Зәбур
Дирижора. Давудун мәзмуру.
31 Сәнә сығынмышам, еј Јеһова,
Гојма хәҹил олум.
Әдаләтин наминә мәни гуртар.
2 Гулағыны мәнә сары әј,
Имдадыма чат, мәни хилас ет.
Дағ үстүндә истеһкамым ол,
Мөһкәм бир галатәк һифз ет мәни.
3 Ахы јалчын гајам, истеһкамым Сәнсән,
Адын наминә мәни јөнәлдирсән, јол ҝөстәрирсән.
4 Мәни ҝизлиндә гојулмуш тордан горујарсан,
Ахы галам Сәнсән.
5 Руһуму Сәнин әлинә әманәт едирәм.
Еј һагг Аллаһы* Јеһова, Сән мәни гуртармысан.
6 Мәнасыз, бош бүтләрә сәҹдә гыланлара нифрәт едирәм,
Мән Сәнә архаланырам, еј Јеһова.
7 Сәнин мәһәббәтиндә һәдсиз севинҹ тапаҹағам,
Чүнки әзаб-әзијјәтими ҝөрдүн,
Гәлбимдәки дәрди билирсән.
8 Мәни дүшмән әлинә салмадын,
Ајаг гојдуғум јери ҝенишләндирирсән.
9 Дардајам, еј Јеһова, мәнә лүтф ҝөстәр,
Дәрддән ҝөзүмүн нуру сөнүб, вүҹудум гурујуб.
10 Өмрүм гәм-гүссә илә,
Илләрим аһ-зарла кечир.
Тәгсирим уҹбатындан мәндә тагәт галмајыб,
Сүмүкләрим әријиб ҝедир.
11 Мәнә ришхәнд едир бүтүн дүшмәнләр,
Гонум-гоншу исә онлардан бетәр,
Таныш-билиш мәндән сәксәнир,
Чөл-бајырда мәни ҝөрәндә гачырлар.
12 Өлмүш адам кими јадларындан чыхмышам, унудулмушам.
Сыныг габ кими олмушам.
13 Чохлу ифтиралар ешидирәм,
Һәр јандан мәни дәһшәт бүрүјүр.
Онлар мәнә гаршы бирләшир,
Ҹанымы алмаг үчүн тәдбир төкүрләр.
14 Амма мән, еј Јеһова, Сәнә ҝүвәнирәм.
«Аллаһым Сәнсән!» — дејирәм.
15 Һәјатым Сәнин әлиндәдир,
Мәни дүшмәнләрин, тәгибчиләрин әлиндән гуртар.
16 Үзүнүн нуруну гулунун үстүнә сал,
Мәһәббәтинлә мәни гуртар.
17 Еј Јеһова, Сәни чағыранда гојма хәҹил олум.
Гој шәр адамлар рүсвај олсунлар,
Гој онлар Мәзарда* суссунлар.
18 Јаланчы дилләр,
Салеһин әлејһинә ловғалыгла, һәгарәтлә данышан азғын дилләр лал олсун.
19 Сәнин кәрамәтин неҹә болдур!
Ону сәндән горханлар үчүн сахлајырсан,
Һамынын өнүндә Сәнә сығынанлара ҝөстәрирсән.
20 Онлары инсанларын гәсдиндән горујуб
Һүзурунун пәнаһына алырсан;
Давакар дилләрдән
Чадырында ҝизләдирсән.
21 Шүкүр олсун Јеһоваја!
Мүһасирәјә дүшмүш шәһәрдә ағласығмаз јолларла мәнә мәһәббәтини ҝөстәрди.
22 Тәлаша дүшүб демишдим:
«Ҝөзләринин габағындан јох олаҹағам».
Лакин Сәндән имдад диләјәндә фәрјадымы ешитдин.
23 Јеһованы севин, еј Онун садиг бәндәләри!
Јеһова вәфалы бәндәләри һифз едәр,
Тәкәббүрлү адамын ҹәзасыны артыгламасы илә верәр.
24 Сиз, еј Јеһоваја ҝүвәнәнләр,
Ҹәсур олун, мөһкәм олун!