“Sarnaqäwijajj jan walipunïnwa”

NAYRA JAKÄWIJA:

Lamar qota jakʼankir Turku sat markanwa jilsuwayta, uka markasti janiw sinti qamir markäkiti. Tatajajj nuwasiñanakan atiptʼirïnwa (boxeador), ukat sullka jilajampejj jupjamarakiw nuwasiñatak yatsupjjerïta. Ukat yateqañ utan masinakajajj “nuwasiñäni” sasin sapjjetäna ukhajj jan pächasisaw jupanakamp nuwasirïta. Ukat waynitöjjasajja, jan walinak lurir amigonakampiw sarnaqjjayäta, ukhamatwa jukʼamp nuwasiñanakan uñjasiwayta, uka amigonakajajj wali uñtʼatäpjjänwa. Ukatjja, heavy metal sat música istʼañ qalltawayta, uk istʼasinwa jupanakjamañ wal munjjarakiyäta.

Ukat batería sat instrumento alasajj mä qhawqhanimpiw tocañ qalltawayapjjta. Qhepat nayaw uka grupon cantirijjayäta. Ukat cantañ waktʼkitäna ukhajja, loqher uñtataw jan walinak lurirïta. Tiempompejj wali uñtʼatäjjapjjayätwa, kunattejj jan walinakar ukat nuwasiñanakar apir musicanak tocapjjerïta. Istʼirejj walja jaqenakaw jutapjjeri, ukat mä qhawqha disconaksa apsuwayapjjaraktwa. Qhepïr discot sumwa parlawayapjje. Ukat jukʼamp uñtʼayasiñatakejja, 1980 maranak tukuyaruw Estados Unidos sat jachʼa markan tocañ amtawayapta. Mä qhawqha kutiw Nueva York ukat Los Ángeles sat markanakan tocawayapta. Ukat janïr Finlandia markar kuttʼkasajja, musicat yatjjattʼatanakampiw uñtʼasiwayapjjarakta.

Cheqansa, music tocañ wals munkchiyätjja, janiw kusisit jakaskayätti. Ukat niyakejjay walja cantirinak utjchïnjja mä machaq grupjam sartañajj chʼamakïnwa. Jakäwijan janiw kuna askis utjkänti. “Jan wali jaqëtwa, infiernon tʼaqhesï” sasaw llakisiyäta. Walja jisktʼanakanïsajj religionat parlir kunayman libronakwa liyiñ qalltawayta, ukat Diosarojj “yanaptʼita” sasaw mayisirïta. Ukampis “Janiw Diosar kusisiykiristi” sasaw amuyarakirïta.

KUNJAMSA BIBLIAJJ YANAPTʼAWAYITU:

Kawkhantï cartanak katoqasi ukat apayasiraki ukanwa irnaqayäta. Ukankirinakat mayniw Jehová Diosan Qhanañchiripätayna, uk yatisajj kuna jisktʼanakanïkayätti ukanakwa jisktʼasiyäta. Jupajj Bibliampiw qhanañchtʼitäna, ukatwa jupamp yateqañ qalltawayta. Ukat mä qhawqha semananakatjja “disco grabañatak mä contrato lurapjjañäni ukajj Estados Unidos markanwa istʼasini” sasaw grupojar sapjjetäna. Uk yatisajj “akapï nayatakejj askïnejja” sasaw wal kusisiyäta.

“Aka mä discompik apsuwayä, ukat jan pächasisaw Biblian yatichäwinakarjam sarnaqañatak chʼamachasï” sasaw Bibliat yatichirijarojj sista. Ukat janiw kuns kamskituti, antisas “kuntï Mateo 6:24 qellqatajj siski uk liytʼam” sasakiw sitäna. Ukanjja akham siwa: “Janiw khitis pä patronarojj sirvkaspati” sasa. Jesusajj uka arunakampejj kamsañsa munäna uk amuyasajj wal muspharayäta. Ukat mä qhawqha urunakatjja, “Jesusaruw arkañ munta, grupojat mistjjawa” sasin jilatar yatiyta ukhajja, juparakiw wal muspharjjäna.

Bibliajj mä espejor uñtataw kuna jan wali luräwinaktï lurkayät uk qhanstayitäna (Santiago 1:22-25). Sarnaqäwijajj jan walipunïnwa. Jachʼa jachʼa tukuri, taqe kuns muniri, jan wali arunak parliri, nuwasiri, cigarro pitiri ukat machjasiri ukhamayätwa. Biblian yatichäwinakaparjam jan sarnaqatajj amuyasisajja, jan walipuniw jikjjatasiyäta. Ukampis Biblian yatichäwinakaparjam sarnaqañatakiw chʼamachasjjayäta (Efesios 4:22-24).

Qalltanjja, nayra jan wali luratanakajaw wal chuym ustʼayitäna. Ukampis Bibliat yatichirijaw wal yanaptʼitäna. Kuntï Isaías 1:18 qellqatajj siski uk uñachtʼayitäna, ukan akham siwa: “Juchanakamajj wila colorar uñtatäkchinisa, nayajj khunjam janqʼow tukuyäjja” sasa. Uka qellqatasa ukat yaqha qellqatanakampiw alajjpachankir Awkisajj kunja khuyaptʼayasiris uk uñachtʼayitäna, ukat khitinakatï nayra jan wali luräwinakapat taqe chuyma arrepentisipki ukanakar yanaptʼañ Jupajj wal muni.

Jehová Diosar uñtʼjjasajj Jupar wal munasjjayäta ukaw jakäwij katuyasiñatak yanaptʼawayitu (Salmo 40:8). Ukat 1992 maranwa, San Petersburgo (Rusia) sat markan Jehová Diosan Qhanañchirinakapan walja markanakat jachʼa tantachäwi apaski ukan bautisasiwayta.

WALJA BENDICIONANAKWA KATOQAWAYTA:

Jehová Diosan markapan walja amigonakwa jikjjatawayta. Awisajj jupanakamp suma musicanak tocañatakiw tantachtʼasipta, ukhamatwa Diosan uka churäwip askit uñjapta (Santiago 1:17). Ukat Kristina warmijajj Diosan mä suma bendicionapapuniwa. Jupampiw kusisiñanakansa, llakisiñanakansa ukat yaqha ukhamanakan jikjjatasiwayapta.

Janitï Jehová Diosan Qhanañchiripäkiriskayätjja, inas jiwatäjjeriskchiyäta. Nayrajj kunayman jan waltʼäwinakaruw mitisiyäta, mä jan waltʼäw askichasajj yaqha jan waltʼäwinwa uñjasirakirïta. Jichhasti, jakäwijajj janiw ukhamäjjeti, kusisitaw jakasjjta.