28 YATICHÄWI

Yuqall (imill) masijatak lupʼisktxa, ¿kamachiristsa?

“Waynituskayäta ukhaxa, waynit masinakajat lupʼiñakiw pʼiqijaru jutaskiri. Ukampis janiw ukax walïkaspati sasaw amuyasirakirïta.” (Óscar)

“Mä amigajampix pä kutjamaw jampʼatisipxta, ukampis yuqallanakax gustaskarakituwa, ukatwa (bisexual) chachar warmir munirïpachätcha sas amuyayäta.” (Sara)

CHACHAPURA warmipura sarnaqañat parlañxa nayrapachax wal axsarayasipxirïna, ukampis jichha tiempon janiw ukhamäxiti. Ukham sarnaqäw contra parlirinakarux yamas jiskʼachapxiwa. Niya taqiniw jupa contrax saytʼapxaspa. Amy sat 16 marani tawaqitax siwa: “Chachapura warmipura sarnaqapxi ukax janiw nayatakix akchʼas walïkiti, ukatwa mä kutix mä tawaq masijax akham sas jisktʼitu: ‘¿ukhamarakti yaqha kasta jañchininakarux jiskʼachta?’ sasa.

Munañapar sarnaqañ munir jaqinaka taypinwa jakastanxa, ukatwa walja wayn tawaqunakax chachapura warmipura sarnaqañanakarux mitisipxi. Beatriz sat 15 marani tawaqitax siwa: “Yatiqir masinakajatxa, yaqhip tawaqunakax ‘tawaq masinakajampiw sarnaqapxta’ sapxiwa; yaqhipanakasti ‘chachampiraki warmimpirakiw sarnaqapxta’ sapxarakiwa, ukat yaqhanakax ‘khitimpïpas’ sapxarakiwa”. Kawkïr yatiqañ utantï Cristina sat 18 marani tawaqux yatiqaski ukanxa niya ukhamarakikiw pasatayna: “Pä tawaq masijaw ‘nayampiskañäni’ sas situ. Ukat maynix ‘mä imill masimamp sarnaqañax kunjamäpachas uk yatiñ munasmati’ sasin mä qillqata churitu” siw Cristinaxa.

Ukham amuyunak jichha tiempon utjxatap laykuxa, inas akham lupʼsta: “¿Juchäskapunpachati? Yuqall masijatakwa lupʼiskta jan ukax imill masijatakwa lupʼiskta, ¿kamachäsa? ¿Homosexual sapkis uka jan wali jaqïpachätti?”.

Chachapura warmipura wachuq jucha lurañatxa, ¿Diosax kamsisa?

Jichhürunakanxa, walja jaqinakampi kʼari yupaychäwi irpirinakampiwa ukham sarnaqañax walikïskaspas ukham amuyapxi. Ukampis Bibliax qhanwa uka tuqit parli. Kunapachatix Diosax chachampi warmimpiru aka Uraqir uskkäna ukhaxa, chacha warmikiw wawanïñatakix chikthapipxañapa sasaw säna (Génesis 1:27, 28; 2:24). Ukhamasti, qhanäskiwa, Bibliarjamax chachapura warmipura wachuq juchan sarnaqañaxa jachʼa juchawa (Romanos 1:26, 27).

Bibliax janiw jichha tiempotakïxiti sasaw yaqhip jaqinakax sapxi. Ukampis ¿kunatsa ukham amuyapxpacha? ¿Munañaparjam lurañ laykukich ukham parlapxpacha? Walja jaqinakatakixa, Diosan arunakapax janiw amuyunakaparjamäkiti ukatwa Bibliarux jan yäqapkiti. Ukampis jiwasax janiw ukham jan suma amuytʼäwinakampix apayasiñasäkiti.

Yuqall jan ukax imill masimatak lupʼiskasma ukhaxa, ¿kamachasmasa? ¿Homosexual sapkis ukham jan wali jaqïxpachätati? Janiwa. Kunapachatï tawaqur munañas waynar munañas ukat chacha warmjam sarnaqañ munañas walpun jilxataski uka tiemponktawa uk amtañama, ukapachax akatjamatakwa ukham amuyunakax pʼiqir jutaspa. Yuqall jan ukax imill masimat lupʼiñ jutstamxa, janiw homosexual sapkis uka jan wali jaqïktati. Ukham amuyunakax tiempompix chhaqxaniwa. Ukañkamasti, sumwa amuytʼasiñama, janiw uka jan wali munañanakampix atipjayasiñamäkiti. Uka jachʼa juchar jan purtʼasiñamatakixa, ¿kamachasmasa?

Jehová Diosaruw yanap mayisiñama. Davitax akham sasaw mayisïna: “Diosay, uñakipitaya, chuymaxar uñantam, nayarux yantʼitaya, lupʼitanakax uñtʼarakim, nayatix ñanqha thakin sarnaqiristxa, chiqa thakinjamay irpasita” sasa (Salmo 139:23, 24). Ukham mayisïta ukhaxa, Jehová Diosax chʼam churätam ukat “samarañapa” churarakïtamxa, uka samarañax taqi amuyunakaruw atipi ukaw ‘chuymamsa, amuyumsa imani’. Ukhamatwa, Diosan ‘jachʼa chʼamapampix’ jan wali amuyunakamxa atipjäta (Filipenses 4:6, 7; 2 Corintios 4:7).

Jan wali amuyunakxa pʼiqimat apsuñamawa (Filipenses 4:8). ¿Kunjamatsa? Sapüru Biblia liyisa. Qullan Qillqatanakax amuyumarusa chuymamarusa walpun yanaptʼaspaxa, uk jan jiskʼachamti (Hebreos 4:12). Raúl sat mä waynax akham siwa: “Jan wali amuyunak jutitu ukhaxa, akïr qillqatanakwa liytʼta, 1 Corintios 6:9, 10 ukat Efesios 5:3, Diosan Arupax wali chʼamanïskapuniwa”.

Janipun pornografía satäkis ukanak uñtamti, janirak chachapura warmipura sarnaqañ tuqit parlirinakarus istʼamti (Colosenses 3:5). Jan walinak amtayirinakatxa jarkʼaqasiñamapuniwa. Sañäni, pornografía satäki ukanakxa janipuniw uñtañamäkisa ni uñañamäkisa, yaqhip peliculanakatsa ukat televisionan uñstki ukanakatsa amuyasiñamawa, ukatxa moda tuqit parlir revistanakansa ukat ejercicio lurir jaqinakat parlki uka revistanakansa jukʼa isin jaqinakaw utji ukanakatsa amuyasiñamarakiwa. Qʼañu amtanakxa pʼiqimat apsum ukat suma amuyunak lupʼma. Mä waynitux siwa: “Yuqall masijat lupʼiña pʼiqir jutitu ukhaxa, Biblian kawkïr qillqatatix nayatak sumäki uka tuqitwa lupʼta” sasa.

Yaqhipanakax sapxakispawa: “Janiw askïkiti uka iwxanakaxa, maynix ukham amuyunakanïchi ukhaxa, kamacharakispasti, chuymaparukiw istʼxañapa” sasa. Ukampis jan wali amuyunakampix janiw atipayasiñamäkiti siw Bibliaxa. Nayrïr cristianonakax jakapkäna uka tiemponxa, chachapura warmipura sarnaqiri jaqinakaxa, jan wali jakäwinakapxa apanukxapxänwa ukat cristiano tamaruw makatxapxäna (1 Corintios 6:9-11). Jumax jupanakjam atiparakismawa. Jan payachasimti, chuymaman munañaparux atipätawa.

Yuqall jan ukax imill masim munañax jan saraqkstam ukhaxa, ¿kamachasmasa? ¿Kunas juchaxa? Chachapura jan ukax warmipura sarnaqasma ukaw jachʼa juchaxa. Ukhamax jan ukar purimti. Khititix taqi chuyma jan ukham sarnaqañataki amtki ukaxa atipjaspawa.

Akham uka tuqit amuytʼañäni. Mä jaqix nuwasiñ munir chuymanïspaw jan ukax ‘mäki kunatsa colerasirïspawa’ (Proverbios 29:22). Nayrax Bibliat janïr yatiqkasaxa, mä jukʼa chuym ustʼayatax jankʼakisa qhuruchasirïchïnxa, ukampis jichhax janiw ukhamañapäxiti ukwa yatiqawayxi. Ukampis ¿janipuniw mä jukʼas colerasiñapax utjxaniti sasat sisna? Janiwa. Awisax colerasispawa, ukampis qhuruchasiñanakatsa nuwasiñanakatsa Jehová Diosax kamsis uk yatisax jan chuymapamp atipayasiñatakix chʼamachtʼasiskakiniwa.

Nayrax chachapur warmipur sarnaqañ amuyunakanïchïnsa, jichhax Biblian yatichäwinakapat yatiqxchi uka jaqinakarux niya ukhamarakiw pasaspa. Inas awisax ukham amuyunakax pʼiqipar jutchispa. Ukampis Jehová Diosax kamsis uka tuqit uk yatiñaw ukham amuyunakar atipañ yanaptʼani.

¡Chʼamachasiskakma!

Inas aka waynitjam jikxataschisma: “Amuyunakaj mayjtʼayañatakiw wal chʼamachasta; Jehová Diosarux mayisiraktwa; uka tuqit parlir walja arstʼäwinakwa istʼarakta, ukat Diosan Arupsa liyiraktwa. Janiw kunamp lurañs yatxti” siwa.

Jumax ukham jikxatassta ukhax chiqansa ukham amuyunakar atipañax wali chʼamäniwa. Ukampis Diosampi sumankañ munasaxa, mayitanakaparuw phuqañama ukat wali chʼamäkchisa, jan wali sarnaqäwinakar jan puriñatakix chʼamachasiñamawa. Jan armasimti, chʼamachasitamatxa Jehová Diosax yatiwa, ukat jupar munasirinakarux khuyaptʼayiwa (1 Juan 3:19, 20).a Jupar istʼäta ukhax bendicïtamwa. Chiqpachansa, khitinakatï kamachinakapar istʼi ukhaxa, walja “askinakwa” jikxatani (Salmo 19:11). Kunayman jan walinakan phuqantat akapachansa, kusisitaw jakasirakisma.

Ukhamasti, Jehová Diosar atinisim ukat jan wali amuyunak contrax saytʼasiskakma (Gálatas 6:9). Biblian aka suma iwxtʼapar phuqañatak chʼamachasim: “Jan wali lurañanakarusti uñisipxarakim, sumäkis ukrak lurapxam” sasa (Romanos 12:9). Chʼamachasiskakïta ukhax jan wali munañanakax pasawayxaniwa. Jumatix jan wali amuyunak contra wal saytʼasïta ukhaxa, Diosan jutïrpachapanwa wiñayataki jakasïta.

[Qhanañchäwi]

BIBLIAX KAMSISA

“Nayarux yantʼitaya, lupʼitanakax uñtʼarakim, nayatix ñanqha thakin sarnaqirïstxa, chiqa thakinjamay irpasita.” (Salmo 139:23, 24)

AKHAM LURASMAXA

Kunjamäñapas mä chachax uk amuytʼañatakixa, Jesusan sarnaqäwipat yatxattʼma (1 Pedro 2:21). Jupax chʼamani ukat munasiri ukhamänwa.

¿YATIYÄTATI?

Inas jan wali amuyunakax jan pʼiqit chhaqtayañjamäkchispati, ukampis jan uka amuyunakamarjam lurañatakix chʼamachtʼasismawa.

¡AKANAK LURÄ!

Chachapura warmipura sarnaqañaruxa, ¿kunatsa Bibliax juchaw sixa? sasin jisktʼapxitani ukhaxa, akham säwa: ․․․․․

Bibliax sintiw jarkʼi sasin maynix saspa ukhaxa, akham sasaw amuytʼayirista: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● ¿Kunatsa Bibliax chachapura warmipur chikañarux juchaw sispachaxa?

● ¿Ukham sarnaqäwinakar jan puriñatakix kunanaks lurasma?

● Kunjamtï Diosax chachapura warmipura sarnaqañarux uñjki ukham jumax uñjaraksta ukhaxa, ¿uka jaqinakarux uñistawa sañt munpacha?

[236 janan qhanañchäwipa]

“Aka ñanqha pachax jan wali amuyañanakaruw puriyitu, imilljamat yuqalljamacha sarnaqäx uksa pantjasiyituwa. Jichhax warmipura sarnaqäwinakar wiytir jaqinakarusa ukat kunanakatix uka tuqir wiytki ukanaksa apanukxtwa.” (Ana)

[233 janan fotopa]

Chacha warmi sarnaqañ tuqixa, akapachan jan wali amuyunakapampiti apayasipxani jan ukax Diosan Arupan jikxataski uka aski mayitanakarjamach sarnaqapxani ukxa sum wayn tawaqunakaxa amtapxañapa