Зәбур
Дирижора. Давудун мәзмуру.
140 Еј Јеһова, мәни шәр адамлардан гуртар,
Залымлардан гору.
2 Онлар үрәкләриндә фитнә гурурлар,
Бүтүн ҝүнү дава ахтарырлар.
3 Дилләри илан дили кими итидир,
Ағызларында ҝүрзә зәһәри вар. (Селаһ)
4 Еј Јеһова, мәни шәр адамлардан,
Залымлардан гору,
Онлар мәнә бадалаг вурмаг истәјирләр.
5 Мәғрурлар мәнә тәлә гурурлар,
Јолумун үстүндә ипләрдән тор сәрирләр,
Мәнә ҹәлә гурурлар. (Селаһ)
6 Јеһоваја дејирәм: «Сән мәним Аллаһымсан.
Еј Јеһова, јалварышларымы ешит».
7 Еј Күлли-Ихтијар Јеһова, гүдрәтли хиласкарым,
Дөјүш ҝүнү башымын үзәриндә галхан тутурсан.
8 Еј Јеһова, гојма писләр мурада чатсын,
Гојма гәсдләри баш тутсун, гүррәләнсинләр. (Селаһ)
9 Әтрафымы бүрүјәнләрин ағзындан чыхан пислик
Гој өз башларына ҝәлсин.
10 Гој башларына көз төкүлсүн,
Ода дүшсүнләр,
Дәрин чалаја дүшсүнләр, даһа дура билмәсинләр.
11 Бөһтанчы адам јер үзүндә көк салмасын,
Пислик гәддар адамы изләјиб јерә вурсун.
12 Билирәм ки, Јеһова мәзлуму мүдафиә едәҹәк,
Јохсула адил һөкм чыхараҹаг.
13 Салеһләр Сәнин адына шүкүр едәҹәк,
Әмәлисалеһләр өнүндә јашајаҹаг.