Зәбур
Дирижора. Мәзмур.
66 Еј дүнја, шаграг сәслә Аллаһа нида ет!
2 Онун шанлы адына нәғмәләр оху,
Она мөһтәшәм тәрифләр сөјлә!
3 Аллаһа дејин: «Ишләрин неҹә ваһимәлидир!
Гүдрәтинин әзәмәтиндән
Дүшмәнләр өнүндә јерә дөшәнәҹәк.
4 Бүтүн дүнја гаршында баш әјәҹәк,
Сәни нәғмәләрдә тәрәннүм едәҹәк,
Адыны нәғмәләрдә вәсф едәҹәк!» (Селаһ)
5 Ҝәлин, еј инсанлар, Аллаһын ишләринә бахын!
О, бәшәр оғуллары уғрунда неҹә дә мөһтәшәм ишләр ҝөрүр!
6 Дәнизи гуруја чевирди,
Чајы пијада кечдиләр.
Орада О, бизи севиндирди.
7 О, даим гүдрәти илә һөкмранлыг едәр,
Ҝөзләри халглары сејр едәр.
Гој дикбашлар өзүнү өјмәсин. (Селаһ)
8 Еј халглар, Аллаһымыза алгыш един,
Гој Она дедијиниз алгышларын сәдасы ҝәлсин.
9 О, бизи јашадыр,
Ајағымызы бүдрәмәјә гојмур.
10 Бизи сынадын, еј Аллаһ,
Ҝүмүштәк сафлашдырдын.
11 Бизи овчу торуна салдын,
Күрәјимизә ағыр јүк гојдун.
12 Фани инсаны үстүмүздән кечиртдин,
Оддан, судан кечдик,
Сонра бизә динҹлик вердин.
13 Евинә јандырма гурбанлары илә ҝәләрәм,
Нәзирләрими јеринә јетирәрәм.
14 О нәзирләри ки дилим дејиб,
Дар ҝүнүмдә ағзымдан чыхыб.
15 Бәсләнмиш һејванлардан Сәнә јандырма гурбаны верәрәм,
Ҝәтирдијим гоч гурбанларынын түстүсү дәрҝаһына галхар,
Буғалар, тәкәләр тәгдим едәрәм. (Селаһ)
16 Еј Аллаһдан горханлар, ҝәлин, динләјин,
Мәним үчүн нәләр етдијини сизә данышым.
17 Ағзымы ачыб Ону чағырдым,
Дилим Она алгыш деди.
18 Үрәјимдән пислик кечсәјди,
Јеһова мәни ешитмәзди.
19 Амма Аллаһ ешитди,
О, дуаларымы динләди.
20 Аллаһа шүкүрләр олсун, дуамы рәдд етмәди,
Мәһәббәтини мәндән әсирҝәмәди.