“Taqenirakiw espíritu santompi phoqtʼatäpjjäna”

1. Pentecostés fiestan kunanakas pasäna uk qhanañchtʼam.

JERUSALÉN markan callenakapanjja, walja jaqenakapuniw utjäna.a Templonjja altaratwa jewqʼejj mistuskäna, ukañkamasti levita chachanakajj Salmos 113–118 (Salmos de Hallel) cantasipkäna. Jupanakat yaqhepajj inas mä parte cantapjjchïna, mayninakasti inas ukjjarojj jaysanipjjarakchïna. Jerusalén markan callenakapanjja, walja markanakat jutir jaqenakaw utjäna. Jupanakajj Elam, Mesopotamia, Capadocia, Ponto, Egipto ukhamarak Roma markanakatäpjjänwa.b ¿Kunas Jerusalén markan amtaspachäna? Pentecostés fiestaw amtasïna, mä arunjja “nayrïr achunak apthapiñ” uruw amtasïna (Núm. 28:26). Uka fiestajj sapa maraw cebada yawthapiñ tukuyaru ukhamarak trigo yawthapiñ qalltar apasirïna.

2. 33 maran Pentecostés fiestanjja, ¿kuna musparkañanakas pasäna?

² Khä 33 maran Pentecostés fiestan niya 9 alwa horasarojja, wali musparkañ mä milagrow pasäna, ukajj walja maranak qhepatsa amtasiskakïnwa. Mä akatjamatwa “wali chʼaman thayas thaytʼankaspa ukham alajjpachat istʼasïna” (Hech. 2:2). Mä 120 discipulonakajj tantachtʼatäpkäna uka utanjja, thayajj walpun suynäna, ukatjja lajjranakar uñtat nakhaskir ninanakwa jupanakajj uñjapjjäna, jaljtasasti sapaqat mayni patjjaruw mayakam purirakïna.c Ukjjarusti “taqenirakiw espíritu santompi phoqtʼatäpjjäna”, ukatwa kunayman arunak parlañ qalltapjjäna. Discipulonakajj Jerusalén markankir callenakar mistupjjäna ukhajja, “pachpa arupat” parlirwa yaqha markat jutirinakajj istʼapjjäna, ukatwa jupanakajj wal musparapjjäna (Hech. 2:1-6).

3. 1) 33 maran Pentecostés fiestan kunatï paskäna ukajja, ¿kunatsa Diosan markapatakejj wali wakiskirïnjja? 2) Jaqenak nayraqatan mä discurso arsusajja, ¿kunjamsa Pedrojj Reinon llavenakapat may aptäna?

³ Kunatï uka urun paskäna ukajja, Diosan markapatakejj wali wakiskirïnwa, uka urunwa Diosan Israelapajj uttʼayasïna, mä arunjja uka urunwa cristiano congregacionajj uttʼayasïna (Gál. 6:16). Ukampis janiw ukakïkänti, uka pachpa urun jaypʼu toqerojja, Pedrojj walja jaqenak nayraqatanwa mä discurso arstʼäna. Ukhamatwa ‘Reinon llavenakapat’ nayrïrsa aptkaspa ukhamänjja, uka llavempiw Pedrojj kunayman aru parlirinakatak mä punku jistʼaräna (Mat. 16:18, 19). Judionakasa proselitonakasa, mä arunjja judionakan religionapar mantirinakas nayrïr llave toqew suma yatiyäwinak katoqapjjäna, espíritu santompis ajllitäpjjarakïna.d Ukhamatwa jupanakajj Diosan Israelap taypinkapjjarakïna. Jupanakajj Diosat jan jitheqtas servisajja, Diosan Reinopan reyinakjama sacerdotenakjamaw apnaqapjjañapäna (Apoc. 5:9, 10). Qhepatjja samaritanonakasa, jan judiöpkäna ukanakas uka pachpa oportunidadanïpjjarakïnwa. 33 maran Pentecostés urun kuna musparkañanakatï paskäna ukat ¿kunsa cristianonakajj yateqsna?

“Taqeniw mä cheqanak tantachatäsipkäna” (Hechos 2:1-4)

4. Cristiano congregacionajj 33 maranwa uttʼayasiwayi, ¿ukhat jichhakamajj cristiano congregacionajj jiljjattaskakiwa sasajj kunatsa sistanjja?

⁴ Cristiano congregacionajj Pentecostés urun alwa toqeruw uttʼayasïna. Uka alwajja mä altus utan tantachatäpkäna uka mä 120 discipulonakaw espíritu santomp ajllitäpjjäna (Hech. 2:1). Ukampis uka urunjja, waljaniw bautisasisajj cristianor tukupjjäna. Ukhat aksarojja Diosan markapajj jiljjattaskakiwa. Jichha tiemponjja, Diosar servir chachanakampi warminakampiw oraqpachan utji, jupanakajj Jehová Diosan Testigonakapäpjjewa. Jupanak toqew ‘Reinon suma yatiyäwinakapajj aka oraqpachan yatiyasiski’, ukhamat taqe markanakankir jaqenakajj janïr akapach tukuskipan yatipjjañapataki (Mat. 24:14).

5. Nayrïr patak maranakansa jichha tiemponsa, ¿kunjamsa congregación taypinkañajj Diosar serviñan chʼamañchtʼistu?

⁵ Pentecostés urun congregacionajj uttʼayaskäna ukajja, Diosar serviñanwa aka pä gruponakar chʼamañchtʼäna: nayraqatajja alajjpachar sarañatak ajllitanakaru, tiempompejja ‘yaqha ovejanakaru’ (Juan 10:16). Pablotakejja jilat kullakanakan chʼamañchtʼasipjjatapajj wali valoranipunïnwa. Ukatwa Roma markankir cristianonakarojj akham sasin qellqäna: “Diosan bendicionapamp jumanakaru chʼamañchtʼañatakejj walpun uñjañ munapjjsma, ukhamat Diosar adorañan wali suma saytʼatäpjjañamataki. Nayajj purapat chʼamañchtʼasiñatakiw uñjañ munapjjsma, ukhamat jumanakansa nayansa Diosar confiyañajj utjkistu ukamp chʼamañchtʼasiñasataki” sasa (Rom. 1:11, 12).

6, 7. ¿Kunjamsa Diosan markapajj Jesusan mayitaparjam predicaski?

⁶ Nayrïr patak maranakanjja, Diosan markapajj walja amtanakanïnwa, jichha tiemponjja uka pachpa amtanakanikïskiwa. Nayraqatajja cristianonakajj Jesusan aka arunakapwa phoqapjjañapa, jupajj arkirinakaparojj akham sänwa: “Taqe markanakankir jaqenakar nayan discipulojar tukuyapjjam, bautisapjjam Awkina, Yoqana, espíritu santon sutipjjaru. Ukatsti taqe kuntï nayajj jumanakar yatichapksma ukanak phoqañ yatichapjjarakim” sasa (Mat. 28:19, 20).

⁷ Jichha tiemponjja, Jehová Diosan Testigonakapaw predicañatakejj wal chʼamachasipjje, ukampis jupanakatakejj predicañajj janiw faciläkapuniti, kuna laykutejj kunayman aru parlir jaqenakaw utji. Ukatwa Testigonakapajj Bibliat apstʼat qellqatanak 1.000 jila arunakar traducipjje. Jumatï Diosan markapanksta, Reinon suma yatiyäwinakaps prediksta, jaqenakarus Jesusan discipulopar tukuysta ukhajja, wali kusisitäpachätawa. Jumajj aka oraqen Jehová Diosan sutip yatiyapki uka jiskʼa grupo taypinktawa.

8. Cristiano congregacionanjja, ¿kuna bendicionanaksa maynejj katoqe?

⁸ Aka jan wali tiempon kusisitakïskañasa, jan qarjtas predicañas janiw faciläkiti. Ukampis Jehová Diosajj aka oraqpachankir jilat kullakanak toqew chʼamañchtʼistu. Pablojj hebreo cristianonakarojj akham sasaw qellqäna: “Mayninakajj kunjamäsipkisa ukjja amuyapjjapuniñäni, ukhamat munasiñasa suma luräwinakasa jukʼamp utjañapataki. Tantachäwinakasjja janirak jaytanukupjjañäniti, kunjamtï yaqhepanakajj jaytanukuñar yatitäpki ukhamjja, antisas maynit maynikam chʼamañchtʼasipjjañäni, Diosan urupajj jakʼankjjatap yatisajj jukʼamp uk lurapjjañäni” sasa (Heb. 10:24, 25). Cheqansa cristiano congregacionajj Jehová Diosan mä suma regalopawa, ukanwa mayninakarojj chʼamañchtʼsna, jiwasas chʼamañchtʼatarakïsna. Ukatwa jilat kullakanakat janipun jitheqtañasäkiti ni tantachäwinakatsa faltasiñasäkiti.

“Sapa mayniw pachpa arupat parlir istʼapjjäna” (Hechos 2:5-13)

9, 10. Yaqha aru parlir jaqenakar suma yatiyäwinak yatiyañatakejja, ¿kunsa yaqhep cristianonakajj lurapjje?

⁹ Judionakasa judionakan religionapar mantirinakas 33 maran Pentecostés urun kunja kusisitas jikjjatasipjjpachäna ¿uk amuyasmati? Jupanakat waljanejj inas mä pachpa aruk parlapjjchïna, uka arojj inas griego arüchïna jan ukajj hebreo arüchïna. Ukampis uka urunjja, “sapa mayniw pachpa arupat parlir” discipulonakar istʼapjjäna (Hech. 2:6). Suma yatiyäwinak pachpa arupat parlir istʼasajj chuymanakapwa chʼalljjtayasipjjäna. Jichha tiemponjja, cristianonakajj janiw mä milagro toqejj yaqha arunak parlktanti. Ukampis walja cristianonakajja, Reinon suma yatiyäwinakap yaqha markanakankir jaqenakar yatiyañatakiw chʼamachasipjje. ¿Kunjamsa uk lurapjje? Yaqhepanakajj yaqha aru parlañwa yateqapjje, ukhamat pachpa markapan utjki uka yaqha aru parlir congregacionar yanaptʼañataki jan ukajj yaqha markar servir sarjjañataki. Yaqha aru parlañatak chʼamachasipjjatap uñjasajja, jupanakar istʼapki uka jaqenakajj wal musparapjje.

¹⁰ Christine kullakat parltʼañäni, jupajj paqallqo Testigonakampiw gujarati aru yateqañatak mä curso pasäna. Kunapachatï gujarati aru parlir trabajopankir compañerapamp jikisïna ukhajja, gujarati arutwa jupar aruntäna. Arupat aruntir istʼasajja uka compañerapajj wal musparäna, kunatsa gujarati aru yateqañatak chʼamachasïna uk yatiñwa jupajj munarakïna. Ukhamatwa Christine kullakajj jupar wali sum predicäna, uka compañerapajj akham sänwa: “Nayajj parlkta uka chʼama aru yateqapjjañapatakejja, janiw kawkïr religionas jaqenakaparojj chʼamañchkaspati. Jumanakajj wali importante yatiyäwinïpjjpachätawa” sasa.

11. ¿Yaqha aru parlir jaqenakar Diosan Reinopat yatiyañatakejj kunsa lursna?

¹¹ Cheqas janiw taqenipunejj yaqha aru yateqañ puedktanti. Ukampis yaqha aru parlir jaqenakar Reinon suma yatiyäwinakap yatiyañatakejj wakichtʼatäsnawa. ¿Kunanakas wakichtʼatäñatakejj yanaptʼistaspa? Ukanakat mayajj JW Language^® sat aplicacionawa, ukan yanaptʼapampejj jakasktan uka cheqan kuna arunakatï parlaski ukwa mä jukʼa yateqsna, ukhamatwa maynirojj pachpa arupat aruntasin parlañ qalltsna. Khitinakatï Bibliat jukʼamp yatiñ munapki ukanakar parltʼaskakiñatakejja, kuna artï parlapki uka aru jukʼamp yateqañatakiw chʼamachassna. Ukatjja Internetan jw.org cheqar mantapjjañapatakiw invittʼsna, uka cheqan kuna qellqatanakasa videonakasa pachpa arupan utji ukwa uñachtʼayaraksna. Taqe uka yanaptʼanakampitï Diosan arunakap yatiyañäni ukhajja, nayrïr patak maranakan jakir cristianonakjamarakiw wali kusisit jikjjatasiñäni, jaqenakajj “pachpa arupat parlir” jupanakar istʼasajj “walpun musparapjjäna”.

Pedrojj parlañatakiw saytʼasïna (Hechos 2:14-37)

12. 1) Pentecostés urun kuna milagrotï paskäna uka toqet ¿kunsa Joel profetajj walja maranak faltkipan arsüna? 2) Joel profetan arunakap phoqasiñapjja, ¿kunatsa nayrïr patak maranakan jakir cristianonakajj wal suyapjjäna?

¹² Pentecostés urut parltʼaskakiñäni. Walja markanakat jutir jaqenakar parlañatakiw Pedrojj saytʼasïna (Hech. 2:14). Pedrojja Diosan yanaptʼapampiw mä milagro toqejj yaqha arunak parlapjjta, ukajj kuntï Diosajj Joel profetap toqejj “taqe kasta jaqenakjjaruw espirituj warjjatanëjja” sasin mä promesa arskäna ukarjamaw phoqasi sasaw qhanañchäna (Joel 2:28). Nayrïr patak maranakan jakir cristianonakajj ukan phoqasiñap wal suyasipkäna. Janïr alajjpachar makatkasajja, Jesús pachpaw jupanakar akham säna: “Nayasti alajjpachankir Awkirojj mayïwa, jupasti yaqha yanapir jumanakar churapjjätam”, “uka yanapiristi [...] espíritu santowa” sasa (Juan 14:16, 17).

13, 14. ¿Jaqenakan chuymapar purtʼañatakejj kunjamsa Pedrojj parläna? ¿Kunsa jiwasajj jupat yateqassna?

¹³ Pedrojj akham sasaw discursop qhana arunakamp tuktʼayäna: “Taqe Israel markpachaw yatiñapa, Diosaw juparojj Tatituta ukhamarak Cristot uttʼayi, kawkïr Jesusarutï jumanakajj mä lawar chʼakkatasin jiwayapkta ukaru” sasa (Hech. 2:36). Tantachtʼatäpkäna uka jaqenakat jilapartejja, Jesusajj mä lawar chʼakkatatäsin jiwkäna ukhajj janiw ukankapkänti. Ukampis niyakejjay jupanakajj uka markankirïpjjchïnjja, kuntï Jesusar lurapkäna ukajj jupanakan juchaparakïnwa. Ukhamäkchïnsa Pedrojj judío jilanakaparojj respetompiw parläna, chuymanakaparuw purtʼañ munarakïna. Pedrojj janiw jupanakar juchañchañ munkänti, jan ukasti arrepentisipjjañapatakiw yanaptʼañ munäna. Pedron arunakap istʼasajj janiw ukankirinakajj chuym ustʼayasipkänti, antisas “jupanakajj chuymanakapan wali llaktʼatapuniw uñjasipjjäna”, “¿kun lurapjjañajas wakisispa?” sasaw jisktʼasipjjarakïna. Pedron wali sum parltʼatapaw jupanakan chuymaparojj purtʼäna, ukatwa arrepentisipjjäna (Hech. 2:37). 

¹⁴ Jaqenakan chuymapar purtʼañatakejja, Pedrotwa yateqasiñasa. Kunapachatï jaqenakar predicktan ukhajja, utanejj jan Bibliarjamäki uk arsuspa ukhajj janiw uka toqet jiskhisiñasäkiti. Antisas kuna toqentï jupampejj acuerdöktan uka toqet parlañatakiw chʼamachasiñasa. Jiwasatï jupanakamp wali sum parltʼañatak chʼamachasiñäni ukhajja, Diosan arupat wali sumwa qhanañchañäni. Ukham parltʼatasatwa suma chuyman jaqenakajj taqe chuyma istʼapjjarakistani.

“Sapa maynis Jesucriston sutipjjar bautisasipjjam” (Hechos 2:38-47)

15. 1) ¿Kunsa Pedrojj arsüna, ukat istʼapkäna ukanakajj kunsa lurapjjäna? 2) Suma yatiyäwinak istʼapkäna uka urpachaw walja jaqenakajj bautisasiñatak wakichtʼatäjjapjjäna sasajj ¿kunatsa sissna?

¹⁵ 33 maran Pentecostés urun Diosan arunakap katoqasipkäna uka judionakarusa, judionakan religionapar mantapkäna ukanakarus Pedrojj akham sänwa: “Arrepentisipjjam, sapa maynis Jesucriston sutipjjar bautisasipjjam” sasa (Hech. 2:38). Uka arunakar istʼasasti mä 3.000 jaqenakaw bautisasipjjäna, inas Jerusalenankir estanquenakana jan ukajj uka jakʼanakan bautisasipjjchïna.e ¿Jupanakajj kusisiñatakti ukham bautisasipjjpachäna? ¿Maynejj janïr wakichtʼatäkasajj bautisasispati? Janiwa. Bibliat yatjjatirinakasa, cristiano familian jilsupki uka wawanakas nayraqatajj wakichtʼasipjjañapawa. Ak amtañäni: Pentecostés urun bautisasipkäna uka judionakasa judionakan religionapar mantirinakas Bibliat wali suma yatjjatatäjjapjjänwa, Jehová Diosatak yaqhachatäkäna uka marka taypinkapjjarakïnwa. Ukhamarusa Dios chuymäpjjatapwa uñachtʼayapjjarakïna, kuna laykutejj sapa maraw Pentecostés fiesta amtañatakejj Jerusalenar wali jay sarapjjerïna. Diosan amtapan Jesusajj kuna luräwinisa uka cheqa yatichäwi amuyapjjañapakiw faltäna. Uk sum amuyjjapjjäna ukhajja, Criston arkiripjam bautisatäjjañatakejj wakichtʼatäjjapjjänwa, ukhamat Diosar serviskakiñataki.

16. Nayrïr patak maranakan jakir cristianonakajja, ¿kunjam chuymanïpjjatapsa uñachtʼayapjjäna?

¹⁶ Jehová Diosan bendicionapajj bautisasipkäna ukanakjjankänwa. Bibliajj akham saskakiwa: “Creyentëjjapjjäna ukanakajja, juntukiw tantachasipjjäna, taqe kunanakatï jupanakan utjkäna ukanakajj taqenitakïnwa, utjirinakapsa oraqenakapsa aljapjjänwa, qhawqtï aljatampejj jikjjatapkäna ukjja taqeniruw lakinoqapjjäna, qhawqhatï sapa maynitak munaski ukarjama” sasa (Hech. 2:44, 45).f Jichha tiempon jakir cristianonakajj jupanakjam munasiri, wajjtʼasiri ukhamäñasarakiwa.

17. ¿Bautisasiñatakejj kunanaksa maynejj lurañapa?

¹⁷ Jichha tiempon khitinakatï jakañ vidap Diosar katuyasiñ munapki, bautisasiñ munapkaraki ukanakajja, Biblian jikjjataski uka mayitanakarjamaw wakichtʼasipjjañapa. Nayraqatajja, Bibliatwa yateqapjjañapa (Juan 17:3). Ukjjarusti Diosar confiyapjjatapwa uñachtʼayapjjañapa, nayra juchanakapatsa taqe chuymaw arrepentisipjjañapa (Hech. 3:19). Ukatjja jakäwipan cambionakwa lurapjjañapa, Jehová Diosan munañaparjam lurañatakis chʼamachasipjjañaparakiwa (Rom. 12:2; Efes. 4:23, 24). Tukuyarusti Diosar jakäwip katuyasiñatakejj mä oración lurapjjañapa, ukjjaruw bautisasjjapjjaspa (Mat. 16:24; 1 Ped. 3:21).

18. ¿Bautisat mä cristianojj kunsa katoqe?

¹⁸ ¿Jumajj oración toqejj Jehová Diosar jakañ vidam katuyasjjtati? ¿Criston arkiripjamajj bautisasjjaraktati? Ukhamächi ukhajja, Jehová Diosajj nayrïr patak maranakan jakir cristianonakarjamaw yanaptʼätam, jupajj Reinopat phoqatpach yatiyañataki ukhamarak munañap lurañamatakiw espíritu santop churätam. ¡Ukajj mä jachʼa privilegiowa!