ҮЗЕЈИР

1 Әрәмја васитәсилә Јеһованын дедији сөз+ һәјата кечсин дејә, Фарс шаһы Курушун*+ һакимијјәтинин биринҹи илиндә, Јеһова Курушун үрәјиндә истәк ојатды. Шаһ фәрман јазыб бүтүн сәлтәнәтиндә ҹар чәкдирди:+

2 «Фарс шаһы Куруш белә дејир: “Ҝөјләрин Аллаһы Јеһова дүнјанын бүтүн сәлтәнәтләрини мәнә вериб+ вә мәнә Јәһудада, Јерусәлимдә Она ев тикмәји бујуруб.+ 3 Аранызда Онун халгына мәнсуб олан һәр кәсә Аллаһы јар олсун! Гој о адам Јәһудаја, Јерусәлимә ҝетсин вә Аллаһын, Исраилин Аллаһы Јеһованын Јерусәлимдәки евини јенидән тиксин*. 4 Гој ҝери гајыданлара гоншулары көмәк етсинләр.+ Онлара гызыл, ҝүмүш, һејванлар, әшјалар, һәмчинин Аллаһын Јерусәлимдәки еви үчүн көнүллү тәгдимәләр версинләр”».+

5 Онда Аллаһын тәшвиг етдији һәр кәс: Јәһуда вә Бинјамин гәбиләләринин нәсил башчылары, каһинләр, лавилиләр јола дүшмәјә вә Јеһованын Јерусәлимдәки евини инша етмәјә һазырлашды. 6 Бүтүн гоншулары онлара көмәк етди. Онлара көнүллү тәгдимәләрлә јанашы, ҹүрбәҹүр шејләр, ҝүмүш әшјалар, гызыл, һејванлар вә гијмәтли әшјалар вердиләр.

7 Һәмчинин шаһ Куруш Јеһованын евинә мәхсус олан әшјалары чыхартды. Бу әшјалары Навуходоносор Јерусәлимдән ҝәтириб өз аллаһынын евинә гојмушду.+ 8 Фарс шаһы Куруш онлары хәзинәдар Митридадын нәзарәти алтында ҝәтиздирди. Митридад Јәһуда башчысы Шешбассар*+ үчүн әшјаларын сијаһысыны тутду.

9 Әшјалар бунлар иди: 30 әдәд гызыл сәбәт, 1000 әдәд ҝүмүш сәбәт, 29 әдәд еһтијат габ, 10 һәмчинин 30 әдәд гызыл масгура, 410 әдәд ҝүмүш масгура вә 1000 әдәд башга әшја. 11 Бүтүн гызыл вә ҝүмүш әшјаларын сајы 5400 әдәд иди. Шешбассар әсирләри+ Бабилдән Јерусәлимә ҝәтирәндә бүтүн бу әшјалары өзү илә ҝөтүрүб ҝәтирди.

2 Бунлар сүрҝүндә оланларын арасындан гајыдан әјаләт сакинләридир.+ Онлары Бабил падшаһы Навуходоносор Бабилә сүрҝүнә апармышды.+ Сонралар исә онлар Јерусәлимә вә Јәһудаја, һәр кәс өз шәһәринә гајытмышды.+ 2 Онлар Зәрубабил+, Јешу,*+ Нәһәмја, Сәрәјаһ, Рәлај, Мәрдәһај, Билшән, Миспар, Бәгвај, Рәһум вә Бәәннаһ илә бирҝә гајытмышдылар.

Исраилли кишиләрин сајы:+ 3 Фаруш өвладлары 2172 нәфәр; 4 Шәфәтај өвладлары 372 нәфәр; 5 Әраһ+ өвладлары 775 нәфәр; 6 Јешу вә Јуаб нәслиндән Фәһат-Муаб өвладлары+ 2812 нәфәр; 7 Елам өвладлары+ 1254 нәфәр; 8 Зәтту өвладлары+ 945 нәфәр; 9 Зәккај өвладлары 760 нәфәр; 10 Бәнни* өвладлары 642 нәфәр; 11 Бәбај өвладлары 623 нәфәр; 12 Әзҹад өвладлары 1222 нәфәр; 13 Әдунигам өвладлары 666 нәфәр; 14 Бәгвај өвладлары 2056 нәфәр; 15 Адһин өвладлары 454 нәфәр; 16 Һизгијјә нәслиндән Атир өвладлары 98 нәфәр; 17 Бисај өвладлары 323 нәфәр; 18 Јураһ* өвладлары 112 нәфәр; 19 Һәшум өвладлары+ 223 нәфәр; 20 Ҹаббар* өвладлары 95 нәфәр; 21 Бејтләһм сакинләри 123 нәфәр; 22 Нәтуфаһ сакинләри 56 нәфәр; 23 Әнатут сакинләри+ 128 нәфәр; 24 Әзмут сакинләри 42 нәфәр; 25 Кирјат-Јарим, Кәфирә вә Биирот сакинләри 743 нәфәр; 26 Рама+ вә Ҝиба+ сакинләри 621 нәфәр; 27 Миһмас сакинләри 122 нәфәр; 28 Бејтел вә Ај+ сакинләри 223 нәфәр; 29 Нәба сакинләри+ 52 нәфәр; 30 Мәғбиш сакинләри 156 нәфәр; 31 о бири Еламын нәслиндән оланлар 1254 нәфәр; 32 Һарим өвладлары 320 нәфәр; 33 Лод, Һәдид вә Унуһ сакинләри 725 нәфәр; 34 Әриһа сакинләри 345 нәфәр; 35 Сәнаһ сакинләри 3630 нәфәр.

36 Каһинләр:+ Јешу+ нәслиндән Јадај+ өвладлары 973 нәфәр; 37 Иммир өвладлары+ 1052 нәфәр; 38 Фәшһур өвладлары+ 1247 нәфәр; 39 Һарим өвладлары+ 1017 нәфәр.

40 Лавилиләр:+ Худавијјә нәслиндән Јешу вә Гәдмаил өвладлары+ 74 нәфәр. 41 Мәзмур охујан+ Асәф өвладлары+ 128 нәфәр. 42 Дарваза кешикчиләринин нәслиндән+ Сәллум өвладлары, Атир өвладлары, Тәлмун+ өвладлары, Аггуб+ өвладлары, Хәтит өвладлары, Шубај өвладлары, ҹәми 139 нәфәр.

43 Мәбәд гуллугчулары:+ Зиһа оғуллары, Һәсуф оғуллары, Тәбаут оғуллары, 44 Гируз оғуллары, Сијаһ оғуллары, Фәдун оғуллары, 45 Ләбән оғуллары, Һагаб оғуллары, Аггуб оғуллары, 46 Һәгаб оғуллары, Салмај оғуллары, Һәнан оғуллары, 47 Гиддил оғуллары, Гаһар оғуллары, Рәја оғуллары, 48 Рәсин оғуллары, Нагуд оғуллары, Гәззәм оғуллары, 49 Үзза оғуллары, Фасиһ оғуллары, Бишај оғуллары, 50 Әсна оғуллары, Мәуним оғуллары, Нәфисим оғуллары, 51 Бағбуг оғуллары, Һагуф оғуллары, Хархур оғуллары, 52 Бәслут оғуллары, Мәһид оғуллары, Хәрша оғуллары, 53 Бәргуз оғуллары, Сисар оғуллары, Тәмаһ оғуллары, 54 Нази оғуллары, Һатиф оғуллары.

55 Сүлејманын нөкәрләринин нәсли: Сутај оғуллары, Сөфрәт оғуллары, Фәруд оғуллары,+ 56 Јалаһ оғуллары, Дәргун оғуллары, Гиддил оғуллары, 57 Шәфәтај оғуллары, Хәттил оғуллары, Фүкрат-Һәззәбајим оғуллары, Ами оғуллары.

58 Мәбәд гуллугчулары вә Сүлејманын нөкәрләринин нәслиндән оланлар, ҹәми 392 нәфәр.

59 Тәл-Мәлаһдан, Тәл-Һәршәдән, Кәррубдан, Әддундан вә Иммирдән ҝәлмиш, анҹаг мәншәләрини, һансы нәсилдән олдугларыны вә Исраил халгындан олуб-олмадыгларыны сүбут едә билмәјәнләр бунлардыр:+ 60 Дәлај өвладлары, Тубијјә өвладлары, Нагуд өвладлары, ҹәми 652 нәфәр. 61 Каһинләр нәслиндән: Һабај оғуллары, Һәггуз оғуллары+, ҝиладлы Бәрзиллајын гызларындан арвад алыб онларын адыны ҝөтүрән Бәрзиллај оғуллары+. 62 Бу адамлар һансы нәсилдән олдугларыны мүәјјән етмәк үчүн нәсилләринин адыны нәсил шәҹәрәләриндә ахтардылар, лакин тапмадылар. Буна ҝөрә дә каһинликдән мәһрум олдулар.+ 63 Вали* онлара деди ки, Урим вә Туммим* атан каһин+ олмајынҹа онлар сон дәрәҹә мүгәддәс јемәкләрдән јејә билмәзләр.+

64 Бүтүн ҹамаатын сајы 42 360 нәфәр иди.+ 65 Бунлардан башга 7337 нәфәр гул-гарабаш, 200 нәфәр киши вә гадын мүғәнни вар иди. 66 Онларын 736 аты, 245 гатыры, 67 һәмчинин 435 дәвәси вә 6720 ешшәји вар иди.

68 Онлар Јеһованын Јерусәлимдәки евинә ҝәлиб чатанда нәсил башчыларындан бәзиләри Аллаһын евини әввәлки јериндә+ тикмәк үчүн көнүллү тәгдимәләр вердиләр.+ 69 Онлар имканларына ҝөрә бу иш үчүн олан хәзинәјә 61 000 гызыл дирһәм*, 5000 ҝүмүш мина*+ вә 100 дәст каһин либасы вердиләр. 70 Беләҹә, каһинләр, лавилиләр, халгын бир гисми, мәзмур охујанлар, дарваза кешикчиләри, мәбәд гуллугчулары вә галан исраиллиләр өз шәһәрләриндә мәскунлашдылар.+

3 Једдинҹи ај+ чатанда өз шәһәрләриндә јашајан исраиллиләр бир нәфәр кими Јерусәлимдә топлашды. 2 Јәһусадиг оғлу Јешу+ илә онун каһин јолдашлары вә Шәәлтиил+ оғлу Зәрубабиллә+ гардашлары Аллаһын гулу Мусанын Ганунунда јазылдығы кими,+ јандырма гурбанлары ҝәтирмәк үчүн Исраилин Аллаһына гурбанҝаһ тикдиләр.

3 Онлар әтраф халглардан+ горхсалар да, гурбанҝаһы әввәлки јериндә тикдиләр. Онун үзәриндә Јеһоваја сәһәр вә ахшам јандырма гурбаны+ тәгдим етмәјә башладылар. 4 Сонра јазылдығы кими, Чардаглар бајрамы кечирдиләр.+ Бајрам ҝүнләриндә һәр ҝүн тәләб олунан сајда јандырма гурбанлары ҝәтирирдиләр.+ 5 О вахтдан етибарән даими јандырма гурбаны ҝәтирдиләр,+ һәмчинин тәзә ај мәрасимләриндә,+ Јеһоваја һәср олунмуш бајрамларда+ тәгдимәләр, еләҹә дә Јеһоваја сәмими-гәлбдән көнүллү тәгдимә+ ҝәтирәнләрин гурбанларыны тәгдим етдиләр. 6 Онлар једдинҹи ајын биринҹи ҝүнүндән+ етибарән, Јеһоваја јандырма гурбаны ҝәтирмәјә башладылар. Һәрчәнд Јеһованын мәбәдинин бүнөврәси һәлә гојулмамышды.

7 Онлар дашкәсәнләрә+ вә сәнәткарлара+ пул өдәдиләр; Фарс шаһы Курушун вердији ихтијарла+ дәниз јолу илә Ливандан Јаффаја сидр тирләри ҝәтирмәк үчүн сидонлулара вә сурлулара әрзаг, ички вә јағ вердиләр.+

8 Аллаһын Јерусәлимдәки евинә ҝәлишләринин икинҹи илинин икинҹи ајында Шәәлтиил оғлу Зәрубабил, Јәһусадиг оғлу Јешу, онларын диҝәр гардашлары, каһинләрлә лавилиләр вә әсирликдән Јерусәлимә гајыдан галан ҹамаат+ ишә башлады. Јашы ијирми вә ијирмидән јухары олан лавилиләри Јеһованын евиндәки ишләрә нәзарәтчи гојдулар. 9 Беләликлә, Аллаһын евиндәки ишчиләрә бирликдә нәзарәт едәнләр бунлар иди: Јәһуда* өвладларындан Јешу, оғуллары вә гардашлары, Гәдмаил вә оғуллары, һәмчинин лавили Һәнадад оғуллары+, онларын оғуллары вә гардашлары.

10 Бәнналар Јеһованын мәбәдинин тәмәлини гојанда+ Исраил падшаһы Давудун вердији ҝөстәришә ујғун олараг, рәсми либас ҝејмиш каһинләр кәрәнајларла+ вә лавилиләрдән Асәф өвладлары синҹләрлә Јеһованы мәдһ етмәк үчүн ајаға галхдылар.+ 11 «О, кәрамәтлидир, Исраилә гаршы мәһәббәти әбәдидир»,+ — дејәрәк нөвбә илә+ Јеһованы мәдһ етмәјә вә Она һәмд сөјләмәјә башладылар. Бүтүн халг исә уҹа сәслә һајгырараг Јеһованы мәдһ етди, чүнки Јеһованын евинин тәмәли гојулмушду. 12 Әввәлки еви ҝөрмүш+ јашлы нәсилдән олан бир чох каһин, лавили, нәсил башчысы евин тәмәлинин гојулдуғуну ҝөрәндә һөнкүр-һөнкүр ағламаға башлады, галанлары исә севинҹдән һајгырырды.+ 13 Севинҹ вә ағлашма сәсләрини бир-бириндән ајырмаг мүмкүн дејилди. Ҹамаат елә һајгырырды ки, сәсләри чох-чох узагларда ешидилирди.

4 Јәһудалыларын вә бинјаминлиләрин дүшмәнләри+ ешидәндә ки, әсирликдән гајыдан халг+ Исраилин Аллаһы Јеһова үчүн мәбәд тикир, 2 дәрһал Зәрубабилин вә нәсил башчыларынын јанына ҝәлиб дедиләр: «Гојун биз дә сизинлә бирҝә мәбәди тикәк. Чүнки бизи бура ҝәтирән Ашшур падшаһы Асархаддонун+ дөврүндән бәри биз дә сизин Аллаһыныза ибадәт едирик+, Она гурбанлар ҝәтиририк». 3 Лакин Зәрубабил, Јешу вә Исраилин диҝәр нәсил башчылары онлара дедиләр: «Бизә гошулуб Аллаһымызын евини тикмәјә һаггыныз јохдур.+ Фарс шаһы Курушун бизә әмр етдији кими, Исраилин Аллаһы Јеһова үчүн еви өзүмүз тикәҹәјик».+

4 Онда әтраф халглар Јәһуда халгыны руһдан салмаға, әлини ишдән сојутмаға башлады.+ 5 Онлар халгын нијјәтини боша чыхармаг үчүн+ Фарс шаһы Курушун дөврүндән та Фарс шаһы Даранын+ һакимијјәтинәдәк мәсләһәтчиләр тутдулар. 6 Онлар Аһашверошун һакимијјәтинин әввәлиндә Јәһуда вә Јерусәлим әһалисинин әлејһинә иттиһамнамә јаздылар. 7 Бундан әлавә, Фарс шаһы Артаксерксин дөврүндә Бишлам, Митридад, Табиил вә онун диҝәр мүттәфигләри шаһ Артаксерксә намә јаздылар. Намәни арами дилинә+ тәрҹүмә етдиләр вә арами һәрфләри илә јаздылар*.

8 * Баш мәмур Рәһум вә мирзә Шимшај Јерусәлим әлејһинә шаһ Артаксерксә намә јаздылар. Намәдә јазылмышды: 9 (Намә баш мәмур Рәһумун, мирзә Шимшајын, онларын диҝәр мүттәфигләринин, һакимләрин, вали наибләринин, катибләрин, әрәклиләрин+, бабиллиләрин, Шуш*+ халгынын, јәни еламлыларын+, 10 бөјүк вә шанлы Асенаппарын* сүрҝүн едиб Сәмәријјә шәһәрләриндә јерләшдирдији диҝәр халгларын+ вә чајын* о тајындакы бөлҝәнин диҝәр халгларынын адындан јазылмышды. 11 Шаһа ҝөндәрилмиш намәнин сурәти будур.)

«Шаһ Артаксерксә чајын о тајындакы бөлҝәдә јашајан гулларындан. 12 Шаһа мәлум олсун ки, онун јанындан чыхыб мәмләкәтимизә ҝәлән јәһудиләр артыг Јерусәлимдәдирләр. Онлар бу мәнфур вә үсјанкар шәһәри бәрпа едир, диварларыны һөрүб гуртарыр,+ шәһәрин бүнөврәсини тәмир едирләр. 13 Гој шаһ билсин ки, әҝәр бу шәһәр бәрпа едилсә, диварлары һөрүлүб гуртарса, онлар нә верҝи, нә хәраҹ+, нә дә торпагбасды верәҹәкләр вә шаһларын хәзинәләринә зијан дәјәҹәк. 14 Биз сарајын чөрәјини* јејирик, буна ҝөрә дә шаһын зәрәр чәкмәсинә ҝөз јума билмәрик. Одур ки, шаһа намә ҝөндәриб ону бу ишдән аҝаһ едирик. 15 Гој ата-бабаларынын салнамәси арашдырылсын.+ Онда шаһ бу шәһәрин үсјанкар олдуғуну, падшаһлара вә әјаләтләрә зијан вурдуғуну, гәдим дөврдән бәри гијамчыларын мәскәни олдуғуну биләҹәк. Мәһз буна ҝөрә шәһәр јерлә јексан едилмишди.+ 16 Шаһа билдиририк ки, әҝәр бу шәһәр бәрпа едилсә, диварлары тикилиб гуртарса, чајын о тајындакы+ бүтүн торпаглар шаһын нәзарәтиндән чыхаҹаг».

17 Шаһ баш мәмур Рәһума, мирзә Шимшаја, онларын Сәмәријјәдә јашајан диҝәр мүттәфигләринә вә чајын о тајындакы бөлҝәдә јашајан диҝәр сакинләрә белә ҹаваб ҝөндәрди:

«Сизә салам олсун! 18 Бизә ҝөндәрдијиниз намә һүзурумда охунду*. 19 Әмримлә арашдырма апарылды вә бу шәһәрин гәдим дөврдән бәри падшаһлара гаршы галхдығы, үсјан вә гијам етдији үзә чыхды.+ 20 Јерусәлимдә гүдрәтли падшаһлар олуб, онлар чајын о тајындакы бөлҝәни идарә едибләр. Ҹамаат онлара верҝи, хәраҹ вә торпагбасды вериб. 21 Инди әмр верин бу адамлар иши дајандырсынлар вә мәним ҝөстәришим олмадан шәһәрин бәрпасына башламасынлар. 22 Бахын, бу ишдә сәһләнкарлыға јол вермәјин. Гојмајын ки, јенә шаһлара зијан дәјсин».+

23 Шаһ Артаксерксдән ҝәлән намәнин сурәти Рәһумун, мирзә Шимшајын вә онларын мүттәфигләринин өнүндә охунанда онлар тәләсик Јерусәлимә, јәһудиләрин јанына ҝедиб зор ҝүҹүнә иши дајандырдылар. 24 Бунунла да Аллаһын Јерусәлимдәки евинин тикинтиси дајандырылды вә Фарс шаһы Даранын һакимијјәтинин икинҹи илинә гәдәр белә галды.+

5 Һәггај пејғәмбәр+ вә Иддунун+ нәвәси Зәкәријјә пејғәмбәр+ Јәһуда вә Јерусәлимдә олан јәһудиләрә Исраилин Аллаһынын* ады илә пејғәмбәрлик едирдиләр. 2 Һәмин вахт Шәәлтиил оғлу Зәрубабил+ вә Јәһусадиг оғлу Јешу+ Аллаһын Јерусәлимдәки евини тикмәјә башладылар.+ Аллаһын пејғәмбәрләри дә онларын јанында идиләр вә онлара көмәк едирдиләр.+ 3 Онда чајын* о тајындакы бөлҝәнин валиси Тәттанај, Шизар-Бузнај вә онларын мүттәфигләри ҝәлиб јәһудиләрә дедиләр: «Бу еви вә бу тикилини кимин ҝөстәриши илә тикирсиниз?» 4 Сонра онлардан сорушдулар: «Бинаны тикәнләрин адлары нәдир?» 5 Амма Аллаһын нәзәри јәһуди ағсаггалларынын үстүндә иди.+ Дараја хәбәр ҝөндәриб ондан бу мәсәлә илә бағлы намә аланадәк бу адамлар иши дајандырмадылар.

6 Чајын о тајындакы бөлҝәнин валиси Тәттанајын, Шизар-Бузнајын вә онун мүттәфигләринин, чајын о тајындакы бөлҝәнин вали наибләринин шаһ Дараја ҝөндәрдији намәнин сурәти будур. 7 Онларын ҝөндәрдији намәдә јазылмышды:

«Шаһ Дараја.

Шаһа салам олсун! 8 Шаһа мәлум олсун ки, биз Јәһуда әјаләтинә, Улу Аллаһын евинә ҝетмишдик. Бу ев ири дашларла тикилир, диварларын ичинә тир гојулур. Ҹамаат вар ҝүҹү илә чалышыр, ишләри габаға ҝедир. 9 Биз онларын ағсаггалларындан сорушдуг: “Бу еви вә бу тикилини кимин ҝөстәриши илә тикирсиниз?”+ 10 Һәмчинин онлардан адларыны сорушдуг ки, ишә башчылыг едән адамларын адыны јазыб сәнә ҝөндәрәк.

11 Онлар бизә белә ҹаваб вердиләр: “Биз јерин вә ҝөјүн Аллаһынын гулларыјыг. Чох илләр әввәл Исраилин әзәмәтли падшаһынын тикдији еви бәрпа едирик.+ 12 Ата-бабаларымыз ҝөјләрин Аллаһыны гәзәбләндирдији үчүн+ Аллаһ онлары Бабил падшаһы кәлдани Навуходоносора тәслим етмишди.+ О да бу еви јерлә јексан едиб+ халгы Бабилә әсир апармышды.+ 13 Анҹаг Бабил һөкмдары Куруш һакимијјәтинин биринҹи илиндә Аллаһын евинин јенидән тикилмәси үчүн фәрман вермишди.+ 14 Һәмчинин шаһ Куруш Навуходоносорун Аллаһын Јерусәлимдәки мәбәдиндән ҝөтүрүб Бабил мәбәдинә апардығы гызыл вә ҝүмүш габлары Бабил мәбәдиндән чыхардыб,+ Шешбассара*+, вали тәјин етдији адама+ вермиш 15 вә она демишди: “Бу габлары ҝөтүр вә онлары Јерусәлимдәки мәбәдә апар. Гој Аллаһын еви әввәлки јериндә тикилсин”.+ 16 Онда Шешбассар Јерусәлимә ҝәлиб Аллаһын евинин бүнөврәсини гојду.+ О вахтдан бәри мәбәд тикилир, амма һәлә тамамланмајыб”.+

17 Инди шаһ мәсләһәт билирсә, гој Бабилдәки сарај хәзинәси* ахтарылсын вә Аллаһын Јерусәлимдәки евинин иншасы үчүн шаһ Курушун әмр вериб-вермәдији мүәјјән олунсун.+ Сонра шаһын бу мәсәлә илә бағлы гәрары бизә ҝөндәрилсин».

6 О заман шаһ Даранын әмри илә Бабил хәзинәсиндә олан дәфтәрхана ахтарылды. 2 Мада* әјаләтиндә, Агбатана* шәһәриндәки галада бир тумар тапылды. Тумарда јазылмышды:

3 «Шаһ Куруш һакимијјәтинин биринҹи илиндә Аллаһын Јерусәлимдәки еви һаггында белә фәрман вериб:+ “Бу ев инша едилсин, орада гурбан ҝәтирилсин. Тәмәли гојулсун, һүндүрлүјү 60 гулаҹ*, ени 60 гулаҹ олсун.+ 4 Үч ҹәрҝә ири даш вә бир ҹәрҝә тир дүзүлсүн.+ Хәрҹләр шаһ сарајынын һесабына өдәнилсин.+ 5 Һәмчинин Навуходоносорун Аллаһын Јерусәлимдәки мәбәдиндән Бабилә ҝәтирдији гызыл вә ҝүмүш габлар+ өз јеринә, Јерусәлимдәки мәбәдә, Аллаһын евинә гајтарылсын”.+

6 Сиз, чајын* о тајындакы бөлҝәнин валиси Тәттанај, Шизар-Бузнај вә мүттәфигләриниз, чајын о тајындакы бөлҝәнин вали наибләри,+ орадан узаг дурун, 7 Аллаһын евинин иншасына мане олмајын. Гој јәһудиләрин валиси вә ағсаггаллары Аллаһын евини әввәлки јериндә тиксинләр. 8 Бундан әлавә, әмр едирәм ки, Аллаһын евинин иншасында јәһудиләрин ағсаггалларына бу көмәји ҝөстәрәсиниз: иш дајанмасын дејә, сарај хәзинәсиндән+, чајын о тајындакы бөлҝәдән топланан верҝиләрдән бу адамларын мәсрәфләри вахтлы-вахтында өдәнилсин.+ 9 Јерусәлимдәки каһинләрин дедији һәр шеји, ҝөјләрин Аллаһына јандырма гурбаны тәгдим етмәк үчүн ҹаван буға+, гоч+ вә гузу+, үстәлик, буғда+, дуз+, шәраб+ вә јағ+ һөкмән һәр ҝүн верилсин. 10 Онлар да һәмишә ҝөјләрин Аллаһына мәгбул олан гурбанлар ҝәтирсинләр вә шаһла оғулларынын ҹанына дуа етсинләр.+ 11 Һәмчинин әмр едирәм ки, ким бу әмрә табе олмаса, һәмин адамын евиндән бир тир чыхарылсын вә о, бу тирдән асылсын, бу әмәлинә ҝөрә еви үмуми ајагјолу* олсун. 12 Гој бу әмри позмаға вә Аллаһын Јерусәлимдәки евини дағытмаға чалышан һәр бир падшаһы вә халгы ораны Өз адына мәскән сечән+ Аллаһ јох етсин. Мән Дара бу әмри верирәм. Әмрим дәрһал јеринә јетирилсин».

13 Чајын о тајындакы бөлҝәнин валиси Тәттанај, Шизар-Бузнај+ вә мүттәфигләри шаһ Даранын әмр етдији һәр шеји дәрһал јеринә јетирдиләр. 14 Јәһудиләрин ағсаггаллары исә Һәггај+ пејғәмбәрин вә Иддунун нәвәси Зәкәријјәнин+ пејғәмбәрлик сөзләриндән үрәкләнәрәк тикинти ишини давам етдирирдиләр; иш габаға ҝедирди+. Беләҹә, онлар Исраилин Аллаһынын, о ҹүмләдән Фарс шаһлары Курушун+, Даранын+ вә Артаксерксин+ әмринә әсасән, еви тикиб гуртардылар.+ 15 Евин иншасы шаһ Даранын һакимијјәтинин алтынҹы илиндә, адар* ајынын үчүнҹү ҝүнүндә баша чатды.

16 Исраил халгы, каһинләр, лавилиләр+ вә әсирликдән гајыдан диҝәр адамлар Аллаһын евинин ачылышыны шадјаналыгла гејд етдиләр. 17 Аллаһын евинин ачылышы үчүн 100 буға, 200 гоч, 400 гузу вә гәбиләләрин сајына мүвафиг олараг, бүтүн Исраил халгы үчүн ҝүнаһ гурбаны кими 12 тәкә тәгдим етдиләр.+ 18 Мусанын китабында јазылдығы кими,+ каһинләри дәстәләринә ҝөрә, лавилиләри бөлүкләринә ҝөрә Јерусәлимдә Аллаһа хидмәтә тәјин етдиләр.+

19 Әсирликдән гајыданлар биринҹи ајын он дөрдүнҹү ҝүнүндә Пасха бајрамыны гејд етдиләр.+ 20 Каһинләрин вә лавилиләрин һамысы бир нәфәр кими пакланыб тәмиз олду.+ Онлар әсирликдән гајыданларын һамысы үчүн, еләҹә дә каһин јолдашлары вә өзләри үчүн Пасха гурбаны кәсдиләр. 21 Әсирликдән гајытмыш исраиллиләр вә Исраилин Аллаһы Јеһоваја ибадәт етмәк үчүн әтраф халгларын натәмизлијиндән узаглашыб онлара гошуланларын һамысы бу гурбандан једиләр.+ 22 Онлар једди ҝүн Мајасыз чөрәк бајрамыны шәнлик ичиндә гејд етдиләр.+ Чүнки Јеһова онлара севинҹ бәхш етмишди вә Ашшур һөкмдарынын үрәјиндә онлара гаршы лүтф ојатмышды+, һөкмдар Аллаһын, Исраилин Аллаһынын евинин иншасында онлара көмәк етмишди.

7 Бу һадисәләрдән сонра, Фарс шаһы Артаксерксин+ һакимијјәти дөврүндә Үзејир*+ Бабилдән чыхды. Үзејир Сәрәјаһын+, Сәрәјаһ Әзријанын, Әзрија Хилгијјәнин+, 2 Хилгијјә Сәллумун, Сәллум Садығын, Садыг Әхитубун, 3 Әхитуб Әмаријјәнин, Әмаријјә Әзријанын+, Әзрија Мәрјутун, 4 Мәрјут Зараһјанын, Зараһја Уззинин, Уззи Буггинин, 5 Бугги Абишунун, Абишу Фәнһасын+, Фәнһас Әлјазарын+, Әлјазар исә бөјүк каһин Һарунун оғлу+ иди. 6 Бабилдән чыхан бу Үзејир мирзә иди вә Исраилин Аллаһы Јеһованын Мусаја вердији Ганунун билиҹиси* иди.+ Аллаһы Јеһова Үзејирә јар олдуғу үчүн шаһ онун һәр хаһишини јеринә јетирмишди.

7 Шаһ Артаксерксин һакимијјәтинин једдинҹи илиндә исраиллиләрдән, каһинләрдән, лавилиләрдән+, мәзмур охујанлардан+, дарваза кешикчиләриндән+ вә мәбәд гуллугчуларындан+ бәзиләри Јерусәлимә ҝетди. 8 Үзејир шаһын һакимијјәтинин једдинҹи илиндә, бешинҹи ајда Јерусәлимә ҝәлди. 9 О, Бабилдән биринҹи ајын биринҹи ҝүнүндә јола чыхмышды, Аллаһын көмәји илә бешинҹи ајын биринҹи ҝүнүндә Јерусәлимә чатды.+ 10 Үзејир Јеһованын Ганунуну тәдгиг вә тәтбиг етмәји+, Исраилдә гајда-ганунлары вә һөкмләри өјрәтмәји үрәјиндә гәт етмишди*.+

11 Јеһованын Исраилә бујурдуғу әмрләрин вә гајдаларын билиҹиси олан мирзә вә каһин Үзејирә шаһ Артаксерксин вердији намәнин сурәти будур:

12 * «Шаһәншаһ Артаксерксдән+ ҝөјләрин Аллаһынын Ганунунун көчүрүҹүсү каһин Үзејирә саламлар олсун! 13 Мән фәрман верирәм ки, сәлтәнәтимдә јашајан Исраил халгындан, каһинләрдән вә лавилиләрдән ким сәнинлә Јерусәлимә ҝетмәк истәјирсә, ҝетсин.+ 14 Шаһ вә онун једди мәсләһәтчиси сәни ҝөндәрир ки, ҝедиб Јәһуда вә Јерусәлимдә Аллаһын Ганунуна, сәндә олан гануна әмәл едилиб-едилмәдијини өјрәнәсән. 15 Мәскәни Јерусәлимдә олан Исраилин Аллаһына шаһ вә онун мәсләһәтчиләринин бәхшиш кими вердији гызыл-ҝүмүшү, 16 һәмчинин Бабил әјаләтиндә сәнә верилән бүтүн гызыл-ҝүмүшү вә каһинләрлә халгын Аллаһын Јерусәлимдәки евинә вердикләри бәхшишләри өзүнлә апар.+ 17 Вахт итирмәдән бу пула буға+, гоч+, гузу+, еләҹә дә тахыл тәгдимәси+ вә шәраб тәгдимәси+ ал. Онлары Аллаһынызын Јерусәлимдәки евинин гурбанҝаһында тәгдим ет.

18 Гызыл-ҝүмүшүн галанындан исә сән вә гардашларын Аллаһынызын ирадәсинә ујғун олараг, истәдијиниз кими истифадә едә биләрсиниз. 19 Аллаһынын евиндә ибадәт заманы истифадә едилән габларын һамысыны ҝөтүрүб Јерусәлимә, Аллаһын һүзуруна апар.+ 20 Аллаһынын еви үчүн башга нәсә лазым олса, сарај хәзинәсиндән өдәјәрсән.+

21 Мән, шаһ Артаксеркс чајын* о тајындакы бөлҝәнин бүтүн хәзинәдарларына әмр едирәм ки, ҝөјләрин Аллаһынын Ганунунун көчүрүҹүсү каһин Үзејирин+ сиздән истәдији һәр шеји дәрһал она верәсиниз. 22 Она 100 таланта* гәдәр ҝүмүш, 100 кора* гәдәр буғда, 100 бата* гәдәр шәраб+, 100 бата гәдәр јағ+ вә истәдији гәдәр дуз+ верин. 23 Гој ҝөјләрин Аллаһынын Өз еви илә әлагәдар бујурдуғу һәр шеј сәјлә јеринә јетирилсин+ вә беләҹә, шаһын сәлтәнәти вә оғуллары Аллаһын гәзәбинә туш ҝәлмәсин.+ 24 Буну да билин ки, каһинләрдән, лавилиләрдән, мусигичиләрдән+, гапы кешикчиләриндән, мәбәд гуллугчуларындан+ вә Аллаһын евиндә иш ҝөрәнләрдән верҝи, хәраҹ+ вә торпагбасды алынмамалыдыр.

25 Сән Үзејир, Аллаһын сәнә вердији һикмәтлә мәмурлар вә һакимләр тәјин ет ки, чајын о тајындакы бөлҝәнин бүтүн әһалисинә, Аллаһынын ганунларыны биләнләрин һамысына һакимлик етсинләр. Ким ганунлары билмирсә, өјрәдин.+ 26 Ким сәнин Аллаһынын Ганунуна вә шаһын ганунуна әмәл етмәсә, дәрһал лајиг олдуғу ҹәза илә — өлүм, сүрҝүн, ҹәримә, јахуд һәбс ҹәзасы илә ҹәзаландырылсын».

27 Јеһованын Јерусәлимдәки евини ҝөзәлләшдирмәк фикрини шаһын үрәјинә гојан ата-бабаларымызын Аллаһы Јеһоваја алгыш олсун!+ 28 О, шаһын, онун мәсләһәтчиләринин+ вә бүтүн нүфузлу әјанларынын өнүндә мәнә лүтф ҝөстәрди.+ Аллаһым Јеһова мәнә јар олдуғу үчүн үрәкләндим вә мәнимлә бирҝә ҝетмәк үчүн Исраил башчыларыны топладым.

8 Шаһ Артаксерксин+ һакимијјәти заманы мәнимлә бирҝә Бабилдән чыхан вә нәсилләринә ҝөрә гејдә алынан нәсил башчылары бунлардыр: 2 Фәнһас+ нәслиндән Һирсәм, Исамар+ нәслиндән Дәнјал, Давуд нәслиндән Һәттуш; 3 Фаруш нәслиндән олан Сәкәнја өвладларындан Зәкәријјә вә онунла бирҝә гејдә алынан 150 киши; 4 Фәһат-Муаб нәслиндән+ Зараһја оғлу Илјәһәнај вә онунла бирҝә 200 киши; 5 Зәтту нәслиндән+ Јаһәзил оғлу Сәкәнја вә онунла бирҝә 300 киши; 6 Адһин нәслиндән+ Јонатан оғлу Әбәд вә онунла бирҝә 50 киши; 7 Елам нәслиндән+ Әтәлја оғлу Јашај вә онунла бирҝә 70 киши; 8 Шәфәтај нәслиндән+ Микајыл оғлу Зәбәдја вә онунла бирҝә 80 киши; 9 Јуаб нәслиндән Јәһјил оғлу Әбдија вә онунла бирҝә 218 киши; 10 Бәнни нәслиндән Јусфија оғлу Сәлимәт вә онунла бирҝә 160 киши; 11 Бәбај нәслиндән+ Бәбај оғлу Зәкәријјә вә онунла бирҝә 28 киши; 12 Әзҹад нәслиндән+ Һаггатан оғлу Јуһәнна вә онунла бирҝә 110 киши; 13 Әдунигам нәслиндән+ сонунҹулар: Әлфәлит, Јаәл, Шәмај вә онларла бирҝә 60 киши; 14 Бәгвај нәслиндән+ Утај илә Зәббуд вә онларла бирҝә 70 киши.

15 Онлары Әһаваја ахан чајын+ кәнарына топладым вә биз дүшәрҝә салыб үч ҝүн орада галдыг. Амма халгы вә каһинләри јохлајанда онларын арасында лавилиләрдән һеч кими тапмадым. 16 Онда хәбәр ҝөндәриб башчылардан Әлјәзәри, Әрјили, Шәмајы, Әлнәтаны, Јариби, Әлнәтаны, Натаны, Зәкәријјәни вә Мәшулламы, мүәллимләрдән Јәһјариби вә Әлнәтаны чағырдым. 17 Сонра онлара әмр етдим ки, Гасифјәдә башчы олан Иддунун јанына ҝетсинләр. Иддуја вә онун мәбәд гуллугчулары олан Гасифјәдәки гардашларына десинләр ки, Аллаһымызын еви үчүн бизә хидмәтчиләр ҝәтирсинләр. 18 Аллаһымыз бизә јар олдуғу үчүн онлар Исраил оғлу Лавинин нәвәси Мәһлинин+ өвладларындан ағыллы бир адамы, Шәрбијаны+, онун оғулларыны вә гардашларыны, 18 нәфәри, 19 Һәшбијјәни, мерарлылардан+ Јашај илә гардашларыны вә онларын оғулларыны, 20 нәфәри, 20 һәмчинин Давудун вә әјанларын лавилиләрин гуллуғуна вердији мәбәд гуллугчулары арасындан адбаад сечилмиш 220 нәфәри јанымыза ҝәтирдиләр.

21 Сонра Аллаһымызын гаршысында өзүмүзү ашағы тутмаг үчүн, Ондан бизи, өвладларымызы, мал-мүлкүмүзү горумасыны, јолда бизә бәләдчилик етмәсини диләмәк үчүн Әһава чајынын кәнарында оруҹ елан етдим. 22 Шаһдан јолбоју бизи дүшмәндән горумаг үчүн әсҝәр вә атлылар истәмәјә үзүм ҝәлмәди, чүнки шаһа демишдик: «Аллаһымыз Она үз тутанлара јар олур,+ Ондан үз дөндәрәнләрә исә ҝүҹүнү вә гәзәбини ҝөстәрир».+ 23 Беләҹә, биз оруҹ тутдуг, Аллаһымыза јалвардыг, О да јалварышымызы ешитди.+

24 Каһинләрин рәһбәрләриндән 12 нәфәри — Шәрбијаны, Һәшбијјәни+ вә онларын гардашларындан 10 нәфәри сечдим. 25 Сонра шаһын, онун мәсләһәтчиләринин, әјанларынын вә орадакы исраиллиләрин Аллаһымызын еви үчүн вердији әшјалары, гызылы, ҝүмүшү чәкиб онлара вердим.+ 26 Онлара чәкиб вердијим шејләр бунлардыр: 650 талант* ҝүмүш, 2 талант дәјәриндә 100 әдәд ҝүмүш әшја, 100 талант гызыл, 27 1000 дарик* дәјәриндә 20 әдәд гызыл масгура вә парлаг гырмызы рәнҝдә, гызыл гәдәр гијмәтли, јахшы мисдән 2 әдәд габ.

28 Сонра онлара дедим: «Сиз Јеһова үчүн мүгәддәссиниз,+ бу әшјалар да мүгәддәсдир. Бу ҝүмүш вә гызыл ата-бабаларынызын Аллаһы Јеһоваја верилән көнүллү тәгдимәдир. 29 Бунлары Јерусәлимдә, Јеһованын евинин отагларында*, каһинләрлә лавилиләрин рәһбәрләринин вә Исраил нәсилләринин башчыларынын өнүндә чыхарыб чәкәнә гәдәр бәрк-бәрк горујун».+ 30 Каһинләрлә лавилиләр онлара чәкилиб верилмиш гызыл-ҝүмүшү вә әшјалары Јерусәлимә, Аллаһымызын евинә апармаг үчүн ҝөтүрдүләр.

31 Биринҹи ајын он икинҹи ҝүнүндә+ Әһава чајынын+ кәнарындан Јерусәлимә јола дүшдүк. Бүтүн јолбоју Аллаһымыз бизә јар олду, бизи дүшмәнләрдән вә пусгулардан гуртарды. 32 Нәһајәт, Јерусәлимә ҝәлиб чатдыг,+ үч ҝүн орада галдыг. 33 Дөрдүнҹү ҝүн исә Аллаһымызын евиндә гызыл-ҝүмүшү вә әшјалары чәкиб+ Урјаһ оғлу каһин Мәримута+ вердик. Фәнһас оғлу Әлјазар, лавилиләрдән Јешу оғлу Јузабад+ вә Бәнја+ оғлу Нудај да онларын јанында иди. 34 Һәр шеј сајылыб чәкилди вә чәки гејдә алынды. 35 Сүрҝүндән гајыдан әсирләр Исраилин Аллаһына јандырма гурбанлары ҝәтирдиләр: 96 гоч+, 77 еркәк гузу, ҝүнаһ гурбаны олараг 12 тәкә+ вә бүтүн Исраил үчүн 12 буға+. Бунлар Јеһоваја ҝәтирилән јандырма гурбанлары иди.+

36 Сонра шаһын әмрләрини ҹанишинләринә вә чајын* о тајындакы бөлҝәнин+ валиләринә чатдырдыг.+ Онлар халга вә Аллаһын евинә јардым етдиләр.+

9 Бүтүн бунлардан сонра башчылар мәнә јахынлашыб дедиләр: «Исраил халгы, каһинләр вә лавилиләр әтраф халглардан — кәнаниләрдән, һетләрдән, фәризиләрдән, јәбусиләрдән, әмуниләрдән, муабиләрдән, мисирлиләрдән+, амориләрдән+ вә онларын ијрәнҹ әмәлләриндән+ узаг дурмајыблар. 2 Онларын гызларындан өзләринә вә оғулларына арвад алыблар.+ Мүгәддәс нәсил+ әтраф халгларла гарышыб+. Бу хәјанәтдә башчылар вә мәмурлар өндә ҝедирләр».

3 Бу хәбәри ешидәндә јахамы ҹырыб сач-саггалымы јолдум вә сарсынты ичиндә јерә чөкдүм. 4 Ахшам тахыл тәгдимәси вахтынадәк беләҹә отурдум.+ Бу арада, Исраилин Аллаһынын сөзләринә еһтирам бәсләјән адамлар әсирликдән гајыданларын хәјанәти илә әлагәдар әтрафыма топлашды.

5 Ахшам тахыл тәгдимәси вахты ҝәлди.+ Јахам ҹырыг, пәришан һалда отурдуғум јердән галхдым. Диз чөкүб әлләрими Аллаһым Јеһоваја ачдым 6 вә дедим: «Еј Аллаһым, Сәнин һүзурунда хәҹаләт чәкирәм, башымы галдырмаға утанырам. Аллаһым, тәгсирләримиз башымыздан ашыр, ҝүнаһларымыз ҝөјләрә чатыб.+ 7 Ата-бабаларымызын дөврүндән бу ҝүнә кими бөјүк ҝүнаһлар етмишик.+ Ҝүнаһларымыза ҝөрә биз, падшаһларымыз, каһинләримиз јаделли падшаһлара тәслим едилдик, гылынҹ+, әсарәт+, талан+, рүсвајчылыг уҹбатындан зүлм чәкдик. Бу зүлмү инди дә чәкирик.+ 8 Инди исә, еј Аллаһымыз Јеһова, бизә бир анлыг лүтф ҝөстәрдин. Еј Аллаһымыз, бизи мәһв олмаға гојмадын, мүгәддәс мәканында бизә тәһлүкәсиз бир јер вердин+ ки, ҝөзүмүз парласын, көләликдә икән бир гәдәр дирчәләк. 9 Биз көләјик,+ амма Сән, еј Аллаһымыз, бизи көләликдә тәрк етмәдин, Фарс шаһларынын өнүндә бизә лүтф ҝөстәрдин.+ Бизи дирчәлтдин ки, Сәнин евини тикәк,+ онун харабалыгларыны абад едәк, Јәһуда вә Јерусәлимдә өзүмүзү, санки, мөһкәм диварлар архасында һисс едәк.

10 Еј Аллаһымыз, бүтүн бунлардан сонра нә дејәк? Сәнин әмрләрини поздуг. 11 Сән пејғәмбәр гулларын васитәсилә бизә бујурмушдун: “Саһиб олаҹағыныз о торпаг мурдар торпагдыр, чүнки сакинләри натәмиздир, ораны башдан-баша ијрәнҹ әмәлләри илә, мурдарлыглары илә булашдырыблар.+ 12 Одур ки, нә онларын оғулларына гыз верин, нә дә оғулларыныза онлардан гыз алын.+ Һеч вахт онларын әмин-аманлығы вә рифаһы үчүн чалышмајын.+ Онда сиз мөһкәмләнәр, торпағын немәтләриндән јејәр вә о торпаға һәмишәлик саһиб олуб ону оғулларыныза ирс гојарсыныз”. 13 Сән, еј Аллаһымыз, бизимлә тәгсирләримизә ҝөрә рәфтар етмәдин,+ бурада олан бизләрә сағ галмаға изин вердин.+ Шәр әмәлләримиз, ағыр ҝүнаһымыз уҹбатындан башымыза ҝәлән бу гәдәр мүсибәтдән сонра 14 һансы һагла јенә Сәнин әмрләрини позуруг, ијрәнҹ әмәлләр едән халгларла гоһум олуруг?+ Инди сән бизә гәзәбләнмәзсән? Бир нәфәри дә сағ сахламајыб һамымызы мәһв етмәзсән? 15 Еј Исраилин Аллаһы Јеһова, Сән адилсән!+ Чүнки биз бу ҝүнә гәдәр сағ галмышыг. Будур, ҝүнаһлы һалда Сәнин гаршындајыг. Бу әмәллә Сәнин һүзурунда дурмаг мүмкүн дејил».+

10 Үзејир Аллаһын евинин гаршысында јерә дөшәниб ағлаја-ағлаја дуа едир,+ халгын ҝүнаһыны етираф едирди. Бу заман исраилли кишиләр, гадынлар вә ушаглардан ибарәт бөјүк бир издиһам онун јанына топлашды. Һамысы һөнкүр-һөнкүр ағлајырды. 2 Елам өвладларындан+ Јәһјил+ оғлу Сәкәнја Үзејирә деди: «Биз Аллаһымыза хәјанәт етмишик, әтрафымыздакы халглардан јаделли арвадлар алмышыг.+ Амма һәлә дә Исраилин үмиди вар. 3 Гој Јеһова илә әһд бағлајыб+ Аллаһымызын ҝөстәришинә вә Онун әмрләринә еһтирам бәсләјәнләрин ҝөстәришинә әсасән, бүтүн јаделли арвадларымызы, онлардан доғулан ушагларымызы јола салаг,+ Гануна риајәт едәк. 4 Галх! Бу ишә ҝөрә сән мәсулијјәт дашыјырсан. Биз дә сәнинләјик, үрәкли ол, ишә башла!»

5 Онда Үзејир ајаға галхды. О, каһинләрин, лавилиләрин рәһбәрләрини вә бүтүн Исраили бу сөзә әмәл едәҹәкләринә анд ичдирди.+ Һамысы анд ичди. 6 Үзејир дуруб Аллаһын евинин гаршысындан Әлјасиб оғлу Јәһукәнанын отағына* ҝетди. Лакин орада нә чөрәк једи, нә су ичди, чүнки әсирликдән гајыданларын хәјанәтинә ҝөрә јас ичиндә иди.+

7 Сонра Јәһудада вә Јерусәлимдә елан едилди ки, бүтүн әсирликдән гајыданлар Јерусәлимә топлашсынлар. 8 Башчыларын вә ағсаггалларын гәрарына әсасән, ким үч ҝүн әрзиндә ҝәлмәсә, онун мал-мүлкү мүсадирә едиләҹәк, өзү исә әсирликдән гајыдан халгын арасындан говулаҹаг.+ 9 Беләҹә, бүтүн Јәһуда вә Бинјамин гәбиләсинин кишиләри үч ҝүн әрзиндә Јерусәлимә топлашдылар. Доггузунҹу ајын ијирминҹи ҝүнү иди. Бүтүн халг Аллаһын евинин һәјәтиндә отурмушду. Онлар һәм бу мәсәләјә ҝөрә, һәм дә ҝөјдән јаған лејсана ҝөрә титрәјирдиләр.

10 Каһин Үзејир ајаға галхды вә онлара деди: «Сиз хәјанәт етмисиниз. Јаделли арвадлар алыб+ Исраилин ҝүнаһларыны артырмысыныз. 11 Инди ата-бабаларынызын Аллаһы Јеһованын өнүндә ҝүнаһынызы етираф един, Онун истәдији кими һәрәкәт един. Әтраф халглардан, јаделли арвадлардан ајрылын».+ 12 Ҹамаат уҹа сәслә деди: «Сәнин сөзүнә әмәл етмәк бизим борҹумуздур. 13 Амма адам чохдур, һәм дә јағыш мөвсүмүдүр, бајырда дајанмаг мүмкүн дејил. Итаәтсизлијимиз о гәдәр бөјүкдүр ки, бу иши бир-ики ҝүнә һәлл едиб гуртара билмәрик. 14 Буна ҝөрә гој башчыларымыз бүтүн халгы тәмсил етсин.+ Вахт тәјин едилсин вә шәһәрләримиздә јаделли арвад алмыш һәр адам өз шәһәринин ағсаггаллары вә һакимләри илә ҝәлсин. Онда бу иш там һәлл олунар вә биз Аллаһымызын бизә гаршы галхмыш гәзәбини јатырарыг».

15 Амма Асаил оғлу Јонатан вә Тигва оғлу Јәһзијјә буна гаршы чыхды, лавили Мәшулламла Шәбтај+ да онлара дәстәк олду. 16 Әсирликдән гајытмыш ҹамаат бу сөзә әмәл етди. Онунҹу ајын биринҹи ҝүнүндә каһин Үзејир вә адбаад сечилмиш бүтүн нәсил башчылары бу иши арашдырмаг үчүн тәкликдә ҝөрүшдүләр. 17 Онлар биринҹи ајын биринҹи ҝүнүнә гәдәр јаделли арвад алмыш бүтүн кишиләрин ишинә бахыб гуртардылар. 18 Мәлум олду ки, каһин оғулларындан да бәзиләри јаделли арвад алмышлар.+ Бунлар Јәһусадиг оғлу Јешунун+ оғулларындан вә гардашларындан Мәсејјә, Әлјәзәр, Јариб вә Гәдали иди. 19 Онлар сөз вердиләр ки, арвадларыны јола салаҹаглар вә тәгсирли олдуглары үчүн бу ҝүнаһа ҝөрә сүрүдән бир гоч тәгдим едәҹәкләр.+

20 Јаделли арвад аланлар бунлар иди: Иммир өвладларындан+ Һәнани вә Зәбәдја; 21 Һарим өвладларындан+ Мәсејјә, Илјас, Шәмај, Јәһјил вә Үзијјә; 22 Фәшһур өвладларындан+ Илјәнај, Мәсејјә, Исмајыл, Нәснаил, Јузабад вә Илјасаһ; 23 лавилиләрдән Јузабад, Шимај, Гәлјаһ (Галит), Фәтһи, Јәһуда вә Әлјәзәр; 24 мәзмур охујанлардан Әлјасиб; дарваза кешикчиләриндән Сәллум, Тәләм вә Ур.

25 Исраиллиләрдән, Фаруш өвладларындан+ Рамјај, Иззија, Мәлкијјә, Мијәмин, Әлјазар, Мәлкијјә вә Бәнаји; 26 Елам өвладларындан+ Мәтәнјаһ, Зәкәријјә, Јәһјил+, Әбдә, Әрәмут вә Илјас; 27 Зәтту өвладларындан+ Илјәнај, Әлјасиб, Мәтәнјаһ, Әрәмут, Зәбад вә Әзза; 28 Бәбај өвладларындан+ Јәһукәнан, Һәнанијјә, Зәббај вә Атлај; 29 Бәнни өвладларындан Мәшуллам, Мәллух, Адај, Јәшуб, Шиал вә Әрәмут; 30 Фәһат-Муаб өвладларындан+ Адна, Кәлал, Бәнаји, Мәсејјә, Мәтәнјаһ, Бәсалил, Бәнја вә Мәнәссә; 31 Һарим өвладларындан+ Әлјәзәр, Ишјаһ, Мәлкијјә+, Шәмај, Шәмун, 32 Бинјамин, Мәллух вә Шимрај; 33 Һәшум өвладларындан+ Мәттәнај, Маттата, Зәбад, Әлфәлит, Әрәми, Мәнәссә вә Шимај; 34 Бәнни өвладларындан Мааддај, Имран, Үјил, 35 Бәнаји, Бәдјаһ, Кәлуһи, 36 Бәнјаһ, Мәримут, Әлјасиб, 37 Мәтәнјаһ, Мәттәнај вә Јәсај; 38 Бәнја өвладларындан Шимај, 39 Шәләмја, Натан, Адај, 40 Мәһнәдбај, Шашај, Шарај, 41 Әзарил, Шәләмја, Шимрај, 42 Сәллум, Әмаријјә вә Јусиф; 43 Нәба өвладларындан Јаәл, Мәттәсјаһ, Зәбад, Зәбин, Јаддај, Јуил вә Бәнаји. 44 Бунларын һамысы јаделли арвад алмышды.+ Онлар арвадларыны оғуллары илә бирҝә јола салдылар.+