LECCIÓN 2

Kunjamtï parlasktan ukham parltʼaña

2 Corintios 2:17

¿KUNSA LURAÑAMA? Kunjamtï sapür parlasktan ukhamwa parltʼañama (jan ukajj natural parltʼañama), chuymatpachwa parltʼañamaraki.

Jehová Diosar mayisim, sum wakichtʼasirakim. Parlkäta uka toqet sum arstʼañatakejja, Diosaruw yanaptʼa mayisiñama. Kuna wakiskir yatichäwinaksa qhanstayañ munta uk sumwa amuyañamaraki. Janiw kunjamtï mä qellqatan uñstki uka pachpa arunak sañamäkiti, jan ukasti arunakamarjamaw parltʼañama.

Bibliata jan ukajj yaqha qellqatat liytʼkäta ukhajja, kuna toqetsa parli uk sum yatjjatañatakiw chʼamachasiñama, ukhamat sum liytʼañamataki. Kuntï mä jaqejj siskäna uk liytʼkäta ukhajja, kunjamtï jaqenakajj parlapki ukhamwa liytʼañama, taqe chuymaw liytʼañamaraki.
Chuymatpach parltʼam. Kunatsa istʼirinakan uka toqet yatipjjañapajj wakisi ukwa lupʼiñama. Ukhamtï lurätajja, kunjamtï saytʼaskta ukansa, uñnaqamansa, amparanakamp parlatamansa taqe chuyma parlatamaw amuyasini.

Kunjamtï parlaskta ukhamwa parltʼañama, ukampis respetompiw parlañama. Kuna toqettï parlkäta ukar respetatam uñachtʼayañatakejja, sumwa parlañama, kunjamtï arunakajj arsusiñapäki ukhamwa parlañamaraki.
Istʼirinakar uñtam. Parlkäta ukhajja, istʼirinakarojj uñttʼañamawa. Arstʼkäta ukhajja, taqenir mayak uñtañat sipansa, mayniru ukat mayniruraki ukhamwa uñttʼañama.