Зәбур
Дирижора. «Узаглардакы сәссиз ҝөјәрчин» үчүн. Давудун мәзмуру. Михтам*. Ҹатда филиштлиләрин* әлинә кечәндә.
56 Мәнә лүтф ет, Илаһи, фани инсан үстүмә ҝәлир,
Ҝеҹә-ҝүндүз мәнимлә вурушур, мәни сыхышдырыр.
2 Дүшмәнләр бүтүн ҝүнү үстүмә ҹумур,
Чохлары гүррәләниб мәнимлә савашыр.
3 Мәни горху бүрүјәндә Сәнә ҝүвәнирәм.
4 Сөзүнү вәсф етдијим Аллаһа,
Аллаһа бел бағламышам, горхмурам,
Инсан мәнә нә едә биләр?
5 Ҝеҹә-ҝүндүз мәнә зијан вурурлар,
Һеј зәрәримә фикирләширләр.
6 Пусгу гурур, һүҹум чәкирләр,
Һәр аддымымы изләјирләр ки,
Ҹанымы алсынлар.
7 Худаја, шәр әмәлләринә ҝөрә онлары рәдд ет,
Гәзәбинлә халглары јерә вур.
8 Сәрҝәрдан ҝәздијим јоллары гејдә алырсан.
Ҝөз јашларымы тулуғуна јығ.
Ахы онлар Сәнин китабында јазылыб.
9 Сәни чағырдығым ҝүн дүшмәнләрим ҝери чәкиләҹәк.
Бир шејдән архајынам — Аллаһ тәрәфимдәдир.
10 Сөзүнү вәсф етдијим Јеһоваја,
Сөзүнү вәсф етдијим Аллаһа,
11 Аллаһ-Таалаја бел бағламышам, горхмурам,
Инсан мәнә нә едә биләр?
12 Еј Аллаһым, Сәнә дедијим нәзирләр бојнумдадыр,
Сәнә шүкран гурбанлары ҝәтирәҹәјәм.
13 Ҹанымы өлүмдән гуртардын ки,
Ајағымы бүдрәмәкдән горудун ки,
Һәјат нурунда Сәнин өнүндә аддымлајым.