Зәбур

5 Еј Јеһова, ешит сөзләрими,

Аһ-зарыма диггәт вер.

 2 Сәнә јалварырам, ја Падшаһым, Аллаһым,

Фәрјадыма гулаг ас.

 3 Сүбһ чағы сәсими ешидәрсән, еј Јеһова,

Сәһәр чағы үрәјими Сәнә ачарам, дуруб ҹаваб ҝөзләјәрәм.

 4 Чүнки Сән шәрдән хошланан Аллаһ дејилсән,

Сәнин јанында пис адама әсла јер јохдур.

Залымлара нифрәт едирсән,

 6 Јалан данышанлары мәһв едәрсән.

 7 Мән исә бөјүк мәһәббәтин сајәсиндә Сәнин евинә ҝәләрәм,

Мүгәддәс мәбәдинә сары дөнүб еһтирамла сәҹдә гыларам.

 8 Еј Јеһова, мәни һагг јолунда апар,

Дүшмәнләримә ҝөрә өнүмдә јолуну һамар ет.

 9 Онларын ағзындан дүз сөз чыхмыр,

Үрәкләри пислик јувасы,

Боғазлары ачыг гәбирдир,

Јағлы дилләрини ишә салырлар.

10 Еј Аллаһым, онлары тәгсиркар чыхарарсан,

Газдыглары гујуја өзләри дүшәрләр.

Гој һәдсиз ҝүнаһларына ҝөрә узаглара атылсынлар,

Чүнки онлар Сәнә гаршы галхыблар.

11 Сәнә пәнаһ ҝәтирәнләр исә севинәр,

Һеј севинҹ сәдалары уҹалдар.

Ганадыны онларын үзәринә ҝәрәрсән,

Адыны әзиз тутанларын һәдсиз севинҹи Сән оларсан.

12 Чүнки Сән, салеһ адамы мүбарәк едәрсән, еј Јеһова,

Лүтфүн онун әтрафында галхан олар.