Noé chachajj mä arca luräna

Tiempompejja jaqenakajj oraqen wal mirantjjäna. Jilapartejj jan wali jaqenakäpjjänwa. Yaqhep angelanakas jan walinakwa lurapjjäna. Alajjpachatwa aka oraqer saraqanipjjäna. ¿Kunatakis saraqanipjjpachäna? Jaqer tukusin warminakamp casarasiñatakiw saraqanipjjäna.

Angelanakan wawanakapajj wali chʼamani, nuwasiri ukhamaw jilsupjjäna, jaqenakarus jan walinak lurapjjäna. Jehová Diosajj janiw ukhamak uñchʼukkänti. Ukatwa jan wali jaqenakar Uma Juiciompi tukjäna, aka oraqe phoqantañkamaw jallojj wal purintäna.

Ukampis Jehová Diosar munasir mä suma jaqew utjäna, Noé satänwa. Jupajj mä esposani kimsa yoqanakanïnwa. Yoqanakapajj Sem, Cam, Jafet satäpjjänwa. Sapa mayniw warminirakïna. Diosajj mä arca lurañapatakiw Noé chachar mayïna, ukasti maderat lurat mä jachʼa cajonar uñtatänwa, umanwa tuyuñaparakïna. Ukhamatwa Noé chachampi familiapampejj Uma Juiciot salvasipjjañapäna. Ukatjja Diosan mayitaparjamajj kunayman animalanakwa salvasipjjañapatakejj uka arcar anantañapäna.

Noé chachajj jankʼakiw uka arca lurañ qalltäna, niya 50 maranakatwa familiapampejj tukuyapjjäna, kunjamtï Jehová Diosajj siskäna ukarjamaw lurapjjarakïna. Ukañkamajja, Noé chachajj Uma Juiciotwa jaqenakar yatiyäna, ukampis janiw khitis istʼañ munkänti.

Arcar mantjjañatak horasajj purinjjänwa. ¿Ukjjarojj kunas pasäna uk yatiñ munasmati?