajj jiwas laykuw vidap churawayi, ukhamatwa taqe jaqenakar wal munasitap uñachtʼayawayistu. Ukampis Jesusat sipansa, Diosaw jiwasanakar jukʼamp munasistu, uka toqet Jesusajj akham sasaw säna: “Diosajj aka mundor wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” sasa (Juan 3:16). Diosajj jiwasar wal munatap laykuw mä sapa Yoqap khitanïna, ukhamat jiwasar juchampit jiwañampit salvañataki (Efesios 1:7). Kuntï Jehová Diosajj jiwas layku lurawayki ukajj mä suma regalopuniwa, janirakiw jupajj khitirus uk katoqasiñatak obligkistuti.

²⁰ Ukhamajja, Jehová Diosan uka suma regalop katoqasiñäniti janicha uk sapa mayniw amtañasa. Uka regalo katoqasitasjja, Jesusar taqe chuyma confiyasaw uñachtʼaysna. Ukampis janiw aru mayakejj ‘nayajj Jesusar confiytwa’ sasin sañasäkiti, jan ukasti luratanakasampi sarnaqatasampiw Diosan Yoqapar confiyatas uñachtʼayañasa (Santiago 2:26). Jesusar confiyatasjja, sapüru jupar arkasaw uñachtʼayaraksna. Ukhamtï lurañäni ukhajja, jichhasa jutïrinsa walja bendicionanakwa katoqañäni. Aka libronkir qhep qhepa capitulopanjja, kuna bendicionanaksa katoqañäni uka toqetwa yatjjataskañäni.