[258 janan recuadropa/fotonakapa]

¿Janit yaqha música istʼañax askïkaspa?

Niya phisqa maranïkasax janikiw walja kasta manqʼanak munirïkpachätati, ukampis jichhax janiw ukhamäxiti. ¿Kunatsa ukhamäpacha? Yaqha kasta manqʼanak malltʼasax ukanakwa munxtaxa. Musicampix niya ukhamarakïspawa. Mä kasta musicanak istʼañat sipansa, yaqha kastanakwa istʼarakisma.

Ukatakix música tukañ yatiqañaw yanaptʼiristamxa. Ukhamatwa jan uñtʼatäki uka musicanaksa jikxatarakisma, ukax jumataki wali askirakïspawa. Ukampis inas akham sischisma: “Janiw tiempox utjkiti, ¿kawkitsa apsüxa?” sasa. Inas televisión jan ukax anatañ videonak armañax wakischispa, ukhamatwa tiempo apsusisma. Yaqhip wayn tawaqunakax akham sapxiwa, uka tuqit amuytʼañäni.

“Nayatakix música tukañax wali kusiskañawa; ukhamat amuyunakam uñachtʼayañax wali askiwa. Ukat jan uñtʼat musicanak tukañ yatiqta, jichhax yaqha kasta musicanak istʼañ jan ukax tukañ munaraktxa.” (Brian, 18 maraniwa, jupax guitarra, batería ukat piano tukañ yati.)

“Maynix kun sum tukañ munasas wal yatsuñapawa. Chiqansa wali chʼamäspawa. Ukampis sum tukxta ukhaxa wali kusiskañawa.” (Jimena, 13 maraniwa, jupax violin tukañ yati.)

“Awisax llakit jikxataskta ukhaxa, guitarra tukañaw yanaptʼitu. Chuym qhanartʼayir suma musicanak tukañax wali askiwa.” (Vanesa, 20 maraniwa, jupax guitarrampi, pianompi ukat clarinetempi tukañ yati.)

“‘Nayax janipuniw jupjam jan ukax khayjam sum tukañ yatiqkäti’ sirïtwa. Ukampis yatiqañkamaw chʼamachasta. Ukat jichhax mä tonada sum tuktʼasax janiw sumaki jikxataskti, jan ukasti khitinakatix sum tukapki ukanakatxa wal muspharta.” (Jacob, 20 maraniwa, jupax guitarra tukañ yati.)

Yatiqaskañ sarnaqäwinaka: David

Davitax janiw musicxa aliqaki ischʼukirïkänti, jan ukasti jupaw suma musicanak tukañsa machaqat apsuñsa yatïna. Ukat juparakiw música tukañanaksa lurasirïna (2 Crónicas 7:6). Jupax wali sum tukirïna, ukatwa Israel markan reyipax ‘nayatak tukarapita’ sänxa (1 Samuel 16:15-23). Iyaw sasaw Davitax saräna, ukampis wali suma musicanak tukasax janiw jachʼa jachʼa tukkänti, ukat janirakiw musicampis apnaqayaskänti. Jan ukasti Diosaruw jachʼañchäna.

¿Jumax música istʼañsa tukañsa walt munarakta? Inas Davitjam sum tukañxa jan yatkstati, ukampis jupat yatiqasiñamawa. Janiw musicxa jakäwiman nayraqatar uchañamäkiti. Ukat janirakiw jan walinaksa lurañamäkiti ni amuyasiñamäkisa, Diosan sutipwa jan walit uñjayasma. Chiqansa jakäwin kusistʼañatakiw sum musicanak tuktʼasma. Suma music tuktʼañasa machaqat apsuñasa Diosan mä aski churäwipawa (Santiago 1:17). Davitax ukhamatwa Jehová Diosar kusisiyarakïna. ¿Jumax ukhamti lurarakïta?