Зәбур
ל [Ламед]
10 Нијә узагда дурмусан, еј Јеһова?
Нијә дар ҝүнүмдә ҝизләнирсән?
2 Шәр адам гүрурланыб мәзлуму тәгиб едир,
Амма гурдуғу фитнәләрин торуна өзү дүшәҹәк.
О, Јеһоваја сајғысызлыг едәр.
4 Шәр адам гүрурундан Аллаһы ахтармаз,
«Аллаһ јохдур», — дејәр.
5 Фираван јашајар,
Сәнин һөкмләрини дәрк етмәз,
Онунла әдавәт апаранларын үстүнә фынхырар.
6 Үрәјиндә дејәр: «Әсла сарсылмарам,
Нәсилләр ҝәлиб-ҝедәр,
Мәнә һеч нә олмаз».
פ [Пе]
7 Ағзы ләнәт, јалан, һәдә илә долудур,
Дилинин алтында бәла вар, шәр вар.
8 Кәндләрин гырағында пусгу гурар,
Хәлвәт јердән чыхыб ҝүнаһсызы өлдүрәр.
ע [Ајн]
Ҝөзү бәдбәхтләри ахтарар.
9 Јувада отурмуш аслан кими пусар,
Мәзлуму гапмаг үчүн ҝүдәр,
Торуну дартыб ону тутар.
10 Гурбанлары әзиләр, тапданар,
Бичарәләр онун пәнҹәсинә кечәр.
11 Үрәјиндә дејәр: «Аллаһ унудуб,
Үзүнү јана чевириб,
Һеч вахт буна фикир вермәз».
ק [Коф]
12 Еј Јеһова, галх! Еј Аллаһым, она гаршы галдыр әлини!
Көмәксизи унутма.
13 Нијә шәр адам Сәнә сајғысызлыг етсин?
Үрәјиндә: «Аллаһ һагг-һесаб чәкмәјәҹәк», — десин.
ר [Рејш]
14 Лакин Сән дәрди, әзабы ҝөрүрсән,
Мүдахилә етмәк үчүн бунлары изләјирсән.
Фағыр үзүнү Сәнә тутар,
Јетимин дајағы Сәнсән.
ש [Шин]
15 Писин, шәр адамын әл-голуну гыр ки,
Ахтаранда
Даһа тапмајасан пислијини.
16 Јеһова әбәдијјән падшаһдыр!
Халглар силиниб јер үзүндән.
ת [Тав]
17 Сән һәлимләрин диләјини ешидәрсән, еј Јеһова,
Онлары үрәкләндирәрсән, сәсләрини диггәтлә динләјәрсән.
18 Јетимә, әзиләнә һагг газандырарсан ки,
Торпагдан јаранмыш фани инсан бир даһа онлары горхутмасын.