Aka revista liytʼirinakan jisktʼäwinakapa

“Ley phoqataj laykojj Leyitakejj jiwatäjjtwa” sasajj ¿kuna toqetsa Pablojj parlaskäna? (Gál. 2:19).

Pablojj akham sasaw qellqäna: “Ley phoqataj laykojj Leyitakejj jiwatäjjtwa, ukhamat Diosatak jakjjañajataki” sasa (Gál. 2:19).

Uka arunakjja, kuna wakiskir yatichäwtï Galacia provinciankir congregacionanakar qhanañchkäna ukhaw apóstol Pablojj qellqäna. Uka cristianonakat yaqhepajja, falso yatichirinakampiw apayasipjjäna, uka falso yatichirinakajja, salvasiñatakejj Moisesar churaskäna taqe uka Leyinakwa phoqañasa, yamas circuncidasiñ toqet Leyejj utjki ukarojj istʼañasapuniwa sasaw yatichapjjäna. Ukampis Diosajj servirinakapar circuncidasiñ jan mayjjatapwa Pablojj yatïna. Ukatwa uka yatichäwinakajj kʼariwa sasin jan pächasis amuytʼayäna. Ukatsti Jesusan vidap loqtasitapar confiyapjjañapatakiw jilat kullakanakar chʼamañchtʼäna (Gál. 2:4; 5:2).

Maynejj jiwjje ukhajja, janiw kunsa yatjjeti, kunatï pasaski uksa janiw amuyjjeti sasaw Bibliajj qhan qhanañchi (Ecl. 9:5). Pablojj “Leyitakejj jiwatäjjtwa” sasinjja, janiw Moisesan Leyip phoqañajajj wakisjjeti sasaw saskäna. Ukampis Jesusan jiwatapar confiyatapat ‘Diosatakiw jakjjäna’, janiw ukat pächaskänti.

Ley utjatap laykuw Pablojj jan nayrjam amuyjjänti. ¿Kunjamsa? “Janiw maynejj Leyirjam sarnaqasajj cheqap sarnaqer jaqet uñjatäkiti, jan ukasti Jesucristor confiyatapatwa cheqap sarnaqer jaqet uñjatajja” sasaw jupajj qhanañchäna (Gál. 2:16). Cheqas Leyejj mä wakiskir amtwa phoqäna. Pablojj Galaciankir jilatanakarojj akham sänwa: “Juchanak qhanstayañatakiw ukajj yaptʼasïna. Ukampis kawkïr wawatakitejj promesajj arsusiwaykäna uka wawan puriniñapkamakiw uka Leyejj utjañapäna” sasa (Gál. 3:19). ¿Leyejj kunsa qhanstayäna? Pantjasiri, jucharara jaqenakjamajja, janiw jan pantjasisapunejj Ley phoqañ puedksnati, ukatwa wiñayatak mä perfecto sacrificiojj munasïna. Ukhamajja, Leyiw jaqenakarojj jutañapäkäna ‘uka wawajj’ Jesusätap amuyapjjañapatak yanaptʼäna. Maynitï Jesusar confiyatap uñachtʼayaspa ukhajja, cheqapar sarnaqer jaqet uñjatäspawa (Gál. 3:24). Pablojj Leyi toqew Jesusarojj katoqäna, confiyarakïna, ukatwa cheqapar sarnaqer jaqet uñjatäna. Ukhamatwa ‘Leyitakejj jiwatäjjäna’ ‘Diosatak jakjjarakïna’. Leyejj janiw jupjjar munañanëjjänti, jan ukasti Diosaw jupjjar munañanëjjäna.

Romanonakar carta qellqkäna ukanjja, niya ukar uñtasitwa Pablojj sarakïna. Jupajj akham sänwa: “Jilatanakaja, Criston cuerpop taypejj ukhamarakiw jumanakajj Leyitak jiwatäjjapjjtajja, [...]. Ukampis jiwasajj Leyitak jiwatäjjtanwa, ukatwa jichhajj Leyit librëjjtanjja” sasa (Rom. 7:4, 6). Uka versiculonakansa, Gálatas 2:19 textonsa, Pablojj janiw Leyimp juchañchat jiwañat parlkänti, jan ukasti Leyit librëjjañatwa parlaskäna. Leyejj janiw jupjjar munañanëjjänti, ni jupjam mayni cristianonakjjarus munañanëjjänti. Jupanakajj Jesusan vidap loqtasitapar confiyapjjatapatwa librëjjapjjäna.