3. Cuerpos sum cuidañasawa

Jehová Diosan munañap lurañ arsuwayapki uka cristianonakajja, Diosan munañaparjamapuniw kuns lurapjje. Jupanakajj mä sacrificior uñtataw cuerpop Diosar loqtapjje, ukatwa wali sum cuidapjjañapa. Romanos 12:1, 2 liytʼasajja aka toqetwa parltʼapjjäta:

• ¿Kunatsa cuerpos sum cuidañasa?

• ¿Kunjamanakatsa cuidassna?

Bibliat yateqkasinjja, jumajj Jehová Diosat waljanakwa yateqawaytajja. Ukatjja kuntï yatjjatawaykta ukarjamajja, inas cambionak lurawayjjaraksta. Ukampis Jehová Diosar vidam katuyasiñatakisa bautisasiñatakisa inas kunas jarkʼaskstam. Aka yatichäwinjja kunjamsa Bibliat yateqerinakajj kunatï bautisasiñatakejj jarkʼkäna ukanakar atipjawayapjje uka toqetwa yatjjatañäni, ukatjja bautisasiñatakejj kunsa jumajj lurarakisma uksa yatjjatarakiñäniwa.

1. ¿Bautisasiñatakejj qhawqsa Bibliat yatiñama?

Bautisasiñatakejja ‘kunatejj cheqäki uk sum uñtʼañamawa’ (1 Timoteo 2:4). Uka arunakajja, kuntï jaqenakajj Bibliat jisktʼasipki ukarojj taqpach qhanañchañamäkaspas ukham janiw sañ munkiti. Kawkïr cristianonakatï walja maranak bautisatäjjapjje ukanakas Bibliat yatjjatasipkakiñapawa (Colosenses 1:9, 10). Ukampis jumajja Biblian wakiskir yatichäwinakapwa sum amuyañama. Jumajj qhawqsa Bibliat yatjjta uk yatiñamatakejja, congregacionankir ancianonakaw yanaptʼapjjätam.

2. ¿Kunanaksa janïr bautisaskasajj lurañama?

Bibliajj akham siwa: “Arrepentisipjjam, kuttʼanjjapjjarakim” sasa (Hechos 3:19 liytʼäta). Janïr bautisaskasajj jumajj ukwa lurañama. ¿Kamsañsa uka arunakajj muni? Kuna juchanaktï nayrajj lurawaykta ukanakat arrepentisiña, ukatjja Jehová Diosar perdón mayisiña sañwa muni. Ukhamarusa kunatï jan walïki ukanak janipun lurañ munaña, Jehová Diosan munañaparjam sarnaqaña sañwa munaraki. Ukatjja tantachäwinakar jan faltasis saraña, congregacionamp chika predicaña sañwa munaraki.

3. ¿Kunatsa bautisasiñ jan ajjsarañamäki?

Yaqhepanakajja ‘kuntï Jehová Diosar arskä uk janiw phoqañ puedkäti’ sasaw ajjsarayasipjje. Cheqas pantjasiñajj utjapuniwa, Biblian uñstki uka chachanakasa warminakas pantjasipjjarakïnwa. Ukampis ak amtañamawa, Jehová Diosajj janiw servirinakapan perfectöpjjañap suykiti (Salmo 103:13, 14 liytʼäta). Jumatï jupatakjam sarnaqañatak chʼamachasïta ukhajja Jehová Diosajj kusisiniwa, ukatjja jupaw yanaptʼaskarakïtam. Janiw kunasa “Diosan munasiñapat apaqkistaspati” sasaw Bibliajj sistu (Romanos 8:38, 39 liytʼäta).

JUKʼAMP YATJJATAÑÄNI

4. Jehová Diosar sum uñtʼam

¿Janïr bautisaskasajj qhawqsa Jehová Diosar uñtʼañama? Diosat taqe kun yatiñajj janiw wakiskapuniti, ukampis yateqatamajja jupar munasiñataki jupar istʼañatakiw jumar yanaptʼañapa. Oraqpachan Bibliat yateqerinakajj kunjamsa uk lurawayapjje uk yatiñatakejja, VIDEO uñtapjjäta. Ukatjja aka toqetwa parltʼapjjäta:

VIDEO: Bautisasiñatak chʼamachasipjjam (3:56)

• Bibliat yateqawayapki ukanakat yaqhepanakarojja, ¿kunas bautisasiñatak yanaptʼawayi?

Romanos 12:2 liytʼasajja aka toqetwa parltʼapjjäta:

• ¿Kuntï Bibliajj yatichki ukat jumajj payachastati? ¿Jehová Diosan Testigonakapajj kunatï cheqäki ukwa yatichapjje sasinti jumajj creyta?

• ¿Jumatï payachassta ukhajj kunsa lurasma?

5. Bautisasiñatakejj kunanakatï jarkʼkiristam ukanakar atipjam

Jehová Diosar jakañ vidas katuyasiñ amttan, bautisasiraktan ukhajja taqeniw jan walinakan uñjastanjja. Ukanakat may yatiñatakejja VIDEO uñtapjjäta. Ukatjja aka toqetwa parltʼapjjäta:

VIDEO: Bautisasiñatakejj Jehová Diosar munasiñaw yanaptʼistaspa (5:22)

• Jehová Diosar serviñatakejja, ¿kunanaksa Narangerel kullakajj luräna?

• ¿Kunjamsa Jehová Diosar munasiñajj uka jan walinakar atipjañatak yanaptʼäna?

Proverbios 29:25 ukat 2 Timoteo 1:7 liytʼasajja aka toqetwa parltʼapjjäta:

• ¿Jan ajjsarasa jan walinakar saykatañatakejj kunanakas yanaptʼistaspa?

6. Jehová Diosaw yanaptʼitani sasin confiyam

Jehová Diosaw jumarojj yanaptʼaskätam. VIDEO uñtasajja aka toqetwa parltʼapjjäta:

VIDEO: Jehová Diosaw yanapaskätam (2:50)

• Uñtktan uka videonjja, ¿kunatsa Bibliat yateqerejj bautisasiñ ajjsarayasïna?

• ¿Jehová Diosar jukʼamp confiyañatakejj kunas jupar yanaptʼäna?

Isaías 41:10, 13 liytʼasajja aka toqetwa parltʼapjjäta:

• Jehová Diosar vidam katuyasiñ arskta uka promesjja phoqasmawa, ¿kunas uka toqet jan payachasiñatak yanaptʼiristam?

7. Jehová Diosar munasiñapat yuspäram

Jehová Diosajj qhawqsa munastam uka toqet lupʼïta ukhajja, jupar yuspärañsa wiñayatak jupar serviñsa wal munäta. Salmo 40:5 liytʼasajja aka toqetwa parltʼapjjäta:

• ¿Jehová Diosajj churktam uka regalonakat kawkïris jumatakejj jukʼamp valoranejja?

Jeremías profetajja Jehová Diosarusa arunakaparus wal munasïna, Jehová Diosan sutipjjar parlañsa wali valoranitwa uñjarakïna. Jeremiasajj akham sänwa: “Arunakamasti wali kusisiñaruw tukjjaraki, chuymajan wali kusisiñaparu, kuna laykutejj nayajj juman sutim apta, ejercitonakan Jehová Diosapa” sasa (Jeremías 15:16). Jichhajj aka jisktʼanakar qhanañchañäni:

• ¿Kunatsa Jehová Diosan Testigopäñajj wali askejja?

• ¿Jehová Diosan Testigopäñatak bautisasiñ munasmati?

• ¿Kunas bautisasiñatakejj jumar jarkʼasktam?

• ¿Kunsa jumajj bautisasiñatak lurasma?

¿KUNSA YATEQAWAYTAN?

Jehová Diosan yanaptʼapampejja, kunatï bautisasiñatak jarkʼtam ukarojj atipjasmawa.

Amtañataki

• ¿Bautisasiñatakejj qhawqsa Bibliat yatiñama?

• ¿Kunanaksa janïr bautisaskasajj lurañama?

• ¿Kunatsa bautisasiñ jan ajjsarayasiñamäki?

JUKʼAMP YATJJATAÑAMATAKI

Kunatsa maynejj bautisasiñ amtañapa uk yatjjatam.

“¿Bautisasiñatakejj wakichatäjjtati?” (Yatiyañataki marzo 2020)

Bautisasiñatakejj kunanakas maynir jarkʼaspa, kunjamsa ukanakarojj atipjaspa uk yatjjatam.

“¿Kunarak nayan bautisasiñajatak jarkʼitaspasti?” (Yatiyañataki marzo 2019)

Bautisasiñatakejj kuna cambionaksa mä chachajj lurawayi uk videon uñtam.

¿Bautisasiñamatakejj kunas jarkʼasktamjja? (1:10)

Qalltanjja Ataa sat chachajj bautisasiñ payachasïnwa, ukampis bautisasiñatakejj kunas yanaptʼawayi uk videon uñtam.

Bautisasiñajj mä jachʼa privilegiowa (7:21)