Diosan luqtiripäpxañapatak wawanakamar yatichapxam
1. Salmo 148:12, 13 qillqatan siski ukarjamaxa, ¿kunsa awk taykanakax lurapxi?
1 Jehová Diosax wawanakaruw Jupar yupaychapxañapatak invittʼi (Sal. 148:12, 13). Ukatwa awk tayakanakax wawanakaparux janiw Biblian chiqa yatichäwinakapaki ukat Diosan kamachinakaparjam sarnaqañak yatichapkiti, jan ukasti Diosan arunakap yatiyapxañapatakiw yatichapxaraki. ¿Kunjamsa jukʼat jukʼat yatichapxaspa?
2. ¿Kunsa wawanakax awk taykapar uñjasax yatiqasipxaspa?
2 Luratanakapampiw yatichapxañapa. Gedeón taripirix akham sasaw 300 soldadonakapar säna: “Uñjapxita kunjamtix nayax lurkä uka” sasa (Jue. 7:17). Chiqas wawanakax awk taykapar uñjasapuniw yatiqasipxi. Mä jilataxa arumanakaw irnaqi, ukampis sábado alwax wali qaritäkchisa ukat utapar ikiñataki kuttañat sipansa, wawanakaparuw yatiyir sarañatak irpawayi. Uk lurasaxa, jan kun kamskasaw kunja wakiskiris yatiyir sarañax uk wawanakapar yatichaski (Mat. 6:33). ¿Diosar yupaychañ tuqit luräwinakanxa wali kusisit irnaqirti wawanakamax uñjapxtam, sañäni: Diosar mayiskasa, Biblia liyisa, tantachäwinakan arstʼasa ukat yatiyir sarasasa? Ukhamächi ukhaxa, wali sumwa luratanakamamp yatichaskta. Ukat Diosar luqtañatak chʼamachasitamat uñjapxani ukhaxa, kuntï yatichasipkta uk taqi chuymarakiw phuqapxani (Deu. 6:6, 7; Rom. 2:21, 22).
3. ¿Diosar yupaychañ tuqitx kun lurapxañapatakis awk taykanakax wawanakapar chʼamañchtʼapxañapa ukat kunjamsa yanaptʼapxaspa?
3 Jukʼamp chʼamañchtʼasipxañapataki. Awk taykanakaxa, wawanakaparux sarnaqaña ukat parlañ yatichañ janiw qaripkiti, ukat isisiñsa yatiqapxañapkamaw yatichapxi. Ukat kun lurañsa yatiqapxi ukhaxa, yaqhanak lurapxañapatakiw amtapxi. Ukat cristianüpxchi ukhaxa, qhawqha maranïpxis ukarjamaw Diosar jukʼamp luqtañapatak chamañchtʼapxi (1 Cor. 9:26). ¿Tantachäwinakan pachpa arunakapampi arstʼapxañapataki ukat Yatiyañataki Diosan Yatichäwipa sat tantachäwin arstʼäwip sapak waktʼayasipxañapatak yatichasipktati? (Sal. 35:18.) ¿Diosar yupaychañ tuqit luräwinakan yanaptʼapxañapatak yatichasipktati? ¿Bautisasipxañapataki ukat Diosatak sapür irnaqtʼapxañapatak chʼamañchtʼapxtati? ¿Kusisita ukat taqi chuyma Diosatak irnaqtʼapxi ukat ukham irnaqtʼapxañapatak wawanakamar chʼamañchtʼapxaspa uka jilat kullakanakamp parlapxañapatak kunsa lurasipkta? (Pro. 13:20.)
4. ¿Awk taykax Diosar luqtapxañapatakt jiskʼatpach yatichapxi ukhax kuna askinaksa wawanakax katuqapxi?
4 Salmonak qillqirix akham sasaw satayna: “Diosaxay, wayna kankañaxatpach yatichasista, nayasti jichhürkamaw muspharkañ luratanakamat yatiyaskta” sasa (Sal. 71:17). Jehová Diosan luqtiripäpxañapatak jiskʼatpach yatichapxam. Ukat kuntï Diosar yupaychañ tuqit jiskʼatpacha yatichätaxa, jilïriñapkamaw yanaptʼani (Pro. 22:6).