Зәбур

Дирижора. Давудун мәзмуру.

41 Фағыра нәзәр салан бәхтијардыр,

Дар ҝүнүндә Јеһова ону гуртарар.

2 Јеһова ону һифз едәр, һәјатыны горујар,

Бәхтәвәр дејәрләр ҹаһанда она!

Ону әсла дүшмәнләринин пәнҹәсинә вермәзсән,

3 Јатаға дүшәндә, Јеһова, она дајаг оларсан,

Хәстәләнәндә јастығыны јүнҝүл едәрсән*.

4 Дедим: «Јеһова, мәнә рәһм ет.

Сәнә гаршы ҝүнаһ етмишәм, ҹаныма шәфа вер».

5 Дүшмәнләрим әлејһимә данышараг дејирләр:

«Бу, нә вахт өләҹәк, ады нә вахт итиб-батаҹаг?»

6 Онлардан бири мәни ҝөрмәјә ҝәләндә үрәјиндән јалан кечәр,

Ҝөзү нәсә ахтарар,

Сонра чыхыб аләмә ҹар чәкәр.

7 Мәнә нифрәт едәнләр јығышыб пыч-пыч едир,

Ајағымын алтыны газырлар.

8 Дејирләр: «Елә бир дәрдә дүчар олуб ки,

Јатаға дүшүб, бир даһа галхмаз».

9 Һәтта ҝүвәндијим кәс, јахын достум,

Чөрәк кәсдијим адам мәнә хәјанәт етди*.

10 Еј Јеһова, мәнә рәһм ет, ајаға галдыр,

Гој онлардан әвәз чыхым.

11 Дүшмәнимин зәфәр сәси јүксәлмәзсә,

Биләрәм ки, мәндән разысан.

12 Камил олдуғум үчүн мәнә арха олурсан,

Мәни һәмишәлик һүзурунда сахларсан.

13 Исраилин Аллаһы Јеһоваја

Әзәлдән әбәдијјәтәдәк алгыш олсун!

Амин! Амин!