¿Jehová Diosajj kunjamasa?

¿Jehová Diosajj kunjamäpachaw sasas jumajj amuyta? ‘Diosajj wali jayankiwa, wali musparkañawa, janiw jupampejj parltʼasksnati’ sasaw yaqhepanakajj sapjje. Diosajj wali chʼamani jan sinttʼasiri Diosäpachawa ¿sasat jumajj amuyta? ¿Jehová Diosajj kunjamapunïpachasa? Diosajj kunjam chuymanisa (kuna cualidadanakanisa) qhawqsa jumat llakisi ukjja Bibliaw qhanañchi.

1. ¿Kunatsa Diosarojj jan uñjktanjja?

“Diosajj mä espirituwa” (Juan 4:24). Jehová Diosajj janiw jiwasjam jañchini chʼakhani ukhamäkiti. Jupajj alajjpachan jakiri mä espirituwa, janirakiw uka lugar uñjksnati.

2. ¿Jehová Diosajj kunjam chuymanisa?

Jehová Diosarojj janiw uñjksnati, ukampis jupajj kunja suma chuymanisa uk yatisajj jukʼampiw jupar munassna. Bibliajj akham siwa: “Jehová Diosasti kunatï cheqapäki ukar munasiriwa, jupat jan jitheqtirinakarus janiw jaytanukkaniti” sasa (Salmo 37:28). Jupajj “wali munasir chuymaniwa, wali khuyaptʼayasirirakiwa”, yamas khitinakatï tʼaqesisipki ukanakarojj jukʼampiw munasi, khuyaptʼayasiraki (Santiago 5:11). “Jehová Diosajj khitinakatï chuyma pʼakintatäpki ukanakan jakʼapankiwa, jupaw sinti desanimatäpki ukanakarojj salvaraki” (Salmo 34:18). Luratanakasajj Jehová Diosar kusisiyaspawa jan ukajj llakisiyaspawa, ¿uk yatiyätati? Jan walinak lurañ amtki uka jaqejja, Diosarojj llakisiyiwa chuymaps ustʼayarakiwa (Salmo 78:40, 41). Ukampis kunatï walïki ukanak lurir jaqejja, Diosan chuymap kusisiyiwa (Proverbios 27:11 liytʼäta).

3. ¿Kunjamsa Jehová Diosajj jiwasar munasitap uñachtʼayistu?

Jehová Diosajj munasiriwa, ukham chuymanïtapaw taqe kunat sipans jilanki. Cheqas Bibliarjamajja ‘Dios pachpaw munasiñajja’ (1 Juan 4:8). Jehová Diosajj Biblia toqe, kunanaktï lurawayki ukanak toqew jiwasar munasitap uñachtʼayistu (Hechos 14:17 liytʼäta). Kunjam lurtʼatätansa uk amuytʼam. Suma coloranak uñjasasa, manqtʼasisasa, music istʼasas kusistʼirwa Diosajj lurawayistu. Jupajj kusisit jakasiñaswa muni.

JUKʼAMP YATJJATAÑÄNI

4. Espíritu santojj Diosan chʼamapawa

Jiwasajj amparanakasampiw trabajtanjja, ukampis Jehová Diosajj espíritu santopampiw taqe kuns luri. Bibliarjamajja espíritu santojj janiw mä diosäkiti, jan ukasti Diosan chʼamapawa, uka chʼamampiw jupajj taqe kuns luri. Lucas 11:13; Hechos 2:17 liytʼasajja aka toqetwa parltʼapjjäta:

• Khitinakatï Jehová Diosar espíritu santop mayisipki ukanakarojja jupajj churapuniniwa. ¿Espíritu santojj mä diosati, jan ukajj Diosan chʼamapacha? ¿Kunatsa ukham amuyta?

Jehová Diosajj espíritu santopampiw wali musparkañanak luri. Salmo 33:6; 2 Pedro 1:20, 21 liytʼasajja aka toqetwa parltʼapjjäta:

• ¿Jehová Diosajj espíritu santopampejj kunanaksa lurawayi?

5. Jehová Diosajj kunjam chuymanisa uk yatisajj facilakwa jupar jakʼachassna

Moisesajj jan jitheqtasas Diosar sirvkchïnjja, jukʼampiw Luriripar uñtʼañ munäna. Ukatwa Moisesajj Diosar akham säna: “Thakinakam uñtʼayita, ukhamat jumar uñtʼañajataki” sasa (Éxodo 33:13). Jehová Diosasti jupa pachpat parlkasajj kunjam chuymanisa ukwa Moisesar sarakïna. Éxodo 34:4-6 liytʼasajja aka toqetwa parltʼapjjäta:

• ¿Jehová Diosajj kunjam chuymanïtapsa Moisesar qhanañchäna?

• ¿Jehová Diosajj kunjam chuymanïtapas jumar jukʼamp gusttamjja?

6. Jehová Diosajj jaqenakat llakisiwa

Nayra tiemponjja hebreonakaw Diosan markapäpjjäna, jupanakajj Egipto markanwa esclavöpjjäna. ¿Jehová Diosajj markapar tʼaqesiskir uñjasajj kunjamakis jikjjatasïna? AUDIO istʼasajja Bibliampiw arktapjjäta, jan ukajj Éxodo 3:1-10 liytʼapjjäta. Ukatjja aka toqetwa parltʼapjjäta:

AUDIO: Markapar tʼaqesir uñjasajj Jehová Diosajj llakisïnwa (2:45)

• Uka versiculonakarjamajja, ¿kunjamakis Diosajj jaqenakar tʼaqesir uñjasajj jikjjatasi? (Éxodo 3:7, 8 uñjjattʼapjjäta).

• ¿Cheqapunit Jehová Diosajj jaqenakar yanaptʼañ munpacha? ¿Jupajj jaqenakar yanaptʼaspawa sasmati? ¿Kunatsa ukham amuyta?

7. Jehová Diosajj kunjam chuymanisa ukjja luratanakapanwa uñjtanjja

Diosajj kunjam chuymanisa uk luratanakapampiw uñachtʼayistu. VIDEO uñtapjjäta. Ukatjja Romanos 1:20 liytʼasajja aka toqetwa parltʼapjjäta:

VIDEO: Luratanakapanwa Jehová Diosan munasiñap amuysna: jaqen cuerpopa (1:57)

• ¿Jehová Diosajj kunjam chuymanïtapsa luratanakapan jumajj uñjta?

¿KUNSA YATEQAWAYTAN?

Jehová Diosajj mä espirituwa, ukatwa juparojj jan uñjksnati. Jehová Diosajj suma chuymanïtap walja toqenakatwa uñachtʼayi, ukampis munasirïtapaw jukʼamp jilanki.

Amtañataki

• ¿Kunatsa Jehová Diosarojj jan uñjksna?

• ¿Kunas espíritu santojja?

• ¿Jehová Diosajj kunjam chuymanisa?

JUKʼAMP YATJJATAÑAMATAKI

Jehová Diosar jukʼamp uñtʼañatakejja, jupajj kunjam chuymanisa uk pusi toqet yatjjatam.

“¿Kunjam Diosasa?” (Yatiyañataki mayïri 2019)

Jehová Diosajj janiw taqe cheqankkiti sañatakejj kuna razonanakas utji uk yatjjatam.

“¿Está Dios en todas partes? ¿Es omnipresente?” (Artículo de jw.org)

Espíritu santojj Diosan amparapäkaspas ukham kunatsa Bibliajj qhanañchi uk yatjjatam.

“¿Qué es el espíritu santo?” (Artículo de jw.org)

Mä juykhu chachajj janis Diosajj jupat llakiskaspa ukhamwa amuyäna. Kunas jan ukham amuyjjañatakejj yanaptʼäna uk yatjjatam.

“Jichhakuchaw mayninakar yanaptʼirista” (Yatiyañataki octubre 1, 2015)