Oraqen jan waltʼäwinakapa: ¿Diosan jan sinttʼasirïtapti uñachtʼayi?

YAQHEPANAKAJJ AKHAM SAPJJE: “Diosaw jan waltʼäwinak utjayi, kunattejj Jupaw akapach apnaqe, ukhamajj janiw sinttʼasirïkiti” sasa.

BIBLIAJJ AKHAM SIWA: ‘Taqe aka oraqpachajj Supayan munañapankiwa’ sasa (1 Juan 5:19). Ukarjamajja, akapachajj jupan amparapankiwa (Mateo 13:19; Marcos 4:15). ¿Ukajj cheqäpachati? Amuytʼañataki, Supayajj akapachjjarojj chʼamaniwa, ukatwa jaqenakar jupjam jan sintʼasirïñataki, jupatakik kuns munirïñataki ukat jan sum amuytʼasirïñatak wiyti. Taqe ukanakaw kunatsa jaqenakajj akapach jan wal apnaqasipki uk sum amuyayistu. Ukat walja yatjjattʼatanakas akham sapjjarakiwa: “Ukham jan wal apnaqapjjatapaw akapacharojj jukʼamp jan waltʼayaski jan ukajj jukʼamp aynachtʼayaski” sasa.

Ukhamajj ¿kunatsa jan waltʼäwinakajj utjpacha? Uk sum yatjjatañatakejj Adán ukat Evan tiemponakapan kunanakas pasäna uk yatjjatañaw wakisispa. Jupanakajj Dios contraw saytʼasipjjäna, ukat janiw Jupan apnaqatañs munapkänti, ukhat jichhakamajj niya taqpach jaqenakaw ukham lurjjapjje. Ukham lurasajj Diosan uñisirip toqew saytʼasipjje, mä arunjja, Supay toqe. Ukatwa Jesusajj Supayar akham säna: ‘Akapach apnaqeri’ sasa (Juan 14:30). Ukampis janiw wiñayatak apnaqkaniti.

Supayajj jaqenakar wal tʼaqhesiyi, ukampis Jehováa Diosajj taqe ukanak uñjasajj janiw ukhamak uñchʼukkiti. Amuytʼañataki, kunjamsa Diosajj jikjjatasïna kunaratutï Israel markajj tʼaqheskäna uk Bibliajj akham siwa: ‘Tatitojj ayqopjjatap uñtanïnwa, ukat arnaqasitanakaparusti istʼarakïnwa’ sasa (Salmo 106:44). Diosajj khuyaptʼayasirïtapatwa akapach apnaqer Supayar jan mayampitak tukjani. Ukat Jesucristo Yoqaparuw reyiñapatak uttʼayawayaraki.

KUNATSA UK YATIÑASAJJA: Supayajj janiw jaqenakar jan waltʼäwinakat jarkʼaqawaykiti, ukampis Jesusajj jarkʼaqaniwa. Amtañäni, aka Oraqenkkäna ukhajj mä jan waltʼäwitwa arkirinakapar qhespiyäna. Uka toqet Bibliajj akham qhanañchi: ‘Qotarusti sarakïnwa: ¡Amuktʼam! ¡Tʼakurarakim! sasa. Thayasti tʼakurjjänwa, mathapinakasti chhaqtawayjjarakïnwa’. Ukat arkirinakapajj akham sapjjarakïna: “¿Khitirakïpach akasti? ¡Juparojj thayas qotas jaysakirakisä!” sasa (Marcos 4:37-41). Ukhamajj Jesusajj apnaqkani ukhajja, Diosar taqe chuyma istʼir jaqenakaruw jan waltʼäwinakat jarkʼaqani uka toqet janipuniw pächasiñasäkiti (Daniel 7:13, 14).