Apnaqerinakajj yaqhepanakar tʼaqhesiyki uk ¿kunatsa Diosajj ukhamak uñchʼukpacha?

Kunjamsa yaqhep apnaqerinakajj markachirinakapat yaqheparojj tʼaqhesiyapjjäna uk Bibliajj qhanañcharakiwa. Amuytʼañataki, khä 900 nayrïr pacha maranakanjja, Acab sat reyiw Israel marka apnaqäna ukat jupajj Nabot chachampin wawanakapampin uva yapup katuntasiñ munäna.a Uk aparañatakejja, Jezabel sat warmipajj jupanakar jiwarayañwa amtäna, ukat reyejj uk jan lurañapatakejj janiw jarkʼkänti (1 Reyes 21:1-16; 2 Reyes 9:26). ¿Kunatsa Diosajj ukanak ukhamak uñchʼukpacha?

Kunattejj Diosajj janiw kʼariskaspati (Tito 1:2). Ukampis ¿kunatsa uka toqet parlañajj wakisi? Amtañäni, Diosajj qalltan akham sasaw jaqenakar säna: ‘Naya contra saytʼasipjjäta ukhajja jiwapjjätawa’ sasa. Uka arunakajj phoqasipunïnwa. Edén jardinan Dios contra saytʼasipkäna ukhat jichhakamajj jaqenakajj janiw jiwañat qhespipkiti. Cheqas Cainajj munañanïtapatwa Abel sullkapar jiwayäna (Génesis 2:16, 17; 4:8).

Ukhat jichhakamajj ‘jaqejj chʼamanïtapatwa masinakaparu jan walinak luri’ sasaw Bibliajj qhanañchi (Eclesiastés 8:9). Amuytʼañataki, Jehová Diosajj akham sasaw israelitanakar säna: ‘Reyinakajj munañaparjamaw apnaqapjjätam, ukat jumanakajj Nayaruw yanapa mayipjjetäta’ sasa (1 Samuel 8:11-18). Wali yatiñani Salomón reyisa, markachirinakarojj wal tʼaqhesiyäna (1 Reyes 11:43; 12:3, 4). Ukat Acab reyjam jukʼamp tʼaqhesiyir reyinakajj utjarakïnwa. Jehová Diosatï uka tʼaqhesiñanakat jarkʼaspäna ukhajja, arunakapajj kʼarïkaspas ukhamäspänwa.

Maysa toqetjja, ‘jaqenakajj janiw Diosarojj taqe chuyma servipkiti’ sasaw Supayajj säna (Job 1:9, 10; 2:4). Diosatï servirinakapar jan walinakat jarkʼaqaspa ukhajja, Supayan arunakapajj cheqäkaspas ukhamarakïspawa. Ukat taqe jaqenakar jan walinakat jarkʼaqaspa ukhajja, jupanak pachpas sum apnaqasipkaspa ukhamwa amuyayaspa, ukampis ukajj kʼariwa. Kunattejj Biblianjja, jaqenakajj janiw jupanak pachpa apnaqasipkaspati sasaw qhanañchi (Jeremías 10:23). Ukatwa Diosan Reinop jutañapajj wali wakiskirejja, ukhamatakwa ina chʼusat tʼaqhesiñanakajj tukusini.

¿Diosajj janiw kuns lurkiti sañti ukajj munpacha? Janiwa, kuns luraski uk pä toqetwa amuytʼañäni. Nayraqatjja, jan wali luririnakan luratanakap qhanstayiwa. Amuytʼañäni, kuna jan walsa Jezabel warmejj Nabot chachar jiwayayañatak lurkäna uk sum Bibliajj qhanañchi. Ukat khitis uka jan walinak lurapjjañapatak chʼamañchi uks qhanañcharakiwa (Juan 14:30; 2 Corintios 11:14). Jupajj janiw uñtʼayasiñ munkiti. ¿Khitïpachasa? Jupajj Supayawa. Ukat munañaparjamaw jaqenakar tʼaqhesiyi, juparakiw jan walinak utjañapatak juchani sasaw Diosajj qhanañchistu, ukhamatwa jan walinakat amuyasiñasataki ukat jutïrin sum jakasiñasatak yanaptʼistu.

Ukatjja, tʼaqhesiñanak tukjawa sasaw Diosajj sarakistu. Ukjja, kunjamtï Jehová Diosajj Acab reyiru, Jezabel warmiru ukat yaqha jaqenakarus jan wali luratanakap qhanstayasin juchap uñtʼaykänjja, ukaw kuntï Jupajj arsuwayki uk phoqaniw sasin atinisiñasatak yanaptʼistu (Salmo 52:1-5). Niyaw jan walinaka tukjä sasaw Jehová Diosajj Jupar munasipki ukanakar qhanañchi.b Cheqasa, Nabot chachampi wawanakapampejj Paraisoptayat aka Oraqen jakasiñatakiw jaktanipjjani, ukanjja, ina chʼusat tʼaqhesiñanakajj janiw utj-jjaniti (Salmo 37:34).