¿Jumajj ‘oraq katoqañatak’ wakichtʼatäjjtati?
TAQENIW Jesusan aka promesap phoqasiñap muntanjja. Jupajj akham sänwa: “Kusisiñanïpjjew llampʼu chuymaninakajja, jupanakaw oraq katoqapjjani” sasa (Mat. 5:5). Alajjpachan Jesusamp chik reyinakjam apnaqjjapjjani ukhaw ajllit cristianonakajj oraq katoqapjjani (Apoc. 5:10; 20:6). Jilaparte cristianonakajja, aka oraqenwa oraq katoqañsa wiñayatak jakañsa wal suytʼasipki. Jupanakajj perfectöjjapjjaniwa, wali kusisita sumankañanwa jakasipjjarakini. Kunanaktï jupanakajj suytʼasipki ukanakan phoqasiñapatakejja, wali wakiskir luräwinakampiw phoqapjjañapäni. Aka yatichäwinjja, uka luräwinakat kimsa uñjaskañäni: 1) aka oraq mä Paraisor tukuyaña, 2) jaktirinakar yanaptʼaña, 3) jaktirinakar yatichaña. Machaq oraqen uka luräwinakamp phoqañ munatam uñachtʼayañatakejj kunsa jichhatpach lurasma ukwa yatjjataskarakiñäni.
¿AKA ORAQE MÄ PARAISOR TUKUYAÑATAKEJJ WAKICHTʼATÄJJTATI?
Kunapachatï Jehová Diosajj “oraqpach phoqantapjjam, apnaqapjjarakim” sasin jaqenakar siskäna ukhajja, mä urojj oraqpachaw mä paraisor tukuni siskaspas ukhamänwa (Gén. 1:28). Khitinakatï uka paraison wiñayatak jakapjjani ukanakajja, uka nayra mandamiento phoqapjjañapaw wakisini. Edén jardinajj walja waranqa maranakaw jan utj-jjeti, ukhamajj Armagedón pasatatjja, janiw aka oraqejj justupatak mä paraisökaniti. Kawkïr cheqanaktï jaqenakajj jan waltʼayapki uka cheqanak wal qʼomachañaw wakisini. ¡Cheqas walipuniw trabajiñajj utjani!
Israelitanakajj Babiloniat oraqepar kuttʼjjapjjäna ukhajj niya ukhamarakwa lurapjjäna, jupanakajj 70 maranakaw oraqenakapan jan jakjjapjjänti. Ukampis Isaiasan profeciaparjamajja, Jehová Diosan yanaptʼapampejj wasitatwa marka saytʼayapjjaspäna. Isaías profetajj akham sänwa: “Wasaraparus Edén jardinarjamaw tukuyani, wasar pampaparus Jehová Diosan jardinaparjamaw tukuyani” sasa (Is. 51:3). Israelitanakajj oraqenakap mä suma lugararuw tukuyapjjäna. Jehová Diosan bendicionapampejja, ukhamarakiw aka oraq katoqapkani ukanakajj oraqpach mä Paraisor tukuyapjjani. Uka luräwinakan yanaptʼañ munatamjja, jichhatpachaw luräwinakamamp uñachtʼayasma.
Mä toqetjja, utamsa utam jakʼanaksa qʼomäñapataki ordentʼatäñapatakiw chʼamachasiñama. Vecinonakamajj janis ukham lurapkchejja, jumajj ukham lurasmawa. Janiw ukakïkiti, Tantachasiñ Utanaka asambleanakajj apaski uka utanak qʼomachañatakisa askichañatakis yanaptʼarakismawa. Jumatï lurirjamästajja, labores de socorro ukan yanaptʼarakismawa. Ukhamatwa yanap munapki ukanakar yanaptʼañ munatam uñachtʼayäta. Akham jisktʼasim: “Jehová Diosatejj jutïrin oraq katoqañajatak bendisitani ukhajja, ¿ukan yanaptʼañatak mä kun lurañs yateqeristti?” sasa.
¿JAKTIRINAKAR YANAPTʼAÑATAKEJJ WAKICHTʼATÄJJTATI?
Jairo chachan imill wawapar jaktaykäna ukhajja, Jesusajj manqʼa churapjjam sasaw säna (Mar. 5:42, 43). 12 marani mä jiskʼa imill wawar yanaptʼañajj janiw sinti chʼamäkpachänti. Ukampis Jesusajj jiwatanakar jaktaykani ukhajj qhawqha lurañas utjani uk amuysnawa. Jesusasti aka promesapwa phoqani: “Taqe khitinakatï sepulturankapki ukanakajj arup istʼapjjani, ukatjja mistunipjjaniwa” sasa (Juan 5:28, 29). Bibliajj janis taqpachpun uka toqet qhanañchkchistojja, jiwatat jaktirinakajj manqʼa, uta, isi munapjjani, uk amuysnawa. ¿Jumajj yanaptʼañatak ukankañ munatam jichhatpach uñachtʼayasmati? Aka jisktʼanakat amuytʼam.
Oraq katoqañatak wakichtʼatätam uñachtʼayañatakejj ¿kunsa jichha tiempon lurasma?
Congregacionamantï superintendente de circuito jilatan visitapajj yatiyasini ukhajja, ¿manqtʼasir jutañapatak invitasmati? Inas mä betelitajj Betelat mistjjasajj congregacionamar asignatäjjchi jan ukajj inas mä superintendente de circuito jilatan asignacionapajj tukuyjjchi. ¿Jakañatak mä lugar jikjjatañ yanaptʼasmati? Kawkjantï jakaskta uka lugarantï mä asamblea regionalasa jan ukajj mä asamblea especialas apasini ukhajja, ¿janïr asamblea apaskipansa asamblea tukuyatarus yanaptʼasmati, jan ukajj uka asambleatak invitatanakarus katoqtʼasmati?
¿JAKTIRINAKAR YATICHAÑATAKEJJ WAKICHTʼATÄJJTATI?
Hechos 24:15 textojja, walja millón millón jaqenakajj jaktanipkani ukwa amuytʼayistu. Jupanakat waljanejja, janïr jiwkasajj janiw Jehová Diosar uñtʼapkänti, ukampis machaq oraqenjja, Jehová Diosar uñtʼjjapjjaniwa.a Khitinakatï walja maranak Jehová Diosar jan jitheqtas serviwayapki ukanakaw jiwatat jaktirinakarojj yatichapjjani (Is. 11:9). Europa, Sudamérica, África toqenakan predikir Charlotte kullakajj uka uru puriniñap wal suytʼaski. Jupajj wali kusisitaw akham saraki: “Jiwatat jaktirinakar yatichañ wal nayajj munta. Nayra tiempon jakiri mä chachana jan ukajj mä warmin sarnaqäwipat liytʼta ukhajja, walja kutiw akham sasin amuyirïta: ‘Jupatï Jehová Diosar uñtʼasapänjja, jakäwipajj janiw ukhamäkaspänti’ sasa. Jehová Diosar jan uñtʼas jiwapkäna ukanakarojja, taqe kunanaktï jan uñjawayapkäna ukanak wal cuenttʼañ munta” sasa.
Jesusajj janïr aka oraqer jutkäna uka tiempon Jehová Diosar jan jitheqtas servipkäna ukanakajja, waljanak yateqapjjañapaw wakisini. Kawkïr profecianaktï Daniel profetajj qellqkäna jan amuykarakïna ukanakajj kunjamsa phoqasïna uk jupar qhanañchañajj wali kusiskañäniwa (Dan. 12:8). Jumanakat jutir mä wawa taypiw Mesiasajj jutäna sasin Rut, Noemí warminakar qhanañchtʼañajj wali kusiskañarakïniwa. Cheqas oraqpachan yatichaskani ukan yanaptʼañajj kunja kusiskañakïkani, kunanakatï aka jan wali pachan jan waltʼaykistu Diosats apaqañ munkistu ukanakajj janiw utj-jjaniti.
¿Kunjamsa jumajj oraqpachan yatichaskani ukan yanaptʼañ munatam uñachtʼayasma? Mä toqetjja, suma yatichirïñatak chʼamachasisa oraqpachan predicaski uk jan jaytas predicasaw uñachtʼayasma (Mat. 24:14). Inas jilïrëjjatam laykusa jan ukajj yaqha razonanak laykusa kunjamtï munkta ukham jan predicañ puedkstati, ukampis kuntï lurirjamäkta uk lurañatak chʼamachasïta ukhajja, jaktirinakar yatichañatak wakichtʼatätamwa uñachtʼayäta.
Aka jisktʼanak amuytʼañajj wali wakiskiriwa: ¿cheqapunit jumajj oraq katoqañ munta?, ¿aka oraq mä Paraisor tukuyañsa, jaktirinakar yanaptʼañsa, jaktirinakar cheqa yatichäwinak yatichañs walt munta? Oraq katoqkäta ukhajj kuna lurañanakatï utjkani ukar uñtasit luräwinak jichha tiempon lurañatak chʼamachasïta ukhajja, wakichtʼatätamwa uñachtʼayäta.
a “Waljaniruw kunatï cheqapäki ukar apasi” sat yatichäwi, Yatiyañataki septiembre de 2022 revistan liytʼäta.