ҺӘГГАЈ

1 Шаһ Даранын һакимијјәтинин икинҹи или, алтынҹы ајын биринҹи ҝүнүндә Јәһуда валиси Шәәлтиил оғлу Зәрубабилә+ вә баш каһин Јәһусадиг оғлу Јушәјә Һәггај*+ пејғәмбәр васитәсилә Јеһованын сөзү назил олду:

2 «Ордулар Аллаһы Јеһова белә дејир: “Бу халг дејир ки, Јеһованын евини тикмәк вахты һәлә јетишмәјиб”».+

3 Сонра Јеһова Һәггај+ пејғәмбәр васитәсилә деди: 4 «Рәвадыр ки, Мәним евим хараба галдығы һалда, сиз јарашыглы евләрдә јашајасыныз?+ 5 Инди ордулар Аллаһы Јеһова белә дејир: “Тутдуғунуз јоллар барәдә ҹидди дүшүнүн. 6 Чох әкирсиниз, аз ҝөтүрүрсүнүз;+ јејирсиниз, дојмурсунуз; ичирсиниз, мәст олмурсунуз. Ҝејинирсиниз, бириниз дә исинмирсиниз; муздур зәһмәт һаггыны јыртыг кисәјә гојур”».

7 «Ордулар Аллаһы Јеһова дејир: “Тутдуғунуз јоллар барәдә ҹидди дүшүнүн”.

8 Јеһова дејир: “Даға галхыб ағаҹ ҝәтирин,+ евими тикин ки,+ Мән мәмнун олум вә уҹалым”».+

9 «Ордулар Аллаһы Јеһова бәјан едир: “Чох шеј умурдунуз, аз алдыныз, евә ҝәтирдиниз, Мән үфүрүб дағытдым.+ Билирсиниз нә үчүн? Чүнки евим хараба галыб, сиз исә өз евиниз үчүн әлләшиб-вурушурсунуз.+ 10 Буна ҝөрә дә ҝөјләр шеһини, торпаг мәһсулуну сиздән кәсиб. 11 Мән јерин вә дағларын үзәринә, тахылын вә тәзә шәрабын үзәринә, јағын үзәринә, торпағын мәһсулу үзәринә, инсанын вә мал-гаранын үзәринә вә әлләринизин бүтүн зәһмәти үзәринә гураглыг ҝөндәрирдим”».

12 Беләҹә, Шәәлтиил оғлу Зәрубабил,+ баш каһин Јәһусадиг+ оғлу Јушә вә халгын сағ галанлары Јеһова Аллаһын сөзүнә вә Аллаһлары Јеһованын ҝөндәрдији Һәггај пејғәмбәрин дедикләринә гулаг асды. Халгын үрәјиндә Јеһоваја гаршы горху јаранды.

13 Јеһованын елчиси Һәггај Јеһованын тапшырығы илә халга мүраҹиәт етди: «Јеһова бәјан едир: “Мән сизинләјәм”».+

14 Јеһова Јәһуда валиси+ Шәәлтиил оғлу Зәрубабилин, баш каһин Јәһусадиг оғлу Јушәнин+ вә халгын сағ галанларынын үрәјиндә һәвәс ојатды+ вә онлар өзләринин Аллаһы, ордулар Аллаһы Јеһованын евиндә ишә башладылар.+ 15 О вахт шаһ Даранын һакимијјәтинин икинҹи или, алтынҹы ајын ијирми дөрдүнҹү ҝүнү иди.+

2 Једдинҹи ајын ијирми биринҹи ҝүнү Һәггај+ пејғәмбәр васитәсилә Јеһованын сөзү назил олду: 2 «Јәһуда валиси+ Шәәлтиил оғлу Зәрубабилә,+ баш каһин Јәһусадиг+ оғлу Јушәјә+ вә халгын сағ галанларына белә сөјлә: 3 “Аранызда бу евин әввәлки әзәмәтини ҝөрәнләрдән ким галыб?+ Бәс евин индики һалына нә дејирсиниз? Сизә елә ҝәлмир ки, әввәлки илә мүгајисәдә бу ев һеч нәдир?”+

4 Јеһова бәјан едир: “Еј Зәрубабил, мәрд ол! Еј баш каһин Јәһусадиг оғлу Јушә, мәрд ол!”

Јеһова бәјан едир: “Еј мәмләкәт әһли, мәрд олун+ вә ишләјин!”

Ордулар Аллаһы Јеһова бәјан едир: “Мән сизинләјәм!+ 5 Мисирдән чыхан заман сизә вердијим вәди хатырлајын,+ руһум араныздадыр*.+ Горхмајын!”»+

6 «Ордулар Аллаһы Јеһова дејир: “Аз галыб, јери вә ҝөјү, дәнизи вә гуруну бир дә силкәләјәҹәјәм”.+

7 “Бүтүн халглары силкәләјәҹәјәм. Халгларын ләл-ҹәваһири ҝәләҹәк+ вә Мән бу еви әзәмәтлә долдураҹағам”,+ — дејир ордулар Аллаһы Јеһова.

8 “Гызыл да, ҝүмүш дә Мәнимдир”, — бәјан едир ордулар Аллаһы Јеһова.

9 “Бу евин ҝәләҹәк әзәмәти әввәлкиндән бөјүк олаҹаг”,+ — дејир ордулар Аллаһы Јеһова.

“Бу јерә әмин-аманлыг верәҹәјәм”,+ — бәјан едир ордулар Аллаһы Јеһова».

10 Даранын һакимијјәтинин икинҹи или, доггузунҹу ајын ијирми дөрдүнҹү ҝүнүндә Һәггај+ пејғәмбәрә Јеһованын сөзү назил олду: 11 «Ордулар Аллаһы Јеһова дејир ки, каһинләрдән ганун барәдә соруш:+ 12 “Бир адам палтарынын әтәјиндә мүгәддәс әт дашыјаркән палтары чөрәјә, шорбаја, шәраба, јаға, јахуд башга һансыса әрзаға дәјәрсә, бунлар мүгәддәс олар?”»

Каһинләр: «Јох!» — дејә ҹаваб вердиләр.

13 Һәггај сөзүнә давам етди: «Бәс ҹәсәдә дәјиб мурдарланан адам бу шејләрдән биринә тохунарса, һәмин шеј мурдар олар?»+

Каһинләр буна: «Бәли, мурдар олар!» — дејә ҹаваб вердиләр.

14 Онда Һәггај деди: «Јеһова бәјан едир: “Бу халг, бу үммәт ҝөзүмдә бу ҹүрдүр. Бүтүн ишләри вә тәгдим етдикләри һәр шеј беләдир, мурдардыр!”

15 “Бу ҝүндән етибарән ҹидди дүшүнүн: Јеһованын мәбәдиндә дашы даш үстә гојмаздан әввәл+ 16 вәзијјәт неҹә иди? О вахтлар ким тахыл тајасынын јанына ијирми өлчү тахыл үчүн ҝәлирдисә, он өлчү чыхырды; ким әлли өлчү шәраб чәкмәк үчүн шәраб чәнинә јахынлашырдыса, ијирми өлчү чыхырды.+ 17 Мән сизи, бүтүн ишләринизи сәмум јели, киф+ вә долу илә вурдум. Јенә дә һеч бириниз Мәнә тәрәф дөнмәдиниз”, — бәјан едир Јеһова.

18 “Бу ҝүн доггузунҹу ајын ијирми дөрдүнҹү ҝүнү, Јеһованын мәбәдинин тәмәлинин гојулдуғу ҝүндүр.+ Бу ҝүндән етибарән, ҹидди дүшүнүн. Јахшы-јахшы дүшүнүн: 19 тахыл анбарында дән галыб?+ Үзүм, әнҹир, нар вә зејтун ағаҹларында бәһрә вар? Бу ҝүндән етибарән Мән сизә бәрәкәт верәҹәјәм!”»+

20 Ајын ијирми дөрдүнҹү ҝүнүндә Јеһованын сөзү Һәггаја икинҹи дәфә назил олду:+ 21 «Јәһуда валиси Зәрубабилә де: “Мән јери-ҝөјү силкәләјәҹәјәм.+ 22 Падшаһларын тахтыны девирәҹәјәм, халгларын сәлтәнәтләринин гүдрәтини јох едәҹәјәм.+ Ҹәнҝ арабасыны вә ону сүрәнләри јыхаҹағам, атлар јыхылаҹаг, сүвариләрин һәр бирини өз гардашынын гылынҹы јерә сәрәҹәк”».+

23 Ордулар Аллаһы Јеһова бәјан едир: «“Еј Шәәлтиил оғлу Зәрубабил+, еј Мәним гулум! О ҝүн сәни ҝөтүрүб мөһүр үзүјү едәҹәјәм, — Јеһова бәјан едир, — чүнки Мән сәни сечмишәм”, — ордулар Аллаһы Јеһова бәјан едир».