ЗӘКӘРИЈЈӘ
1 Даранын һакимијјәтинин икинҹи илинин сәккизинҹи ајында+ Идду оғлу Бәрхијанын оғлу Зәкәријјә* пејғәмбәрә+ Јеһованын сөзү назил олду: 2 «Јеһова аталарыныза бәрк гәзәбләнмишди.+
3 Онлара сөјлә ки, ордулар Аллаһы Јеһованын сөзү будур: “Мәнә тәрәф дөнүн, — бәјан едир ордулар Аллаһы Јеһова, — Мән дә сизә тәрәф дөнәрәм,+ — дејир ордулар Аллаһы Јеһова”.
4 Аталарыныз кими олмајын! Әввәлки пејғәмбәрләр: “Ордулар Аллаһы Јеһованын сөзү будур: “Пис јолларыныздан, шәр әмәлләриниздән әл чәкин, Мәнә тәрәф дөнүн”, — дејәрәк онлары сәсләјирдиләр”.+
“Амма онлар Мәни ешитмәдиләр, Мәнә етина етмәдиләр”,+ — бәјан едир ордулар Аллаһы Јеһова.
5 Һаны аталарыныз? Һаны пејғәмбәрләриниз? Онлар әбәди галдылар? 6 Мәҝәр гулум пејғәмбәрләрә бујурдуғум сөзләр вә һөкмләр аталарынызын дөврүндә иҹра олмады?+ Онлар етираф едиб демишдиләр: “Ордулар Аллаһы Јеһова јолларымыза вә әмәлләримизә ҝөрә бизә нә етмәк истәдисә, ону да етди”».+
7 Даранын һакимијјәтинин икинҹи илиндә,+ он биринҹи ај олан шват* ајынын ијирми дөрдүнҹү ҝүнүндә мәнә, Идду оғлу, Бәрхија оғлу Зәкәријјә пејғәмбәрә Јеһованын сөзү назил олду. 8 Ҝеҹә вахты иди. Мән рөјада ҝөрдүм ки, дәрәдә, мәрсин ағаҹларынын арасында гырмызы атын белиндә бир адам дајаныб. Онун архасында гырмызы, кәһәр вә ағ атлар вар.
9 Мән сорушдум: «Ағам, бу атлылар кимдир?»
Мәнимлә данышан мәләк ҹаваб верди: «Онларын ким олдуғуну сәнә ҝөстәрәҹәјәм».
10 Мәрсин ағаҹларынын арасында дајанан адам белә деди: «Бунлары Јеһова дүнјаны ҝәзиб-долашмаг үчүн ҝөндәриб». 11 Онлар мәрсин ағаҹларынын арасында дајанан Јеһованын мәләјинә дедиләр: «Биз дүнјаны ҝәзиб-долашдыг вә ҝөрдүк ки, бүтүн дүнја асајиш вә әмин-аманлыг ичиндәдир».+
12 Онда Јеһованын мәләји деди: «Еј ордулар Аллаһы Јеһова, бу јетмиш ил әрзиндә+ гәзәбләндијин Јерусәлим вә Јәһуда шәһәрләриндән мәрһәмәтини нә вахтадәк әсирҝәјәҹәксән?»+
13 Јеһова мәнимлә данышан мәләјә хош, тәсәлливериҹи сөзләрлә ҹаваб верди. 14 Мәнимлә данышан мәләк мәнә деди: «Ҹар чәкиб де: “Ордулар Аллаһы Јеһова белә дејир: “Мән Јерусәлимин вә Сионун гејрәтини чәкирәм, гејрәтим сарсылмаздыр.+ 15 Архајын јашајан халглара гаршы бәрк гәзәбләнмишәм,+ чүнки Мән халгыма азҹа һирсләнмишдим,+ онлар исә халгыма диван тутдулар”.+
16 Буна ҝөрә Јеһова дејир: “Мән Јерусәлимә мәрһәмәтлә гајыдаҹағам.+ Мәним евим орада тикиләҹәк,+ — бәјан едир ордулар Аллаһы Јеһова, — бүтүн Јерусәлим боју өлчү ипи чәкиләҹәк”.+
17 Һәмчинин ҹар чәкиб де: “Ордулар Аллаһы Јеһова дејир: “Шәһәрләримин немәти јенә ашыб-дашаҹаг, Јеһова јенә Сионун+ һалына аҹыјаҹаг вә јенә Јерусәлими сечәҹәк”».+
18 Сонра башымы галдырыб бахдым вә дөрд бујнуз ҝөрдүм.+ 19 Мәнимлә данышан мәләкдән сорушдум: «Бунлар нәдир?» О, мәнә ҹаваб верди: «Бунлар Јәһуданы,+ Исраили+ вә Јерусәлими+ дидәрҝин салмыш бујнузлардыр».
20 Сонра Јеһова мәнә дөрд уста ҝөстәрди. 21 Мән сорушдум: «Онлар нә етмәк истәјирләр?»
О деди: «Бујнузлар Јәһуданы елә сәпәләдиләр ки, һеч ким башыны галдыра билмәди. Бу усталар исә ҝәлиб ки, Јәһуда дијарына бујнуз галдырыб сәпәләјән халглары дәһшәтә салсын вә бујнузларыны гырыб атсын».
2 Мән башымы галдырыб бахдым вә бир адам ҝөрдүм. Онун әлиндә өлчү ипи+ вар иди. 2 Мән сорушдум: «Һара ҝедирсән?»
О ҹаваб верди: «Јерусәлими өлчмәјә ҝедирәм, бахым ҝөрүм онун ени, узуну нә гәдәрдир».+
3 Мәнимлә данышан мәләк мәндән ајрыланда башга мәләк ону гаршыламаға чыхды. 4 О, она деди: «Гач, о ҹавана де: “Јерусәлимдә о гәдәр инсан вә һејван олаҹаг ки,+ шәһәр диварсыз кәндләр кими мәскунлашаҹаг.+ 5 Мән онун әтрафында одлу дивар олаҹағам,+ онун ичини әзәмәтимлә долдураҹағам”», — бәјан едир Јеһова.+
6 «Һајды, һајды! Шимал өлкәсиндән гачын!»+ — бәјан едир Јеһова.
«Чүнки сизи дүнјанын дөрд сәмтинә* сәпәләдим»,+ — бәјан едир Јеһова.
7 «Һајды, Сион! Еј Бабил гызы илә бирликдә јашајан, гач ҹаныны гуртар!+ 8 Ордулар Аллаһы Јеһова, шаны уҹаландан сонра, мәни сизи талан едән халгларын јанына ҝөндәриб деди:+ “Сизә тохунан Мәним ҝөз бәбәјимә тохунур.+ 9 Әлими онлара гаршы галдыраҹағам, өз гуллары онлары гарәт едәҹәк”.+ Онда биләҹәксиниз ки, мәни ордулар Аллаһы Јеһова ҝөндәриб.
10 Еј Сион гызы, севин, шадлан!+ Бах, ҝәлирәм,+ аранызда мәскән салаҹағам,+ — бәјан едир Јеһова. — 11 Һәмин ҝүн чохлу халглар Јеһованын әтәјиндән јапышаҹаг+ вә Мәним үммәтим олаҹаг. Мән сизин аранызда мәскән салаҹағам». Онда биләҹәксиниз ки, мәни сизин јаныныза ордулар Аллаһы Јеһова ҝөндәриб. 12 Јеһова мүгәддәс торпагда Јәһуданы Өз пајы кими мүлк едәҹәк вә јенә Јерусәлими сечәҹәк.+ 13 Еј бәшәр, Јеһованын өнүндә сүкут ет! Чүнки О, мүгәддәс мәскәниндән һәрәкәтә кечиб!
3 Јеһова мәнә Өз мәләјинин өнүндә дуран баш каһин Јушәни+ вә она мүгавимәт ҝөстәрмәк үчүн онун сағында дуран Шејтаны+ ҝөстәрди. 2 Јеһованын мәләји Шејтана деди: «Јеһова сәнин ҹәзаны версин, еј Шејтан,+ гој Јерусәлими сечмиш+ Јеһова сәни мәһкум етсин! Мәҝәр бу адам аловун ичиндән чыхарылмыш јанар одун парчасы дејил?»
3 Јушә кирли палтарда мәләјин һүзурунда дурмушду. 4 Мәләк өнүндә дајананлара деди: «Кирли палтары онун әјниндән чыхарын». Сонра она деди: «Бах, Мән тәгсирини үзәриндән ҝөтүрдүм, сәнә ҝөзәл либас ҝејиндириләҹәк».+
5 Онда мән дедим: «Гој онун башына тәмиз әммамә гојсунлар».+ Онун башына тәмиз әммамә гојдулар вә әјнинә либас ҝејиндирдиләр. Јеһованын мәләји дә орада дајанмышды. 6 Јеһованын мәләји Јушәјә бәјан етди: 7 «Ордулар Аллаһы Јеһова белә дејир: “Әҝәр сән јолларымла јерисән, сәнә һәвалә етдијим мәсулијјәти иҹра етсән, евимдә һакимлик едәҹәксән,+ һәјәтләрими горујаҹагсан вә Мән сәнә бурада дуранларла бәрабәр һүзурума ҝәлмәјә изин верәҹәјәм”.
8 “Еј баш каһин Јушә, сән вә сәнин өнүндә отуран, рәмзи мәна дашыјан јолдашларын, гулаг асын: Мән гулум+ Пөһрәни+ ҝәтирирәм! 9 Јушәнин гаршысына гојдуғум даш будур! Бу дашын үстүндә једди ҝөз вар. Мән онун үзәринә јазы һәкк едирәм, — бәјан едир ордулар Аллаһы Јеһова, — о торпағын тәгсирини бир ҝүндә силәҹәјәм”.+
10 “О ҝүн һәр бириниз сојдашыны өз мејнәсинин, өз әнҹир ағаҹынын алтында отурмаға чағыраҹаг”, — бәјан едир ордулар Аллаһы Јеһова».+
4 Мәнимлә данышан мәләк ҝери гајыдыб мәни ојатды, санки, јатмыш адамы ојадырды. 2 Сонра мәндән сорушду: «Нә ҝөрүрсән?»
Мән дедим: «Бүсбүтүн гызылдан олан чырагдан ҝөрүрәм.+ Онун јухарысында бир каса вар, үстүндә исә једди чыраг.+ Бу једди чырағын једди лүләси вар. 3 Чырагданын јанында ики зејтун ағаҹы+ дуруб; бири касанын сағында, бири солунда».
4 Сонра мәнимлә данышан мәләкдән сорушдум: «Ағам, бунлар нә демәкдир?» 5 О деди: «Мәҝәр бунларын мәнасыны билмирсән?»
Мән дедим: «Хејр, ағам».
6 Онда мәләк мәнә деди: «Јеһованын Зәрубабилә сөзү будур: “Һәрб ҝүҹү илә јох, ҝүҹ-гүввә илә јох,+ Мәним руһумла”,+ — дејир ордулар Аллаһы Јеһова. 7 Сән кимсән, еј уҹа дағ?! Зәрубабилин+ өнүндә дүзәнҝаһа чевриләҹәксән.+ О, “Нә ҝөзәлдир! Нә гәшәнҝдир!” сәдалары алтында тәпә дашыны галдырыб гојаҹаг».
8 Мәнә Јеһованын сөзү назил олду: 9 «Бу евин бүнөврәсини Зәрубабилин әлләри гојду,+ онун әлләри дә бу иши тамамлајаҹаг.+ Онда биләҹәксиниз ки, мәни сизин јаныныза ордулар Аллаһы Јеһова ҝөндәриб. 10 Кичик ишләрлә башланмыш ҝүнләрә ким һәгарәт едирди?+ Зәрубабилин әлиндә шагулу ҝөрәнләр севинәҹәк. Һәмин једди ҝөз Јеһованын ҝөзләридир. Онлар бүтүн дүнјаны сејр едир».+
11 Мән ондан сорушдум: «Чырагданын сағында вә солунда олан о ики зејтун ағаҹы нәји билдирир?»+ 12 Сонра сорушдум: «Бәс зејтун ағаҹларынын ики гызыл лүләдән гызыл маје ахыдан ики будағы нәји билдирир?»
13 Онда о, мәнә деди: «Мәҝәр бунларын мәнасыны билмирсән?»
Мән дедим: «Хејр, ағам».
14 О, мәнә деди: «Бунлар Худавәнди-аләмин јанында дуран ики мәсһ олунмушу билдирир».+
5 Јенә башымы галдырыб бахдым вә бир учан тумар ҝөрдүм. 2 Мәләк мәндән сорушду: «Нә ҝөрүрсән?»
Мән дедим: «Учан тумар ҝөрүрәм. Онун узунлуғу ијирми гулаҹ*, ени он гулаҹдыр».
3 Онда о, мәнә деди: «Бу, бүтүн дүнја үзәринә ҝәлән ләнәтдир. Чүнки тумарын бу үзүндә јазылдығы кими, оғурлуг едән кәс+ ҹәзасыз галыб. Тумарын о бири үзүндә јазылдығы кими, јаландан анд ичән кәс+ дә ҹәзасыз галыб. 4 Ордулар Аллаһы Јеһова бәјан едир: “Ону Мән ҝөндәрмишәм; о, оғрунун да, јаландан адымла анд ичәнин дә евинә ҝирәҹәк вә орада галаҹаг. Һәмин еви, онун тирләрини вә дашларыны дағыдаҹаг”».
5 Мәнимлә данышан мәләк јахынлашыб мәнә деди: «Башыны галдырыб бах, ҝөр јахынлашан нәдир».
6 Мән сорушдум: «Бу нәдир?»
О деди: «Бу ҝәлән өлчү габыдыр*». Сонра әлавә етди: «Бу, бүтүн дүнјадакы писләрин ҝөркәмидир». 7 Өлчү габынын дәјирми гурғушун гапағы галдырыланда ҝөрдүм ки, онун ичиндә бир гадын отуруб. 8 Мәләк деди: «Бу Шәрдир». Сонра о, гадыны габын ичинә итәләјиб ағзыны гурғушун гапагла бағлады.
9 Јенә башымы галдыранда ҝөрдүм ки, ики гадын јахынлашыр. Онлар күләјин ахыны илә сүзүрдүләр. Ганадлары лејләк ганадына охшајырды. Онлар өлчү габыны јерлә ҝөј арасына галдырдылар. 10 Мәнимлә данышан мәләкдән сорушдум: «Онлар өлчү габыны һара апарырлар?»
11 О деди: «Шинар* дијарына.+ Орада гадын үчүн ев тикиләҹәк, ев һазыр оланда гадын лајиг олдуғу јерә гојулаҹаг».
6 Сонра јенә башымы галдырыб бахдым вә ики дағ арасындан чыхан дөрд ҹәнҝ арабасы ҝөрдүм. Дағлар мисдән иди. 2 Биринҹи араба гырмызы атлара, икинҹи араба гара,+ 3 үчүнҹү араба ағ, дөрдүнҹү араба исә халлы вә ала-була атлара гошулмушду.+
4 Мәнимлә данышан мәләкдән сорушдум: «Ағам, бунлар нәдир?»
5 Мәләк ҹаваб верди: «Бунлар ҝөјләрин дөрд руһудур.+ Онлар Худавәнди-аләмин һүзурунда дурмушдулар,+ инди орадан чыхыб ҝәлирләр. 6 Гара атлар шимал дијарына,+ ағ атлар дәнизин о тајына, халлы атлар ҹәнуб дијарына ҝедәҹәк. 7 Ала-була атлар јер үзүнү долашмаға ҹан атырлар». Сонра о деди: «Ҝедин, јер үзүнү долашын!» Онлар јер үзүнү долашмаға башладылар.
8 О, мәнә уҹадан деди: «Бах, шимал дијарына ҝедәнләр Јеһованын ораја гаршы гәзәбини сојутдулар».
9 Мәнә јенидән Јеһованын сөзү назил олду: 10 «Әсирликдәки ҹамаатын ҝөндәрдији бәхшишләри Һәлдајын, Тубјаһын вә Јадајын әлиндән ҝөтүр. Бабилдән ҝәлән бу адамларла бирҝә, елә һәмин ҝүн, Сәфәнја оғлу Јушијјәнин евинә ҝет. 11 Гызыл вә ҝүмүшдән таҹ дүзәлт, ону баш каһин Јәһусадиг оғлу Јушәнин башына гој.+ 12 Она сөјлә:
“Ордулар Аллаһы Јеһова дејир: “Бах, Пөһрә+ адлы адам будур! О, олдуғу јердә бој атаҹаг вә Јеһованын мәбәдини тикәҹәк.+ 13 Јеһованын мәбәдини о тикәҹәк. О, әзәмәт саһиби олаҹаг, өз тахтында отуруб һөкмранлыг едәҹәк+ вә бу тахтда каһинлик едәҹәк. Бу ики вәзифә бир-бири илә һәмаһәнҝ олаҹаг. 14 Таҹ Һәләмин, Тубјаһын, Јадајын,+ Сәфәнја оғлу Һәнин хатирәси кими Јеһованын мәбәдиндә галаҹаг. 15 Узагда оланлар ҝәлиб Јеһованын мәбәдинин тикинтисиндә ишләјәҹәк”. Онда биләҹәксиниз ки, мәни сизин јаныныза ордулар Аллаһы Јеһова ҝөндәриб. Әҝәр Аллаһыныз Јеһоваја гулаг ассаныз, белә дә олаҹаг».
7 Шаһ Даранын һакимијјәтинин дөрдүнҹү илиндә, доггузунҹу ај олан кислев* ајынын дөрдүнҹү ҝүнү Зәкәријјәјә+ Јеһованын сөзү назил олду. 2 Бејтел әһли Јеһовадан лүтф диләмәк үчүн Шарасары, Риғәммәлики вә онун адамларыны ҝөндәриб 3 ордулар Аллаһы Јеһованын пејғәмбәрләриндән вә мәбәддәки каһинләрдән сорушду: «Бу илләр боју етдијимиз кими, бешинҹи ајда+ да оруҹ тутуб ағлајагмы?»
4 Онда мәнә ордулар Аллаһы Јеһованын сөзү назил олду: 5 «Бүтүн өлкә ҹамаатына вә каһинләрә де: “Јетмиш ил+ әрзиндә бешинҹи вә једдинҹи ајларда+ оруҹ тутуб ағладығыныз заман мәҝәр Мәним үчүн оруҹ тутурдунуз? 6 Бәлкә јејиб-ичдијиниз заман Мәним үчүн јејиб-ичирдиниз? 7 Мәҝәр Јерусәлимлә әтраф шәһәрләр әмин-аманлыг ичиндә јашајанда, Неҝев вә Шәфла сакинли оланда сиз Јеһованын әввәлки пејғәмбәрләр+ васитәсилә дедији сөзләрә итаәт етмәли дејилдиниз?”»
8 Зәкәријјәјә јенә Јеһованын сөзү назил олду: 9 «Ордулар Аллаһы Јеһова дејир: “Һагг-әдаләтлә мүһакимә един.+ Бир-биринизә гаршы хејирхаһ,+ мәрһәмәтли олун. 10 Дул гадыны, јетими,+ гәриби+ вә мәзлуму+ алдатмајын. Үрәјиниздә бир-биринизә гаршы пис нијјәт олмасын”.+ 11 Лакин онлар гулаг асмаг истәмәдиләр,+ инадла арха чевирдиләр,+ гулагларыны тыхадылар ки, ешитмәсинләр.+ 12 Үрәкләрини алмаз дашы* кими сәрт етдиләр ки,+ ордулар Аллаһы Јеһованын Өз руһу васитәсилә, әввәлки пејғәмбәрләрин дили илә билдирдији ганун вә сөзләрә әмәл етмәсинләр.+ Буна ҝөрә ордулар Аллаһы Јеһова бәрк гәзәбләнди».+
13 «Ордулар Аллаһы Јеһова дејир: “Неҹә ки Мән чағыранда онлар гулаг асмадылар,+ онлар да чағыранда Мән гулаг асмадым.+ 14 Онлары туфан сәпәләјән кими танымадыглары халгларын арасына сәпәләдим.+ Јурдлары виран галды, ораја ҝедиб-ҝәлән олмады.+ Онлар ҝөзәл торпағы аҹынаҹаглы һала салдылар”».
8 Мәнә јенә ордулар Аллаһы Јеһованын сөзү назил олду: 2 «Ордулар Аллаһы Јеһова дејир: “Ҹошгун гејрәтлә Сионун гејрәтини чәкәҹәјәм.+ Күкрәјән гәзәблә онун гејрәтини чәкәҹәјәм”.
3 Јеһова дејир: “Сиона гајыдаҹағам,+ Јерусәлимдә мәскән салаҹағам.+ Јерусәлимә һәгигәт* шәһәри,+ ордулар Аллаһы Јеһованын дағына мүгәддәс дағ дејиләҹәк”.+
4 Ордулар Аллаһы Јеһованын сөзү будур: “Јерусәлим мејданларында јенә аһыл кишиләр, гоҹа гарылар әјләшәҹәк. Јашлары чох олдуғундан һәр бири әлиндә чәлик тутаҹаг.+ 5 Шәһәр мејданлары атылыб-дүшән оғлан вә гыз ушаглары илә долаҹаг”.+
6 Ордулар Аллаһы Јеһованын сөзү будур: “Әҝәр о ҝүнләрдә халгын сағ галанларынын ҝөзүндә бу иш мүшкүл ҝөрүнәрсә, мәҝәр Мәнә дә мүшкүл ҝөрүнмәлидир?” — бәјан едир ордулар Аллаһы Јеһова.
7 Ордулар Аллаһы Јеһованын сөзү будур: “Бах, Мән Өз халгымы ҝүндоған вә ҝүнбатан торпагларындан чыхараҹағам.+ 8 Онлары Јерусәлимә ҝәтирәҹәјәм, орада јашајаҹаглар.+ Онлар Мәним халгым олаҹаг, Мән дә сәдагәтлә, әдаләтлә онларын Аллаһы олаҹағам”.+
9 Ордулар Аллаһы Јеһованын сөзү будур: “Еј ордулар Аллаһы Јеһованын евини, мәбәди тикмәк үчүн тәмәл гојулан ҝүн дејилән сөзләри бу ҝүн пејғәмбәрләрин дилиндән ешидәнләр,+ ҹәсур олун!+ 10 О ҝүнләрә гәдәр нә инсанын, нә дә һејванын зәһмәти үчүн һагг верилмирди.+ Дүшмәнләрин әлиндән һеч кәс раһат ҝедиб-ҝәлә билмирди. Чүнки инсанлары бир-биринин үстүнә галдырмышдым”.
11 Ордулар Аллаһы Јеһова бәјан едир: “Анҹаг инди халгын сағ галанлары илә әввәлки кими рәфтар етмәјәҹәјәм.+ 12 Чүнки сүлһ тохуму әкиләҹәк, тәнәк бәһрәсини, јер мәһсулуну,+ ҝөјләр исә шеһини верәҹәк. Бүтүн бунлары халгын сағ галанларына ирс верәҹәјәм.+ 13 Сизи гуртараҹағам, еј Јәһуда вә Исраил еви. Сиз халглар арасында ләнәтли олмушдунуз,+ инди исә немәт олаҹагсыныз.+ Горхмајын,+ ҹәсур олун!”+
14 Ордулар Аллаһы Јеһованын сөзү будур: “Аталарыныз Мәни гәзәбләндирдији үчүн башыныза фәлакәт ҝәтирмәји гәт етдим вә пешман олмадым, — дејир ордулар Аллаһы Јеһова.+ — 15 Бу ҝүнләрдә исә Јерусәлимә вә Јәһуда евинә+ јахшылыг етмәји гәт етмишәм. Горхмајын!”+
16 “Белә един: бир-биринизә һәгигәти сөјләјин.+ Шәһәр дарвазасында верилән һөкмләр һагг-әдаләти, сүлһү уҹалтмалыдыр.+ 17 Үрәјиниздә бир-биринизә гәсд гурмајын,+ јаландан анд ичмәјин*,+ чүнки Мән бүтүн бунлара нифрәт едирәм”,+ — бәјан едир Јеһова».
18 Мәнә јенидән ордулар Аллаһы Јеһованын сөзү назил олду: 19 «Ордулар Аллаһы Јеһованын сөзү будур: “Дөрдүнҹү,+ бешинҹи,+ једдинҹи+ вә онунҹу+ ајларын оруҹу Јәһуда еви үчүн севинҹ, шадлыг, тој-бајрам ҝүнләри олаҹаг.+ Одур ки, һагг-әдаләти вә сүлһү севин”.
20 Ордулар Аллаһы Јеһованын сөзү будур: “Һәлә чох халглар, чох шәһәрләрин сакинләри ҝәләҹәк. 21 Бир шәһәрин сакинләри ҝедиб о бири шәһәрин сакинләринә дејәҹәк: “Ҝәлин, ҝәлин ҝедәк, Јеһовадан лүтф диләјәк, ордулар Аллаһы Јеһованы ахтараг. Бах, биз ҝедирик”.+ 22 Чох халглар вә гүдрәтли үммәтләр ордулар Аллаһы Јеһованы ахтармаг вә Јеһовадан лүтф диләмәк үчүн Јерусәлимә ахышаҹаг”.+
23 Ордулар Аллаһы Јеһованын сөзү будур: “О ҝүнләрдә бүтүн халглардан олан, мүхтәлиф дилләрдә данышан он адам+ бир јәһудинин әтәјиндән* јапышыб дејәҹәк: “Биз дә сәнинлә ҝедирик,+ чүнки ешитмишик, Аллаһ сизинләдир”».+
9 Һөкм:
«Јеһованын сөзү Һәдрах дијарына гаршыдыр,
Дәмәшги нишан алыб.+
Чүнки Јеһованын ҝөзү бәшәрин+
Вә ҹәми Исраил гәбиләләринин үзәриндәдир.
2 Бу сөз онунла* һәмсәрһәд олан Һәмәсә аиддир,+
Сура+ вә Сидона+ да аиддир, чүнки онлар һәддән артыг ағыллыдырлар.+
3 Сур өзүнә истеһкам тикди,
Торпаг гәдәр ҝүмүш,
Күчәнин палчығы гәдәр гызыл топлады.+
4 Лакин Јеһова онун мал-мүлкүнү әлиндән алаҹаг,
Ордусуну дәниздә вураҹаг,+
Алов ону јандырыб күл едәҹәк.+
5 Ашкелон буну ҝөрүб горхаҹаг,
Гәззә бөјүк әзаб чәкәҹәк,
Екрон да һәмчинин, чүнки үмиди пуч олду.
Гәззәдән падшаһ јох олаҹаг,
Ашкелон бомбош галаҹаг.+
7 Онларын ағзындан ганлы әти,
Дишләри арасындан ијрәнҹ јемәкләри дартыб чыхараҹағам.
Онларын сағ галанлары Аллаһымыза мәхсус олаҹаг,
Екрон исә јәбусиләрә+ бәнзәјәҹәк.
8 Евимин әтрафында ордуҝаһ гураҹағам ки,+
Ора ҝириб-чыхан олмасын.
Артыг халгымын арасында нәзарәтчи* ҝәзмәјәҹәк,+
Чүнки инди онларын һалыны ҝөзүмлә ҝөрүрәм.
9 Еј Сион гызы, севинҹдән ҹуша ҝәл!
Еј Јерусәлим гызы, севинҹдән һајгыр!
Бах! Падшаһын јанына ҝәлир.+
10 Мән Әфраимдән ҹәнҝ арабаларыны,
Јерусәлимдән атлары јох едәҹәјәм.
Јај-каман сындырылаҹаг.
Сәнин падшаһын халглара сүлһү бәјан едәҹәк.+
Дәниздән дәнизә,
11 Еј гадын*, сәнә ҝәлинҹә, арамыздакы ган әһдинә әсасән
Мәһбусларыны сусуз гујудан чыхарыб азад едәҹәјәм.+
12 Еј үмиди олан мәһбуслар, гајыдын галаја!+
Бу ҝүн сәнә дејирәм:
“Еј гадын, сәнә икигат пај верәҹәјәм.+
13 Јәһуданы камантәк дартаҹағам,
Әфраими ох кими камана гојаҹағам.
Еј Сион, сәнин оғулларыны ојадаҹағам,
Еј Јунан дијары, онлары сәнин оғулларынын үстүнә галдыраҹағам.
Сәни, еј Сион, иҝидин гылынҹы кими едәҹәјәм”.
14 Јеһова онларла олдуғуну әјан едәҹәк.
Онун оху шимшәк кими чахаҹаг.
Күлли-Ихтијар Јеһова шејпур чалаҹаг,+
Ҹәнуб туфанлары илә һүҹума кечәҹәк.
15 Ордулар Аллаһы Јеһова онлары мүдафиә едәҹәк,
Онлар сапанд дашларыны удаҹаг вә әзәҹәкләр.+
16 Аллаһлары Јеһова о ҝүн Өз халгыны,
Өз сүрүсүнү хилас едәҹәк.+
Онлар Онун торпағында таҹ үзәриндәки даш-гаш кими пар-пар парлајаҹаглар.+
17 Онун кәрамәти неҹә бөјүкдүр!+
Онун ҹалалы неҹә әзәмәтлидир!
Оғланлар тахылдан,
Гызлар тәзә шәрабдан ҹанланаҹаглар».+
10 «Јаз јағышы мөвсүмүндә Јеһовадан јағыш диләјин.
2 Ев бүтләри* јалан данышыр,
Фалчылар јалан вәһјләр ҝөрүр,
Мәнасыз јухулар данышараг
Бош-бошуна тәсәлли вермәјә чалышырлар.
Буна ҝөрә ҹамаат гојун кими азаҹаг,
Чобанлары олмадығындан әзијјәт чәкәҹәкләр.
3 Чобанлара гаршы гәзәбим аловланды.
Залым башчылардан* һесабат тәләб едәҹәјәм.
Чүнки ордулар Аллаһы Јеһова Өз сүрүсүнә,+ Јәһуда евинә нәзәр салды,
Дөјүшдә ону Өзүнүн шаһанә аты етди.
4 Башчы* ондан чыхаҹаг,
Арха-дајаг олаҹаг һөкмдар* да ондан чыхаҹаг,
Һәрб каманы вә бүтүн нәзарәтчиләр ондан чыхаҹаг.
Бәли, һамысы ондан чыхаҹаг.
5 Онлар дөјүш вахты күчәләрин палчығыны тапдалајан ҹәнҝавәр кими олаҹаглар.
Онлар дөјүшәҹәкләр,
6 Мән Јәһуда евини ҝүҹлү едәҹәјәм,
Јусиф евини гуртараҹағам,+
Онлара рәһм едәҹәјәм,+
Онлары гајтараҹағам,
Санки, онлары һеч вахт рәдд етмәмишәм.+
Онлара һај верәҹәјәм, ахы Мән онларын Аллаһы Јеһовајам.
7 Әфраимлиләр иҝид кими олаҹаг,
Үрәкләри, шәраб ичмиш кими, ҹуша ҝәләҹәк.+
Оғуллары буну ҝөрүб шадланаҹаг,
Үрәкләринин севинҹи Јеһова олаҹаг.+
8 “Фит чалыб онлары бир јерә топлајаҹағам.
Онлары гуртараҹағам,+ онлар артаҹаглар,
Чохалдыгҹа чохалаҹаглар.
9 Онлары тохум кими халглар арасына сәпәләсәм дә,
Чох-чох узагларда Мәни хатырлајаҹаглар.
Оғуллары илә бирҝә дирчәлиб гајыдаҹаглар.
10 Онлары Мисир торпағындан гајтараҹағам,
Ашшурдан топлајаҹағам,+
Ҝилад торпағына+ вә Ливана ҝәтирәҹәјәм.
Онлара јер бәс етмәјәҹәк.+
Ашшурун гүруру јерә вурулаҹаг,
Мисирин һөкмдар әсасы әлиндән алынаҹаг.+
11 «Еј Ливан, гапыларыны ач,
Гој сидрләри алов јандырыб күл етсин.
2 Еј ардыҹ ағаҹы, фәрјад ет, чүнки сидр ағаҹы јыхылды,
Мөһтәшәм ағаҹлар мәһв олду!
Еј Башан палыдлары, фәрјад един,
Кечилмәз мешә мәһв олду!
3 Динләјин! Чобанлар фәған едир,
Онларын јашыл отлаглары бош галыб.
Динләјин! Ҝәнҹ асланлар нәрилдәјир,
Иорданбоју ҹәнҝәлликләр мәһв олуб.
4 Аллаһым Јеһова дејир: “Өлүмә ҝедән сүрүнү отар.+ 5 Сүрүнү аланлар гојун-гузуну өлдүрүр,+ амма тәгсиркар билинмир. Сатанларса+ белә дејир: “Јеһоваја шүкүр, варланаҹағам”. Чобанларын онлара јазығы ҝәлмир”.+
6 “Бу дијарын сакинләринә даһа рәһм етмәјәҹәјәм, — бәјан едир Јеһова. — Һәр кәси сојдашына вә падшаһына тәслим едәҹәјәм. Онлар бу өлкәни дармадағын едәҹәкләр, һеч бирини онларын әлиндән гуртармајаҹағам”».
7 Еј сүрүдәки мәзлумлар! Өлүмә ҝедән сүрүнү сиздән өтрү отардым.+ Ики дәјәнәк ҝөтүрдүм. Биринә «Лүтф», диҝәринә «Бирлик»+ адыны гојдум вә сүрүнү отармаға башладым. 8 Бир ајын ичиндә үч чобаны говдум, чүнки онлар мәни тәнҝә ҝәтирмишди, онларын да мәндән зәһләси ҝедирди. 9 Сонра дедим: «Даһа сизи отармајаҹағам. Өлән өлсүн, гырылан гырылсын! Сағ галанлар исә гој бир-биринин әтини јесин». 10 Мән «Лүтф»+ адлы дәјәнәјими ҝөтүрүб сындырдым. Беләҹә, халгымла бағладығым әһди поздум. 11 Әһд о ҝүн ләғв олду, мәнә бахан сүрүдәки мәзлумлар билдиләр ки, бу, Јеһованын сөзүдүр.
12 Мән онлара дедим: «Әҝәр сизә хошдурса, мәнә һаггымы верин, хош дејилсә, вермәјин». Онлар отуз ҝүмүш сајыб һаггымы вердиләр.+
13 Онда Јеһова мәнә деди: «Будур онларын Мәнә вердији јүксәк гијмәт! Ат онлары хәзинәјә!»+ Мән дә отуз ҝүмүшү ҝөтүрүб Јеһованын евиндәки хәзинәјә атдым.+
14 Сонра Јәһуда илә Исраил арасындакы гардашлыг телләрини кәсмәк үчүн+ «Бирлик»+ адлы о бири дәјәнәјими дә сындырдым.
15 Јеһова мәнә деди: «Јарытмаз чобанын әшјаларыны ҝөтүр.+ 16 Мәним изнимлә өлкәдә бир чобан пејда олаҹаг. О, тәләф оланлара мәһәл вермәјәҹәк,+ гузулары ахтармајаҹаг, јаралылары сағалтмајаҹаг,+ сағламлары бәсләмәјәҹәк. Әксинә, көк гојунларын әтини јејәҹәк,+ дырнагларыны гопараҹаг.+
17 Сүрүнү атыб ҝедән+ фәрсиз чобанымын вај һалына!+
Гылынҹ онун голундан вә сағ ҝөзүндән вураҹаг.
Онун әл-голу гурујаҹаг,
Сағ ҝөзү кор олаҹаг».
12 Һөкм:
«Јеһованын Исраиллә бағлы сөзү».
Ҝөјләри јајан,+
Јерин тәмәлини гојан,+
Инсанын ичиндәки руһу* јарадан Јеһова бәјан едир:
2 «Мән Јерусәлими бүтүн әтраф халглары кефләндирән бир пијалә едирәм. Јерусәлим дә, Јәһуда да мүһасирәјә алынаҹаг.+ 3 О ҝүн Јерусәлими бүтүн халглар үчүн ағыр бир даш едәҹәјәм, ону галдыранларын һамысы бәрк зәдәләнәҹәк.+ Дүнјанын бүтүн халглары она гаршы топланаҹаг».+ 4 Јеһова бәјан едир: «О ҝүн Мән бүтүн атлары карыхдыраҹағам, атлыларын исә ағлыны алаҹағам. Ҝөзүм Јәһуда евинин үстүндә олаҹаг, халгларын бүтүн атларыны кор едәҹәјәм. 5 Јәһуда шејхләри үрәкләриндә дејәҹәк: “Јерусәлим әһли бизә ордулар Аллаһы Јеһовадан ҝәлән ҝүҹ-гүввәт олду”.+ 6 О ҝүн Јәһуда шејхләрини ағаҹлар арасында тонгал, тәзәҹә бичилмиш тахыл дәрзләри арасында јанан мәшәл едәҹәјәм;+ онлар һәндәвәрдә, сағда вә солда олан бүтүн халглары тәләф едәҹәкләр+ вә Јерусәлим әһли јенә өз јурдунда, Јерусәлимдә јашајаҹаг.+
7 Јеһова илк әввәл Јәһуда чадырларыны хилас едәҹәк ки, Давуд евинин вә Јерусәлим әһлинин шәрәфи Јәһуданынкындан үстүн олмасын. 8 О ҝүн Јеһова Јерусәлим сакинләрини һәр тәрәфдән горујаҹаг,+ онларын ән зәифи Давуд кими, Давуд еви аллаһ кими, халгын өнүндә ҝедән Јеһованын мәләји кими олаҹаг.+ 9 О ҝүн Јерусәлимә һүҹум едән бүтүн халглары мәһв едәҹәјәм.+
10 Давуд евинин вә Јерусәлим әһлинин үзәринә лүтф вә диләк руһу төкәҹәјәм. Онлар бәдәнини дешдикләри адама бахаҹаглар+ вә јеҝанә оғлу үчүн јас тутан адам кими, онун үчүн јас тутаҹаглар, илкин оғлунун үстүндә ағы дејән адам кими, онун үчүн ағы дејәҹәкләр. 11 О ҝүн Јерусәлимдә Меҝиддо+ дүзүндәки Һәдадриммун ағлашмасы кими бөјүк ағлашма олаҹаг. 12 Бүтүн дијар, һәр аилә ајры-ајры јас тутаҹаг. Давуд еви ајры, гадынлары ајры; Натан+ еви ајры, гадынлары ајры; 13 Лави еви+ ајры, гадынлары ајры; Шимај нәсли+ ајры, гадынлары ајры вә 14 бүтүн галан аиләләр, һәр бири ајры-ајры, гадынлары да ајрыҹа јас тутаҹаг.
13 О ҝүн Давуд евини вә Јерусәлим әһлини ҝүнаһдан вә мурдарлыгдан тәмизләмәк үчүн су гујусу газылаҹаг».+
2 Ордулар Аллаһы Јеһова бәјан едир: «О ҝүн өлкәдән бүтләрин адыны силәҹәјәм,+ онлар бир дә хатырланмајаҹаг. Пејғәмбәрләри+ вә мурдарлыг руһуну да бу дијардан јох едәҹәјәм. 3 Әҝәр кимсә јенидән пејғәмбәрлик етсә, ону дүнјаја ҝәтирән ата-анасы она дејәҹәк: “Сән јашамајаҹагсан, чүнки Јеһованын ады илә јалан данышырсан”. О, пејғәмбәрлик етдији үчүн ону дүнјаја ҝәтирән ата-анасы онун бәдәнини дешәҹәк.+
4 О ҝүн пејғәмбәрләр пејғәмбәрлик вәһјләринә ҝөрә утанаҹаглар, онлар түклү палтар+ ҝејинәрәк халгы алдатмајаҹаглар. 5 Онлар дејәҹәк: “Мән пејғәмбәр дејиләм. Мән әкинчијәм, чүнки ҹаванлығымда бир адам мәни өзүнә гул алыб”. 6 Ондан сорушанда: “Бәдәниндәки* јаралар нәдир?” О: “Бунлар әзизләримин евиндә једијим көтәкләрин јеридир”, — дејәҹәк».
8 Ордулар Аллаһы Јеһова бәјан едир:
«Бүтүн дијарда ҹамаатын үчдә икиси гырылыб өләҹәк,
Амма бир һиссәси галаҹаг.
9 Һәмин бир һиссәни Мән оддан-аловдан кечирәҹәјәм.
Онлары ҝүмүшү сафлашдырантәк саф едәҹәјәм,
Гызылы јохлајантәк јохлајаҹағам.+
Онлар Мәни адымла чағыраҹаг,
Мән онлара һај верәҹәјәм.
Дејәҹәјәм: “Бу, Мәним халгымдыр”,+
Онлар да: “Јеһова бизим Аллаһымыздыр”, — дејәҹәк».
14 «Будур, о ҝүн ҝәлир, Јеһованын ҝүнү ҝәлир! Гарәт олунмуш малларын сәнин* ичиндәҹә бөлүшдүрүләҹәк. 2 Мән бүтүн халглары Јерусәлимә гаршы мүһарибәјә топлајаҹағам. Шәһәр ишғал едиләҹәк, евләр гарәт олунаҹаг, гадынлар зорланаҹаг. Шәһәрин јарысы сүрҝүн едиләҹәк, амма галан халгын көкү шәһәрдән кәсилмәјәҹәк.
3 Јеһова чыхаҹаг вә дөјүш ҝүнүндә олдуғу кими бу халгларла+ вурушаҹаг.+ 4 О ҝүн Онун ајаглары шәрг тәрәфдән Јерусәлимин өнүндә олан Зејтун дағы+ үзәриндә дураҹаг. Зејтун дағы шәргдән гәрбәдәк ортадан бөлүнәҹәк вә бөјүк бир дәрә әмәлә ҝәтирәҹәк. Дағын јарысы шимала, јарысы исә ҹәнуба чәкиләҹәк. 5 Сиз дағларымын арасындакы дәрәјә гачаҹагсыныз, чүнки бу дәрә Азилә гәдәр узанаҹаг. Јәһуда падшаһы Үзијјәнин вахтында зәлзәләдән гачдығыныз кими гачмалы олаҹагсыныз.+ Аллаһым Јеһова ҝәләҹәк, бүтүн мүгәддәсләр дә јанында.+
6 О ҝүн парлаг ишыг олмајаҹаг,+ һәр шеј донуб галаҹаг. 7 О ҝүн әламәтдар бир ҝүн олаҹаг, Јеһованын ҝүнү кими танынаҹаг.+ О ҝүн нә ҝүндүз, нә дә ҝеҹә олаҹаг, ахшам дүшәндә дә ишыг олаҹаг. 8 О ҝүн Јерусәлимдән дирилик сулары+ ахаҹаг,+ јарысы шәрг дәнизинә*,+ јарысы гәрб дәнизинә* төкүләҹәк.+ Јај-гыш белә олаҹаг. 9 Јеһова бүтүн дүнја үзәриндә падшаһ олаҹаг.+ О ҝүн тәк Јеһова олаҹаг+ вә тәк Онун ады олаҹаг.+
10 Ҝибадан+ Јерусәлимин ҹәнубундакы Риммуна+ гәдәр һәр јер Әрәбә+ кими олаҹаг. Јерусәлим тикиләҹәк, сакинләри Бинјамин дарвазасындан+ та Биринҹи дарвазаја вә Күнҹ дарвазаја гәдәр, Һәнанил гүлләсиндән+ та падшаһын үзүмсыханына гәдәр өз јурдунда мәскунлашаҹаг.+ 11 Ҹамаат Јерусәлимдә мәскунлашыб асајиш ичиндә јашајаҹаг,+ бу шәһәр бир дә ләнәтләниб мәһвә дүчар олмајаҹаг.+
12 Јеһова Јерусәлимлә вурушан бүтүн халглары бах бу бәла илә ҹәзаландыраҹаг:+ бәдәнләри елә ајаг үстәҹә чүрүјәҹәк, ҝөзләри јувасында, дилләри ағызларында чүрүјәҹәк.
13 О ҝүн Јеһова онларын арасына бөјүк чахнашма салаҹаг, һәр бири јолдашынын әлини тутуб она әл галдыраҹаг.+ 14 Јәһуда да Јерусәлимдәки дөјүшә гатылаҹаг, бүтүн әтраф халгларын сәрвәти, сајсыз-һесабсыз гызыл-ҝүмүш, пал-палтар топланаҹаг.+
15 Атлары, гатырлары, дәвәләри, ешшәкләри вә дүшмән ордуҝаһындакы бүтүн мал-гараны ејни бәла јахалајаҹаг.
16 Јерусәлимин үстүнә галхан бүтүн халглардан сағ галан һәр кәс Падшаһа, ордулар Аллаһы Јеһоваја+ сәҹдә етмәк вә Чардаглар бајрамыны+ гејд етмәк үчүн һәр ил Јерусәлимә галхаҹаг.+ 17 Әҝәр јер үзүндәки тајфаларын ичиндә кимсә Падшаһа, ордулар Аллаһы Јеһоваја сәҹдә етмәк үчүн ҝәлмәсә, онун үзәринә јағыш јағмајаҹаг.+ 18 Әҝәр Мисир халгы шәһәрә галхыб ора ҝирмәсә, онун да үзәринә јағыш јағмајаҹаг. Јеһова онлара Чардаглар бајрамыны кечирмәк үчүн Јерусәлимә ҝәлмәјән халглара вердији ҹәзаны верәҹәк. 19 Мисирин вә Чардаглар бајрамыны гејд етмәјә ҝәлмәјән бүтүн халгларын ҝүнаһынын ҹәзасы бу олаҹаг.
20 О ҝүн атларын зынгыровлары үзәриндә: “Мүгәддәслик Јеһоваја мәхсусдур!”+ — јазылаҹаг. Јеһованын евиндәки газанлар+ гурбанҝаһын өнүндәки ләјәнләр+ кими олаҹаг. 21 Јерусәлимдә вә Јәһудада олан һәр бир газан ордулар Аллаһы Јеһоваја мәхсус мүгәддәс әшја олаҹаг. Гурбан кәсмәјә ҝәләнләр бу газанларда әт биширәҹәкләр. О ҝүн ордулар Аллаһы Јеһованын евиндә бир нәфәр дә кәнани* галмајаҹаг».+
Мәнасы: Јеһова хатырлады.
Б15 әлавәсинә бах.
Һәрфән: ҝөјләрин дөрд күләјинә.
Гулаҹ 44,5 см-ә бәрабәрдир. Б14 әлавәсинә бах.
Һәрфән: ефадыр. Б14 әлавәсинә бах.
Јәни Бабилистан.
Б15 әлавәсинә бах.
Диҝәр вариант: бәрк даш.
Јахуд сәдагәт.
Һәрфән: јаландан анд ичмәји севмәјин.
Јахуд палтарындан.
Еһтимал ки, Дәмәшг вә ја Һәдрах.
Бәзи мәнбәләрә әсасән, филистимлиләр.
Гәбилә башчысы.
Јахуд зүлмкар.
Фәрат чајы.
Сион, јахуд Јерусәлим.
Лүғәтә бах.
Һәрфән: тәкәләрдән.
Һәрфән: күнҹ бүрҹү. Нүфуз саһиби вә ја башчы тимсалы.
Һәрфән: мых. Арха-дајаг олан адам вә ја һөкмдар тимсалы.
Јахуд нәфәси. Лүғәтдә «руһ» сөзүнә бах.
Һәрфән: әлләринин арасындакы. Јәни синәдәки вә ја күрәкдәки.
Јәни 2-ҹи ајәдә сөзү ҝедән шәһәрин.
Өлү дәниз.
Аралыг дәнизи.
Диҝәр вариант: таҹир.