¿Kunjamatsa kusisit familianïsma? (mayïri)

Jichhak casaratanakajja, casarasipkäna uka urojj kunja kusisitäpjjänsa ukham kusisit jakasiñwa munapjje. Cheqas ukham jakasipjjaspawa. Walja maranak casaratäjjapjje uka cristianonakaw ukhamätap yatipjje, jupanakajj Biblian ewjjtʼanakaparjam sarnaqañatakiw chʼamachasiwayapjje.

1. ¿Kunsa Bibliajj esposonakar ewjjtʼi?

Jehová Diosaw esposorojj familia pʼeqtʼañapatak uttʼayi (Efesios 5:23 liytʼäta). Ukatwa familiar yanaptʼkiri suma amtanakar puriñap muni. Bibliajja esposonakarojj akham siwa: “Warminakamarojj munasisipkakim” sasa (Efesios 5:25). ¿Kamsañsa ukajj muni? Esposapar munaski uka esposojja, panipäpki ukhasa yaqhanakampïpki ukhas wali munasiñampiw uñji. Jupajja esposaparojj jan walinakat jarkʼaqewa, kusisitäñapatakis yanaptʼarakiwa, ukatjja kunanaktï necesitki ukanaks churarakiwa (1 Timoteo 5:8). Diosar jakʼachasiñatakejj kunatï esposapar yanaptʼkaspa uk lurañatakiw jukʼamp chʼamachasi (Mateo 4:4). Amuytʼañataki, esposojj esposapampiw oraspa, jan ukajj panipaw Biblia liyipjjaspa. Mä esposotï esposapar munasiñamp uñjani ukhajja, Jehová Diosampejj sumwa apasini (1 Pedro 3:7 liytʼäta).

2. ¿Kunsa Bibliajj esposanakar ewjjtʼi?

Diosan Arupajja esposajj ‘chachaparojj wali respetompiw uñjañapa’ siwa (Efesios 5:33). ¿Kunjamsa mä esposajj ukarjam luraspa? Jupajja esposopajj kunja suma chuymanisa, jupar uñjañatakisa wawanakapar uñjañatakis qhawqsa chʼamachasi uka toqenakatwa amuytʼaspa. Ukatjja akanak lurasaw esposopar respetatap uñachtʼayaspa: kuntï esposopajj amtkani ukar yanaptʼasa, munasiñamp parlasa, mayninakampïsajj esposopat sum parlasa. Diosar jan adoriri esposonïkasas ukanakwa mä esposajj lurañapa.

3. ¿Kunjamsa casadonakajj jukʼamp sum apasipjjaspa?

Casarat chacha warminakatjja, Bibliajj akham siwa: “Panipasti mä jañchikëjjapjjaniwa” sasa (Mateo 19:5). ¿Kamsañsa uka arunakajj muni? Casaratäpki ukanakajja, kunatï esposapatsa jan ukajj esposopatsa jitheqtaykaspa ukanak jan lurañatakiw chʼamachasipjje. Ukatwa juntöñatakejj tiempo apstʼasipjjapuni, kunsa amuyapjje kunjamas jikjjatasipjje uk jan imtʼasaw munasiñamp qhan parltʼasipjjaraki. Casadonakatakejj janiw kunasa ni khitisa esposopat sipansa, jan ukajj esposapat sipans jukʼamp importantëñapäkiti, Jehová Diosakiw jukʼamp importantëñapa. Ukatjja jupanakajj janirakiw yaqhanakamp sinti amigöñ thaqapjjañapäkiti.

JUKʼAMP YATJJATAÑÄNI

4. Esposo, esposamarojj munasim sum cuidarakim

VIDEO: Chachanaka, warminakamarojj juma pachparjam munasipjjam (9:53)

• ¿Mä esposojj kunjamanakatsa esposapar munasitapsa sum uñjatapsa uñachtʼayaspa?

Colosenses 3:12 liytʼasajja aka toqetwa parltʼapjjäta:

• ¿Kunjamsa mä esposojj matrimoniopan uka textorjam sarnaqaspa?

5. Esposa, esposomarojj munasim respetomp uñjarakim

Mä warmin esposopajj Jehová Diosar sirvchisa janisa, Bibliajj esposopar respetañapatakiw esposanakar ewjjtʼi. 1 Pedro 3:1, 2 liytʼasajja aka toqetwa parltʼapjjäta:

• Esposomatï Jehová Diosar jan adorkchi ukhajja, Diosar adorañapwa munarakpachätajja. ¿Kunjamsa esposomarojj yanaptʼasma? ¿Juparojj sapa ratut predicañamäspa, jan ukajj munasiñampi respetomp jupar uñjasach yanaptʼasma? ¿Kunatsa ukham amuyta?

Esposompi esposampejja panpachanejj suma amtanakaruw puripjjaspa. Ukampis kuntï esposopajj amtki ukajja, janiw esposapatakejj waljamäkaspati. Ukhamäni ukhajja, esposajj kuntï amuyki ukjja esposoparojj respetompi suma arunakampiw sañapa. Ukatjja akwa amtañaparaki, kunatï familiapatak walïkaspa uk amtañapatakejja Jehová Diosajj esposonakaruw ajlliwayi. Maysa toqetjja, kuntï esposopajj amtki ukar yanaptʼañapatakiw chʼamachasiñaparaki. Taqe ukanak lurasajja, mä esposajj familiapan kusisit jakasiñapatakiw yanaptʼani. 1 Pedro 3:3-5 liytʼasajja aka toqetwa parltʼapjjäta:

• Kunapachatï mä esposajj esposopar respetki ukhajja, ¿kunjamas Jehová Diosajj jikjjatasi?

6. Matrimonion jan waltʼäwinakajj utjki ukanakajj askichasispawa

VIDEO: ¿Kunas chacha warminakarojj sum apasipjjañapatak yanaptʼaspa? (5:44)

• Uñtktan uka videonjja, ¿kunjamsa mä chacha warmejj jukʼat jukʼat jan sum apasjjapjjäna?

• ¿Kunsa matrimoniopan sum jakasiñatakejj lurapjjäna?

1 Corintios 10:24 ukat Colosenses 3:13 liytʼapjjäta. Ukatjja sapa texto liytʼasajj aka toqetwa parltʼapjjäta:

• ¿Kunatsa matrimonionakajj uka textorjam sarnaqasajj jukʼamp sum jakasipjje?

Bibliajja maynit maynikam respetasiñasatakiw chʼamañchtʼistu, mä arunjja mayninakarojj munasiñampiw uñjañasa. Romanos 12:10 liytʼasajja aka toqetwa parltʼapjjäta:

• ¿Maynejj esposopana jan ukajj esposapan jupar nayraqat respetañapti suyañapa? ¿Kunatsa ukham amuyta?

¿KUNSA YATEQAWAYTAN?

Casado chacha warminakatï munasipjjani, respetasipjjani, Biblian wiñay yatichäwinakaparjamas sarnaqapjjarakini ukhajja, jupanakajj kusisitaw jakasipjjani.

Amtañataki

• Matrimoniopan jukʼamp kusisit jakasipjjañapatakejja, ¿kunjamsa esposonakajj yanaptʼapjjaspa?

• Matrimoniopan jukʼamp kusisit jakasipjjañapatakejja, ¿kunjamsa esposanakajj yanaptʼapjjaspa?

• Jumatï casadösta ukhajja, ¿Biblian kawkïr wiñay yatichäwipas matrimonioman yanaptʼiristam?

JUKʼAMP YATJJATAÑAMATAKI

Kusisit familianïñatakejja, Biblian kawkïr ewjjtʼanakapas yanaptʼiristam uk yatjjatam.

Familiamajj kusisitaw jakasispa (Folleto)

Casadonakatï Diosan ewjjtʼanakaparjam sarnaqapjjaspa ukhajja, kuna bendicionanakas utjaspa uk yatiñatakejj musican video uñtäta.

Cheqpach munasiña (4:26)

Esposorojj familia pʼeqtʼirïtap laykojj respetañasawa, kunatsa ukham sistan uk yatjjatam.

“¿Kunatsa warmejj pʼeqtʼiripar istʼañapa?” (Yatiyañataki mayo 15, 2010)

Mä chacha warmejj kunjamsa jan walinakar saykatapjjäna uk videon uñtam.

Jehová Diosan yanaptʼapampiw chacha warmjam sum jakasjjapjjayäta (5:14)