Зәбур
Дирижора. Симли аләтләрин мүшајиәтилә. Маскил*. Давудун мәзмуру.
55 Пәрвәрдиҝара, дуамы ешит,
Лүтф диләјирәм, диләјими рәдд етмә.
2 Нә олар, мәни динлә, һај вер.
Дәрд-сәрдән динҹлијими итирмишәм.
Ағлым башымдан чыхыб,
3 Дүшмәнин сөзләриндән,
Шәр адамын зорундан.
Үзәримә пислик јағдырырлар,
Мәнә гаршы аҹыглыдырлар, әдавәт бәсләјирләр.
4 Көксүмдә үрәјим ағрыдан сызылдајыр,
Өлүм дәһшәти чөкүб үстүмә.
5 Горхудан ҹаныма титрәмә дүшүб,
Вүҹудум тир-тир әсир.
6 Дејирәм: «Каш ҝөјәрчинтәк ганадларым олајды!
Учуб сакит јердә мәскән салардым.
7 Гачыб узаглара ҝедәрдим,
Чөл-бијабанда јашајардым. (Селаһ)
8 Сәрт күләјин, гасырғанын әлиндән
Тез далдаја ҝирәрдим».
9 Еј Јеһова, онлары чашбаш гој, нијјәтләрини алт-үст ет*,
Чүнки шәһәрдә зоракылыг, дава-далаш ҝөрдүм.
10 Ҝеҹә-ҝүндүз диварларын үстүндә долашырлар,
Шәһәрдәсә фитнә-фәсад вар, пислик вар.
11 Орада әдавәт баш алыб ҝедир,
Мејданындан зүлм-ситәм, фырылдаг әскилмир.
12 Мәни дүшмән әлә салсајды,
Дөзәрдим.
Үстүмә јағы ҝәлсәјди,
Ондан ҝизләнәрдим.
13 Амма бу сәнсән, мәним кими бир инсан,
Өз рәфигим, јолдашым.
14 Сәнинлә ҝөзәл достлуғумуз вар иди,
Ҹамаата гошулуб Аллаһын евинә гоша ҝедәрдик.
15 Гој дүшмәнләрим мәһв олсун,
Дири-дири Мәзара* дүшсүнләр,
Чүнки араларында, үрәкләриндә пислик јашајыр.
16 Мән исә Аллаһымы чағыраҹағам,
Јеһова мәни гуртараҹаг.
17 Сәһәр, ҝүнорта, ахшам дәрд-сәр әлиндән аһ-зар едирәм,
О, сәсими ешидир.
18 Дүшмәнләр алај-алај үстүмә ҝәлир,
Аллаһ ҹаныма динҹлик верәр, онларын һәмләсиндән гуртарар.
19 Әзәлдән бәри тахтында әјләшән Аллаһ
Мәни ешидәр, онлара гаршы чыхар. (Селаһ)
О кәсләр ки Аллаһ горхусу билмирләр,
Онлар пис јолларындан дөнмәзләр.
20 Рәфигим достларына әл галдырды,
Илгарыны позду.
21 Онун дили јағдан да јумшагдыр,
Үрәји исә дава ахтарыр.
Сөзләри зејтун јағындан да зәрифдир,
Лакин сијрилмиш гылынҹа бәнзәр.
22 Сән гајғы јүкүнү Јеһоваја вер,
О, сәнә дајаг олар,
О, һеч вахт салеһ инсаны јыхылмаға гојмаз.
23 Еј Аллаһым, Сән онлары ән дәрин гәбрә саларсан,
Бу әлиганлы, мәкрли адамларын өмрү јарыја да чатмајаҹаг.
Мән исә Сәнә ҝүвәнәҹәјәм.