DIOSAR JAKʼACHASIPJJAM
‘Mayisipkakim, Diosasti churapjjätamwa’
“Tata, oración lurañay yatichtʼapjjeta” sasaw Jesusan arkirinakapat maynïrejj Jesusar säna (Lucas 11:1). Diosampi istʼatäñatakejj kunjamsa Diosar oración mayiñasa uk sum amuytʼayañatakejj pä uñachtʼäwimpiw Jesusajj yatichäna. Ukhamajja, ¿Diosajj mayisitanakasar istʼpachati? Uk sum amuytʼañatakejja, Jesusan qhanañchäwipat yatjjatañajj wali wakiskirïniwa. (Lucas 11:5-13 liytʼäta.)
Nayrïr uñachtʼäwejja, kunjamsa maynejj mayisiñapa uk uñachtʼayi (Lucas 11:5-8). Jesusan uñachtʼäwipan mä visit katoqer chachatwa parli, visitiripajj chika arumaw utapar puri ukat jupar manqʼa wajjtʼañatakejj janiw kunas utjkiti. Visitanitakejj kun wajjtʼañas wali wakiskirïnwa, ukatwa arumpachas amigopan utapar tʼantʼa maytʼasir sari. Amigopajj familiapar jan sartayañ laykojj janiw mistuniñ munkiti. Ukat visit katoqerejj amigopan mistuniñapkamaw punk leqʼeskaki, ukat jan leqʼeskakiñapatakejj kuntï mayki ukwa churaraki.a
¿Kunsa mayisiñ toqet yateqtanjja? Kuntï mayktan uk mayiskakiñasa, thaqaskakiñasa ukat punk leqtʼaskakiñasawa (Lucas 11:9, 10). Uka arunakajj ¿kamsañs muni? ¿Inaki ukat jan istʼasir Diosarus mayisksna ukhamti Jesusajj amuyayañ munaskäna? Janiwa. Antisas rogtʼayasir jaqet sipansa, Jehová Diosajj kuntï Jupar mayktan uk churañ munapunistuwa, ukatakejj iyawsäwimpiw mayiñasa ukat munañaparjamarakiw lurañasa, ukwa uka uñachtʼäwit yateqsna. Cheqas kutin kutin mayiskakiñäni ukhaw iyawsäwinïtas uñachtʼayañäni, ukham mayisinjja, kuntï mayktan uk munapunitasa ukat Diosajj churapunistaniwa sas taqe chuym atinisitaswa uñachtʼaytanjja (Marcos 11:24; 1 Juan 5:14).
Payïr uñachtʼäwinjja, Jehová Diosata khititï ‘mayisitanakar istʼki’ Jupat qhanañchi (Salmo 65:2). Jesusajj akham sasaw qallti: “¿Kawkïr awkich wawaparojj [tʼantʼa mayipanjj mä qal churaspa? ¿Jan ukajj] mä asiru churaspa chawll mayipanjja? ¿Jan ukajj mä alacranch churaspa mä kʼawn mayipanjja?” sasa. Cheqas janiw mä munasir awkejj kunatï wawar usuntaykaspa uk churkaspati. Jesusajj ukat saskakïnwa pantjasirïkasasa: ‘Wawanakamarojj sumanak churirïpjjstajja, ¡qawqha jukʼamps alajjpachankir Awkimajj qollan ajayjja churanejja mayipki ukanakarojja!’ sasa (Lucas 11:11-13; Mateo 7:11).b
Diosajj kuntï Jupar mayktan uk churañ munapunistuwa, ukatakejj iyawsäwimpiw mayiñasa
Jehová Diosajj mä munasir awkjamaw ‘mayisitanakasar istʼi’ ukat yanaptʼañsa munarakistuwa, ukwa Jesusajj uka uñachtʼäwimpejj yatichistu. Ukatwa taqe khitinakatï Diosar yupaychapki ukanakajj kunatï chuymapan utjki uk mayisipkakispa. Ukampis niyakejjay Jehová Diosajj jupanakan askip yatchejja, janisay mayitanakaparjam jaysankchi ukhasa kuntï katoqapki ukampejj kusisitakïpjjewa.c
Aka phajjsin Biblia liytʼañataki:
a Jesusan uka uñachtʼäwipajj uka tiempon costumbrenakapwa uñachtʼayi. Judionakatakejj katoqtʼasirïña ukat wajjtʼasirïñas wali wakiskirïnwa. Niyakejjay familianakajj tʼantʼa mä uru manqʼañatakik lurapjjerichïnjja, pistʼjjäna ukhajj uta jakʼapankirinakat mayir sarapjjerïna. Pisinkir familianakajj mä utanak ikipjjerïna, jilapartejj oraqena ukat maynitï sartaspän ukhajj taqeniruw sartayaspäna.
b Jaqenakan sum amuytʼapjjañapatakejj kunatï waljanin uñtʼatäki ukat jan uñtʼatäki ukanakampiw yatichirïna, ukat akham sasaw sirïna: “Qawqha jukʼamps” sasa.
c ¿Kunjamsa Diosamp istʼatäñatakejj mayisiñasa? uka toqet jukʼamp yatjjatañatakejja, ¿Kunsa Bibliax chiqpachapuni yatichi? sat libron 17 jaljap uñjjattʼäta, ukajj Jehová Diosan Qhanañchirinakapan luratawa.