Зәбур
Әзраһлы Итанын Маскили*.
89 Јеһованын мәһәббәтини даим нәғмәләрдә тәрәннүм едәрәм.
Дилим Сәнин сәдагәтини бүтүн нәсилләрә бәјан едәҹәк.
2 Дејирәм: «Мәһәббәтин әбәди дураҹаг.
Сәдагәтини ҝөјләрдә бәргәрар етмисән».
3 Сән дедин: «Сечдијим гулумла әһд бағламышам,
Гулум Давуда анд ичмишәм:
4 “Өвладыны* әбәдилик бәргәрар едәҹәјәм,
Тахтыны гураҹағам, нәсилләр боју дураҹаг”». (Селаһ)
5 Еј Јеһова, ҝөјләр харигәләрини мәдһ едир,
Мүгәддәсләр мәҹлисиндә сәдагәтини.
6 Ҝөјләрдә Јеһованын тајы-бәрабәри вармы?
Аллаһ оғулларындан* һансы бири Јеһоваја бәнзәр?
7 Мүгәддәсләр мәҹлисиндә Аллаһа еһтирам вар,
О, дөврәсиндә оланлар үчүн бөјүкдүр, зәһмлидир.
8 Еј ордулар Аллаһы Јеһова,
Еј Јаһ, Сәндәки ҝүҹ кимдә вар?
Сәдагәтин әтрафыны бүрүјүб.
9 Күкрәјән дәнизи рам едирсән,
Габаран далғалары јатырырсан.
10 Сән Раһабы* әзиб леш етдин,
Гүввәтли голунла дүшмәнләри пәрән-пәрән салдын.
11 Ҝөјләр дә Сәниндир, јер дә Сәнин,
Јер үзүнү, ону долдуран һәр шеји Сән јаратмысан.
12 Шималы да, ҹәнубу да јарадан Сәнсән,
Табур вә Һәрмун севинҹдән ҹошуб адыны мәдһ едир.
13 Сәнин голун гүввәтлидир,
Әлин ҝүҹлүдүр,
Сағ әлин уҹадыр.
14 Доғрулуг вә әдаләт тахтынын тәмәлидир,
Мәһәббәтлә сәдагәт өнүндә дурур.
15 Шадлыг сәси билән халг нә бәхтијардыр!
Онлар үзүнүн нурунда јеријир, еј Јеһова.
16 Адын онлара севинҹ бәхш едир ҝеҹә-ҝүндүз,
Әдаләтинлә јүксәлирләр.
17 Чүнки гүввәтләринин таҹы Сәнсән.
Лүтфүн ҝүҹүмүзү уҹалдыр*.
18 Галханымыз Јеһовадандыр,
Бизә падшаһы верән Исраилин Мүгәддәсидир.
19 О заман садиг бәндәләринә вәһјдә сөјләдин:
«Бир иҝидә гүввәт вермишәм,
Халгын арасындан сечдијими јүксәлтмишәм.
20 Гулум Давуду тапыб
Мүгәддәс јағымла мәсһ етмишәм.
21 Әлим она дајаг олаҹаг,
Голум она гүввәт верәҹәк.
22 Һеч бир дүшмән ондан хәраҹ ала билмәјәҹәк,
Һеч бир шәр адам она зүлм етмәјәҹәк.
23 Өнүндән дүшмәнләрини дармадағын едәҹәјәм,
Она нифрәт едәнләри вуруб јыхаҹағам.
24 Сәдагәтим, мәһәббәтим онунладыр,
Гүдрәти адымла јүксәләҹәк.
25 Онун әлини* дәнизләрин,
Сағ әлини чајларын үзәринә гојаҹағам.
26 О, Мәни: “Сән Атамсан,
Аллаһымсан, хиласкар гајамсан”, — дејә чағыраҹаг.
27 Мән дә ону илк оғул,
Дүнјанын шаһәншаһы едәҹәјәм.
28 Мәһәббәтим әбәдијјән онунла олаҹаг,
Онунла бағладығым әһд әсла позулмајаҹаг.
29 Өвладыны әбәди бәргәрар едәҹәјәм,
Тахты ҝөјләр дурдугҹа дураҹаг.
30 Оғуллары ганунумдан чыхыб
Һөкмләримә әмәл етмәзсә,
31 Гајдаларымы позуб
Әмрләримә риајәт етмәзсә,
32 Онлары итаәтсизлијә ҝөрә чубугла дөјәҹәјәм,
Тәгсирләринә ҝөрә көтәкләјәҹәјәм.
33 Амма ону мәһәббәтимдән мәһрум етмәјәҹәјәм,
Вәдимә хилаф чыхмајаҹағам.
34 Әһдими позмајаҹағам,
Ағзымдан чыхан сөзү дәјишмәјәҹәјәм.
35 Мүгәддәслијимә бир кәрә анд ичмишәм,
Давуда јалан данышмарам.
36 Өвлады әбәди галаҹаг,
Ҝүнәш дурдугҹа тахты һүзурумда дураҹаг,
37 Сәмадакы вәфалы шаһид кими,
Ај кими, әбәдилик бәргәрар олаҹаг». (Селаһ)
38 Лакин Сән мәсһ етдијини атдын, рәдд етдин,
Она гаршы гәзәбин аловланды.
39 Гулунла бағладығын әһди ләғв етдин,
Онун таҹыны јерә атыб мурдарладын.
40 Даш һасарларыны учуруб дағытдын,
Истеһкамларыны јерлә јексан еләдин.
41 Һәр јолдан кечән ону сојуб-талады,
Гоншуларын јанында үзүгара олду.
42 Дүшмәнләринә гәләбә вердин,
Бүтүн дүшмәнләрини севиндирдин.
43 Үстәлик, онун гылынҹыны ҝери гајтардын,
Дөјүшдә ону мүвазинәтдән чыхартдын.
44 Шан-шөһрәтини әлиндән алдын,
Тахтыны јерә салдын.
45 Ҝәнҹлик илләрини гысалтдын,
Ону рүсвајчылыға бүрүдүн. (Селаһ)
46 Еј Јеһова, нә вахтадәк мәндән үз дөндәрәҹәксән? Әбәдиликми?
Гәзәбин нә вахтадәк аловланаҹаг?
47 Унутма ки, өмрүм чох гысадыр.
Мәҝәр бәшәр оғулларыны бош јерә јаратмысан?
48 Һансы инсан јашајыб өлүмү дадмајаҹаг?
Мәзарын* пәнҹәсиндән ҹаныны гуртараҹаг? (Селаһ)
49 Еј Јеһова, әввәлки лүтфүн һарада галды,
Давуда сәдагәтлә анд ичдијин лүтфүн?
50 Унутма, еј Јеһова, бәндәләринә атылан истеһзалары,
Неҹә халгларын тәнәсини көксүмдә ҝәздирирәм.
51 Унутма, дүшмәнләрин неҹә тәһгирләр сөјләјир,
Мәсһ етдијинин һәр аддымыны неҹә тәһгир едирдиләр, еј Јеһова.
52 Јеһоваја әбәди алгыш олсун! Амин! Амин! Јаһа алгыш един!